رُّوسُولْ ن لْمَاسِيحْ
4
1 أجّْ أَنغْ أَذْ نتّْوَاحْسبْ زَّايْومْ أَمْ إِمْسخَّارنْ ن لْمَاسِيحْ ؤُ أَمْ إِوْكِيڒنْ ن ڒسْرَارْ ن أَربِّي. ▪ 2 خنِّي أَقَا إِتّْخصَّا إِ إِوْكِيڒنْ أَذْ تّْوَافنْ ذ إِمْثِيقَّانْ. ▪ 3 نشّْ وَارْ ذ أَيِي إِشْقِي شَا مَاڒَا تّْوَاحكْمغْ زَّايْومْ نِيغْ زڭْ إِجّْ ن بْنَاذمْ. ؤُڒَا ذ نشّْ وَارْ حكّْمغْ شَا خْ إِخفْ إِنُو. 4 مِينْزِي نشّْ وَارْ ؤُشِيغْ س شَا وَارْ إِحْڒِينْ ذَايِي، مَاشَا س مَانْ أَيَا وَارْ تّْوَاسڭّْذغْ، مَاغَارْ أَقَا سِيذِي ذ ڒْقَاضِي إِنُو. ▪ 5 س ؤُينِّي وَارْ حكّْممْ شَا خْ وَالُو أَڒْ د غَا يَاسْ سِيذِي ونِّي إِ غَا إِسُّوفّْغنْ غَارْ ثْفَاوْثْ مِينْ إِنُّوفَارنْ ذِي ثَادْجسْثْ، أَذْ إِسّضْهَارْ إِخَارِّيصنْ ن وُوڒَاونْ، ؤُشَا ڒخْذنِّي كُوڒْ إِجّْ أَذْ غَارسْ يِيڒِي ؤُسمْغَارْ زِي أَربِّي. ▪ 6 أَقَا مَانْ أَيَا، أَ أَيْثْمَا، إِوْيغْ ث-إِ-د خَافِي ؤُ خْ أَپُولُّوسْ أَمشْنَاوْ إِجّْ ن ؤُمذْيَا ذِي طّْوعْ نْومْ، حِيمَا أَذْ زَّايْنغْ ثْڒمْذمْ مَاحنْذْ وَارْ ثتّْخَارِّيصمْ شَا بَارَّا إِ مِينْ إِدْجَانْ ذِي ثِيرَا، حِيمَا ؤُڒَا ذ إِجّْ مَا أَذْ إِسّمْغَارْ إِخفْ نّسْ ضِيدّْ إِ ؤُمْقَارّبْ نّسْ ذِي سِّيبّثْ ن يِيجّنْ نّغْنِي. ▪ 7 مَانْ ونْ يَارزُّونْ ذَايْومْ؟ نِيغْ مِينْ غَارْومْ نِّي وَارْ ث ثطِّيفمْ؟ ؤُشَا مَاڒَا ثطّْفمْ ث، مَايمِّي ثْشنّْعمْ أَخْمِي وَارْ ث ثطِّيفمْ شَا؟ ▪ 8 ڒخُّو أَقَا ثجِّيوْنمْ، ؤُ ثْذوْڒمْ ثتّجَّارمْ ؤُشَا بْڒَا نشِّينْ أَقَا ثْحكْممْ أَمْ إِجدْجِيذنْ. مَاعْلِيكْ كنِّيوْ ثْحكّْممْ أَمْ إِجدْجِيذنْ، أَذْ يِيڒِي نشِّينْ خنِّي أَذْ نحْكمْ عَاوذْ أَكِيذْومْ! 9 مِينْزِي إِتّْغِيڒْ أَيِي بلِّي أَربِّي إِڭَّا أَنغْ، نشِّينْ إِنِّي إِدْجَانْ ذ رُّوسُولْ، غَارْ ؤُنڭَّارْ، أَخْمِي خَانغْ حكْمنْ س ڒْموْثْ، مِينْزِي أَقَا نذْوڒْ ذ أَفُورّجْ إِ دُّونشْثْ ؤُ إِ لْمَالَاكَاثْ ذ إِوْذَانْ. ▪
10 نشِّينْ ندْجْ ذ إِپُوهَاڒِييّنْ خْ سِّيبّثْ ن لْمَاسِيحْ، مَاشَا كنِّيوْ ثدْجَامْ ذ إِمِيغِيسنْ ذِي لْمَاسِيحْ. نشِّينْ نْهيّفْ، كنِّيوْ ثْجهْذمْ. كنِّيوْ ثتّْوَاشنّْعمْ، نشِّينْ نتّْوَاسحْقَارَا. ▪
11 أَڒْ ڒخُّو نشِّينْ ذَايْنيْ ڒَاژْ ذ ؤُفَاذِي ذ ثُوعَارْينْثْ، شَّاثنْ أَنغْ، وَارْ غَارْنغْ بُو ثْزذِّيغْثْ، ▪
12 نَاربّرْ أَمْ نْخدّمْ س إِفَاسّنْ نّغْ. نِيثْنِي سّحْقَارَانْ أَنغْ، أَقَا أَذْ نْبَاركْ، ذَارّْشنْ خَانغْ، مَاشَا أَقَا نْكسِّي أَرْمحْ، ▪
13 شقّْفنْ ذَايْنغْ، أَقَا نتّْحشّمْ إِ-ثنْ ذِي ڒْخِيرْ. أَڒْ ڒخُّو نذْوڒْ أَمشْنَاوْ ثَازُوبَاتْشْ ن دُّونشْثْ ذ إِفُورَاضْ ن مَارَّا، أَڒْ إِ ڒخُّو.
14 وَارْ تَّارِيغْ أَيَا حِيمَا أَذْ كنِّيوْ سّحْشِيمغْ، مَاشَا تّْزِييَّارغْ كنِّيوْ أَمشْنَاوْ ثَارْوَا إِعِيزّنْ. ▪
15 وَاخَّا مَاڒَا ثُوغَا ذِينْ غَارْومْ عشْرَا-أَڒَافْ ن يِينِّي إِ كنِّيوْ يَاربَّانْ ذِي لْمَاسِيحْ، أَقَا وَارْ غَارْومْ أَطَّاسْ ن إِبَابَاثنْ، مِينْزِي نشّْ جِّيغْ-د كنِّيوْ ذِي يشُّو لْمَاسِيحْ س ڒخْبَارْ أَصبْحَانْ. ▪
16 س ؤُينِّي تَّارّغْ زَّايْومْ: أَروْسمْ أَيِي! ▪
17 س ؤُينِّي سّكّغْ أَومْ-د ثِيمُوثِييُو، ونِّي إِدْجَانْ ذ مِّي إِعِيزّنْ ذ أَمْثِيقِّي ذِي سِيذِي، ونِّي كنِّيوْ إِ غَا إِسّْفكَّارنْ إِبْرِيذنْ إِنُو إِ إِدْجَانْ ذِي لْمَاسِيحْ، أَمْ مَامّشْ ثنْ سّڒْمَاذغْ ذِي مَارَّا ثِيمسْمُونِينْ.
18 مَاشَا شَا زَّايْومْ أَقَا تّْنفَّاخنْ أَخْمِي نشّْ وَارْ غَارْومْ تِّيوِيضِيغْ.
19 مَاشَا مَاڒَا إِخْسْ سِيذِي أَذْ غَارْومْ د-أَسغْ ذغْيَا. خنِّي وَارْ تّخْسغْ زعْمَا أَذْ سّْنغْ أَوَاڒنْ ن يِينِّي إِسّْڭعّْذنْ إِخفْ نْسنْ، مَاشَا جّهْذْ نْسنْ. ▪ 20 مِينْزِي ثَاڭلْذِيثْ ن أَربِّي وَارْ ثدْجِي شَا ذڭْ وَاوَاڒْأنْ، مَاشَا ذِي جّهْذْ. ▪ 21 مِينْ ثخْسمْ؟ مَا أَذْ غَارْومْ د-أَسغْ س وعْمُوذْ نِيغْ س ثَايْرِي ذ أَرُّوحْ ن ثمْهِينْثْ؟