ڒْحُوكْمْ خْ ڒْعذْيَانْ ن إِسْرَائِيل
9
1 ڒْحُوكْمْ إِسَّاڭّْوَاذنْ ن وَاوَاڒْ ن سِيذِي خْ ثمُّورْثْ ن حَاذْرَاخْ، ڒْحُوكْمْ نِّي يَارْسَانْ خْ ذِيمَاشْقْ، - مَاغَارْ سِيذِي إِحطَّا خْ بْنَاذمْ ؤُ خْ مَارَّا ثِيقبَّاڒْ ن إِسْرَائِيل - ،
2 ؤُڒَا خْ حَامَاثْ إِ-ت-د-إِڒسْقنْ،
خْ صُورْ ذ صِيذُونْ، وَاخَّا نِيثنْثِي ذ ثِيمِيغِيسِينْ أَطَّاسْ.
3 ثبْنَا صُورْ إِجّْ ن لْپُورْجْ إِ يِيخفْ نّسْ
ؤُ ثيْرُو نُّوقَارْثْ أَمْ ثْعجَّاجْثْ
ذ وُورغْ إِقُّورنْ أَمْ ؤُبدْجَاعْ ن إِمسْرَاقْ.
4 خْزَارْ، سِيذِي أَذْ ت إِطّفْ
ؤُ أَذْ إِوّثْ لْبَارَاجْ نّسْ غَارْ ڒبْحَارْ،
ؤُشَا أَذْ ت ثشّْ ثْمسِّي.
5 أَشْكلُونْ أَذْ ت ثْژَارْ، أَذْ ثذْوڒْ ثڭّْوذْ،
أَمُّو ؤُڒَا ذ غَازَّا، أَذْ ثَارْجِيجْ أَطَّاسْ،
ؤُڒَا ذ عَاقْرُونْ، مَاغَارْ أَذْ إِفْشڒْ ؤُرَاجِي نّسْ.
أَذْ إِتّْوَاثحَّا ؤُجدْجِيذْ زِي غَازَّا
ؤُ ثَانْذِينْثْ ن أَشْقَالُونْ وَارْ ثتّْوَازدّغْ.
6 مِّيسْ ن ڒحْرَامْ أَذْ إِزْذغْ ذِي أَشْذُوذْ،
ؤُ نشّْ أَذْ ثحِّيغْ نّْفَاخثْ ن إِفِيلِيسْطِينِييّنْ. ▫
7 نشّْ أَذْ كْسِيغْ إِذَامّنْ زڭْ ؤُقمُّومْ نّسْ
ؤُڒَا ذ نّْعَاوَاثْ زِي جَارْ ثِيغْمَاسْ نّسْ
ؤُ أَمُّو إِ غَا إِقِّيمْ ؤُڒَا ذ نتَّا إِ أَربِّي نّغْ.
نتَّا أَذْ يِيڒِي أَمْ إِجّْ ن ومْغَارْ ذِي يَاهُوذَا
ؤُ عَاقْرُونْ أَمْ إِجّْ ن ؤُيَاپُوسِي.
8 نشّْ أَذْ ڭّغْ ڒْمَارْڭحْ إِنُو ذڭْ ونّضْ ن ثَادَّارْثْ إِنُو،
ضِيدّْ ن ونِّي إِ غَا إِژْوَانْ ؤُ ضِيدّْ ن ونِّي د غَا إِذوْڒنْ،
حِيمَا ونِّي إِحصَّارنْ وَارْ خَاسْ إِعدُّو شَا عَاذْ،
مَاغَارْ ڒخُّو ژْڒِيغْ ث س ثِيطَّاوِينْ إِنُو.
أَجدْجِيذْ إِ د غَا يَاسنْ
9 فَارْحْ، أَ ثَايدْجِيثْ صِيهْيُونْ، سْڒِيوْڒوْ، أَ ثَايدْجِيثْ ؤُرْشَالِيمْ!
خْزَارْ، أَجدْجِيذْ نّمْ يُوسَا-د غَارمْ،
نتَّا ذ أَمْسڭّذْ ؤُ أَقَا إِوْجذْ حِيمَا أَذْ إِسّنْجمْ،
نتَّا ذ أَمْوَاضعْ ؤُ إِنْيَا خْ إِجّْ ن وغْيُوڒْ،
خْ إِجّْ ن وزْعُوقْ، أَسْنُوسْ ن إِشْثْ ن ثغْيُوتْشْ.
10 نشّْ أَذْ قْضِيغْ إِكَارُّوثنْ ن ؤُمنْغِي زِي إِفْرَايِيمْ
ؤُڒَا ذ إِيْسَانْ زِي ؤُرْشَالِيمْ.
أَذْ إِتّْوَاقْڒعْ ؤُڒَا ذ ڒْقوْسْ.
نتَّا أَذْ إِبَارّحْ س ڒهْنَا إِ رڭْنُوسْ
ؤُ صُّولْطَا نّسْ أَذْ ثِيڒِي زِي ڒبْحَارْ أَڒْ ڒبْحَارْ
ؤُ زڭْ إِغْزَارْ ن لْفُورَاطْ أَڒْ إِنڭُّورَا ن ثمُّورْثْ.
11 ؤُڒَا ذ شمْ، أَ يدْجِيسْ ن صِيهْيُونْ، زِي سِّيبّثْ ن إِذَامّنْ ن ڒْعَاهْذْ نّمْ
فكّغْ-د إِمحْبَاسْ نّمْ زڭْ وَانُو يُوژْغنْ إِ وَارْ ذِي دْجِينْ وَامَانْ. ▪
12 عقْبمْ غَارْ لْپُورْجْ نْومْ، كنِّيوْ إِمحْبَاسْ إِنِّي غَارْ إِدْجْ ؤُسِيثمْ.
ؤُڒَا ذ أَسّْ-أَ نشّْ تّْبَارّْحغْ: أَقَا نشّْ أَذْ غَارمْ د-أَرّغْ ثْنَاينْ ن ثْسقَّارْ،
13 مَاغَارْ نشّْ أَذْ محْضغْ يَاهُوذَا أَمْ إِجّْ ن ڒْقوْسْ
ؤُ أَذْ ڭّغْ إِفْرَايِيمْ خْ ڒْقوْسْ.
نشّْ أَذْ سّكَّارغْ إِحنْجِيرنْ نّمْ، أَ صِيهْيُونْ،
ضِيدّْ إِ إِحنْجِيرنْ نّكْ، أَ لْيُونَانْ،
ؤُ نشّْ أَذْ شكْ أَرّغْ أَمشْنَاوْ سِّيفْ ن إِجّْ ن بُو-ثغْرُوضْثْ. ▫
سِيذِي أَذْ إِسّنْجمْ ڒْڭنْسْ نّسْ
14 سِيذِي أَذْ إِبَانْ سنّجْ نْسنْ
ؤُ فْڒِيثْشَاثْ نّسْ أَذْ إِڒِينْثْ تّْوسّْڭنْثْ أَمْ وَاسَّامْ
ؤُ سِيذِي إِنُو، سِيذِي، أَذْ إِصُوضْ ذڭْ ؤُيِيشّْ ن إِشَارِّي،
أَذْ يُويُورْ أَكْ-ذ ثْحَارْيَاضِينْ ن ؤُصمِّيضْ ن لْجَانُوبْ. ▪
15 سِيذِي ن ڒْعسْكَارَاثْ أَذْ ثنْ إِسّْذُوڒِي ؤُ نِيثْنِي أَذْ شّنْ.
أَذْ دّْزنْ إِژْرَا ن إِدْجِييْ ؤُشَا أَذْ سْونْ،
أَذْ ڭّنْ دّْرِيزْ أَمْ غَارْ بِينُو
ؤُ أَذْ ذوْڒنْ شُّورنْ س إِذَامّنْ أَمْ طَّاوْيَا ن ؤُرُوشِّي،
أَمْ ثْغمَّارْ ن ؤُعَالْطَارْ.
16 سِيذِي، أَربِّي نْومْ أَذْ ثنْ إِسّنْجمْ ذڭْ وَاسّْ نِّي
أَمْ وُودْجِي ن ڒْڭنْسْ نّسْ،
مَاغَارْ نِيثْنِي أَمشْنَاوْ إِژْرَا إِغْڒَانْ
إِتِّيسِّيقنْ خْ ثمُّورْثْ نّسْ.
17 مَاغَارْ مشْهَاڒْ مَا إِمْغَارْ أَذْ يِيڒِي ڒْخَارْ نّسْ
ؤُ مشْهَاڒْ مَا إِمْغَارْ أَذْ يِيڒِي وَاژْڒِي نّسْ!
إِمنْذِي أَذْ إِسّغْمِي إِحُوذْرِييّنْ
ؤُڒَا بِينُو ن جْذِيذْ ثِيعْزَارِييِّينْ.