‏1 أَوَارْنِي أَسْ إِسّْشنْ أَيِي يَاهُوشَاعْ، أَرَّايْسْ ن إِكهَّاننْ. نتَّا ثُوغَا إِبدّْ زَّاثْ إِ وُوذمْ ن لْمَالَاكْ ن سِيذِي. شِّيطَانْ إِبدّْ-د غَارْ ؤُفُوسْ أَفُوسِي ن يَاشُوعَا حِيمَا أَذْ زَّايسْ إِسّْشثْشَا. ‏2 سِيذِي إِنَّا إِ شِّيطَانْ: ”أَذْ يِيڒِي أَذْ شكْ إِعَاقبْ سِيذِي، أَ شِّيطَانْ! أَذْ شكْ إِعَاقبْ سِيذِي، ونِّي إِفَارْزنْ ؤُرْشَالِيمْ! مَا وَارْ إِدْجِي يَاهُوشَاعْ وَانِيثَا ذ إِجّْ ن ؤُكشُّوضْ قڒْعنْ ث-د زِي ثْمسِّي؟“ ^▪   ‏3 يَاهُوشَاعْ ثُوغَا يَارْضْ أَرُّوضْ إِوسّْخنْ أَمْ إِبدّْ زَّاثْ إِ وُوذمْ ن لْمَالَاكْ.

‏4 خنِّي إِطّفْ نتَّا ذڭْ وَاوَاڒْ ؤُشَا إِسِّيوڒْ أَكْ-ذ ينِّي إِبدّنْ زَّاثْ إِ وُوذمْ نّسْ، إِنَّا: ”كّْسمْ أَسْ أَرُّوضْ إِوسّْخنْ إِ وَانِيثَا!“ ؤُ نتَّا إِنَّا أَسْ: ”خْزَارْ، نشّْ كّْسغْ زَّايكْ ڒْمُوعْصِييّثْ نّكْ ؤُ أَذْ شكْ سّْيَارْضغْ س إِجّْ ن وَارُّوضْ إِشُووَّارنْ.“ ^▪   ‏5 نشّْ نِّيغْ: ”أَذْ أَسْ قّْننْ إِجّْ ن أَرژّثْ ثَامزْذَاڭْثْ خْ ؤُزدْجِيفْ نّسْ!“ ؤُ نِيثْنِي قّْننْ أَسْ أَرژّثْ ثَامزْذَاڭْثْ خْ ؤُزدْجِيفْ نّسْ ؤُشَا سّْيَارْضنْ أَسْ أَرُّوضْ إِشُووَّارنْ ؤُ لْمَالَاكْ ن سِيذِي إِبدّْ ذِينْ.

‏6 خَاسْ ؤُشَا إِشْهذْ لْمَالَاكْ ن سِيذِي إِ يَاهُوشَاعْ، إِنَّا:

‏7 ”أَمُّو إِ إِقَّارْ سِيذِي ن ڒْعسْكَارَاثْ:

مَاڒَا شكْ ثُويُورذْ خْ إِبْرِيذنْ إِنُو،

ؤُ مَاڒَا شكْ أَذْ ثحْضِيذْ ثَاسخَّارْثْ إِنُو،

خنِّي أَذْ ثسُّويُورذْ ؤُڒَا ذ ثَادَّارْثْ إِنُو س ڒْحقّْ

ؤُ أَذْ ثِيڒِيذْ ذ أَمحْضَايْ ن ڒمْرَاحَاثْ إِنُو،

ؤُ نشّْ أَذْ أَشْ وْشغْ أَذْ ثْزمَّارذْ أَذْ ثْرَاحذْ أَذْ ثَاذْفذْ

جَارْ إِنِّي ذَا إِبدّنْ.

‏8 خنِّي سڒْ، يَاهُوشَاعْ، شكْ، أَرَّايْسْ ن إِكهَّاننْ،

شكْ ذ إِمدُّوكَّاڒْ نّكْ، إِنِّي إِقِّيمنْ زَّاثكْ،

مَاغَارْ نِيثْنِي ذ إِشْثْ ن ڒعْڒَامثْ ن ؤُثبْهثْ،

مَاغَارْ خْزَارْ، نشّْ أَذْ د-أَوْيغْ أَمْسخَّارْ إِنُو، ’أَغدُّو‘. ^▪  

‏9 مَاغَارْ خْزَارْ، أَژْرُو،

ونِّي ذِينْ سَّارْسغْ زَّاثْ إِ يَاهُوشَاعْ،

خْ وژْڒُو نِّي خزَّارنْثْ سبْعَا ن ثِيطَّاوِينْ.

خْزَارْ، نشّْ أَذْ نقْشغْ ثَانقَّاشْثْ نّسْ،

أَمُّو إِ إِقَّارْ سِيذِي ن ڒْعسْكَارَاثْ،

ؤُ نشّْ أَذْ كّْسغْ ڒْمُوعْصِييّثْ ن ثمُّورْثْ-أَ ذڭْ إِجّْ ن وَاسّْ.

‏10 ذڭْ وَاسّْ نِّي، إِقَّارْ سِيذِي ن ڒْعسْكَارَاثْ،

أَذْ ثْعَارْضمْ إِجّْ إِ ونّغْنِي سَاذُو ثْزَايَارْثْ ؤُ سَاذُو وَارْثُو.“