سِيذِي يَارَّا-د خْ حَابَاقُّوقْ إِ ثْوَاڒَا وِيسّْ ثْنَاينْ
2
1 نشّْ ڭِّيغْ أَذْ بدّغْ ذڭْ ومْشَانْ ن ثْعسَّاسْثْ إِنُو ؤُ سّْبدّغْ إِخفْ إِنُو خْ صُّومْعثْ ن ثْعسَّاسْثْ،
صوْضغْ مَاحنْذْ أَذْ ژَترغْ مِينْ إِ ذ أَيِي غَا يِينِي نتَّا،
ؤُ مِينْ غَا يَارّغْ خْ ؤُشثْشِي إِنُو. ▪
2 يَارَّا-د خَافِي سِيذِي ؤُشَا إِنَّا:
أَرِي ثَامژْرِيوْثْ،
أَرِي ت ثْفَارْزْ خْ ثڒْوِيحِينْ،
مَاحنْذْ ونِّي إِعدُّونْ إِزمَّارْ أَذْ ت إِغَارْ. ▪
3 مَاغَارْ ثَامژْرِيوْثْ ثتّْرَاجَا عَاذْ أَڒْ ڒْوقْثْ نِّي يُورَانْ.
ثتّمْحِيزْوَارْ غَارْ ؤُقطُّو ؤُ وَارْ ثسّْخَارِّيقْ شَا.
مَاڒَا ثقِّيمْ وَارْ د-ثتِّيسْ، قِّيمْ رَاجَا ت،
مَاغَارْ أَذْ د-ثَاسْ س ثِيذتّْ، وَارْ ڭُّورْ أَذْ ثْعطَّاڒْ.
4 خْزَارْ، أَقَا إِتُّوفّْ، وَاهْ، ڒعْمَارْ نّسْ وَارْ إِسڭّمْ ذَايسْ،
مَاشَا أَمْسڭّذْ س لْ-إِيمَانْ نّسْ أَذْ إِدَّارْ. ▫
5 س ثِيذتّْ، بِينُو أَقَا إِشمّثْ!
بِينُو أَقَا-ث أَمْ يِيجّْ ن بُو-نّْفَاخثْ ونِّي وَارْ إِتَّاريّْحنْ،
ونِّي إِسّمْغَارَانْ ڒعْمَارْ نّسْ أَمْ ڒَاخَارْثْ.
نتَّا وَارْ إِتّْجِّيوِينْ أَمْ ڒْموْثْ
ؤُ إِيْرُو غَارسْ مَارَّا ڒڭْنُوسْ
ؤُ إِسّْمُونْ غَارسْ مَارَّا إِيْذُوذنْ. ▫
6 مَا وَارْ د خَاسْ تِّيوْينْ نِيثْنِي إِجّْ ن وَاوَاڒْ إِوزْننْ
ؤُڒَا ذ إِجّْ ن يژْرِي إِشُّورْ س ڒمْعَانِي إِنُّوفَارنْ، أَذْ إِنِينْ:
ؤُشْثْ خْ ونِّي إِجَارّْونْ مِينْ وَارْ إِدْجِينْ نّسْ!
أَڒْ مڒْمِي عَاذْ؟
ؤُشْثْ خْ ونِّي إِسّْذقَّاڒنْ إِخفْ نّسْ س ورْهَانْ!
7 مَا وَارْ د-تّكَّارنْ س ڒْغفْڒثْ إِنِّي إِ شكْ غَا إِزعْفنْ،
ؤُ مَا وَارْ د-تّْفَاقَانْ شَا إِنِّي شكْ غَا يَارّنْ ثتَّارْجِيجذْ،
ؤُ مَا وَارْ ذ أَسنْ ثتِّيڒِيذْ ذ ثَاكشَّاضْثْ نْسنْ؟
8 مَاغَارْ شكْ ثْكشّْضذْ أَطَّاسْ ن ڒڭْنُوسْ،
أَذْ شكْ كشّْضنْ مَارَّا ڒڭْنُوسْ إِقِّيمنْ
ذِي سِّيبّثْ ن إِذَامّنْ ن إِوْذَانْ ذ لْعُونْفْ خْ ثمُّورْثْ،
ؤُ خْ ثنْذِينْثْ ؤُ خْ مَارَّا إِنِّي ذَايسْ إِزدّْغنْ.
9 ؤُشْثْ خْ ونِّي إِكسّْبنْ س ڒْغشّْ ثَاكشَّاضْثْ إِ ثَادَّارْثْ نّسْ،
مَاحنْذْ أَذْ إِبْنَا ڒْعُوشّْ نّسْ ذِي ڒُوعْڒَا،
حِيمَا أَذْ إِنْجمْ أَمُّو زڭْ ؤُفُوسْ ن ڒْغَارْ.
10 شكْ ثْشَاوَارذْ ڒفْضِيحثْ إِ ثَادَّارْثْ نّكْ،
حِيمَا أَذْ ثقْضِيذْ خْ ڒڭْنُوسْ،
ؤُشَا أَمُّو إِ ثڭِّيذْ دّنْبْ ذِي ڒعْمَارْ نّكْ.
11 مِينْزِي أَژْرُو إِسْغُويُّو-د زِي ڒْحِيضْ،
ؤُ ثَاحْنَاشْثْ ثتَّارَّا-د خَاسْ زِي جَارْ ثفْرَاوْثْ.
12 ؤُشْثْ خْ ونِّي إِبنَّانْ إِشْثْ ن ثنْذِينْثْ س إِذَامّنْ
ؤُڒَا خْ ونِّي إِسّْرُوسَانْ ذْسَاسْ ن يِيشْثْ ن ثنْذِينْثْ س ڒْغشّْ!
13 خْزَارْ، مَا وَارْ إِدْجِي زِي سِيذِي ن ڒْعسْكَارَاثْ،
أَقَا ڒڭْنُوسْ أَربّْرنْ إِخفْ نْسنْ إِ ثْمسِّي،
ؤُ شُّوعُوبْ تَّاحْڒنْ إِ وَالُو؟
14 مَاغَارْ ثَامُّورْثْ أَذْ ثتّْوَاشُّورْ
س ثُوسّْنَا ن ؤُعُودْجِي ن سِيذِي،
أَمْ مَامّشْ تّْذَاڒنْ وَامَانْ ڒبْحَارْ.
15 ؤُشْثْ خْ ونِّي إِسّسّنْ أَمْقَارّبْ نّسْ،
ونِّي إِخدْجْضنْ بِينُو س سّمْ نّكْ ؤُ خنِّي إِسّْشَارْ إِ-ث،
مَاحنْذْ أَذْ إِژَارْ ثُوعَّارْيَانْثْ نْسنْ.
16 أَذْ ثسّْيِيوْنذْ إِخفْ نّكْ س ڒفْضِيحثْ ذڭْ ومْشَانْ ن شَّانْ.
سُو شكْ ڒخُّو عَاوذْ، ؤُشَا أجّْ أَخْثَانْ نّكْ وَارْ إِدْجِينْ إِتّْبَانْ.
ڒْكَاسْ زڭْ ؤُفُوسْ أَفُوسِي ن سِيذِي أَذْ غَاركْ د-يَاسْ،
ؤُڒَا ذ ڒفْذِيحثْ خْ ؤُعُودْجِي نّكْ.
17 مَاغَارْ ڒْعُونْفْ إِ ثڭِّيذْ ضِيدّْ إِ لُوبْنَانْ أَذْ شكْ إِذڒْ
ؤُڒَا ذ أَردّدْجْ ن ڒْمَاڒْ إِ زِي ثنْ ثسِّيڭّْوْذذْ،
ذِي سِّيبّثْ ن إِذَامّنْ ن إِوْذَانْ ذ لْعُونْفْ خْ ثمُّورْثْ،
ؤُ خْ ثنْذِينْثْ ؤُ خْ مَارَّا إِنِّي ذَايسْ إِزدّْغنْ.
ڭّْوذمْ سِيذِي، وَارْ إِدْجِي لَاصْنَامْ إِمتَّانْ
18 مَا ثِيزِي ن إِجّْ ن ڒخْيَاڒْ إِنقْشنْ،
ؤُمِي ث إِنْقشْ ؤُنقَّاشْ س يِيخفْ نّسْ،
مَانْ ثِيزِي ن يِيجّْ ن ڒخْيَاڒْ إِفسْينْ ؤُ ن إِجّْ ن ؤُمْسڒْمذْ ن إِخَارِّيقنْ،
ڒَامِي ونِّي ث إِڭِّينْ إِتّْشڒْ خْ مِينْ إِڭَّا،
ؤُمِي إِتّڭّْ لْ-أَصْنَامْ إِڭنْونْ؟
19 ؤُشْثْ خْ ونِّي إِقَّارنْ إِ ؤُكشُّوضْ ’فَاقْ!‘
ؤُ إِ وژْرُو إِڭنْونْ ’كَّارْ!‘.
مَا إِزمَّارْ أَذْ إِسّڒْمذْ؟
خْزَارْ، أَقَا إِتّْوَاڒحّفْ س وُورغْ ذ نُّوقَارْثْ
ؤُ وَارْ ذَايسْ قَاعْ بُو بُوحْبڒْ.
20 سِيذِي أَقَا-ث ذِي زَّاوشْثْ نّسْ إِقدّْسنْ.
سُوسمْ زَّاثْ إِ وُوذمْ نّسْ، مَارَّا ثَامُّورْثْ!