‏1 ”أَقَا سِّيوْڒغْ أَكِيذْومْ أَيَا حِيمَا وَارْ ثنْذْرِيفمْ. ‏2 أَذْ كنِّيوْ سُّوفّْغنْ زِي ثمْزِيذَاوِينْ نْسنْ. إِوَا، ثَاسَاعّثْ أَذْ د-ثَاسْ ؤُمِي كُوڒْ إِجّنْ ونِّي كنِّيوْ إِ غَا إِنْغنْ أَذْ أَسْ إِتّْغِيڒْ أَقَا إِوْشَا إِشْثْ ن ثوْهِيبْثْ إِ أَربِّي. ^▪   ‏3 أَذْ زَّايْومْ ڭّنْ مَانْ أَيَا، مِينْزِي نِيثْنِي وَارْ سِّيننْ بَابَا ؤُڒَا ذ نشّْ. ^▪   ‏4 مَاشَا أَقَا نِّيغْ أَومْ مَانْ أَيَا حِيمَا، خْمِي إِ د غَا ثَاسْ ثْسَاعّثْ، خنِّي أَذْ ثْعقْڒمْ خْ مَانْ أَيَا. نشّْ وَارْ ذَايْومْ نِّيغْ شَا مَانْ أَيَا قْبڒْ، مِينْزِي نشّْ ثُوغَا أَيِي أَكِيذْومْ.“ ^▪  

‏5 ”مَاشَا ڒخُّو أَذْ رَاحغْ غَارْ ونِّي ذ أَيِي د-إِسّكّنْ، ؤُشَا ؤُڒَا ذ إِجّْ زَّايْومْ وَارْ ذ أَيِي إِسّقْسِي: ’مَانِي إِ غَا ثْرَاحذْ؟‘ ‏6 مَاغَارْ مِينْزِي نِّيغْ أَومْ مَانْ أَيَا، أَقَا شُّورنْ وُوڒَاونْ نْومْ س وشْضَانْ. ‏7 مَاشَا نشّْ أَذْ أَومْ إِنِيغْ ثِيذتّْ: حْسنْ أَومْ أَذْ رَاحغْ، مَاغَارْ مَاڒَا وَارْ رُوحغْ شَا، وَارْ غَارْومْ د-إِتِّيسْ ؤُمفْذِي. مَاڒَا رُوحغْ، أَذْ أَومْ ث-إِ-د-سّكّغْ. ^▪   ‏8 ڒَامِي د-يُوسَا وَانِيثَا، أَذْ إِسّقْنعْ دُّونشْثْ خْ دّْنُوبْ خْ ثْسڭْذَا ؤُ خْ ڒْحُوكْمْ. ‏9 خْ دّْنُوبْ مِينْزِي نِيثْنِي وَارْ زَّايِي ؤُمِيننْ،

‏10 خْ ثْسڭْذَا، مِينْزِي نشّْ أَذْ رَاحغْ غَارْ بَابَا ؤُشَا وَارْ ذ أَيِي ثْژَارّمْ عَاذْ،

‏11 ؤُشَا خْ ڒْحُوكْمْ، مِينْزِي أَمقّْرَانْ ن دُّونشْثْ-أَ أَقَا إِتّْوَاحَاسبْ. ^▪  

‏12 غَارِي أَطَّاسْ مِينْ ذَايْومْ إِ غَا إِنِيغْ، مَاشَا ڒخُّو وَارْ ثْزمَّارمْ أَذْ ث ثكْسِيمْ.

‏13 مَاشَا ڒَامِي د-يُوسَا أَرُّوحْ ن ثِيذتّْ، أَذْ كنِّيوْ إِنْذهْ ذِي مَارَّا ثِيذتّْ، مِينْزِي نتَّا وَارْ إِسِّيوِيڒْ شَا زڭْ إِخفْ نّسْ، مَاشَا مَارَّا مِينْ غَا إِسْڒَا، أَذْ زَّايسْ إِسِّيوڒْ ؤُشَا أَذْ أَومْ إِسّْشنْ ثِيمسْڒَايِينْ إِ د غَا يَاسنْ. ^▪  

‏14 نتَّا أَذْ أَيِي إِسّْعُودْجْ، مِينْزِي أَذْ إِكْسِي زِي مِينْ غَارِي ؤُشَا أَذْ كنِّيوْ إِسَّارْڭبْ زَّايسْ.

‏15 مَارَّا مِينْ إِدْجَانْ غَارْ بَابَا، أَقَا-ث إِنُو. س ؤُينِّي نِّيغْ، بلِّي نتَّا أَذْ إِكْسِي زِي مِينْ غَارِي ؤُشَا أَذْ كنِّيوْ ت إِسَّارْڭبْ.“ ^▪  

‏16 ”وَارْ إِتّْغِيمِي شَا ؤُشَا وَارْ ذ أَيِي ثْژَارّمْ عَاذْ، ؤُ خنِّي عَاوذْ وَارْ إِتّْغِيمِي شَا ؤُشَا أَذْ أَيِي ثْژَارمْ، مِينْزِي نشّْ أَذْ رَاحغْ غَارْ ثْبَابَاثْ.“ ^▪  

‏17 شَا زڭْ إِمحْضَارنْ نّسْ نَّانْ جَارْ أَسنْ: ”مَانَاوْيَا مِينْ إِ ذ أَنغْ إِنَّا: ’وَارْ إِتّْغِيمِي شَا ؤُشَا وَارْ ذ أَيِي ثْژَارّمْ عَاذْ، ؤُ خنِّي عَاوذْ وَارْ إِتّْغِيمِي شَا ؤُشَا أَذْ أَيِي ثْژَارمْ عَاوذْ!‘، ؤُ: ’نشّْ أَذْ رَاحغْ غَارْ ثْبَابَاثْ!‘؟“

‏18 نِيثْنِي نَّانْ: ”مَانَاوْيَا مِينْ إِقَّارْ: ’وَارْ إِتّْغِيمِي شَا!‘؟ وَارْ نسِّينْ شَا مِينْ إِخْسْ أَذْ يِينِي.“

‏19 إِسّنْ يشُّو مِينْ خْسنْ أَذْ ث سّقْسَانْ، إِنَّا أَسنْ: ”مَا ثمّْسقْسَامْ مِينْزِي نِّيغْ: ’وَارْ إِتّْغِيمِي شَا ؤُشَا وَارْ ذ أَيِي ثْژَارّمْ عَاذْ ؤُ خنِّي عَاوذْ وَارْ إِتّْغِيمِي شَا ؤُشَا أَذْ أَيِي ثْژَارمْ عَاوذْ!‘؟“

‏20 ”س ثِيذتّْ، س ثِيذتّْ، نشّْ أَذْ أَومْ إِنِيغْ: كنِّيوْ أَذْ ثْرُومْ، أَذْ ثسْغُويّمْ، مَاشَا دُّونشْثْ أَذْ ثْفَارْحْ. كنِّيوْ أَذْ ثْشضْنمْ، مَاشَا أَشْضَانْ نْومْ أَذْ إِذْوڒْ ذ ڒفْرَاحثْ. ‏21 ثَامْغَارْثْ، خْمِي إِ غَا ثَارُووْ، أَذْ ذَايسْ يِيڒِي ڒحْرِيقْ مِينْزِي ثَاسَاعّثْ نّسْ أَقَا ثِيوضْ-د. مَاشَا خْمِي د غَا ثَارُووْ مِّيسْ، وَارْ ثْفكَّارْ شَا عَاذْ ذِي ڒحْرِيقْ نّسْ س ڒفْرَاحثْ مِينْزِي ثَارْنِي-د إِجّْ ن بْنَاذمْ غَارْ دُّونشْثْ. ^▪   ‏22 ؤُڒَا ذ كنِّيوْ أَقَا ذَايْومْ أَشْضَانْ ڒخُّو، مَاشَا أَذْ كنِّيوْ ژَترغْ عَاوذْ ؤُشَا أَذْ فَارْحنْ وُوڒَاونْ نْومْ ؤُشَا ؤُڒَا ذ إِجّْ وَارْ زَّايْومْ إِتّكّسْ ڒفْرَاحثْ نْومْ.

‏23 ذڭْ وَاسّْ نِّي وَارْ ذ أَيِي ثتَّارمْ شَا. س ثِيذتّْ، س ثِيذتّْ، نشّْ أَذْ أَومْ إِنِيغْ: مَارَّا مِينْ غَا ثتَّارمْ زِي بَابَا س يِيسمْ إِنُو، أَذْ أَومْ ث إِوْشْ. ^▪   ‏24 أَڒْ إِ ڒخُّو وَارْ ثتَّارمْ شَا س يِيسمْ إِنُو. تَّارمْ، أَذْ ثكْسِيمْ، حِيمَا أَذْ ثِيڒِي ڒفْرَاحثْ نْومْ ثكْمڒْ.

‏25 سِّيوْڒغْ أَومْ خْ مَانْ أَيَا س إِمذْيَا، مَاشَا أَذْ د-ثَاوضْ ثْسَاعّثْ إِ ذِي وَارْ غَارْومْ إِ غَا سِّيوِيڒغْ عَاذْ س إِمتِّيڒنْ، مَاشَا أَذْ أَومْ د-بَارّْحغْ خْ ثْبَابَاثْ س بْطَايْطَايْ. ‏26 ذڭْ وَاسّْ نِّي أَذْ ثتَّارمْ س يِيسمْ إِنُو. نشّْ وَارْ ذ أَومْ قَّارغْ شَا بلِّي أَذْ تَّارغْ شَا إِ ثْبَابَاثْ ذِي طّْوعْ نْومْ، ‏27 مِينْزِي ثَابَابَاثْ سِيمَانْثْ نّسْ إِتّخْسْ كنِّيوْ، مِينْزِي كنِّيوْ ثُوغَا ثتّخْسمْ أَيِي ؤُشَا أَقَا ثُومْنمْ أَقَا نشّْ زِي غَارْ أَربِّي إِ د-فّْغغْ. ^▪   ‏28 فّْغغْ-د زِي ثْبَابَاثْ، ؤُسِيغْ-د غَارْ دُّونشْثْ. أَذْ جّغْ نشّْ عَاوذْ دُّونشْثْ ؤُشَا أَذْ رَاحغْ غَارْ ثْبَابَاثْ.“ ^▪  

‏29 نَّانْ أَسْ إِمحْضَارنْ نّسْ: ”أَقَا ڒخُّو ثسَّاوَاڒذْ س بْطَايْطَايْ، وَارْ ثسِّيوِيڒذْ شَا س إِجّْ ن ؤُمذْيَا. ‏30 ڒخُّو نسّنْ أَقَا ثسّْنذْ كُوڒْشِي، وَارْ ثحْذِيجذْ أَذْ شكْ إِسّقْسَا حذْ. زِي مَانَاونِّي نُومنْ أَقَا شكْ ثفّْغذْ-د زِي أَربِّي.“ ^▪   ‏31 يشُّو يَارَّا-د خَاسنْ: ”مَا ڒخُّو ثُومْنمْ؟ ‏32 أَذْ د-ثَاوضْ ثْسَاعّثْ، أَقَا ثِيوضْ-د، إِ ذِي إِ غَا ثتّْوَاسُّوزَّارمْ، كُوڒْ إِجّْ أَذْ إِطّفْ غَارْ ومْشَانْ نّسْ، أَذْ أَيِي ثجّمْ وحّْذِي، مَاشَا نشّْ وَارْ دْجِيغْ بُو وحّْذِي، مِينْزِي ثَابَابَاثْ أَقَا-ث أَكِيذِي. ^▪   ‏33 أَقَا سِّيوْڒغْ أَكِيذْومْ س مَانْ أَيَا حِيمَا أَذْ غَارْومْ يِيڒِي ڒهْنَا ذَايِي. ذِي دُّونشْثْ أَذْ غَارْومْ ثِيڒِي ڒْمحْنثْ، ڭّمْ ؤُڒْ، نشّْ أَقَا غلّْبغْ خْ دُّونشْثْ.“ ^▪