29
1 Aryaz, wenni, awarni řami t ɛaqben aṭṭas n twařawin, isseqsḥen yiri nnes, ad yarẓ deg ijj n umur,
xenni war din iǧi ɛad ugenfu.
2 Mařa dewřen imseggaden s ṣṣulṭa, xenni ifarreḥ řgens,
maca mařa iḥekkem uɛeffan, ad izhar řgens. ■
3 Bnadem ittexsen tiɣit, issfarraḥ baba as,
maca wenni ittmunan ak-d temɣarin n farq-ccɣeř,
ittzeǧaɛ agřa nnes. ■
4 Ajeǧid issbedda tammurt s řḥeqq,
maca aryaz nni issgeɛɛaden ḍḍariba aṭṭas n twařawin,
iheddem i-tt.
5 Aryaz nni isswaṭan amqarreb nnes,
ittbezzaɛ ict n tracca i iḍaren nnes.
6 Deg uɛeddi n ijj n weryaz aɛeffan innuffar dayes ijj n řfex,
maca amsegged ittesřiwřew u ifarreḥ.
7 Amsegged issen ddeɛwet n imarxa,
aɛeffan maca war ifehhem walu di tussna. ■
8 Imestehzayyen ssekkaran aɣewweɣ di tendint,
maca imiɣisen ssneqřaben aɣḍab.
9 Mařa amiɣis iksi-dd tanfuč i yijj n ubuhaři,
xenni netta ggur ad ixeyyeq wanit u ad iḍḥec břa qeṭṭu.
10 Iryazen umi itteɛjib idammen carrhen amezdag,
maca inni igguren nican xezzaren ɣar řeɛmar nnes.
11 Abuhaři iḍeǧeq i marra buḥbeř nnes,
maca amiɣis ittqemmeɛ i-t. ■
12 Řḥakem nni itticen taynit i řhard n ixarriqqen,
zzayes ad iřin marra imsexxaren nnes d iɛeffanen.
13 Amezřuḍ d ijj n weryaz ittwaḥsaren řebda, msagaren,
SIDI issnewwar tiṭṭawin nsen s tnayen idsen. ■
14 Ajeǧid nni itticen tasɣart i imarxa di ccreɛ,
řkursi nnes ad iqqim ibedd i řebda. ■
15 Aɛmud d uwebbex tticen tiɣit,
maca aḥenjir jjin t i yixef nnes,
yarra yemmas ad tesseḍḥa. ■
16 Mařa dewřen iɛeffanen jehden, xenni yarenni uxeṭṭu,
maca imseggaden ad ẓaren weṭṭu nsen. ■
17 Arebba mmic u netta ggur ad cek issareyyeḥ,
netta ad iwc lbarakat timiẓidin. ■
18 Mařa war din tameẓriwt, ittfuccuḥ řgens,
maca sseɛd n wenni iḥeṭṭan Ccariɛa.
19 Ijj n ismeɣ war ittejji ad t arrebban s wawařen,
maɣar waxxa netta ifehhem xak, war xak ittarri ca.
20 Ma cek ɛemmarṣ war teẓrid ijj n weryaz ittqeǧiq s wawařen nnes?
Aqa din asitem ktar i ubuhaři uřa xas. ■
21 Mařa ijjen issubeḍ ismeɣ nnes zi temẓi,
ad idweř ɣar uneggar war t ittqidi.
22 Aryaz ittarrujduden issekkara-dd amcubbec,
u bab n wesɛar ittegg aṭṭas n ixeṭṭan. ■
23 Nnfaxet n bnadem ggur ad t isswaḍeɛ,
maca amwaḍeɛ n buḥbeř ad as ittwagg ccan. ■
24 Wenni ibeṭṭan ak-d uxewwan, icarreh ixef nnes,
maɣar netta ittesřa i tjaǧit, maca war t iqqar ca. ■
25 Tiggʷudi zeg iwdan tneddeh ɣar řfex,
maca wenni ittcařan x SIDI, ad ittwasgeɛɛed di řaman.
26 Aṭṭas arezzun udem n řḥakem,
waxxa tasɣart n kuř ijj tᵉttas-dd zi SIDI. ■
27 Aryaz aɣeccac d nnɛi i imseggaden,
maca wenni igguren nican deg webrid nnes, aqa-t d nnɛi i uɛeffan.