1 Xenni anabi Ilicaɛ iřaɣa-dd i yijjen zeg imeḥḍaren n inabiyyen, inna as: “Byes u ksi aɣarraf-a n zzect deg ufus nnek uca tuyured ɣar Ramut di Jilɛad. ^■   2 Xmi dinni i ɣa tawḍed, arzu x Yahu, mmis n Yahucafaṭ, mmis n Nimci. Adef ɣares uca ejj i-t ad dd-ikkar zi řwest n yaytmas, ndeh i-t ɣar ijj n wexxam iṭṭurfiy mliḥ. 3 Xenni ksi aɣarraf n zzect, zeǧeɛ i-t x uzeǧif nnes uca ini: ‘Ammu i iqqar SIDI: Necc dehneɣ cek d ajeǧid x Israil.’ Xenni arzem tawwart, arweř, war ttraja ɛad ktar!” ^■  

4 Aḥudri, amsexxar ameẓyan n unabi, yuyur deg webrid ɣar Ramut di Jilɛad. 5 Umi din dd-yiweḍ, xzar, řqebṭanat n řɛeskar tuɣa qqimen din. Netta inna: “Necc ɣari ijj n wawař i cek, a řqebṭan. Yahu isseqsa: “I man wen zzayneɣ marra?” Netta inna: “I cek, a řqebṭan!” 6 Xenni ikkar Yahu, yudef ɣar taddart. U netta ifarreɣ as zzect x uzeǧif nnes, inna as: “Ammu i iqqar SIDI, AREBBI n Israil: ‘Necc dehneɣ cek d ajeǧid x řgens n SIDI, x Israil. 7 Cek ad tewted taddart n Axab, sidi nnek, u necc ad ttareɣ zeg ufus n Izabil idammen n imsexxaren inu, inabiyyen, uřa d idammen n marra imsexxaren n SIDI. 8 Marra taddart n Axab ad tᵉttwakkes u Necc ad qḍiɣ zi taddart n Axab marra wi t itteggen x řḥiḍ, am wenni ittwaṭṭfen, am wenni umi ijjin di Israil. ^■   9 Necc ad arreɣ taddart n Axab amecnaw taddart n Yarubɛam, mmis n Nabaṭ, u amecnaw taddart n Baɛca, mmis n Axiya. ^■  

10 Iṭan ad ccen Izabil deg iyyar n Yazraɛil uca war ittiři uřa d ijj wenni tt i ɣa ineḍřen.” Xenni yarzem netta tawwart uca yarweř.’ ” ^■  

11 Umi dd-iffeɣ Yahu ɣar barra ɣar imsexxaren n sidis, nnan as: “Aqa cek mliḥ? Mayemmi i ɣarek dd-yusa ubuhaři aya?” Netta yarra-dd xasen: “Kenniw tessnem maca aryaz d řharḍ nnes!”

12 Maca nitni nnan “D ixarriqen, ini aneɣ t!” xenni inna: “Ammu d wammu i kidi issiweř, inna: ‘Ammu i iqqar SIDI: Necc dehneɣ cek d ajeǧid x Israil.’ ”

13 Řexdenni qeǧqen u kuř ijj iksi arruḍ nnes uca issars i-t sadu nnes x tareddifin n ddruj uca ṣuḍen deg uyicc n icarri, nnan: “Yahu d ajeǧid!”

14 Yahu, mmis n Yahucafaṭ, mmis n Nimci, igga ijj n řɛahd ḍidd Yuram. Yuram, netta jmiɛ ak-d marra Israil, tuɣa iḥḍa x Ramut di Jilɛad arendad n wudem n Ḥazayil, ajeǧid n Aram.

15 Maca ajeǧid Yuram yareggʷeḥ-dd maḥend ad yarzu di Yazraɛil agenfu zeg iyezzimen i d as tuɣa ggin ayt n Aram, umi imneɣ ak-d Ḥazayil, ajeǧid n Aram. Yahu inna: “Mařa kenniw tᵉttafqem, xenni war ttejjim ad yarweř uřa d ijj zi tendint, ad yuyur maḥend ad issiweḍ řexbar-a ɣar Yazraɛil.” ^■  

16 Xenni inya deg ukarru nnes, indeh ɣar Yazraɛil, maɣar dinni i tuɣa Yuram. Axazya, ajeǧid n Yahuda, tuɣa ihwa-dd ḥima ad issijj x Yuram.

17 Aɛessas ibedd x ṣṣumɛet di Yazraɛil uca iẓra Yahu yusa-dd, inna: “Necc twařiɣ ijj n uhimur.” Xenni inna Yuram: “Awi-dd ijj n bu-uyis uca ssekk i-t-i-dd i umsagar akidsen, ad yini: “Ma d řehna min xef dd-tusid?”

18 Bu-uyis inya ḥima ad t iřqa, inna: “Ammu i iqqar ujeǧid: ‘Ma d řehna min xef dd-tusid?’ ” Maca Yahu yarra-dd xas: “Mani cek icqa řehna? As-dd ɣar ḍeffar inu.” Aɛessas iɛřem aya, inna: “Amsexxar yiweḍ ɣarsen, maca war dd-iɛqib ca.”

19 Issekk ujeǧid ijj n bu-uyis wiss tnayen. Umi dd-yusa wanita ɣarsen, inna: “Ammu i iqqar ujeǧid: ‘Ma d řehna min xef dd-tusid?’ ” Maca Yahu yarra-dd xas: “Mani cek icqa řehna. As-dd ɣar ḍeffar inu.” 20 Aɛessas iɛřem s manaya ɛawed: “Netta yiweḍ i-ten, maca war dd-iɛqib ca u mammec ineddeh ayis, igga am mammec ittegg Yahu, mmis n Nimci, maɣar netta ineddeh am ineddeh ubuhaři.”

21 Xenni inna Yuram: “Ḥezzem akarru!” Ḥezzmen akarru nnes u Yuram, ajeǧid n Israil, iffeɣ ak-d Axazya, ajeǧid n Yahuda, nedhen kuř ijj akarru nnes. Nitni ffɣen i umsagar ak-d Yahu uca ufin t ɣar yeyyar n Nabut, Ayazraɛili. 22 Imsar umi iẓra Yuram Yahu mani inna: “Ma d řehna i x dd-tusid, a Yahu?” Maca wanita yarra-dd: “Mana řehna aya, min ɣa yekk farq-ccɣeř n yemmac Izabil d tseḥḥarin nnes ammu s waṭṭas?” 23 Inneqřeb Yuram ḥima ad yarweř, uca inna i Axazya: “Tamenziwt, Axazya!” 24 Maca Yahu imneɛ řqews nnes deg ufus uca iřqef Yuram s fřitca jar iɣaǧen nnes. Fřitca tesnuqqeb qaɛ uř nnes uca iwḍa deg ukarru nnes. 25 Xenni inna Yahu i Bidkar, aneɣraf nnes n řɛeskar: “Ksi t uca nḍar i-t di tesɣart n yeyyar n Nabut, Ayazraɛili, maɣar ɛqeř, necc d cek, ijj ɣar uɣezdis n wenneɣni, nedhen x ikarruten nneɣ awarni i baba as Axab umi xas icetca SIDI ammu, inna: 26 ‘S tidett amecnaw ẓriɣ iḍennaḍ idammen n Nabut d iḥenjiren nnes, inna SIDI, ammu zzayek i ɣa xeřfeɣ x yeyyar-a, inna SIDI.’ Xenni řexxu, ksi t uca nḍar i-t deg iyyar ɛlaḥsab awař n SIDI.” ^■  

27 Umi Axazya, ajeǧid n Yahuda, iẓra aya, iṭṭef abrid ɣar Bayt-Hagan. Yahu iḍfar i-t u řami yiweḍ ɣar teysart n Jur wenni iǧan ɣar Jibliɛam, inna: “Wwet i-t uřa d netta x ukarru!” Xenni yarweř netta ɣar Majiddu uca immut din. ^■   28 Imsexxaren nnes iwyen t x ukarru ɣar Urcalim uca neḍřen t deg wenḍeř nnes jar řejdud nnes di tendint n Dawud. 29 Deg useggʷas wiss ḥiṭac n Yuram, mmis n Axab, idweř Axazya d ajeǧid x Yahuda.

30 Xenni yusa-dd Yahu ɣar Yazraɛil. Řami tt tesřa Izabil, tkeḥḥeř tiṭṭawin nnes, tzewweq acewwaf nnes uca texzar zi řkazi ɣar swadday. 31 Umi dd-yudef Yahu zi tawwart, tenna: “Ma d řehna i x dd-tusid, Zimri, a cek wenni inɣin sidis?” ^□  ■   32 Netta ixzar ɣar řkazi sennej uca inna: “Wi akidi iǧan? Man Wen?” Xenni xzaren tnayen niɣ třata n imsexxaren icenɛen ɣares din swadday. 33 Netta inna asen: “Nḍarem tt-dd swadday!” Nitni nḍaren-tt-dd swadday ařami idammen nnes ttwaruccen x řḥiḍ u x yeysan, u netta iřbez i-tt. 34 Netta yudef uca icca, iswa. Awarni i uya inna: “Xzarem ɣar tmexziwt nni u neḍřem tt, maɣar nettat d yeǧis n ujeǧid.” ^■   35 Nitni uyuren ḥima ad tt neḍřen, maca nitni war tt ufin ca mɣir taceqquft n uzeǧif nnes d iḍaren d ifassen waha. 36 Umi dd-ɛeqben, ɛawden as t u netta yarra-dd: “Wa d awař n SIDI nni issiwřen s uqemmum n umsexxar nnes, Ilicaɛ Aticbi. Netta inna: ‘X yeyyar n Yazraɛil iṭan ad ccen aysum n řxecbet n Izabil. ^■   37 Řxecbet n Izabil ad tiři am řeɣbar x yeyyar deg weḥwic n Yazraɛil, ař ɣa taf war din wi i ɣa inin: Ta d Izabil.’ ”