‏1 س ؤُينِّي أَقَا شكْ بْڒَا سْمَاحثْ، أَ بْنَاذمْ، شكْ ذ ونِّي إِحكّْمنْ خْ ؤُمْقَارّبْ نّسْ، مِينْزِي ذِي مِينْ ثْحكّْمذْ خْ ؤُمْقَارّبْ نّكْ، أَقَا ؤُڒَا ذ شكْ ذ بُو-ؤُمَارْوَاسْ ذِي مَانْ أَيَا، مَاغَارْ شكْ ونِّي إِتّْحَاسَابنْ إِنّغْنِي، ڒسْقنْثْ غَاركْ ؤُڒَا ذ سِيمَانْثْ ن ثْمسْڒَايِينْ. ^▪   ‏2 نشِّينْ نسّنْ بلِّي ڒْحُوكْمْ ن أَربِّي ذ ثِيذتّْ خْ ينِّي غَارْ ثدْجْ ثسْغَارْثْ ذِي ثْمسْڒَايِينْ أَمْ ثِينَا. ‏3 مَا إِتّْغِيڒْ أَشْ، أَ بْنَاذمْ، ونِّي إِحكّْمنْ خْ ينِّي إِتّڭّنْ ثِيمسْڒَايِينْ-أَ أَمْ ؤُڒَا ذ شكْ ثتّڭّذْ ثنْثْ سِيمَانْثْ نّكْ، أَقَا مَا ثْزمَّارذْ أَذْ ثَاروْڒذْ زِي ڒْحُوكْمْ ن أَربِّي؟ ‏4 نِيغْ ثسّحْقَارَاذْ أَڭْڒَا ن ثْشُونِي نّسْ ذ تَّاسِيعْ ن ؤُرَاجِي نّسْ ذ تَّاسِيعْ ن ڒْخَاضَارْ نّسْ ؤُشَا وَارْ ثسِّينذْ شَا بلِّي ثْشُونِي ن أَربِّي أَقَا إِندّهْ إِ شكْ غَارْ تُّوبثْ؟ ^▪   ‏5 مَاشَا ذِي سِّيبّثْ ن ثْغنَّانْثْ نّكْ ذ وُوڒْ نّكْ وَارْ إِتُّوبنْ، ثْيَارْوذْ إِ يِيخفْ نّكْ أَغْضَابْ إِ وَاسّْ ن وغْضَابْ، ؤُ إِ ؤُسَارْڭبْ ن ڒْحُوكْمْ إِسڭّْذنْ ن أَربِّي، ^▪   ‏6 ونِّي إِ غَا إِخدْجْصنْ كُوڒْ إِجّنْ عْلَاحْسَابْ ڒخْذَايمْ نّسْ: ^▪  

‏7 ... إِ ينِّي إِتّْصبَّارنْ ذِي ڒخْذَايمْ إِصبْحنْ، أَرزُّونْ أَعُودْجِي ذ شَّانْ ذ مِينْ وَارْ إِفنِّينْ، أَقَا أَذْ أَسنْ إِخدْجصْ س ثُوذَارْثْ إِتّْذُومَانْ،

‏8 ... مَاشَا إِ ينِّي يَارزُّونْ إِمْشُوبّشنْ، إِنِّي وَارْ إِتّطِّيعنْ إِ ثِيذتّْ، مَاشَا ضفَّارنْ إِ مِينْ وَارْ إِسڭّْذنْ، أَقَا أَذْ أَسنْ إِخدْجصْ س وغْضَابْ ذ ثفْقحْثْ، ^▪  

‏9 ... ڒْمحْنثْ ذ ڒحْسَارثْ أَذْ د-أَسنْثْ خْ كُوڒْ ڒعْمَارْ ن بْنَاذمْ إِ إِتّڭّنْ ڒْغَارْ، خْ وُوذَاينْ ذ أَمزْوَارْ، خنِّي خْ إِرَامِييّنْ،

‏10 ... مَاشَا أَعُودْجِي ذ شَّانْ ذ ڒهْنَا أَذْ إِڒِينْ إِ مَارَّا وِي إِتّڭّنْ ثْشُونِي، إِ وُوذَاينْ ذ أَمزْوَارْ، خنِّي إِ إِرَامِييّنْ،

‏11 مِينْزِي أَربِّي وَارْ إِتّڭّْ س وُوذْمَاونْ. ^▪  

‏12 مِينْزِي مَارَّا إِنِّي إِ غَا إِخْضَانْ بْڒَا شَّارِيعَا، بْڒَا شَّارِيعَا أَذْ تّْوَاهلّْكنْ ؤُشَا مَارَّا إِنِّي إِ غَا إِخْضَانْ سَاذُو شَّارِيعَا، أَقَا س شَّارِيعَا أَذْ تّْوَاحَاسْبنْ،

‏13 مِينْزِي وَارْ إِدْجِي إِنِّي إِتّسْڒَانْ إِ شَّارِيعَا نِيثْنِي ذ إِمْسڭَّاذنْ غَارْ أَربِّي، مَاشَا إِنِّي إِضفَّارنْ شَّارِيعَا أَقَا نِيثْنِي أَذْ تّْوَاسڭّْذنْ. ^▪  

‏14 مَاڒَا ڒڭْنُوسْ إِنِّي وَارْ غَارْ إِدْجِي بُو شَّارِيعَا، تّڭّنْ س طّْبِيعثْ مِينْ ذَايسْ ذِي شَّارِيعَا، أَقَا يِينَا ذ شَّارِيعَا إِ يِيخفْ نْسنْ، وَاخَّا نِيثْنِي وَارْ غَارْسنْ بُو شَّارِيعَا.

‏15 أَقَا نِيثْنِي سّْشَاننْ بلِّي ڒْخذْمثْ ن شَّارِيعَا ثُورَا ذڭْ وُوڒَاونْ نْسنْ، أَمْ ثشْهذْ عَاوذْ ثْنفْسشْثْ نْسنْ ؤُشَا إِخَارِّيصنْ نْسنْ ذدْجنْ ؤُڒَا تّْذَافَاعنْ خْ إِخفْ نْسنْ جَارْ أَسنْ

‏16 ذڭْ وَاسّْ مِينْ ذِي إِ غَا إِحَاسبْ أَربِّي خْ مِينْ إِنُّوفَارنْ ذڭْ إِوْذَانْ س يشُّو لْمَاسِيحْ عْلَاحْسَابْ ڒخْبَارْ أَصبْحَانْ إِنُو. ^▪  

‏17 مَاشَا مَاڒَا ڒَاغَانْ أَشْ ؤُذَايْ، ثْسنَّاذذْ خْ شَّارِيعَا ؤُ ثسّمْغَارذْ ذِي أَربِّي، ^▪  

‏18 أَقَا ثسّْنذْ مِينْ إِخْسْ نتَّا، ثْفَارّْزذْ مِينْ إِصبْحنْ، مِينْزِي ثتّْوَاسْڒمْذذْ زِي شَّارِيعَا،

‏19 ؤُ ثْحَاسْبذْ إِخفْ نّكْ ذ أَمْڭوّذْ ن إِذَارْغَاڒنْ ذ ثْفَاوْثْ إِ ينِّي إِدْجَانْ ذِي ثَادْجسْثْ، ‏20 ؤُڒَا ذ أَمْسڭّمْ يَارّبَانْ إِپُوهَاڒِييّنْ ذ أَمْسڒْمَاذْ ن إِقُوبَّانِييّنْ، أَقَا غَاركْ صِّيفثْ ن ثُوسّْنَا ذ ثِيذتّْ ذِي شَّارِيعَا، ‏21 إِوَا شكْ ونِّي إِسّڒْمَاذنْ إِنّغْنِي، مَا وَارْ ثسّڒْمِيذذْ شَا إِخفْ نّكْ؟ شكْ ونِّي إِتّْبَارّْحنْ ’وَارْ تِّيشَارْ!‘، مَا ثتَّاشَارذْ؟ ‏22 شكْ ونِّي إِقَّارنْ ’وَارْ زنِّي!‘، مَا ثْزنِّيذْ؟ شكْ ذ ونِّي إِشَارّْهنْ لْ-أَصْنَامْ، مَا ثَاشَارذْ زَّاوشْثْ نْسنْ إِقدّْسنْ؟ ‏23 شكْ ونِّي إِسّمْغَارَانْ ذِي شَّارِيعَا، مَا ثْفضْحذْ أَربِّي ؤُمِي ثخْضِيذْ ذِي شَّارِيعَا؟ ‏24 مِينْزِي خْ سِّيبّثْ نْومْ إِتّتّْوَاشقّفْ ذڭْ يِيسمْ ن أَربِّي جَارْ ڒڭْنُوسْ أَمْ مَامّشْ ثُورَا. ^▪  

‏25 أَقَا أَخْثَانْ إِنفّعْ مَاڒَا ثْضفَّارذْ شَّارِيعَا نِيشَانْ، مَاشَا مَاڒَا ثتّْعذِّيذْ خْ شَّارِيعَا، أَقَا أَخْثَانْ نّكْ إِتّْوَاحْسبْ بْڒَا أَخْثَانْ. ‏26 مَاڒَا ونِّي بْڒَا أَخْثَانْ إِتّطّفْ ذِي ڒُومَارْ إِسڭّْذنْ ن شَّارِيعَا، خْزَارْ، مَا خنِّي وَارْ إِحسّبْ بْڒَا أَخْثَانْ نّسْ ذ أَخْثَانْ؟ ‏27 ونِّي إِضفَّارنْ شَّارِيعَا نِيشَانْ س طّْبِيعثْ أَمْ إِدْجْ بْڒَا أَخْثَانْ، أَذْ شكْ إِحَاسبْ، شكْ ونِّي إِتّْعدَّانْ خْ شَّارِيعَا س ثِيرَا ذ وخْثَانْ! ‏28 مِينْزِي ؤُذَايْ وَارْ إِدْجِي ذ ؤُذَايْ س وُوذمْ، ؤُ أَخْثَانْ وَارْ إِدْجِي مِينْ إِتّْبَاننْ ذڭْ ويْسُومْ، ^▪   ‏29 مَاشَا نتَّا ذ ؤُذَايْ ونِّي إِتِّيڒِينْ ذ ؤُذَايْ ذِي ثْنُوفْرَا، ؤُ نتَّا س وخْثَانْ ونِّي ث إِتِّيڒِينْ ذڭْ وُوڒْ س أَرُّوحْ، وَارْ إِدْجِي س ثِيرَا ن شَّارِيعَا. خنِّي أَقَا أَسمْغَارْ نّسْ وَارْ د-إِتِّيسْ شَا زڭْ إِوْذَانْ مَاشَا زِي أَربِّي. ^▪