1 Řḥukm x Miṣra. “Xzar, SIDI innya x ict n tseynut ittazzřen. Netta yudef ɣar Miṣra uca l’aṣnam ad arjijen zzat i wudem nnes u ayt n Miṣra ad ad asen ifceř wuř deg idmaren nsen. 2 Maɣar ad ssḥarrceɣ Imiṣriyyen x Imiṣriyyen, maḥend kuř ijj ad imneɣ ak-d umas, u kuř ijj ak-d wajjar nnes, tandint ak-d tendint, tagelda ak-d tgelda. 3 Buhbeř n Imiṣriyyen ad yarjef daysen u Necc ad fesxeɣ ixarriṣen nsen. Xenni ad sseqsan l’aṣnam nsen d yenni ittɛezzmen uřa d yenni issawařen ak-d imettan d igezzanen. 4 Ad ggeɣ Imiṣriyyen deg ufus n aytbab iqesḥen uca ajeǧid iwɛaren ad xasen iḥkem, ammu i iqqar Sidi, SIDI n řɛeskarat. 5 Aman di řebḥar ad aẓɣen u iɣzar ad idweř d ijdi, ad yaẓeɣ. 6 Iɣezran ad arxun i arriḥet yursuḍen u iɣezran n Miṣra ad arsen uca ad aẓɣen, aɣanim d telga ad isřawen. 7 Ddmani n tarewsa ɣar Nil, ɣar uqemmum n yeɣzar n Nil, uřa d marra tammurt ɣar iɣezran mani zarrɛen, ad aẓɣen, ad ttwakksen, war ttiřin ɛad. 8 Ibeḥriyyen n iseřman ad ceḍnen u marra inni inḍaren tasennart nsen deg yeɣzar n Nil, u inni ibezzɛen tracca x waman, ad isřawen zeg wecḍan. 9 Inni ixeddmen tiffest azdad meccḍen ad sseḍḥan, uřa d idarrazen n řkettan d acemřař.

10 Ad ttwaddzen ipilaren n temmurt, marra inni ixeddmen di ṭṭweɛ n řmunet icḍen as řeɛmar.”

11 “Wah, řḥukkam n Ṣuɛan d ibuhařiyyen, ccwar n imcawaren imiɣisen n Firɛun idweř ibbuhři. Mammec tzeɛɛmem ad teqqarem ɛad i Firɛun: ‘Necc d mmis n imiɣisen, mmis n ijeǧiden n wecḥař uya?’

12 Mani ǧan xenni imiɣisen nnek? Ejj i-ten ad ac ssargben u ad cek ssecnen min ixarreṣ SIDI n řɛeskarat ḍidd i Miṣra!

13 Řḥukkam n Ṣuɛan dewřen d ibuhařiyyen, ttwacemten řḥukkam n Nuf. Ad ssweddaren Miṣra, aqa inni d aẓru n teɣmart n tqebbař nnes.”

14 “SIDI ikebb di Miṣra buḥbeř issdewwaxen di řwest nnes. Nitni ssweddaren Miṣra di marra min igga, amecnaw ameskar iweddar di tɛuqqit nnes.

15 War ittiři ɛad i Miṣřa min ɣa yegg, min izemmar ad t igg uzeǧif niɣ akennas, taseṭṭa niɣ aɣanim.” ^■  

16 “Deg wass nni ad iřin Imiṣriyyem am temɣarin. Ad arjijen, ad nnxeřɛen zi ssibbet n wenhezzi issaggʷaden n ufus n SIDI n řɛeskarat, i zi ɣarsen i ɣa inhezz ssa d ssa.

17 Tammurt n Yahuda ad tedweř d amedya n unexřiɛ i Imiṣriyyen. Marra wenni t ittidaren, ad innexřeɛ zi ssibbet n uxarreṣ n SIDI n řɛeskarat nni xasen ixarreṣ.”

18 “Deg wass nni ad din iřint xemsa n tneddam di temmurt n Miṣra, ad din ssiwřen iwdan iřes n Kenɛan uca ad jjaǧen ɣar SIDI n řɛeskarat. Ict n zzaysent ad as qqaren ‘Ir-Heres!’, ixs ad yini: ‘Tandint n wareddeǧ’.^■  

19 Deg wass nni ad din yiři ijj n uɛalṭar di řwest n temmurt n Miṣra u ijj n umayḍu iqeddsen ɣar weymir nnes. 20 Aya ad yiři d řeɛřamet d cchadet i SIDI n řɛeskarat di temmurt n Miṣra: xmi i ɣa řaɣan i SIDI zi ssibbet n yinni ten iḥeṣṣaren, Netta ad ɣarsen issekk amsenjem d ameqqran, u wanita ad ten ifekk. 21 Ad idweř SIDI ittwassen ɣar Imiṣriyyen uca Imiṣriyyen ad ssnen SIDI deg wass nni. Nitni ad as sexxaren s tɣarṣt d tewhibt n řɣiǧet uca ad wcen lwaɛd i SIDI u ad t kemmřen. ^■   22 Ad iwwet SIDI Imiṣriyyen s tiyyita, Netta ad ten iwwet u ad ten issgenfa. Nitni ad dd-dewřen ɣar SIDI u Netta ad yejj ixef nnes ad ittwasseṣřeḥ s tẓaǧit yuǧɣen nsen u ad ten issgenfa.”

23 “Deg wass nni ad din yiři webrid ameqqran zi Miṣra ař Accur. Ayt n Accur ad dd-asen di Miṣra uca Imiṣriyyen di Accur. Ad as ɛebden Imiṣriyyen i Netta jmiɛ ak-d ayt n Accur.”

24 “Deg wass nni ad yiři Israil d wiss třata ak-d Miṣra d Accur, d lbaraka di řwest n temmurt. 25 Maɣar SIDI n řɛeskarat ad ten ibarek, ad yini: ‘Iři ad ittwabarek řgens inu Miṣra, u řxedmet n ifassen inu Accur, uřa d tasɣart inu Israil!’ ”