‏1 إِمْسَارْ ذِي سّبْثْ أَقَا يشُّو إِشُوقّْ ذڭْ إِيَّارنْ ن إِمنْذِي. ثُوغَا إِمحْضَارنْ نّسْ تّكّْسنْ ثِيذْرِينْ، تّْحكَّانْ ثنْثْ س إِفَاسّنْ نْسنْ، تّتّنْ ثنْثْ. ^▪   ‏2 شَا ن إِفَارِيسِييّنْ نَّانْ أَسنْ: ”مَايمِّي ثتّڭّمْ مِينْ وَارْ إِحدْجْڒنْ أَذْ إِتّْوَاڭّْ ذِي سّبْثْ؟“ ^▪   ‏3 يَارَّا-د يشُّو، إِنَّا أَسنْ: ”مَا وَارْ ثغْرِيمْ ؤُڒَا ذ مِينْ إِڭَّا ذَاوُوذْ ؤُمِي إِدْجُوژْ نتَّا ذ ينِّي ثُوغَا إِدْجَانْ أَكِيذسْ؟ ‏4 مَامّشْ يُوذفْ غَارْ ثَادَّارْثْ ن أَربِّي، إِكْسِي أَغْرُومْ ن وسْشَانْ إِ إِدْجَانْ خْ طَّابْڒَا ن سِيذِي إِ وَارْ إِحدْجْڒنْ مَاشَّا نّسْ مْغِيرْ إِ إِكهَّاننْ وَاهَا، ؤُشَا إِشَّا زَّايسْ ؤُ إِوْشَا عَاوذْ إِ ينِّي ثُوغَا إِدْجَانْ أَكِيذسْ؟“ ‏5 خنِّي إِنَّا أَسنْ: ”أَقَا مِّيسْ ن بْنَاذمْ ذ بَابْ ن سّبْثْ.“ ^▪  

‏6 إِمْسَارْ عَاوذْ ذِي سّبْثْ نّغْنِي، يُوذفْ غَارْ ثمْزِيذَا، إِبْذَا إِسّْغَارَا. ثُوغَا ذِينْ إِجّْ ن بْنَاذمْ ونِّي ؤُمِي أَفُوسْ نّسْ إِقُوشّحْ. ^▪   ‏7 حْضَانْ ث إِمْسڒْمَاذنْ ن إِذْلِيسنْ ذ إِفَارِيسِييّنْ، مَا أَذْ إِسّْڭنْفَا ذِي سّبْثْ، حِيمَا أَذْ خَاسْ أَفنْ شَا ن تُّوهْمثْ. ‏8 مَاشَا نتَّا يَارْڭبْ خْ إِخَارِّيصنْ نْسنْ ؤُشَا إِنَّا إِ بْنَاذمْ ونِّي ؤُمِي إِقُوشّحْ ؤُفُوسْ نّسْ: ”كَّارْ، بدّْ ذِي ڒْوسْثْ ن ثمْزِيذَا.“ ؤُمِي إِكَّارْ ؤُ ثُوغَا إِبدّْ ذِينْ، ‏9 إِنَّا أَسنْ يشُّو: ”أَذْ كنِّيوْ سّقْسِيغْ خْ مِينْ إِحدْجڒْ أَذْ إِتّْوَاڭّْ ذڭْ وَاسّْ ن سّبْثْ: مَا إِعدّڒْ إِ بْنَاذمْ مَاحنْذْ أَذْ إِڭّْ ڒْخَارْ نِيغْ ڒْغَارْ، أَذْ إِسّنْجمْ ثُوذَارْثْ نِيغْ أَذْ ت يَاردّدْجْ؟“

‏10 ثُوغَا إِخزَّارْ غَارْ مَارَّا إِنِّي ذ أَسْ د-إِنّْضنْ، إِنَّا أَسْ إِ بْنَاذمْ نِّي: ”سْوِيژّضْ أَفُوسْ نّكْ!“ إِسّْوِيژّضْ نتَّا أَفُوسْ نّسْ ؤُشَا إِذْوڒْ ؤُفُوسْ نّسْ إِصحّْ أَمْ ونّغْنِي. ^▪  

‏11 مَاشَا نِيثْنِي ذوْڒنْ شُّورنْ س زّْعَافْ ؤُشَا سِّيوْڒنْ جَارْ أَسنْ خْ مِينْ غَا ڭّنْ إِ يشُّو.

‏12 إِمْسَارْ ذڭْ وُوسَّانْ نِّي، أَقَا إِفّغْ يشُّو غَارْ إِجّْ ن وذْرَارْ حِيمَا أَذْ إِژَّادْجْ ؤُشَا إِسّعْذُو ذِينْ دْجِيڒثْ إِتّْژَادْجْ إِ أَربِّي.

‏13 ؤُمِي ثُوغَا ذ أَزِيڒْ، إِڒَاغَا-د إِ إِمحْضَارنْ نّسْ، ؤُشَا إِخْضَارْ زَّايْسنْ ثنْعَاشْ، إِسمَّا ثنْ رُّوسُولْ. ^▫  ▪  

‏14 شِيمْعُونْ، ونِّي إِتّْكنَّانْ بُوطْرُوسْ، ذ أَنْذْرَاوُوسْ ؤُمَاسْ ذ يَاعْقُوبْ ذ يُوحَانَّا، ذ فِيلِيبُّوسْ ذ بَارْ-ثُولُومَاوُوسْ

‏15 ذ مَاتَّا ذ ثُومَا ذ يَاعْقُوبْ مِّيسْ ن حَالْفَا ذ شِيمْعُونْ ونِّي ؤُمِي تّْكنَّانْ ’أَمْعسَّابْ‘،

‏16 يَاهُوذَا ؤُمَاسْ ن يَاعْقُوبْ، ذ يَاهُوذَا إِسْخَارِييُوطِي ونِّي إِدْجَانْ ذ أَغدَّارْ.

‏17 إِهْوَا-د يشُّو أَكِيذْسنْ ؤُشَا إِبدّْ ذڭْ ومْشَانْ ن ڒوْضَا. ثُوغَا أَكِيذسْ إِجّْ ن ؤُبَارُّو ن إِمحْضَارنْ نّسْ ذ إِجّْ ن ؤُبَارُّو ن إِوْذَانْ زِي مَارَّا يَاهُوذِييَّا ذ ؤُرْشَالِيمْ ؤُ زِي ثْمَا ن ڒبْحَارْ غَارْ صُورْ ذ صَايْذُونْ. ^▪  

‏18 نِيثْنِي ؤُسِينْ-د حِيمَا أَذْ أَسْ سْڒنْ ؤُ أَذْ تّْوَاسْڭنْفَانْ زِي ڒهْڒَاشْ نْسنْ، أَكِيذْسنْ ؤُڒَا ذ إِنِّي إِتّْوَاغزَّانْ زِي ڒَارْيَاحْ إِمنْڭَاسْ، ؤُشَا تّْوَاسْڭنْفَانْ.

‏19 مَارَّا ڒْغَاشِي ثُوغَا إِتّخْسْ أَذْ ث إِحَاذَا مِينْزِي ثُوغَا إِتّفّغْ-د زَّايسْ جّهْذْ نِّي إِسّْڭنْفَانْ كُوڒْشِي. ^▪  

‏20 إِسّْڭعّذْ ثِيطَّاوِينْ نّسْ غَارْ إِمحْضَارنْ نّسْ، إِنَّا:

”سّعْذْ نْومْ، كنِّيوْ، أَ إِمزْڒَاضْ مِينْزِي ثَاڭلْذِيثْ ن أَربِّي إِ كنِّيوْ. ^▪  

‏21 سّعْذْ نْومْ، كنِّيوْ، أَ ينِّي إِدْجُوژنْ ڒخُّو، مِينْزِي كنِّيوْ أَذْ ثتّْوَاسْجِيوْنمْ.

سّعْذْ نْومْ، كنِّيوْ، ينِّي إِتّْرُونْ ڒخُّو، مِينْزِي كنِّيوْ أَذْ ثْذهْشمْ. ^▪  

‏22 سّعْذْ نْومْ، ؤُمِي كنِّيوْ شَارّْهنْ إِوْذَانْ، تَّاژّْڒنْ خَاومْ، تّكّْوَارنْ كنِّيوْ، ؤُشَا سّْفطَّاحنْ زڭْ يِيسمْ نْومْ خْ سِّيبّثْ ن مِّيسْ ن بْنَاذمْ. ^▪  

‏23 فَارْحمْ ذڭْ وَاسّْ نِّي، نڭْزمْ س ڒفْرَاحثْ، مِينْزِي، أَقَا ڒَاجَارْ نْومْ إِمْغَارْ ذڭْ ؤُجنَّا، مِينْزِي أَمُّو ثُوغَا تّڭّنْ ڒجْذُوذْ نْسنْ ذڭْ إِنَابِييّنْ. ^▪  

‏24 مَاشَا ؤُشْثْ خَاومْ، كنِّيوْ، أَيْثْبَابْ ن وَاڭْڒَا، مِينْزِي أَقَا ثطّْفمْ أَفوّجْ نْومْ. ^▪  

‏25 ؤُشْثْ خَاومْ، كنِّيوْ، إِنِّي إِجِّيوْننْ، مِينْزِي أَذْ ثدْجَاژمْ.

ؤُشْثْ خَاومْ، كنِّيوْ إِنِّي إِضحّْشنْ ڒخُّو، مِينْزِي أَذْ ثْشضْنمْ، أَذْ ثْرُومْ. ^▪  

‏26 ؤُشْثْ خَاومْ ؤُمِي إِوْذَانْ أَذْ خَاومْ سِّيوْڒنْ مْلِيحْ، مِينْزِي أَمُّو ثُوغَا تّڭّنْ بَابَاثْسنْ أَكْ-ذ إِنَابِييّنْ إِسّْخَارِّيقنْ.“

‏27 ”مَاشَا نشّْ أَذْ أَومْ إِنِيغْ، إِنِّي إِ غَا إِسْڒنْ إِ وَايَا: خْسمْ ڒْعذْيَانْ نْومْ، ثْهِيلَّامْ ذڭْ إِنِّي كنِّيوْ إِشَارّْهنْ، ^▪   ‏28 بَارْكمْ إِ ينِّي كنِّيوْ إِنعّْڒنْ، ژَتدْجمْ خْ ينِّي خَاومْ إِتّْعدَّانْ. ^▪   ‏29 إِ ونِّي إِ شكْ إِوْثِينْ غَارْ ؤُمڭِّيزْ، أَرّْ أَسْ-د س ونّغْنِي، ؤُ ونِّي ذ أَشْ إِ غَا إِكّْسنْ أَجدْجَابْ، وَارْ ث تّطّفْ أَذْ إِكْسِي ؤُڒَا ذ ثْشَامِيرْ نّكْ. ^▪   ‏30 مَارَّا ونِّي ذ أَشْ إِ غَا إِتَّارنْ أوْشْ أَسْ ث، ؤُ ونِّي إِ غَا إِكْسِينْ مِينْ إِدْجَانْ نّكْ وَارْ ذ أَسْ ث تّتَّارْ. ^▪   ‏31 أَمْ مَامّشْ ثخْسذْ أَذْ أَومْ ڭّنْ إِوْذَانْ، ڭّمْ ؤُڒَا ذ كنِّيوْ ذَايْسنْ أَمنِّي. ^▪   ‏32 مَاڒَا ثخْسمْ غَارْ ينِّي كنِّيوْ إِتّخْسنْ، مَانْ ڒَاجَارْ إِ غَارْومْ. أَقَا ؤُڒَا ذ إِمذْنَابْ تّخْسنْ إِنِّي إِ ثنْ إِتّخْسنْ. ^▪   ‏33 مَاڒَا ثڭّمْ ڒْخَارْ إِ ينِّي ذ أَومْ إِتّڭّنْ ڒْخَارْ، مَانْ ڒَاجَارْ إِ غَارْومْ. أَقَا ؤُڒَا ذ إِمذْنَابْ تّڭّنْ أَمنِّي. ‏34 ؤُ مَاڒَا ثَارْضْڒمْ إِ إِوْذَانْ إِ زِي ثتّْرَاجَامْ أَذْ أَومْ د-أَرّنْ، مَانْ ڒَاجَارْ غَارْومْ؟ أَقَا ؤُڒَا ذ إِمذْنَابْ أَرْضْڒنْ إِ إِمذْنَابْ، حِيمَا أَذْ أَسنْ د-إِذْوڒْ أَمنِّي عَاوذْ. ^▪   ‏35 مَاشَا خْسمْ ڒْعذْيَانْ نْومْ، ڭّمْ ثْشُونِي، أَرْضْڒمْ، وَارْ ثْقطّْعمْ ڒَايَاسْ إِ شَا ن يِيجّنْ، ؤُشَا أَذْ يِيڒِي ڒَاجَارْ نْومْ إِمْغَارْ، أَذْ ثِيڒِيمْ ذ ثَارْوَا ن ؤُمْعُودْجِي خْ كُوڒْشِي، مِينْزِي أَقَا إِتّڭّْ س تَّاسِيعْ نْ ڒْخَاضَارْ أَكْ-ذ إِعفَّاننْ ذ ينِّي وَارْ ث إِشكَّارنْ. ^▪  

‏36 أَڒهْممْ أَمْ مَامّشْ إِدْجْ بَابَاثْومْ ذ أَرْحِيمْ.“

‏37 ”وَارْ حكّمْ، حِيمَا وَارْ ثتّْوَاحَاكَاممْ. وَارْ تّْحَاسَابمْ، حِيمَا وَارْ كنِّيوْ تّْحِيسِيبنْ. غْفَارمْ، أَذْ أَومْ إِتّْوَاغْفَارْ. ^▪  

‏38 وْشمْ، أَذْ أَومْ إِمّوْشْ. أَذْ نْضَارنْ إِجّْ ن ڒْمُوذْ إِشْنَا، إِذقّسْ، إِتّْوَاسّنْهزّْ، إِفيّضْ ذڭْ وحْسِينْ نْومْ، مِينْزِي س ڒْمُوذْ إِ زِي غَا ثْوزْنمْ كنِّيوْ، أَذْ زَّايسْ ثتّْوَاوزْنمْ ؤُڒَا ذ كنِّيوْ.“ ^▪  

‏39 نتَّا إِنَّا أَسنْ إِجّْ ن ؤُمذْيَا: ”مَا إِزمَّارْ ؤُذَارْغَاڒْ أَذْ إِنْذهْ أَذَارْغَاڒْ؟ مَا وَارْ وطِّينْ س ثْنَاينْ إِذْسنْ ذڭْ وحْفُورْ؟ ^▪   ‏40 أَمحْضَارْ وَارْ إِدْجِي شَا حْسنْ زڭْ ؤُمْسڒْمَاذْ نّسْ، مَاشَا كُوڒْ أَمحْضَارْ نِيشَانْ أَذْ يِيڒِي أَمشْنَاوْ أَمْسڒْمَاذْ نّسْ. ^▪   ‏41 مَايمِّي ثْخزَّارذْ غَارْ ؤُخشِّيوْ، ثنِّي ذِي ثِيطّْ ن ؤُمَاشْ، مَاشَا ثَاحْنَاشْثْ، ثنِّي ذِي ثِيطّْ نّكْ، وَارْ كِيسْ ثڒْهِيذْ؟ ^▪   ‏42 مَامّشْ ثتّڭّذْ ثقَّارذْ إِ ؤُمَاشْ: ’ؤُمَا، أجّْ أَيِي أَذْ أَشْ د-سُّوفّْغغْ أَخشِّيوْ إِ ذَايكْ ذِي ثِيطّْ نّكْ!‘، ؤُ شكْ سِيمَانْثْ نّكْ وَارْ ثتّْوِيڒِيذْ شَا ثَاحْنَاشْثْ إِ غَاركْ ذِي ثِيطّْ نّكْ. شكْ، أَ أَمْنَافقْ، سُوفّغْ-د أَمزْوَارُو ثَاحْنَاشْثْ ثنِّي غَاركْ ذِي ثِيطّْ نّكْ، خنِّي أَذْ ثتّْوَاڒِيذْ مْلِيحْ مَاحنْذْ أَذْ ثسُّوفّْغذْ أَخشِّيوْ زِي ثِيطّْ ن ؤُمَاشْ.“

‏43 ”وَارْ ذِينْ بُو ثْشجَّارْثْ ثَاصبْحَانْثْ إِ د-إِسّْغمَّاينْ ڒْغِيدْجثْ ثخْسَارْ، نِيغْ ثَاشجَّارْثْ إِخْسَارنْ إِ د-إِسّْغمَّاينْ ڒْغِيدْجثْ ثَاصبْحَانْثْ. ^▫  ▪   ‏44 مِينْزِي كُوڒْ ثَاشجَّارْثْ ثتّْوَاسّنْ س ڒْغِيدْجثْ نّسْ، مِينْزِي وَارْ ڒقّْضنْ زڭْ إِسنَّاننْ ڒْبَاشُورْ ؤُڒَا زِي شْبَارْقْ أَكْ-ذ إِسنَّاننْ أَضِيڒْ. ^▪   ‏45 بْنَاذمْ أَصبْحَانْ زِي ڒْكنْزْ ن وُوڒْ نّسْ ذ أَصبْحَانْ أَذْ إِسُّوفّغْ مِينْ إِصبْحنْ ؤُشَا بْنَاذمْ أَعفَّانْ زِي ڒْكنْزْ ن وُوڒْ نّسْ ذ أَعفَّانْ أَذْ د-إِسُّوفّغْ ثُوعفّْنَا. س مِينْ زِي إِشُّورْ وُوڒْ، زَّايسْ إِسَّاوَاڒْ ؤُقمُّومْ نّسْ.“ ^▪  

‏46 ”مَايمِّي ذ أَيِي ثتّْڒَاغَامْ: ’أَ سِيذِي، أَ سِيذِي‘ ؤُشَا وَارْ ثتّڭّمْ شَا مِينْ قَّارغْ؟ ^▪   ‏47 مَارَّا ونِّي غَارِي إِ د غَا يَاسنْ، أَذْ إِسڒْ إِ وَاوَاڒنْ إِنُو ؤُشَا أَذْ زَّايْسنْ إِڭّْ، نشّْ أَذْ أَومْ سّشْنغْ مِينْ ذِي يَارْوسْ نتَّا. ^▪   ‏48 نتَّا يَارْوسْ ذڭْ إِجّْ ن بْنَاذمْ إِ إِبْنَانْ إِشْثْ ن ثَادَّارْثْ: إِغْزَا، إِحْفَارْ ؤُشَا إِسَّارْسْ ذْسَاسْ خْ سّدْجَاحْ. ؤُمِي د-ثُوسَا سّحْڒثْ، ثْقبّضْ ڒْحمْڒثْ ثَادَّارْثْ نِّي ؤُشَا وَارْ ثْزمَّارْ أَذْ ت ثسّنْهزّْ، مِينْزِي ثُوغَا ثبْنَا خْ سّدْجَاحْ. ‏49 مَاشَا ونِّي إِتّسْڒَانْ وَارْ إِتّڭّْ، يَارْوسْ ذِي بْنَاذمْ إِ إِبْنَانْ ثَادَّارْثْ نّسْ خْ ثمُّورْثْ بْڒَا ذْسَاسْ. ؤُمِي ث إِ-د ثْقبّضْ ڒْحمْڒثْ، ڒخْذنِّي ثوْضَا. ثُوغَا أَفَارْثكْ ن ثَادَّارْثْ نِّي ذ أَمقّْرَانْ.“