‏1 خنِّي نشِّينْ، أَمْ نتّْوَاسڭّذْ س لْ-إِيمَانْ، أَقَا أَذْ غَارْنغْ يِيڒِي ڒهْنَا أَكْ-ذ أَربِّي س سِيذِيثْنغْ يشُّو لْمَاسِيحْ، ^▪   ‏2 ونِّي زَّايسْ عَاوذْ إِذْوڒْ أَنغْ-د أَذَافْ س لْ-إِيمَانْ غَارْ أَرْضَا أَيَا مِينْ ذِي نْبدّْ ؤُ نسّمْغَارْ ذڭْ ؤُسِيثمْ ن ؤُعُودْجِي ن أَربِّي. ^▪   ‏3 وَارْ إِدْجِي ذِي مَانْ أَيَا وَاهَا، مَاشَا نسّمْغَارْ عَاوذْ ذِي ڒمْحَايمْ، نسّنْ بلِّي ڒْمحْنثْ ثتَّارُو-د ذَايْنغْ ضّْبَارْ، ^▪   ‏4 ذ ضّْبَارْ أَذْ يَاوِي ثَاقدْجبْثْ ؤُشَا ثَاقدْجبْثْ أَذْ ثَاوِي أَسِيثمْ ‏5 ؤُشَا أَسِيثمْ وَارْ إِتّْسحْشِيمْ شَا، مِينْزِي ثَايْرِي ن أَربِّي أَقَا ثتّْوَافَارّغْ ذڭْ وُوڒَاونْ نّغْ س أَرُّوحْ إِقدّْسنْ إِ ذ أَنغْ إِمّوْشنْ.

‏6 مَاغَارْ ذِي سِّيبّثْ ن ثُوضْعفْثْ نّغْ، إِمُّوثْ لْمَاسِيحْ ذِي ڒْوقْثْ-أَ ذِي طّْوعْ ن إِعفَّاننْ. ^▪   ‏7 مَاغَارْ وَارْ ثتِّيفذْ حذْ أَذْ إِمّثْ ذِي طّْوعْ ن ؤُعفَّانْ، مِينْزِي ذِي طّْوعْ ن ؤُصبْحَانْ أَذْ ثَاغْ إِزمَّارْ أَذْ إِزْعمْ حذْ أَذْ إِمّثْ. ‏8 مَاشَا أَربِّي إِمْڒَا أَنغْ ثَايْرِي نّسْ، مِينْزِي ؤُمِي ثُوغَا أَنغْ عَاذْ ذ إِمذْنَابْ، إِمُّوثْ لْمَاسِيحْ ذِي طّْوعْ نّغْ. ^▪   ‏9 مشْحَاڒْ قَاعْ ڒخُّو إِ غَا نتّْوَاسڭّذْ س إِذَامّنْ نّسْ ؤُشَا أَذْ زَّايسْ نتّْوَاسنْجمْ زڭْ وغْضَابْ!

‏10 مِينْزِي ڒَامِي ثُوغَا أَنغْ عَاذْ ذ ڒْعذْيَانْ، نتّْوَاسصْڒحْ أَكْ-ذ أَربِّي س ڒْموْثْ ن مِّيسْ، مشْحَاڒْ قَاعْ ڒخُّو، أَوَارْنِي ڒَامِي نُوفَا أَصْڒَاحْ، أَذْ نتّْوَاسنْجمْ س ثُوذَارْثْ نّسْ.

‏11 وَارْ إِدْجِي مَانْ أَيَا وَاهَا، مَاشَا أَذْ نسّمْغَارْ ذِي أَربِّي عَاوذْ س سِيذِيثْنغْ يشُّو لْمَاسِيحْ، ونِّي زِي نكْسِي ڒخُّو أَصْڒَاحْ س ؤُفيّضْ.

‏12 مَاغَارْ أَخْمِي س يِيجّْ ن بْنَاذمْ يُوذفْ-د دّنْبْ غَارْ دُّونشْثْ ؤُشَا س دّنْبْ ثُوذفْ-د ڒْموْثْ، أَمُّو د-ثُوذفْ ڒْموْثْ غَارْ إِوْذَانْ مَارَّا، مِينْزِي خْضَانْ مَارَّا. ^▪  

‏13 مِينْزِي قْبڒْ مَا ثُوغَا ثدْجْ شَّارِيعَا، ثُوغَا دّنْبْ ذِي دُّونشْثْ، مَاشَا دّنْبْ وَارْ إِتّْوَاحْسِيبْ شَا مِينْزِي وَارْ ذِينْ ثدْجِي شَّارِيعَا.

‏14 مَاشَا ڒْموْثْ ثُوغَا ثحْكمْ زِي أَذَامْ أَڒْ مُوسَا ؤُڒَا خْ ينِّي وَارْ إِخْضِينْ أَمشْنَاوْ مَامّشْ إِخْضَا أَذَامْ أَكْ-ذ شَّارِيعَا، أَذَامْ ونِّي ذ صِّيفثْ ن ونِّي د غَا يَاسنْ.

‏15 مَاشَا وَارْ إِدْجِي س ؤُخطُّو أَمشْنَاوْ س ثوْهِيبْثْ ن أَرْضَا. مِينْزِي مَاڒَا مُّوثنْ أَطَّاسْ خْ سِّيبّثْ ن إِجّْ ن ؤُخطُّو، مشْحَاڒْ قَاعْ إِ غَا إِفيّضْ أَرْضَا ن أَربِّي ؤُ ثَاوْهِيبْثْ س يِيجّْ ن بْنَاذمْ، يشُّو لْمَاسِيحْ إِ وَاطَّاسْ.

‏16 مَاشَا س مِينْ إِمّوْشنْ س أَرْضَا وَارْ إِتِّيڒِي أَمشْنَاوْ س ؤُخطُّو ن يِيجّنْ. س مِينْزِي ڒْحُوكْمْ إِتَّاوِي-د لْحِيسَابْ زڭْ إِجّْ ن ؤُخطُّو، مَاشَا ثَاوْهِيبْثْ ن أَرْضَا ثتَّاوِي-د زڭْ وَاطَّاسْ ن إِخطَّانْ أَڒْ غَا نتّْوَاسڭّذْ.

‏17 مِينْزِي مَاڒَا س ؤُخطُّو ن إِجّنْ أَقَا ثحْكمْ ڒْموْثْ، مشْحَاڒْ قَاعْ إِ غَا حكْمنْ ذِي ثُوذَارْثْ إِنِّي إِكْسِينْ أَفيّضْ ن أَرْضَا ذ ثْموْشِي ن ثْسڭْذَا س يِيجّنْ، أَقَا-ث ذ يشُّو لْمَاسِيحْ.

‏18 أَمْ مَامّشْ خنِّي س يِيجّْ ن ؤُخطُّو أَقَا إِذْوڒْ ڒْحُوكْمْ خْ مَارَّا إِوْذَانْ، أَمُّو إِ د-إِتَّاسْ أَرْضَا غَارْ مَارَّا إِوْذَانْ س ثْسڭْذَا ن يِيجّنْ، حِيمَا أَذْ تّْوَاسڭّْذنْ إِ ثُوذَارْثْ.

‏19 مِينْزِي أَمَاشْنَاوْ س ڒْمُوعْصِييّثْ ن إِجّْ ن بْنَاذمْ ذوْڒنْ أَطَّاسْ ذ إِمذْنَابْ، أَمُّو عَاوذْ س طَّاعثْ ن إِجّنْ أَذْ ذوْڒنْ أَطَّاسْ ذ إِمْسڭَّاذنْ. ‏20 مَاشَا ؤُمِي د-ثُوسَا شَّارِيعَا، إِمَّارْنِي دّنْبْ، ؤُ مَانِي إِمَّارْنِي دّنْبْ، إِمَّارْنِي أَرْضَا كْثَارْ س وَاطَّاسْ، ^▪   ‏21 حِيمَا، أَمْ مَامّشْ إِحْكمْ دّنْبْ أَڒْ ڒْموْثْ، أَذْ إِحْكمْ أَرْضَا ثَانْيَا س ثْسڭْذَا أَڒْ ثُوذَارْثْ إِتّْذُومَانْ س يشُّو لْمَاسِيحْ، سِيذِيثْنغْ.