‏1 ذِي ڒْوقْثْ نِّي إِسْڒَا هِيرُوذُوسْ، ڒْحَاكمْ خْ إِجّْ ن أَرْبَاعْ ن ثمُّورْثْ، ڒخْبَارْ ن يشُّو. ^▪   ‏2 إِنَّا إِ يِيمْسخَّارنْ نّسْ: ”وَانِيثَا ذ يُوحَانَّا أَمْسغْضَاصْ. أَقَا إِتّْوَاسْنكَّارْ-د زِي ثَادَّارْثْ ن إِمتِّيننْ، س ؤُينِّي خدّْمنْثْ ذَايسْ ڒعْجَايبْ نِّي.“ ‏3 مِينْزِي هِيرُوذُوسْ ثُوغَا إِطّفْ يُوحَانَّا، إِشَارْفْ إِ-ث، إِڭَّا إِ-ث ذِي ڒحْبسْ زِي سِّيبّثْ ن هِيرُوذِييَّا، ثنِّي ذ ثَامْغَارْثْ ن فِيلِيبُّوسْ، ونِّي ذ ؤُمَاسْ ن هِيرُوذُوسْ، ^▪   ‏4 مِينْزِي يُوحَانَّا ثُوغَا إِقَّارْ أَسْ: ”وَارْ غَاركْ بُو تّسْرِيحْ أَقَا ثِيوْيذْ ت ذ ثَامْغَارْثْ نّكْ.“ ^▪   ‏5 س ؤُيَا ثُوغَا إِخْسْ أَذْ ث إِنغْ، مَاشَا ثُوغَا إِڭّْوذْ زِي ڒْغَاشِي مِينْزِي نِيثْنِي حسْبنْ ث ذ أَنَابِي. ^▪   ‏6 مَاشَا ڒَامِي د-يِيوضْ وَاسّْ ن وخْڒَاقْ ن هِيرُوذُوسْ، ثشْضحْ يدْجِيسْ ن هِيرُوذِييَّا زَّاثْ إِ إِنوْجِيونْ ؤُشَا ثعْجبْ أَسْ إِ هِيرُوذُوسْ. ^▪   ‏7 س ؤُينِّي إِوَاعْذْ إِ-ت س إِشْثْ ن ثْجَادْجِيثْ أَذْ أَسْ إِوْشْ مَارَّا مِينْ غَا ثتَّارْ. ^▪   ‏8 ؤُشَا نتَّاثْ، أَمْ ت ثُوغَا ثتّْوَاعَارّنْ زڭْ يمَّاسْ، ثنَّا: ”أوْشْ أَيِي ذَا خْ طّبْصِي أَزدْجِيفْ ن يُوحَانَّا أَمْسغْضَاصْ!“ ‏9 إِشْضنْ ؤُجدْجِيذْ، مَاشَا ؤُمِي ثُوغَا إِجِّيدْجْ ؤُ خْ سِّيبّثْ ن يِينِّي أَكِيذسْ إِقِّيمنْ، يُومُورْ أَذْ أَسْ إِمّوْشْ ؤُزدْجِيفْ.

‏10 إِسّكّْ حذْ غَارسْ، ؤُشَا وَانِيثَا إِقسّْ أَسْ أَزدْجِيفْ إِ يُوحَانَّا ذِي ڒحْبسْ.

‏11 إِوْينْ-د أَزدْجِيفْ نّسْ ذِي طّبْصِي، إِمّوْشْ أَسْ إِ ثْحنْجِيرْثْ ؤُشَا نتَّاثْ ثِيوْيِي-ث إِ يمَّاسْ.

‏12 ؤُسِينْ-د إِمحْضَارنْ نّسْ، كْسِينْ ڒْخشْبثْ، نضْڒنْ ت. ڒخْذنِّي رُوحنْ، خبَّارنْ يشُّو.

‏13 ڒَامِي إِسْڒَا يشُّو مَانْ أَيَا، إِفّغْ سّنِّي ذِي ثْغَارَّاپُوثْ غَارْ إِجّْ ن ومْشَانْ إِخْڒَانْ، ثُوغَا-ث ذِينْ وحّْذسْ. إِسْڒَا ڒْغَاشِي خْ مَانْ أَيَا، ؤُشَا ضْفَارنْ ث خْ ثمُّورْثْ زِي ثْندَّامْ. ^▪  

‏14 ؤُمِي د-إِفّغْ يشُّو زِي ثْغَارَّاپُوثْ، إِژْرَا أَطَّاسْ ن ڒْغَاشِي ؤُشَا إِحِينّْ خَاسنْ، إِسّْڭنْفَا إِمهْڒَاشْ نْسنْ. ^▪  

‏15 ڒَامِي د-ثِيوضْ ثْمذِّيثْ، ؤُسِينْ-د غَارسْ إِمحْضَارنْ نّسْ، نَّانْ: ”أَقَا أَمْشَانْ-أَ إِخْڒَا ؤُ ڒْوقْثْ ثعْذُو، زعْمَا سْقبّضْ ڒْغَاشِي حِيمَا أَذْ ؤُيُورنْ غَارْ ڒذْشُورْ أَذْ سْغنْ مِينْ غَا شّنْ إِ يِيخفْ نْسنْ.“ ^▪  

‏16 مَاشَا يشُّو إِنَّا أَسنْ: ”نْهْڒَا مَا رُوحنْ، وْشمْ أَسنْ كنِّيوْ مِينْ غَا شّنْ.“

‏17 نَّانْ أَسْ: ”وَارْ غَارْنغْ ذَا مْغِيرْ خمْسَا ن ثشْنِيفِينْ ذ ثْنَاينْ ن إِسڒْمَانْ.“

‏18 إِنَّا: ”أَوْيمْ ثنْ-د ذَا غَارِي.“

‏19 خنِّي يُومُورْ ڒْغَاشِي أَذْ قِّيمنْ خْ ڒحْثِيشْ. خنِّي إِطّفْ خمْسَا ن ثشْنِيفِينْ ذ ثْنَاينْ نِّي ن إِسڒْمَانْ، إِخْزَارْ غَارْ ؤُجنَّا، إِبَاركْ، يَارْژَا إِ-ثنْثْ ؤُشَا إِوْشَا ثِيشْنِيفِينْ إِ إِمحْضَارنْ ؤُ إِمحْضَارنْ وْشِينْ ثنْثْ إِ ڒْغَاشِي. ^▪   ‏20 مَارَّا شِّينْ، جِّيوْننْ. ڒخْذنِّي كْسِينْ إِڒقّْوَازْ إِشطّنْ: ثُوغَا ذِينْ ثنْعَاشْ ن ثْسُودْجَاثِينْ عمَّارنْثْ. ‏21 إِنِّي شِّينْ ثُوغَا أَثنْ ذِي خمْسَا أَڒفْ ن يرْيَازنْ، بْڒَا ثِيمْغَارِينْ ذ إِحنْجِيرنْ.

‏22 ذغْيَا إِزِييَّارْ يشُّو إِمحْضَارنْ نّسْ أَذْ نْينْ ذِي ثْغَارَّاپُوثْ ؤُشَا أَذْ أَسْ إِزْوَارنْ غَارْ ؤُجمَّاضْ، أَمْ إِسّْقبضْ نتَّا ڒْغَاشِي. ^▪   ‏23 أَوَارْنِي ڒَامِي إِسّْقبضْ ڒْغَاشِي، إِڭعّذْ غَارْ وذْرَارْ وحّْذسْ حِيمَا أَذْ إِژَّادْجْ. ڒَامِي د-ثِيوضْ ثْمذِّيثْ، ثُوغَا إِقِّيمْ ذِينْ وحّْذسْ. ^▪   ‏24 ثَاغَارَّاپُوثْ ثُوغَا-ت ثِيڭّْوجْ خْ ثمُّورْثْ شَا ن كِيلِيمُوثِيرْ، ؤُشَا ثتّْوَاعَارّنْ زِي سَّا غَارْ ذِيهَا مِينْزِي أَسمِّيضْ يُوسَا أَسنْ-د ذڭْ وُوذمْ. ‏25 ؤُشَا ذڭْ حطُّو وِيسّْ أَربْعَا ن دْجِيڒثْ، يُوسَا-د غَارْسنْ يشُّو أَمْ إِڭُّورْ خْ وَامَانْ ن ڒبْحَارْ. ‏26 ؤُمِي ث ژْرِينْ إِمحْضَارنْ إِڭُّورْ خْ وَامَانْ ن ڒبْحَارْ، نّْخڒْعنْ، نَّانْ: ”وَا ذ ڒخْيَاڒْ أَغدَّارْ!“، ؤُشَا سْغُويّنْ زِي ثِيڭّْوُوذِي. ‏27 ذغْيَا إِسِّيوڒْ-د غَارْسنْ يشُّو، إِنَّا: ”ڭّمْ ؤُڒْ، أَقَا ذ نشّْ، وَارْ تّڭّْوذمْ شَا!“ ‏28 بُوطْرُوسْ يَارَّا-د خَاسْ، إِنَّا: ”أَ سِيذِي، مَاڒَا ذ شكْ، وصَّا أَيِي أَذْ غَاركْ د-أَسغْ خْ وَامَانْ.“ ‏29 إِنَّا أَسْ: ”أَسْ-د!“ إِهْوَا-د بُوطْرُوسْ زِي ثْغَارَّاپُوثْ، يُويُورْ خْ وَامَانْ حِيمَا أَذْ د-يَاوضْ غَارْ يشُّو. ‏30 مَاشَا ؤُمِي إِژْرَا أَسمِّيضْ إِجْهذْ، ثڒْقفْ إِ-ث ثِيڭّْوُوذِي ؤُشَا، أَمْ إِبْذَا إِغَارّقْ، إِتّْڒَاغَا، إِنَّا: ”أَ سِيذِي، سنْجمْ أَيِي!“ ‏31 يشُّو إِسّْوِيژّضْ ذغْيَا أَفُوسْ نّسْ، إِطّفْ ذَايسْ، إِنَّا أَسْ: ”أَ شكْ ونِّي ذِي إِدْجْ ذْرُوسْ ن لْ-إِيمَانْ، مَايمِّي ذَايكْ يُوذفْ شّكْ؟“ ‏32 أَوَارْنِي ڒَامِي نْيِينْ ذِي ثْغَارَّاپُوثْ، يَارْسَا ؤُسمِّيضْ. ‏33 إِنِّي إِدْجَانْ ذِي ثْغَارَّاپُوثْ، ؤُسِينْ-د غَارسْ، سجْذنْ أَسْ، نَّانْ: ”س ثِيذتّْ، شكْ ذ مِّيسْ ن أَربِّي!“

‏34 أَوَارْنِي ڒَامِي ژْوَانْ ڒبْحَارْ، إِوْضنْ غَارْ ثمُّورْثْ ن جِينِّيسَارثْ. ^▪   ‏35 ڒَامِي ث عقْڒنْ يرْيَازنْ ن ثمُّورْثْ نِّي، سُّوفّْغنْ ڒخْبَارْ ذِي مَارَّا جّْوَايهْ نِّي ذ أَسْ د-إِنّْضنْ، إِوْينْ-د غَارسْ مَارَّا إِنِّي ثُوغَا إِهڒْشنْ أَطَّاسْ، ‏36 ؤُشَا تَّارنْ زَّايسْ أَذْ ثنْ يجّْ أَذْ حَاذَانْ مْغِيرْ أَبحْڒُوڒْ ن ؤُجدْجَابْ نّسْ، ؤُ مَارَّا إِنِّي ث إِحَاذَانْ، ذوْڒنْ ڭّنْفَانْ.