‏1 أَوَارْنِي ڒَامِي إِكمّڒْ يشُّو ڒُومُورْ نّسْ إِ ثنْعَاشْ ن إِمحْضَارنْ نّسْ، يُويُورْ سّنِّي حِيمَا أَذْ إِسّڒْمذْ ؤُ أَذْ إِبَارّحْ ذِي ثْندَّامْ نْسنْ.

‏2 ڒَامِي ثُوغَا يُوحَانَّا إِتّسْڒَا ذِي ڒحْبسْ خْ ڒخْذَايمْ ن لْمَاسِيحْ، إِسّكّْ شَا زڭْ إِمحْضَارنْ نّسْ. ^▪   ‏3 إِنَّا أَسْ: ”مَا ذ شكْ ذ ونِّي د غَا يَاسنْ نِيغْ أَذْ نْرَاجَا إِجّنْ نّغْنِي؟“

‏4 يَارَّا-د يشُّو، إِنَّا أَسنْ: ”رُوحمْ، ثْعَاوْذمْ إِ يُوحَانَّا مِينْ ثسْڒَامْ ذ مِينْ ثژْرِيمْ! ‏5 أَقَا إِذَارْغَاڒنْ تّْوَاڒَانْ، إِنعْضَابنْ ڭُّورنْ ذ ينِّي ذِي إِدْجْ ڒْبَارْصْ تّْوَاسِيزْذِيڭنْ، إِذهْشَارْ ذوْڒنْ تّسْڒَانْ، إِمتِّيننْ تّْوَاسْنكَّارنْ-د ؤُ ڒخْبَارْ أَصبْحَانْ إِتّْوَابَارَّاحْ إِ إِمزْڒَاضْ. ^▪   ‏6 سّعْذْ ن ونِّي وَارْ ذ أَيِي إِتّنْذْرَافنْ.“

‏7 ڒَامِي ؤُيُورنْ إِنَا، إِبْذَا يشُّو إِسَّاوَاڒْ أَكْ-ذ ڒْغَاشِي خْ يُوحَانَّا، إِنَّا: ”مِينْ غَارْ د-ثفّْغمْ غَارْ ڒخْڒَا مَاحنْذْ أَذْ ث ثْژَارمْ؟ مَا غَارْ إِجّْ ن ؤُغَانِيمْ إِسّنْهزَّا ث ؤُسمِّيضْ؟ ^▪   ‏8 مَاشَا مِينْ غَارْ د-ثفّْغمْ غَارْ ڒخْڒَا مَاحنْذْ أَذْ ث ثْژَارمْ؟ مَا غَارْ إِجّْ ن بْنَاذمْ س وَارُّوضْ يَارْضبْ؟ خْزَارْ، إِنِّي يَارّْضنْ أَرُّوضْ إِغْڒَانْ يَارْضبْ، أَقَا أَثنْ ذِي ثُوذْرِينْ ن ؤُجدْجِيذْ. ‏9 مِينْ غَارْ د-ثفّْغمْ خنِّي مَاحنْذْ أَذْ ث ثْژَارمْ؟ إِجّْ ن ؤُنَابِي؟ وَاهْ، نشّْ أَذْ أَومْ إِنِيغْ، أَقَا ذ أَمقّْرَانْ عَاذْ خْ ؤُنَابِي.

‏10 أَقَا ذ وَا ذ ونِّي إِ خفْ إِتّْوَارِي وَاوَاڒْ-أَ: ’خْژَارْ، أَذْ د-سّكّغْ أَرقَّاسْ إِنُو زَّاثْ إِ وُوذمْ نّكْ، ونِّي إِ غَا إِسّْوجْذنْ أَبْرِيذْ نّكْ زَّاثكْ.‘ ^▪  

‏11 س ثِيذتّْ، نشّْ أَذْ أَومْ إِنِيغْ، جَارْ إِنِّي د-إِتّْوَاخڒْقنْ زِي ثمْغَارِينْ، وَارْ د-إِفِّيغْ ؤُڒَا ذ إِجّْ ذ أَمقّْرَانْ خْ يُوحَانَّا أَمْسغْضَاصْ، مَاشَا أَمژْيَانْ ذِي ثْڭلْذِيثْ ن إِجنْوَانْ ذ أَمقّْرَانْ خَاسْ.

‏12 زڭْ وُوسَّانْ ن يُوحَانَّا أَمْسغْضَاصْ أَڒْ إِضَا ثتّْوَانْذهْ ثْڭلْذِيثْ ن إِجنْوَانْ أَمْ ذَايسْ تّڭّنْ لْعُونْفْ، ؤُشَا أَيْثْ ن بُو-ڒخْشُونشْثْ تّطّْفنْ ت. ^▪  

‏13 مِينْزِي مَارَّا إِنَابِييّنْ ذ وذْلِيسْ إِتّْوَانّْضنْ ن شَّارِيعَا ثُوغَا تّْنَابَّانْ أَڒْ د-يَاسْ يُوحَانَّا. ^▫  

‏14 مَاڒَا ثخْسمْ أَذْ ت ثْقبْڒمْ، أَقَا وَانِيثَا ذ إِلِييَا ونِّي د غَا يَاسنْ. ^▪  

‏15 ونِّي غَارْ إِدْجْ إِمزُّوغنْ إِ ؤُسدْجِي أَذْ إِسڒْ.“

‏16 ”وِي أَكْ-ذ إِ غَا سّمْقُودّغْ جِّيڒْ-أَ؟ أَقَا-ث أَمشْنَاوْ إِحنْجِيرنْ إِقِّيمنْ ذِي ڒسْوَاقْ تّْڒَاغَانْ خْ إِمدُّوكَّاڒْ نْسنْ، ^▪  

‏17 قَّارنْ: ’أَقَا نْژمَّارْ أَومْ، كنِّيوْ وَارْ ثشْضِيحمْ. أَقَا نْغنّجْ إِجّْ ن وژْرِي ن وشْضَانْ إِ كنِّيوْ، مَاشَا وَارْ ثشْضِينمْ.‘

‏18 مَاغَارْ يُوسَا-د يُوحَانَّا، وَارْ إِتّتّْ، وَارْ إِسسّْ، ؤُشَا قَّارنْ نِيثْنِي: ’ذَايسْ إِجّْ ن ڒَارْيَاحْ أَعفَّانْ!‘ ^▪  

‏19 أَقَا مِّيسْ ن بْنَاذمْ يُوسَا-د، إِتّتّْ، إِسسّْ، ؤُشَا نِيثْنِي قَّارنْ: ’أَقَا ذِينْ بْنَاذمْ إِڒْهفْ خْ مَاشَّا ذ بِينُو، نتَّا ذ أَمدُّوكّڒْ ن أَيْثْ ن ضَّارِيبَا ذ إِمذْنَابْ!‘ مَاشَا ثِيغِيثْ ثتّْوَاسڭّذْ س ڒخْذَايمْ نّسْ.“

‏20 ڒخْذنِّي إِبْذَا إِتّْوبّخْ ثِيندَّامْ إِ ذِي إِڭَّا أَزْينْ أَمقّْرَانْ ن ڒعْجَايبْ نّسْ، مِينْزِي نِيثنْثِي وَارْ ثُوبنْثْ شَا. ^▪   ‏21 ”ؤُشْثْ خَامْ، أَ خُورَازِينْ، ؤُشْثْ خَامْ، أَ بَايْثْصَايْذَا! مْڒِي ثُوغَا تّْوَاڭّنْثْ ذِي صُورْ ذ صَايْذُونْ ڒعْجَايبْ إِجهْذنْ ثِينِّي إِتّْوَاڭّنْ ذَايْكنْثْ، إِڒِي أَقَا ثُوبنْثْ أَطَّاسْ زڭْ وَامِي س ثْخَانْشثْ ن وشْضَانْ ذ إِغّضْ خْ إِزدْجِيفنْ نْسنْثْ. ^▪   ‏22 مَاشَا نشّْ أَذْ أَومْ إِنِيغْ: أَذْ يِيڒِي ڒْحَاڒْ إِ ثنْذِينْثْ ن صُورْ ذ صَايْذُونْ إِهْونْ زِي ڒْحَاڒْ نْومْ ذڭْ وَاسّْ ن لْحِيسَابْ. ^▪   ‏23 إِ شمْ، أَ ثَانْذِينْثْ ن كَافَارْنَاحُومْ، ثنِّي إِتّْوَاسْڭعّْذنْ أَڒْ أَجنَّا؟ غَارْ ڒَاخَارْثْ إِ غَارْ ذ غَا ثهْوِيذْ. مِينْزِي مَاڒَا تّْوَاڭّنْثْ ذِي سَاذُومْ ڒعْجَايبْ إِجهْذنْ إِ ذَايمْ إِتّْوَاڭّنْ، إِڒِي أَقَا ثقِّيمْ أَڒْ أَسّْ ن يِيضَا. ‏24 مَاشَا نشّْ أَذْ أَومْ إِنِيغْ، أَذْ يِيڒِي ڒْحَاڒْ إِ ثمُّورْثْ ن سَاذُومْ إِهْونْ زِي ڒْحَاڒْ نّمْ ذڭْ وَاسّْ ن لْحِيسَابْ.“ ^▪  

‏25 ذِي ثْسَاعّثْ نِّي إِبْذَا يشُّو أَذْ يِينِي: ”حمْذغْ شكْ أَ بَابَا، سِيذِي ن ؤُجنَّا ذ ثمُّورْثْ، مِينْزِي ثسّْنُوفَّارذْ أَيَا خْ إِمِيغِيسنْ ذ إِمُوسْنَاونْ، مَاشَا ثسَّارڭْبذْ أَيَا إِ إِحنْجِيرنْ. ^▪   ‏26 وَاهْ، أَ بَابَا، مِينْزِي ذ وَا ذ أَرْضَا إِ شكْ. ‏27 مَارَّا مِينْ إِدْجَانْ إِمّوْشْ أَيِي-د زِي بَابَا، ؤُشَا ؤُڒَا ذ إِجّْ وَارْ إِسِّينْ ثَاممِّيثْ مْغِيرْ ثَابَابَاثْ، ؤُشَا ؤُڒَا ذ إِجّْ وَارْ إِسِّينْ ثَابَابَاثْ مْغِيرْ ثَاممِّيثْ ؤُ وِي ؤُمِي إِخْسْ ثْممِّيثْ أَذْ ث إِسَّارْڭبْ. ^▪   ‏28 أَسمْ-د غَارِي مَارَّا كنِّيوْ، إِنِّي يُوحْڒنْ ذ ينِّي يَارْپُونْ دّْقڒْ، أَذْ أَومْ وْشغْ أَرَّاحثْ،

‏29 كْسِيمْ-د أَزَايْڒُو إِنُو خَاومْ، ڒمْذمْ زَّايِي، مِينْزِي نشّْ ذ أَمْهِينْ ذ أَمْوَاضعْ ن وُوڒْ ؤُشَا أَذْ ثَافمْ أَرَّاحثْ إِ ڒعْمُورْ نْومْ. ^▪   ‏30 مِينْزِي أَزَايْڒُو ذ ڒحْمڒْ إِنُو فْسُوسنْ.“ ^▪