أَعْذَاڒْ ن يَاهُوذَا ذ إِسْرَائِيل
10
1 تَّارمْ أَنْژَارْ زِي سِيذِي، ذِي ڒْوقْثْ ن ونْژَارْ ن ثفْسُوثْ.
سِيذِي إِتّڭّْ أَسَّامنْ.
نتَّا أَذْ إِوْشْ إِپُوذَا ن ونْژَارْ،
إِ كُوڒْ إِجّْ ن وفْسُو ذڭْ إِيَّارْ. ▫
2 مَاغَارْ ڒخْيَاڒَاثْ ن لْ-أَصْنَامْ سَّاوَاڒنْ ڒْغشّْ،
ؤُ إِڭزَّاننْ تّْوَاڒَانْ إِخَارِّيقنْ
ؤُ نِيثْنِي تّْعَاوَاذنْ ثِيرْجَا إِشمّْثنْ،
نِيثْنِي سّْفوَّاجنْ س ڒعْوِينْ.
س ؤُينِّي إِ تّْوَاسِيڭّْوجنْ أَمْ وُودْجِي،
تّْوَاحْصَارنْ، مِينْزِي أَمكْسَاوْ وَارْ ذِينْ إِدْجِي. ▫ ▪
3 خْ إِمكْسَاونْ يَارْغَا وغْضَابْ إِنُو
ؤُ نشّْ أَذْ خدْجْصغْ إِغَايْضنْ،
مَاغَارْ سِيذِي ن ڒْعسْكَارَاثْ أَذْ إِسِّيجّْ خْ ثْحِيمَارْثْ نّسْ،
خْ ثَادَّارْثْ ن يَاهُوذَا،
ؤُ نتَّا أَذْ ثنْ إِسدّْ أَمْ ؤُيِيسْ نّسْ إِتِّيسِّيقنْ غَارْ ؤُمنْغِي.
4 زَّايسْ أَژْرُو ن ثغْمَارْثْ،
زَّايسْ ڒوْثذْ،
زَّايسْ ڒْقوْسْ ن ؤُمنْغِي،
أَذْ زَّايسْ د-فّْغنْ مَارَّا إِمْزيَّارنْ جْمِيعْ.
5 نِيثْنِي مَارَّا أَذْ ذوْڒنْ أَمْ أَيْثْ ن بُو-ثغْرُوضْثْ
إِنِّي ذڭْ ؤُمنْغِي أَذْ عفْسنْ خْ ؤُبدْجَاعْ ذِي زّْنَاقِي.
وَاهْ، نِيثْنِي أَذْ مّنْغنْ،
مَاغَارْ سِيذِي أَذْ يِيڒِي أَكِيذْسنْ،
ؤُ نِيثْنِي أَذْ سّضْحَانْ إِنِّي إِنْيِينْ خْ ييْسَانْ.
6 نشّْ أَذْ سّْجهْذغْ ثَادَّارْثْ ن يَاهُوذَا
ؤُ أَذْ سّْنجْمغْ ثَادَّارْثْ ن يُوسُوفْ
ؤُ نشّْ أَذْ أَسنْ وْشغْ ثَازذِّيغْثْ،
مَاغَارْ نشّْ أَرّحْمغْ ذَايْسنْ
ؤُ نِيثْنِي أَذْ إِڒِينْ أَخْمِي نشّْ وَارْ ثنْ نْضَارغْ،
مَاغَارْ نشّْ ذ سِيذِي، أَربِّي نْسنْ،
ؤُ نشّْ أَذْ غَارْسنْ سْڒغْ.
7 إِنِّي ن إِفْرَايِيمْ أَذْ إِڒِينْ أَمْ إِجّْ ن بُو-ثغْرُوضْثْ
ؤُ ؤُڒْ نْسنْ أَذْ إِفَارْحْ أَمْ غَارْ بِينُو،
ؤُ إِحنْجِيرنْ نْسنْ أَذْ ث ژَترنْ ؤُ أَذْ فَارْحنْ،
ؤُڒْ نْسنْ أَذْ إِفَارْحْ ذِي سِيذِي.
8 نشّْ أَذْ خَاسنْ صفَّارغْ ؤُ أَذْ ثنْ سّْمُونغْ،
مَاغَارْ نشّْ فْذِيغْ ثنْ ؤُ نِيثْنِي أَذْ د-ذوْڒنْ ذڭْ وَاطَّاسْ،
أَمْ مَامّشْ ثنْ ثُوغَا ذڭْ وَاطَّاسْ.
9 نشّْ أَذْ ثنْ زَارْعغْ جَارْ ڒڭْنُوسْ
ؤُ نِيثْنِي أَذْ أَيِي إِذَارنْ ذِي جّْوَايهْ إِڭّْوجّنْ.
أَذْ دَّارنْ ذِينْ أَكْ-ذ إِحنْجِيرنْ نْسنْ ؤُشَا أَذْ د-ذوْڒنْ.
10 نشّْ أَذْ ثنْ جّغْ أَذْ د-عقْبنْ زِي مِيسْڒَا
ؤُ أَذْ ثنْ د-سّْمُونغْ زِي أَشُّورْ
ؤُ أَذْ ثنْ د-أَوْيغْ غَارْ ثمُّورْثْ ن جِيلْعَاذْ ؤُ غَارْ لُوبْنَانْ،
مَاشَا أَيَا وَارْ ثنْ إِتّْقذِّي.
11 نتَّا أَذْ إِژْوَا ڒبْحَارْ ن ڒحْصَارثْ نْسنْ
ؤُ أَذْ إِوّثْ ڒمْوَاجْ ن ڒبْحَارْ
ؤُ مَارَّا إِمُوشَانْ يُودْجْغنْ ن يغْزَارْ ن نِيلْ أَذْ أَژْغنْ.
نّْفَاخثْ ن أَشُّورْ أَذْ ثتّْوَاسْوَاضعْ،
ؤُ أَزدْجَاضْ ن مِيسْڒَا أَذْ إِتّْوَاودَّارْ.
12 نشّْ أَذْ ثنْ سّْجهْذغْ ذِي سِيذِي
ؤُ نِيثْنِي أَذْ ؤُيُورنْ ذڭْ يِيسمْ نّسْ،
أَمُّو إِ إِقَّارْ سِيذِي.