‏1 أَ أَيْثْمَا، نشّْ وَارْ زمَّارغْ أَذْ كِيومْ سِّيوْڒغْ أَمشْنَاوْ أَكْ-ذ إِوْذَانْ إِنِّي إِدَّارنْ عْلَاحْسَابْ أَرُّوحْ، مَاشَا أَمشْنَاوْ إِنِّي إِدَّارنْ عْلَاحْسَابْ أَرِّيمثْ ثَامذْنُوبْثْ وَاهَا، أَمشْنَاوْ إِسيْمَانْ ذِي لْمَاسِيحْ. ‏2 أَقَا وْشِيغْ أَومْ أَذْ ثسْومْ أَغِي، وَارْ إِدْجِي ذ أَڒقِّيمْ إِ ڒبْذَا، مِينْزِي ثُوغَا وَارْ ذ أَسْ ثْزمَّارمْ، ؤُڒَا ڒخُّو وَارْ ذ أَسْ ثْزمَّارمْ عَاذْ، ^▪   ‏3 س مِينْزِي أَقَا كنِّيوْ عَاذْ ذِي أَرِّيمثْ ثَامذْنُوبْثْ. مَاغَارْ مَاڒَا ذِينْ عَاذْ جَارْ أَومْ ڒحْسذْ ذ إِمنْغَانْ ذ ؤُمْسبْضِي، مَا وَارْ ثدْجِيمْ عَاذْ ن أَرِّيمثْ ثَامذْنُوبْثْ نِيغْ ثڭُّورمْ عَاذْ أَمْ بْنَاذمْ أَمذْنُوبْ؟ ^▪   ‏4 مِينْزِي مَاڒَا إِجّنْ زَّايْومْ إِقَّارْ: ’نشّْ أَقَا أَيِي زِي بُولُوسْ!‘ ؤُ ونّغْنِي إِقَّارْ: ’نشّْ أَقَا أَيِي زِي أَپُولُّوسْ!‘، مَا خنِّي كنِّيوْ وَارْ ثدْجِيمْ شَا ذ إِوْذَانْ إِمذْنَابْ؟ ^▪   ‏5 مَاغَارْ مِينْ إِعْنَا أَپُولُّوسْ ؤُ مِينْ إِعْنَا بُولُوسْ؟ أَقَا أَثنْ مْغِيرْ ذ إِمْسخَّارنْ إِ زِي ثْذوْڒمْ ثُومْنمْ، ؤُشَا كُوڒْ إِجّنْ أَمْ مَامّشْ ذ أَسْ إِوْشَا سِيذِي. ^▪   ‏6 أَقَا نشّْ ژُّوغْ، أَپُولُّوسْ إِسُّو، مَاشَا أَربِّي إِسّغْمِي. ^▪   ‏7 خنِّي ونِّي إِتّژُّونْ وَارْ إِدْجِي ذ شَا ؤُڒَا ذ ونِّي إِتّسُّونْ، مَاشَا أَربِّي ونِّي إِسّْغمَّاينْ. ‏8 ونِّي إِتّژُّونْ ذ ونِّي إِتّسُّونْ ذ إِجّنْ، وَاخَّا كُوڒْ إِجّْ ثكَّارْ أَسْ-د ڒْمُونثْ نّسْ أَمشْنَاوْ ڒْخذْمثْ نّسْ. ^▪   ‏9 مِينْزِي نشِّينْ ذ إِمْسخَّارنْ أَكْ-ذ أَربِّي ؤُشَا كنِّيوْ ذ ثَافدْجَاحْثْ ذ ڒبْنِي ن أَربِّي إِ ثدْجَامْ. ^▪  

‏10 عْلَاحْسَابْ أَرْضَا ن أَربِّي إِ ذ أَيِي إِمّوْشنْ، نشّْ، أَمشْنَاوْ ڒمْعدْجمْ أَبنَّايْ أَمِيغِيسْ، ڭِّيغْ ذْسَاسْ ؤُ ونّغْنِي أَذْ إِبْنَا خَاسْ. أجّْ كُوڒْ إِجّْ أَذْ إِحْضَا مَامّشْ خَاسْ إِ غَا إِبْنَا.

‏11 مِينْزِي ؤُڒَا ذ إِجّنْ وَارْ إِزمَّارْ أَذْ إِڭّْ ذْسَاسْ نّغْنِي خْ ونِّي إِمَّارْسنْ، أَقَا-ث ذ يشُّو لْمَاسِيحْ. ^▪  

‏12 ؤُشَا مَاڒَا حذْ أَذْ إِبْنَا خْ ذْسَاسْ نِّي س وُورغْ، نُّوقَارْثْ، إِژْرَا إِغْڒَانْ، ثفْروْثْ، ڒُومْ نِيغْ س ؤُخشْخُوشْ،

‏13 ڒْخذْمثْ ن كُوڒْ إِجّنْ أَذْ ثْبَانْ، مِينْزِي أَسّْ أَذْ ت إِسّْشنْ. مِينْزِي س ثِيمسِّي أَذْ إِتّْوَاسضْهَارْ مَامّشْ ثدْجْ ڒْخذْمثْ ن كُوڒْ  إِجّْ، ثِيمسِّي ڭُّورْ أَذْ ت ثْقدْجبْ. ^▪  

‏14 مَاڒَا ثقِّيمْ ڒْخذْمثْ إِ خَاسْ ثُوغَا إِبْنَا شَا ن إِجّنْ، أَقَا نتَّا أَذْ إِطّفْ ڒْمُونثْ نّسْ س ؤُفُوسْ ن ڒمْعدْجمْ أَبنَّايْ،

‏15 ؤُ مَاڒَا ثشْمضْ ڒْخذْمثْ ن شَا ن إِجّنْ، أَقَا نتَّا أَذْ يَارْپُو ثَاخسَّارْثْ نّسْ، مَاشَا نتَّا سِيمَانْثْ نّسْ أَذْ إِنْجمْ، وَاخَّا أَخْمِي إِكَّا ثِيمسِّي.

‏16 مَا وَارْ ثسِّينمْ شَا بلِّي ثدْجَامْ ذ زَّاوشْثْ ن أَربِّي ؤُشَا بلِّي أَرُّوحْ ن أَربِّي إِزدّغْ ذَايْومْ؟ ^▪  

‏17 مَاڒَا حذْ يَاريّبْ زَّاوشْثْ ن أَربِّي، أَربِّي أَذْ ث يَاريّبْ، مِينْزِي زَّاوشْثْ ن أَربِّي، ثنِّي ثدْجَامْ كنِّيوْ، ثْقدّسْ إِ ثدْجْ.

‏18 وَارْ ثجِّي حذْ أَذْ إِسّشْمثْ إِخفْ نّسْ! مَاڒَا ذِينْ حذْ جَارْ أَومْ إِتّْغِيڒْ أَسْ إِخفْ نّسْ ذ أَمِيغِيسْ ذِي دُّونشْثْ-أَ، أَذْ إِذْوڒْ ذ أَپُوهَاڒِي مَاحنْذْ أَذْ يِيڒِي ذ أَمِيغِيسْ. ^▪  

‏19 مِينْزِي ثِيغِيثْ ن دُّونشْثْ-أَ ثدْجْ ذ ثُوبُّوهڒْيَا غَارْ أَربِّي. أَقَا ثُورَا:

”إِطّفْ إِمِيغِيسنْ س ثحْرَايْمشْثْ نْسنْ!“، ^▪  

‏20 ؤُشَا عَاوذْ:

”سِيذِي إِسّْننْ أَقَا إِخَارِّيصنْ ن إِمِيغِيسنْ ذ ڒْبَاطڒْ.“ ^▪  

‏21 أَمُّو خنِّي ؤُڒَا ذ إِجّْ وَارْ إِسّمْغَارِي شَا زڭْ إِوْذَانْ، مِينْزِي مَارَّا نْومْ، ‏22 مَا ذ بُولُوسْ، مَا ذ أَپُولُّوسْ، مَا ذ كِيفَا، مَا ذ ثُوذَارْثْ، مَا ذ ڒْموْثْ، مَا ذ إِضَا نِيغْ ذ ثِيوشَّا، أَقَا مَارَّا نْومْ، ‏23 مَاشَا كنِّيوْ ن لْمَاسِيحْ ؤُشَا لْمَاسِيحْ ن أَربِّي.