Adlis Iqeddsen s Trifit ( AIT)

©  www.tarifit.info  -   CC SA-BY 2.0 

contact@tarifit.info

TAMEZWARUT

I wenni i ɣa iɣaren ... 

Deg Wedlis Iqeddsen s Trifit ad tafem řa min tufim di Řɛahd Aqdim (dayes Ttawrat, Zzabur d Inabiyyen) uřa min tufim di Řɛahd n Jdid (Řexbar Aṣebḥan niɣ L'Injil). Man aya ixs ad yini aqa Adlis Iqeddsen s Trifit dayes marra idlisen i d aneɣ immewcen zi Arebbi, zeg wedlis amezwaru umi qqaren 'Amezwaru' (Genesis, Génèse, Génesis) ař adlis aneggaru umi qqaren 'Asargeb' (Apocalipsis, Apocalyps, Revelation, Offenbarung, Openbaring), 66 n idlisen: Řɛahd Aqdim dayes 39 n idlisen, Řɛahd n Jdid dayes 27 n idlisen.  

L'Injil s ufus n Matta iffeɣ-dd ɛad deg useggʷas 1887 u L'Injil s ufus n Yuḥanna iffeɣ-dd deg useggʷas n 1890.  Deg useggʷas 2009 iffeɣ-dd Řɛahd n Jdid (s řḥuruf n Tlatinit d Tifinaɣ d řḥuruf n Teɛrabt). 

Řɛahd n Jdid d ijj n wawař nneɣni i Řexbar Aṣebḥan (L'Injil). Řɛahd n Jdid dayes 4 n idlisen, daysen Řexbar Aṣebḥan: ijj n wedlis yuran s ufus n Matta, ijjen s ufus n Markus, ijjen s ufus n Luka u wenni aneggaru s ufus n Yuḥanna. Awarni asen aqa din adlis n Řexdayem n Rrusul d tebratin n rrasul Bulus i tmesmunin (lkanayis) u i ca n imsexxaren n Lmasiḥ inni tuɣa kides ixeddmen i ubarreḥ n L'Injil jar řegnus. Awarni i tebratin n Bulus aqa din tabrat n Yaɛqub, d tnayen n tebratin n Buṭrus d třata n tebratin n Yuḥanna d ict n tebrat n Yahuda. Adlis aneggar n Řɛahd n Jdid d adlis qqaren as 'Asargeb', minzi dayes issargeb Lmasiḥ s ufus n ijj n lmalak i rrusul Yuḥanna mammec dd i ɣa iḍhar ɣar uneggar n ddunit u mammec i ɣa iɣelleb x marra inni war dayes uminen u mammec i ɣa yegg maḥend ad issemten tagelda nnes i ijj n řqedd n wařef n iseggʷusa. Awarni man aya ad yiři ujenna d temmurt n jdid i řebda  tandint n Urcalim i dd-ihwan zeg ujenna amecnaw tasřit izehhjen i wesři, uca aɛuǧi n AREBBI ad dayes yareɣ uca Izmar (ixs ad yini Lmasiḥ i ittwaṣellben x temmurt-a di řweqt n Irumaniyyen) ad yiři d Řefnar nnes. 

Adlis Iqeddsen qqaren as ɛawed: Tira Iqeddsen. Řexxu aqa iffeɣ-dd Adlis Iqeddsen am ikmeř: Řɛahd Aqdim d Řɛahd n Jdid, maca nitenti s tnayen d Adlis d ijjen. 

Ad tafed Adlis Iqeddsen (Řectab Iqeddsen) di furma n ijj n APP i Android u di furma n ijj n PWA (Pressive Web App) i MacOS, iOS, Android, Linux d Windows. Xzar: www.tarifit.info

Aṭṭas n iwdan war zemmaren ad ɣaren deɣya Tarifit, maca zemmaren ad sřen i wawař n Arebbi. Aqa nebda ad narni udiyu, 'audio', ak-d kuř 'update'. Ɣar umezwaru ad tafem L'Injil n Matta d Markus. 

I wenni umi itteɛjib tɣuri x tewriqt, aqa negga marra idlisen n Wedlis Iqeddsen s řḥuruf n Tlatinit  d Tifinaɣ di furma PDF danita ḥima izemmar kuř ijjen ad ten issuffeɣ i ṭṭebɛ. Xzar:

www.tarifit.info/adlis-iqeddsen.html    

Mařa texsed ad ten tɣared 'on-line' di furma HTML, arzu danita: 

www.tarifit.info/seř---ɣar-online.html   

Ad cek / cem ibarek Arebbi deg Yisem n Yeccu Lmasiḥ, Lmubarek!