‏1 ثُوغَا يشُّو إِسَّاوَاڒْ س مَانْ أَيَا ؤُشَا إِسّْڭعّذْ ثِيطَّاوِينْ نّسْ غَارْ ؤُجنَّا، إِنَّا: ”أَ بَابَا، أَقَا ثَاسَاعّثْ ثِيوضْ-د. سُوعْڒَا مِّيشْ، حِيمَا ؤُڒَا ذ مِّيشْ أَذْ شكْ إِسُّوعْڒَا، ^▪   ‏2 أَڒَامِي ذ أَسْ ثوْشِيذْ صُّولْطَا خْ مَارَّا دَّاثْ، حِيمَا خنِّي نتَّا أَذْ إِوْشْ ثُوذَارْثْ إِتّْذُومَانْ إِ كُوڒْ إِجّنْ إِ ذ أَسْ ثوْشِيذْ. ^▪   ‏3 ذ ثَانِيثَا ذ ثُوذَارْثْ إِتّْذُومَانْ، أَقَا نِيثْنِي أَذْ شكْ سّْننْ، مَاغَارْ شكْ وحّْذكْ ذ أَربِّي ذ ثِيذتّْ، ذ يشُّو لْمَاسِيحْ ونِّي د-ثسّكّذْ. ^▪   ‏4 نشّْ سُّوعْڒِيغْ شكْ خْ ثمُّورْثْ. نشّْ كمّْڒغْ ڒْخذْمثْ إِ ذ أَيِي ثوْشِيذْ حِيمَا أَذْ ت ڭّغْ. ^▪   ‏5 ڒخُّو، سْعُودْجِي أَيِي، أَ بَابَا، غَارْ إِخفْ نّكْ س ؤُعُودْجِي إِ ثُوغَا غَارِي قْبڒْ مَا أَذْ ثِيڒِي دُّونشْثْ. ^▪  

‏6 سشْنغْ إِسمْ نّكْ إِ إِوْذَانْ إِنِّي ذ أَيِي ثوْشِيذْ زِي دُّونشْثْ. نِيثْنِي ثُوغَا أَثنْ نّكْ، ثوْشِيذْ ثنْ إِ نشّْ، أَقَا طّْفنْ ذڭْ وَاوَاڒْ نّكْ. ‏7 ڒخُّو سّْنغْ بلِّي مَارَّا مِينْ ذ أَيِي ثوْشِيذْ، أَقَا-ث زَّايكْ. ‏8 مِينْزِي نشّْ وْشِيغْ أَسنْ أَوَاڒنْ إِ ذ أَيِي ثوْشِيذْ ؤُشَا نِيثْنِي قبْڒنْ زَّايْسنْ، سّْننْ س ثِيذتّْ بلِّي نشّْ فّْغغْ-د زَّايكْ، ؤُمْننْ أَقَا شكْ ثسّكّذْ أَيِي-د. ^▪   ‏9 نشّْ تَّارغْ ذِي طّْوعْ نْسنْ، وَارْ تّتَّارغْ ذِي طّْوعْ ن دُّونشْثْ مَاشَا ذِي طّْوعْ ن يِينِّي ذ أَيِي ثوْشِيذْ، مِينْزِي أَقَا أَثنْ نّكْ.

‏10 مَارَّا مِينْ إِدْجَانْ إِنُو أَقَا-ث نّكْ ؤُ مِينْ إِدْجَانْ نّكْ أَقَا-ث إِنُو. نشّْ تّْوَاسّْعُودْجغْ ذَايْسنْ. ^▪  

‏11 نشّْ وَارْ دْجِيغْ عَاذْ ذِي دُّونشْثْ، مَاشَا نِيثْنِي أَقَا أَثنْ ذِي دُّونشْثْ ؤُشَا نشّْ أَذْ غَاركْ د-أَسغْ. أَ ثَابَابَاثْ إِقدّْسنْ، حْضَا ثنْ ذڭْ يِيسمْ نّكْ، إِسمْ نِّي ذ أَيِي ثوْشِيذْ، حِيمَا نِيثْنِي أَذْ إِڒِينْ ذ إِجّنْ أَمْ نشِّينْ.

‏12 ڒَامِي ذ أَيِي ثُوغَا أَكِيذْسنْ، حْضِيغْ ثنْ ذڭْ يِيسمْ نّكْ. نشّْ عسّغْ خْ ينِّي ذ أَيِي ثوْشِيذْ. ؤُڒَا ذ إِجّْ زَّايْسنْ وَارْ إِتّْوَاهلّكْ، مْغِيرْ مِّيسْ ن ثهْلِيكثْ حِيمَا أَذْ إِتّْوَاكمّڒْ مِينْ يُورَانْ ذڭْ وذْلِيسْ. ^▪  

‏13 مَاشَا ڒخُّو أَذْ غَاركْ د-أَسغْ ؤُ سَّاوَاڒغْ خْ مَانْ أَيَا ذِي دُّونشْثْ حِيمَا أَذْ ثِيڒِي ڒفْرَاحثْ إِنُو ثكْمڒْ ذَايْسنْ.

‏14 وْشِيغْ أَسنْ أَوَاڒْ نّكْ ؤُشَا دُّونشْثْ ثُوغَا ثْشَارّهْ إِ-ثنْ مِينْزِي وَارْ دْجِينْ شَا زِي دُّونشْثْ أَمْ نشّْ وَارْ دْجِيغْ شَا زِي دُّونشْثْ. ^▪  

‏15 نشّْ وَارْ تَّارغْ حِيمَا أَذْ ثنْ ثكْسِيذْ زِي دُّونشْثْ، مَاشَا حِيمَا أَذْ ثنْ ثحْضِيذْ زڭْ ؤُمْعفَّانْ.

‏16 نِيثْنِي وَارْ دْجِينْ شَا زِي دُّونشْثْ أَمْ نشّْ وَارْ دْجِيغْ شَا زِي دُّونشْثْ.

‏17 أَ ثْبَابَاثْ، قدّسْ إِ-ثنْ ذِي ثِيذتّْ، أَوَاڒْ نّكْ ذ ثِيذتّْ. ^▪  

‏18 أَمْ مَامّشْ إِ ذ أَيِي د-ثسّكّذْ غَارْ دُّونشْثْ، سّكّغْ ثنْ عَاوذْ غَارْ دُّونشْثْ. ^▪  

‏19 سّْقدَّاسغْ إِخفْ إِنُو ذِي طّْوعْ نْسنْ، حِيمَا أَذْ تّْوَاقدّْسنْ ؤُڒَا ذ نِيثْنِي ذِي ثِيذتّْ. ^▪  

‏20 وَارْ تَّارغْ ذِي طّْوعْ ن يِينَا وَاهَا، مَاشَا عَاوذْ ذِي طّْوعْ ن يِينِّي ذَايِي يُومْننْ س وَاوَاڒْ نْسنْ. ‏21 حِيمَا أَذْ إِڒِينْ مَارَّا ذ إِجّنْ، أَ بَابَا، أَمْ شكْ ذَايِي ؤُ نشّْ ذَايكْ، حِيمَا ؤُڒَا ذ نِيثْنِي أَذْ إِڒِينْ ذ إِجّنْ ذَايْنغْ، حِيمَا أَذْ ثَامنْ دُّونشْثْ بلِّي أَقَا ذ شكْ إِ ذ أَيِي د-إِسّكّنْ. ^▪   ‏22 نشّْ وْشِيغْ أَسنْ أَعُودْجِي إِ ذ أَيِي ثوْشِيذْ، حِيمَا أَذْ إِڒِينْ ذ إِجّنْ أَمْ مَامّشْ نشِّينْ ندْجْ ذ إِجّنْ. ‏23 نشّْ ذَايْسنْ، شكْ ذَايِي، حِيمَا أَذْ إِڒِينْ تّْوَاكمّْڒنْ غَارْ إِجّنْ، حِيمَا أَذْ ثسّنْ دُّونشْثْ أَقَا شكْ ثسّكّذْ أَيِي-د ؤُ ثخْسذْ ثنْ أَمْ مَامّشْ إِ ذ أَيِي ثخْسذْ.

‏24 أَ ثَابَابَاثْ، خْسغْ إِ ينِّي ذ أَيِي ثوْشِيذْ أَذْ إِڒِينْ أَكِيذِي مَانِي مَا دْجِيغْ نشّْ ؤُشَا أَذْ ژَترنْ أَعُودْجِي إِنُو إِ ذ أَيِي ثوْشِيذْ، مِينْزِي شكْ ثخْسذْ أَيِي قْبڒْ مَا أَذْ ثتّْوَاڭّْ دُّونشْثْ. ^▪   ‏25 أَ بَابَا إِنُو إِسڭّْذنْ، أَقَا دُّونشْثْ وَارْ شكْ ثسِّينْ، مَاشَا نشّْ أَقَا سّْنغْ شكْ ؤُ إِنَا سّْننْ أَقَا شكْ ثسّكّذْ أَيِي-د. ^▪   ‏26 نشّْ سّشْنغْ أَسنْ إِسمْ نّكْ ؤُ أَذْ ث سّشْنغْ، حِيمَا ثَايْرِي إِ زِي ثُوغَا ذ أَيِي ثتّخْسذْ أَذْ ثِيڒِي ذَايْسنْ ؤُ نشّْ ذَايْسنْ.“