‏1 نشّْ سّْڭعّْذغْ ثِيطَّاوِينْ إِنُو ؤُشَا ژْرِيغْ، ؤُ خْزَارْ أَقَا ذِينْ أَربْعَا ن وَاشَّاونْ. ‏2 نشّْ نِّيغْ إِ لْمَالَاكْ نِّي كِيذِي إِسَّاوَاڒنْ: ”مِينْ عْنَانْ إِنَا؟“ نتَّا يَارَّا-د خَافِي: ”إِنَا ذ أَربْعَا ن وَاشَّاونْ نِّي إِزُوزَّارنْ يَاهُوذَا، إِسْرَائِيل ذ ؤُرْشَالِيمْ.“

‏3 خنِّي إِسّْشنْ أَيِي سِيذِي أَربْعَا ن إِمْزِيڒنْ. ‏4 ڒخْذنِّي نشّْ نِّيغْ: ”مِينْ ؤُمِي د-ؤُسِينْ نِيثْنِي، مِينْ غَا ڭّنْ؟“ نتَّا إِسِّيوڒْ، إِنَّا: ”إِنَا ذ أَشَّاونْ نِّي إِزُوزَّارنْ يَاهُوذَا، أَڒَامِي وَارْ د-إِسّْڭعّذْ عَاذْ ؤُڒَا ذ إِجّْ أَزدْجِيفْ نّسْ، مَاشَا إِنَا ؤُسِينْ-د حِيمَا أَذْ ثنْ سّْنخْڒْعنْ، حِيمَا أَذْ نْضَارنْ أَشَّاونْ ن ڒڭْنُوسْ نِّي د-إِسّْڭعّْذنْ إِشّْ ضِيدّْ إِ ثمُّورْثْ ن يَاهُوذَا حِيمَا أَذْ ت زُوزَّارنْ.“

‏5 نشّْ سّْڭعّْذغْ ثِيطَّاوِينْ إِنُو، ژْرِيغْ، ؤُ خْزَارْ، أَقَا ذِينْ إِجّْ ن ورْيَازْ س ؤُفِيڒُو ن ڒعْبَارْ ذڭْ ؤُفُوسْ نّسْ. ‏6 نشّْ نِّيغْ: ”مَانِي إِ غَا ثْرَاحذْ شكْ؟“ نتَّا يَارَّا-د ”نشّْ أَذْ رَاحغْ حِيمَا أَذْ عْبَارغْ ؤُرْشَالِيمْ مَاحنْذْ أَذْ ژَترغْ مشْحَاڒْ ثدْجْ ثِيرُو نّسْ ؤُ مشْحَاڒْ ثدْجْ ثُوزّڭَّارْثْ نّسْ.“ ‏7 ؤُ خْزَارْ، إِفّغْ-د لْمَالَاكْ نِّي كِيذِي إِسَّاوَاڒنْ ؤُشَا إِجّْ ن لْمَالَاكْ نّغْنِي إِفّغْ-د حِيمَا أَذْ كِيذسْ إِمّڒْقَا، ‏8 إِنَّا أَسْ: ”ذغْيثْ، سِيوڒْ أَكْ-ذ ؤُحُوذْرِي نِّي، إِنِي:

’ؤُرْشَالِيمْ أَذْ ثِيڒِي ذ إِشْثْ ن دّمْنثْ ثنُّورْزمْ ثمْغَارْ

زِي سِّيبّثْ ن وَاطَّاسْ ن إِوْذَانْ ذ ڒْمَاڒْ إِ إِدْجَانْ ذِي ڒْوسْثْ نّسْ.

‏9 نشّْ أَذْ أَسْ إِڒِيغْ ذ إِجّْ ن ڒْحِيضْ ن ثْمسِّي إِ ذ أَسْ-د إِتّنّْضنْ، إِقَّارْ سِيذِي،

ؤُ ذِي ڒْوسْثْ نّسْ أَذْ أَسْ إِڒِيغْ إِ ؤُعُودْجِي.

‏10 ذغْيَامْ، ذغْيَامْ، أَروْڒمْ زِي ثمُّورْثْ ن شَّامَالْ، أَمُّو إِ إِقَّارْ سِيذِي،

\qt مَاغَارْ نشّْ أَذْ كنِّيوْ بْضِيغْ خْ أَربْعَا ن إِسمِّيضنْ ن ؤُجنَّا،

أَمُّو إِ إِقَّارْ سِيذِي.

‏11  ذغْيَاثْ، صِيهْيُونْ، فكّثْ،

شمْ ذ ثنِّي إِزدّْغنْ غَارْ يدْجِيسْ ن بَابِيلْ!‘ “

‏12 ”مَاغَارْ أَمُّو إِ إِقَّارْ سِيذِي ن ڒْعسْكَارَاثْ:

ذِي طّْوعْ ن ؤُعُودْجِي،

إِسّكّْ أَيِي-د نتَّا غَارْ ڒڭْنُوسْ نِّي كنِّيوْ إِكشّْضنْ،

مَاغَارْ ونِّي كنِّيوْ إِ غَا إِحَاذَانْ، إِحَاذَا مُومُّو ن ثِيطّْ إِنُو.

‏13 مَاغَارْ خْزَارْ، نشّْ سّنْهزّغْ أَفُوسْ إِنُو خَاسنْ،

ؤُ نِيثْنِي أَذْ ذوْڒنْ ذ ثَاكشَّاضْثْ ن إِمْسخَّارنْ نْسنْ.

كنِّيوْ أَذْ ثسّْنمْ

أَقَا إِسّكّْ أَيِي-د سِيذِي ن ڒْعسْكَارَاثْ.

‏14 سْڒِيوْڒوْ ؤُ فَارْحْ، أَ ثَايدْجِيثْ صِيهْيُونْ،

مَاغَارْ خْزَارْ، نشّْ أَذْ د-أَسغْ ؤُ أَذْ زذْغغْ ذِي ڒْوسْثْ نّمْ،

أَمُّو إِ إِقَّارْ سِيذِي. ^▪  

‏15 ذڭْ وَاسّْ نِّي أَذْ قّْننْ وَاطَّاسْ ن ڒڭْنُوسْ غَارْ سِيذِي،

ؤُ نِيثْنِي أَذْ إِڒِينْ ذ ڒْڭنْسْ إِنُو،

ؤُ نشّْ أَذْ زذْغغْ ذِي ڒْوسْثْ نّمْ ؤُ أَذْ ثسّْنذْ،

أَقَا سِيذِي ن ڒْعسْكَارَاثْ إِسّكّْ أَيِي-د غَارمْ.

‏16 سِيذِي أَذْ إِطّفْ يَاهُوذَا ذ ثَاغَارْسْثْ خْ ثمُّورْثْ إِقدّْسنْ.

نتَّا أَذْ إِفَارْزْ ؤُرْشَالِيمْ عَاذْ.

‏17 أجّْ مَارَّا دَّاثْ أَذْ إِسّغْذْ زَّاثْ إِ وُوذمْ ن سِيذِي،

مَاغَارْ نتَّا إِفَاقْ-د زِي ثْزذِّيغْثْ نّسْ إِقدّْسنْ.“