Ayub inɛem i Arebbi
42
1 Ayub yarra-dd x SIDI, inna: 2 “Necc ssneɣ aqa Cek tzemmared i kuřci
u war issbeṭṭiř uřa d ijj n wenway nnek.
3 Cek teqqared: ‘Man wen issbarrcnen břa tussna ccwar n Arebbi?’ S uyenni ssiwřeɣ x min war fhimeɣ, x tmesřayin nni di ttbehteɣ aṭṭas, war tent ssineɣ.” ■
4 “Seř maca uca ad ssiwřeɣ, xseɣ ad Cek sseqsiɣ uca xenni Cek ad ayi xas tessargbed.
5 S umezzuɣ xak i sřiɣ waha, maca řexxu tiṭṭ inu teẓri Cek.
6 S uyenni ttɛiffiɣ ixef inu uca ndemmeɣ, qqimeɣ di tɛejjajt d yiɣɣeḍ.”
Arebbi idebbar-dd x weṣřaḥ d usgenfi
7 Awarni řami tuɣa issiwiř SIDI awařen-a ak-d Ayub, inna SIDI i Ilifaz zi Tayman: “Lɣaḍab inu yarɣa xak u x tnayen n imeddukkař nnek, maɣar kenniw war xafi tessiwřem ca nican am mammec xafi issiweř umsexxar inu Ayub.
8 Xenni řexxu, ksim kenniw sebɛa n iyenduzen d sebɛa n icarriyyen, uca uyurem ɣar umsexxar inu Ayub uca qeddmem ten d taɣarṣt n wecmaḍ i yixef nwem. Jjem amsexxar inu Ayub ad xawem iẓẓaǧ. Maɣar Necc ad ssgeɛɛdeɣ aɣembub nnes i westajeb, ḥima war tteggeɣ akidwem am tubbuheřya nwem, minzi kenniw war xafi tessiwiřem nican am mammec xafi issiwiř umsexxar inu Ayub.”
9 Xenni iffeɣ Ilifaz zi Tayman, u Bildad zi Cuḥa d Ṣufar zi Naɛmat uca ggin nitni am mammec i d asen inna SIDI. SIDI issgeɛɛed aɣembub n Ayub i ustajeb n tẓaǧit nnes.
10 SIDI ifsi iceddiyyen n Ayub, awarni řami tuɣa ittẓaǧa Ayub i imeddukkař nnes, uca yarni SIDI di marra agřa n Ayub tnayen n tseqqar.
11 Usin-dd ɣares marra aytmas d marra suyetmas d marra inni t issnen zic. Nitni ccin akides aɣrum di taddart nnes uca ssecnen as aziǧez nsen uca ɛezzan t x marra řɣar xas dd-iɣḍeř SIDI. Iwca as kuř ijjen zzaysen ict n tepyast n nnuqart uřa d ict n txadent n wureɣ.
12 Ibarek SIDI taneggarut n Ayub ktar zi tmezwarut nnes, maɣar tuɣa ɣares arebɛa-ařaf n wuǧi d setta-ařaf n iřeɣman d wařef n ifunasen n teɣnact d wařef n teɣyař.
13 Tuɣa ɣares sebɛa n iḥenjiren d třata n yessis.
14 Tamezwarut igga as Yamima, wiss tnayen qqaren as Qaṣiɛa d wiss třata qqaren as Qarn-Haffuk.
15 War ufin, di marra ddunect, tiḥramin cnant amecnaw yessis n Ayub. Babatsent iwca asent tasɣart jar aytmatsent.
16 Ayub iddar awarni i uya mya u-rebɛin n iseggʷusa. Netta iẓra iḥenjiren nnes d iḥenjiren n iḥenjiren nnes ɣares ař jjiř wiss arebɛa.
17 Ayub immut awarni řami iwsar aṭṭas u tuɣa ijjiwen ussan n tudart nnes.