مِينْ إِقِّيمنْ ن إِسْرَائِيل
11
1 أَذْ إِنِيغْ: مَا يُوڭِي أَربِّي خنِّي ڒْڭنْسْ نّسْ؟ عمَّارْصْ! أَقَا نشّْ سِيمَانْثْ إِنُو عَاوذْ ذ أَيِيسْرَا إِلِي زِي زَّارِيعثْ ن إِبْرَاهِيمْ، زِي ثقْبِيتْشْ ن بِينْيَامِينْ. ▪ 2 أَربِّي وَارْ إِنطَّارْ شَا ڒْڭنْسْ نّسْ إِ ثُوغَا إِسّنْ زڭْ ؤُمزْوَارُو. نِيغْ وَارْ ثسِّينمْ شَا مِينْ إِقَّارْ وذْلِيسْ إِقدّْسنْ خْ إِلِييَا، أَمْ مَامّشْ ثُوغَا إِكْسِي ثَانْفُوتْشْ خْ إِسْرَائِيل غَارْ أَربِّي، إِنَّا: 3 ”أَ سِيذِي، نْغِينْ إِنَابِييّنْ نّكْ،
أَردّْدْجنْ إِعَالْطَارنْ نّكْ.
قِّيمغْ نشّْ وَاهَا،
ؤُشَا نِيثْنِي أَرزُّونْ ڒعْمَارْ إِنُو.“ ▪
4 إِتّْوَانَّا أَسْ س إِجّْ ن ڒوْحِييْ:
”أَقَا جِّيغْ إِ يِيخفْ إِنُو سبْعَا-أَڒَافْ ن يرْيَازنْ،
إِنِّي وَارْ ضْرِينْ شَا غَارْ إِضَارنْ زَّاثْ إِ بَاعَالْ،
وَارْ عبْذنْ إِ بَاعَالْ.“ ▪
5 أَمُّو ذِي ڒْوقْثْ ن يِيضَا عَاوذْ، أَقَا ثقِّيمْ يِيجّْ ن ڒْبَاقِي أَمْ ث إِخْضَارْ نتَّا خْ ڒحْسَابْ ن أَرْضَا. ▪ 6 مَاڒَا ثدْجْ س أَرْضَا، أَقَا وَارْ ثتِّيڒِي عَاذْ س ڒخْذَايمْ نِيغْ خنِّي أَرْضَا وَارْ إِدْجِي عَاذْ ذ أَرْضَا. مَاشَا مَاڒَا س ڒخْذَايمْ، وَارْ ثدْجِي عَاذْ ذ أَرْضَا. مَاڒَا لَّا، أَقَا ڒْخذْمثْ وَارْ ثدْجِي عَاذْ ذ ڒْخذْمثْ. ▪
7 مِينْ إِ غَا نِينِي خنِّي؟ مِينْ ثُوغَا ثَارزُّو إِسْرَائِيل وَارْ ث ثطِّيفْ، مَاشَا إِنِّي إِتّْوَافَارْزنْ طّْفنْ ث ؤُشَا إِنّغْنِي ذوْڒنْ ذ إِذَارْغَاڒنْ ذڭْ وُوڒَاونْ نْسنْ، ▪ 8 أَمْ مَامّشْ ثُورَا:
”أَقَا أَربِّي إِوْشَا أَسنْ أَرُّوحْ إِضْبَارنْ
ذ ثِيطَّاوِينْ إِ وَارْ إِتّْوِيڒِينْ،
ذ إِمزُّوغنْ إِ وَارْ إِتّسْڒِينْ،
أَڒْ أَسّْ ن يِيضَا.“ ▪
9 ذَاوُوذْ إِنَّا عَاوذْ:
”أَذْ ثذْوڒْ ثَاژوْضَا ن ثِيغَارْصِينْ نْسنْ ذ ثَاخْشفْثْ
ذ ثَافْضُوتْشْ ذ ؤُخدْجصْ أَعفَّانْ ذ ثْعنْكْرِيفْثْ إِ نِيثْنِي. ▪
10 أجّْ أَذْ ذَارْغْڒنْثْ ثِيطَّاوِينْ نْسنْ حِيمَا وَارْ تّْوِيڒِينْ،
ؤُ أجّْ أَذْ قوْسنْ إِعُورَارْ نْسنْ إِ ڒبْذَا.“ ▪
ڒفْرُوعْ إِڒقّْمنْ
11 عَاوذْ أَذْ إِنِيغْ: مَا نْذرْفنْ حِيمَا أَذْ وْضَانْ؟ عمَّارْصْ! مَاشَا س ؤُوطُّو نْسنْ ثِيوضْ-د ثُوذَارْثْ إِ ڒڭْنُوسْ، حِيمَا أَذْ ذوْڒنْ تَّاسْمنْ.
12 مَاڒَا إِذْوڒْ ؤُنذْرفْ نْسنْ ذ أَڭْڒَا ذ أَمقّْرَانْ إِ دُّونشْثْ ؤُشَا ثَاخسَّارْثْ نْسنْ ذ أَڭْڒَا إِ ڒڭْنُوسْ، مشْحَاڒْ قَاعْ إِ غَا ثِيڒِي ڒكْمَاڒثْ نْسنْ كْثَارْ.
13 أَقَا سَّاوَاڒغْ أَكِيذْومْ، أَ ڒڭْنُوسْ، نشّْ ذ ونِّي ذ رَّاسُولْ إِ ڒڭْنُوسْ، مَاحنْذْ أَذْ سّمْغَارغْ ذِي ڒْخذْمثْ ن ثْسخَّارْثْ إِنُو: ▫ ▪
14 أَذْ ثَاغْ أَذْ زمَّارغْ أَذْ ڭّغْ ثُوسْمِي ذڭْ أَيْثْ ن ڒْڭنْسْ إِنُو ؤُشَا أَذْ إِتّْوَاسّنْجمْ شَا زَّايْسنْ.
15 س مِينْزِي، مَاڒَا أَمنْضَارْ نْسنْ أَقَا-ث ذ أَصْڒَاحْ س ؤُفيّضْ إِ دُّونشْثْ، مَامّشْ إِ غَا يِيڒِي وذْوَاڒْ نْسنْ مْغِيرْ ثُوذَارْثْ زِي ثَادَّارْثْ ن إِمتِّيننْ!
16 مَاڒَا ثُوغَا أَسُوفّغْ أَمزْوَارُو ن صَّابثْ ثْقدّسْ، أَمنِّي ؤُڒَا ذ ڒْعجْنثْ ن أَرشْثِي ثْقدّسْ! مَاڒَا ثُوغَا أَژْوَارْ إِقدّسْ أَمنِّي ؤُڒَا ذ ڒفْرُوعْ. ▪
17 مَاشَا مَاڒَا ثُوغَا إِتّْوَاقصّْ شَا ن ڒفْرُوعْ ؤُ خنِّي شكْ أَمْ إِجّْ ن ؤُزمُّورْ ن ڒخْڒَا ثتّْوَاڒقّْمذْ ذڭْ ومْشَانْ نْسنْ، ثْذوْڒذْ ثْنفْعذْ زڭْ إِژوْرَانْ ذ زّشْثْ ن ثْزِيثُونْثْ،
18 وَارْ ثُوفّْ شَا خْ ڒفْرُوعْ. مَاڒَا ثُوفّذْ، وَارْ ثُوشِيذْ أَكْ-ذ يِيخفْ نّكْ، أَقَا شكْ وَارْ ثكْسِيذْ شَا أَژْوَارْ، مَاشَا أَژْوَارْ إِكْسِي شكْ.
19 أَذْ ثَاغْ أَذْ ثِينِيذْ: ”أَقَا تّْوَاقصّنْ ڒفْرُوعْ حِيمَا نشّْ أَذْ تّْوَاڒقّْمغْ.“ 20 مْلِيحْ! نِيثْنِي تّْوَاقصّنْ ؤُمِي وَارْ ؤُمِيننْ شَا ؤُشَا شكْ س لْ-إِيمَانْ ثتّْوَاڒقّْمذْ ؤُ ثكْسِيذْ أَمْشَانْ نْسنْ. وَارْ ثُوفّْ شَا، مَاشَا ڭّْوذْ. 21 مِينْزِي مَاڒَا ثُوغَا أَربِّي وَارْ إِتّْشطَّارْ شَا خْ ڒفْرُوعْ ن طّْبِيعثْ، أَذْ ثَاغْ وَارْ خَاكْ إِتّْشطَّارْ شَا عَاوذْ. 22 أَقَا ذَا ذ ڒضْرَافثْ ن أَربِّي ذ ڒوْعَارثْ نّسْ: ڒوْعَارثْ خْ ينِّي إِوْضَانْ، مَاشَا ڒضْرَافثْ خَاكْ مَاڒَا ثطّْفذْ ذِي ڒضْرَافثْ نّسْ نِيغْ ؤُڒَا ذ شكْ أَذْ ثتّْوَاقسّذْ. 23 ؤُڒَا ذ نِيثْنِي أَذْ تّْوَاڒقّْمنْ إِجّْ ن ؤُمُورْ نّغْنِي، مَاڒَا وَارْ قِّيمنْ بْڒَا لْ-إِيمَانْ، مِينْزِي غَارْ أَربِّي ثِيزمَّارْ حِيمَا أَذْ ثنْ إِڒقّمْ عَاوذْ. ▪ 24 مِينْزِي مَاڒَا شكْ ثتّْوَاقسّذْ زڭْ ؤُزمُّورْ ن ڒخْڒَا ؤُشَا ثتّْوَاڒقّْمذْ ذِي ثْزِيثُونْثْ ثَاصبْحَانْثْ، س ڒْعكْسْ ن طّْبِيعثْ نّكْ، مشْحَاڒْ إِهوْننْ كْثَارْ أَذْ تّْوَاڒقّْمنْ نِيثْنِي ذِي ثْزِيثُونْثْ نِّي د-إِتَّاسنْ أَكْ-ذ طّْبِيعثْ نْسنْ!
أَسنْجمْ ن إِسْرَائِيل
25 مِينْزِي تّخْسغْ أَذْ ثسّْنمْ سِّيرّْ-أَ، أَ أَيْثْمَا، حِيمَا وَارْ تِّيڒِيمْ ذ إِمِيغِيسنْ أَكْ-ذ يِيخفْ نْومْ، أَقَا ثمْسَارْ إِشْثْ ن ؤُسْذَاغڒْ ن وُوڒْ خْ إِسْرَائِيل إِ ذْرُوسْ ن ڒْوقْثْ أَڒْ د غَا يَاذفْ ؤُعمَّارْ ن ڒڭْنُوسْ. ▪ 26 ؤُشَا خنِّي مَارَّا إِسْرَائِيل أَذْ ثذْوڒْ ثدَّارْ أَمْ مَامّشْ ثُورَا:
”أَمْسنْجمْ أَذْ د-إِفّغْ زِي صِيهْيُونْ،
ؤُشَا أَذْ إِسّْبعّذْ ڒْمُوعْصِييّثْ خْ يَاعْقُوبْ. ▪
27 خنِّي أَذْ طّْفنْ ذِي ڒْعَاهْذْ إِ د-يُوسِينْ زَّايِي،
خْ مِينِّي إِ غَا غْفَارغْ إِ دّْنُوبْ نْسنْ.“ ▪
28 زِي جِّيهثْ ن ڒخْبَارْ أَصبْحَانْ نِيثْنِي أَقَا ذ ڒْعذْيَانْ ن أَربِّي خْ سِّيبّثْ نْومْ، مَاشَا ؤُمِي تّْوَاخْضَارنْ زِي أَربِّي أَقَا نِيثْنِي ذ إِمْعِيزّنْ خْ سِّيبّثْ ن ڒجْذُوذْ. 29 مِينْزِي أَربِّي وَارْ إِتّْبدَّاڒْ ثَاوْهِيبْثْ نّسْ س أَرْضَا ؤُڒَا ذ ثْڒَاغِيثْ نّسْ. 30 مِينْزِي أَمْ مَامّشْ ثُوغَا كنِّيوْ زِيشْ وَارْ ثطِّيعمْ شَا أَربِّي، مَاشَا ڒخُّو أَقَا ثكْسِيمْ أَرّحْمثْ س ڒْمُوعْصِييّثْ نْسنْ، 31 أَمُّو نِيثْنِي عَاوذْ وَارْ طِيعنْ شَا ڒخُّو إِ أَرّحْمثْ ثنِّي خَاومْ د-يُوسِينْ، حِيمَا أَذْ خَاسنْ د-ثَاسْ أَرّحْمثْ. 32 مِينْزِي أَربِّي إِحبّسْ إِ-ثنْ مَارَّا سَاذُو ڒْمُوعْصِييّثْ، حِيمَا أَذْ ثنْ يَارْحمْ مَارَّا. ▪
33 أَ، رَادْجَاغْ ن وَاڭْڒَا ذ ثِيغِيثْ ذ ثُوسّْنَا ن أَربِّي، مَامّشْ إِ غَا يڭّْ بْنَاذمْ أَذْ إِقدْجبْ ڒحْكَامَاثْ نّسْ، مَامّشْ إِ غَا يڭّْ أَذْ يَافْ إِبْرِيذنْ نّسْ. ▪
34 ”مِينْزِي وِي إِ غَا إِسّْننْ نّيّثْ ن سِيذِي؟“
نِيغْ:
”وِي ذ أَسْ إِدْجَانْ ذ أَمْشَاوَارْ؟“ ▪
35 نِيغْ:
”وِي ذ أَسْ إِزَّارنْ إِوْشَا أَسْ شَا،
ؤُمِي ذ أَسْ إِتّْخصَّا أَذْ إِتّْوَاخدْجصْ زَّايسْ؟“ ▪
36 مِينْزِي مَارَّا زَّايسْ إِ إِدْجْ، ؤُ مَارَّا ذَايسْ، ؤُ مَارَّا أَقَا-ث س ؤُفُوسْ نّسْ. غَارسْ نتَّا أَعُودْجِي إِ ڒبْذَا قَاعْ. أَمِينْ. ▪