‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”أَ مِّيسْ ن بْنَاذمْ، سِيوڒْ أَكْ-ذ ثَارْوَا ن ڒْڭنْسْ نّكْ، إِنِي أَسنْ: خْمِي إِ غَا يْأَوْيغْ سِّيفْ خْ ثمُّورْثْ ؤُشَا ڒْڭنْسْ ن ثمُّورْثْ أَذْ إِكْسِي إِجّْ ن ورْيَازْ زِي طّْرُوفَا نّسْ ؤُشَا أَذْ ث ڭّنْ ذ أَعسَّاسْ إِ يِيخفْ نْسنْ، ‏3 ؤُشَا وَانِيثَا إِثْوَاڒَا يُوسَا-د سِّيفْ خْ ثمُّورْثْ، خنِّي إِتّْصُوضْ ذڭْ ؤُيِيشّْ ن إِشَارِّي ؤُشَا إِعدْجمْ إِ ڒْڭنْسْ ‏4 ؤُشَا أَقَا ذِينْ إِجّنْ إِسْڒَا إِ ؤُصُوضِي ذڭْ ؤُيِيشّْ ن إِشَارِّي، مَاشَا وَارْ إِجِّي إِخفْ نّسْ أَذْ زَّايسْ إِتّْوَاعْڒمْ ؤُشَا يُوسَا-د سِّيفْ، إِكّسْ إِ-ث، خنِّي إِذَامّنْ نّسْ أَذْ إِڒِينْ خْ ؤُزدْجِيفْ نّسْ. ‏5 نتَّا إِسْڒَا إِ ڒْحسّْ ن ؤُصُوضِي ذڭْ ؤُيِيشّْ ن إِشَارِّي، مَاشَا وَارْ إِجِّي إِخفْ نّسْ أَذْ إِتّْوَاعْڒمْ، إِذَامّنْ نّسْ أَقَا أَثنْ خَاسْ، مَاشَا ڒعْمَارْ ن ونِّي إِجِّينْ إِخفْ نّسْ أَذْ إِتّْوَاعْڒمْ، أَذْ إِنْجمْ.

‏6 مَاشَا مَاڒَا أَعسَّاسْ إِثْوَاڒَا سِّيفْ يُوسَا-د ؤُشَا وَارْ إِصُوضْ ذڭْ ؤُيِيشّْ ن إِشَارِّي، أَڒَامِي وَارْ إِتّْوَاعْڒمْ ڒْڭنْسْ ؤُشَا سِّيفْ يُوسَا-د، إِكّسْ إِجّْ ن ڒعْمَارْ جَارْ أَسنْ، خنِّي أَقَا نتَّا إِمّكْسِي زِي سِّيبّثْ ن ڒْمُوعْصِييّثْ ن يِيخفْ نّسْ، مَاشَا نشّْ أَذْ تَّارغْ إِذَامّنْ نّسْ زڭْ ؤُفُوسْ ن ؤُعسَّاسْ.“

‏7 ”شكْ، أَ مِّيسْ ن بْنَاذمْ، نشّْ ڭِّيغْ شكْ ذ أَعسَّاسْ خْ ثَادَّارْثْ ن إِسْرَائِيل. أَذْ ثسْڒذْ إِجّْ ن وَاوَاڒْ زڭْ ؤُقمُّومْ إِنُو ؤُشَا أَذْ أَسنْ ثْعڒْمذْ زَّايِي. ^▪   ‏8 ؤُمِي نشّْ نِّيغْ إِ ؤُعفَّانْ: ’أَ أَعفَّانْ، شكْ أَذْ ثمّْثذْ ڒْموْثْ!‘، ؤُ شكْ وَارْ ثسِّيوِيڒذْ مَاحنْذْ أَذْ ثْعڒْمذْ إِ ؤُعفَّانْ خْ وبْرِيذْ نّسْ إِودَّارنْ، خنِّي أَذْ إِمّثْ ؤُعفَّانْ نِّي س ڒْمُوعْصِييّثْ نّسْ، مَاشَا نشّْ أَذْ تَّارغْ إِذَامّنْ نّسْ زڭْ ؤُفُوسْ نّكْ. ‏9 مَاشَا مَاڒَا شكْ ثْعڒْمذْ إِ ؤُعفَّانْ خْ وبْرِيذْ نّسْ، مَاحنْذْ أَذْ أَسْ إِحيّذْ ؤُشَا نتَّا وَارْ إِحيّذْ خْ وبْرِيذْ نّسْ، خنِّي نتَّا أَذْ إِمّثْ س ڒْمُوعْصِييّثْ نّسْ، مَاشَا شكْ ثسّْنجْمذْ ڒعْمَارْ نّكْ.“

‏10 ”شكْ، أَ مِّيسْ ن بْنَاذمْ، إِنِي إِ ثَادَّارْثْ ن إِسْرَائِيل: أَمُّو إِ ثسَّاوَاڒمْ، ثقَّارمْ: ’إِعذِّييّنْ نّغْ ذ دّْنُوبْ نّغْ أَقَا أَثنْ خَانغْ ؤُشَا نْهلّكْ ذَايْسنْ، خنِّي مَامّشْ إِ غَا نقِّيمْ ندَّارْ؟‘ ^▪  

‏11 إِنِي أَسنْ: س ثِيذتّْ أَمْ دَّارغْ نشّْ، إِقَّارْ سِيذِي إِنُو، سِيذِي، عمَّارْصْ وَارْ أَرطِّيغْ خْ ڒْموْثْ ن ؤُعفَّانْ، مَاشَا أَذْ أَرْضغْ أَعفَّانْ خْمِي إِ غَا إِثُوبْ زڭْ وبْرِيذْ نّسْ ؤُشَا أَذْ إِدَّارْ. ثُوبمْ، ثُوبمْ زڭْ وبْرِيذنْ نْومْ إِعفّْننْ، مَاغَارْ مَايمِّي إِ غَا ثمّْثذْ، أَ ثَادَّارْثْ ن إِسْرَائِيل؟“ ^▪  

‏12 ”شكْ، أَ مِّيسْ ن بْنَاذمْ، إِنِي إِ ثَارْوَا ن ڒْڭنْسْ نّكْ: ثَاسڭْذَا ن ؤُمْسڭّذْ وَارْ ث إِسّْنجِّيمْ ذڭْ وَاسّْ نِّي ذِي غَا إِخْضَا، ؤُشَا ثُوعفّْنَا ن ؤُعفَّانْ وَارْ زَّايسْ إِ غَا إِنْقَارضْ ذڭْ وَاسّْ نِّي ذِي غَا إِثُوبْ زِي ثُوعفّْنَا نّسْ. أَمْسڭّذْ وَارْ إِزمَّارْ أَذْ إِقِّيمْ إِدَّارْ س ثْسڭْذَا نّسْ ذڭْ وَاسّْ نِّي ذِي غَا إِخْضَا. ^▪  

‏13 ؤُمِي نِّيغْ نشّْ إِ ؤُمْسڭّذْ، أَقَا نتَّا أَذْ إِدَّارْ س ثِيذتّْ، مَاشَا نتَّا إِتِّيقّْ ذِي ثْسڭْذَا نّسْ ؤُشَا إِڭَّا ڒْمُوعْصِييّثْ، خنِّي وَارْ ثتِّيڒِي عَاذْ ڒِيذَارثْ ذِي ثْسڭْذَا نّسْ، مَاشَا ذِي ڒْغشّْ نّسْ نِّي إِڭَّا، أَقَا أَذْ ذَايسْ إِمّثْ.

‏14 مَاڒَا نشّْ نِّيغْ إِ ؤُعفَّانْ: ڒْموْثْ إِ غَا ثمّْثذْ، ؤُشَا نتَّا إِثُوبْ خْ دّنْبْ نّسْ ؤُشَا أَذْ إِڭّْ ڒْحقّْ ذ ثْسڭْذَا،

‏15 - أَقَا أَعفَّانْ أَذْ إِسّعْقبْ دِّييّثْ نّسْ، أَذْ إِخدْجصْ مِينْ إِتّْوَاشَارنْ، أَذْ يُويُورْ ذِي ثْوصَّا ن ثُوذَارْثْ بْڒَا مَا أَذْ إِڭّْ ڒْغشّْ -، خنِّي أَذْ إِدَّارْ س ثِيذتّْ، وَارْ إِتّْمتِّي شَا.

‏16 مَارَّا دّْنُوبْ نِّي إِڭَّا، وَارْ د أَسْ تّْوَاحسّبْ شَا. إِڭَّا ڒْحقّْ ذ ثْسڭْذَا، أَذْ إِدَّارْ س ثِيذتّْ.“

‏17 ”ثَارْوَا نْ ڒْڭنْسْ نّكْ قَّارنْ: ’أَبْرِيذْ ن سِيذِي وَارْ إِدْجِي شَا نِيشَانْ!‘، ؤُمِي أَبْرِيذْ ن سِيمَانْثْ نْسنْ وَارْ إِدْجِي شَا نِيشَانْ. ^▪  

‏18 مَاڒَا أَمْسڭّذْ إِهيّضْ خْ ثْسڭْذَا نّسْ ؤُشَا إِتّڭّْ ڒْغشّْ، خنِّي أَذْ ذَايسْ إِمّثْ،

‏19 ؤُشَا خْمِي إِ غَا إِثُوبْ ؤُعفَّانْ خْ ثُوعفّْنَا نّسْ ؤُشَا أَذْ إِڭّْ ڒْحقّْ ذ ثْسڭْذَا، خنِّي أَذْ زَّايسْ إِدَّارْ. ‏20 عَاذْ ثقَّارمْ: ’أَبْرِيذْ ن سِيذِي وَارْ إِدْجِي شَا نِيشَانْ!‘ نشّْ أَذْ خَاومْ حكْمغْ، أَ ثَادَّارْثْ ن إِسْرَائِيل، كُوڒْ  إِجّْ أَمشْنَاوْ إِبْرِيذنْ نّسْ.“

‏21 ذڭْ ؤُسڭّْوَاسْ وِيسّْ ثنْعَاشْ ن لْمنْفَا نّغْ، ذڭْ ؤُيُورْ وِيسّْ عشْرَا، ذڭْ وَاسّْ وِيسّْ خمْسَا ن ؤُيُورْ، إِمْسَارْ أَقَا يُوسَا-د غَارِي إِجّْ ن ؤُمَارْوَاڒْ زِي ؤُرْشَالِيمْ، إِنَّا: ”ثَانْذِينْثْ ثتّْوَاغلّبْ!“^▪   ‏22 غَارْ دْجِيڒثْ ثُوغَا ؤُفُوسْ ن سِيذِي خَافِي، قْبڒْ د غَا يَاسْ ؤُمَارْوَاڒْ، ؤُ نتَّا يَارْزمْ أَيِي أَقمُّومْ ؤُمِي د-يُوسَا ؤُمَارْوَاڒْ غَارِي ذِي ضّْبحْ. ثُوغَا أَقمُّومْ إِنُو إِتّْوَارْزمْ ؤُشَا وَارْ تِّيڒِيغْ عَاذْ ذ أَيْنَاوْ. ‏23 يُوسَا-د غَارِي وَاوَاڒْ ن سِيذِي، إِنَّا:

‏24 ”أَ مِّيسْ ن بْنَاذمْ، إِمزْذَاغْ ن ڒْخِيرْبَاثْ-أَ ذِي ثمُّورْثْ ن إِسْرَائِيل سَّاوَاڒنْ، قَّارنْ: ’إِبْرَاهِيمْ ثُوغَا-ث ذ إِجّْ ؤُشَا إِوَارْثْ ثَامُّورْثْ-أَ. نشِّينْ ڒخُّو ذڭْ وَاطَّاسْ، ثمّوْشْ أَنغْ ثمُّورْثْ ذ ثَاسْغَارْثْ!‘ ‏25 س ؤُيَا، إِنِي أَسنْ: أَمُّو إِ إِقَّارْ سِيذِي إِنُو، سِيذِي: كنِّيوْ ثتّثمْ أَيْسُومْ أَكْ-ذ إِذَامّنْ ؤُشَا ثسّْڭعَّاذمْ ثِيطَّاوِينْ نْومْ غَارْ إِميْضَا ن لَاصْنَامْ نْومْ ؤُشَا ثسَّازَّاڒمْ إِذَامّنْ. مَا إِعدّڒْ أَذْ ثطّْفمْ كنِّيوْ ثَامُّورْثْ ذ ڒْوَارْثْ؟ ^▪   ‏26 ثتّْبدَّامْ خْ سِّيفْ نْومْ. ثتّڭّمْ جّْعِيفشْثْ ؤُ كُوڒْ أَرْيَازْ إِسّْخمَّاجْ ثَامْغَارْثْ ن ؤُمْقَارّبْ نّسْ. مَا إِعدّڒْ أَذْ ثطّْفمْ كنِّيوْ ثَامُّورْثْ ذ ڒْوَارْثْ؟‘

‏27 أَمُّو إِ ذ أَسنْ غَا ثِينِيذْ: أَمُّو إِ إِقَّارْ سِيذِي إِنُو، سِيذِي: ’س ثِيذتّْ أَمْ دَّارغْ نشّْ، أَقَا إِنِّي إِدْجَانْ خْ ڒْخِيرْبَاثْ أَذْ وْضَانْ س سِّيفْ، ؤُ ونِّي إِدْجَانْ خْ وُوذمْ ن ييَّارْ أَذْ ث وْشغْ إِ ڒوْحُوشْ ن ڒخْڒَا مَاحنْذْ أَذْ ث صَارْضنْ، ؤُشَا إِنِّي إِدْجَانْ ذِي لْقلْعَاثْ ؤُ ذڭْ إِفْرَانْ أَذْ مّْثنْ س طَّاعُونْ! ‏28 مَاغَارْ نشّْ أَذْ أَرّغْ ثَامُّورْثْ ذ أَردّدْجْ ذ إِجّْ ن ؤُمذْيَا ن وَارْجفْ، ؤُشَا نّْفَاخثْ ن صُّولْطَا نّسْ أَذْ ثتّْوَاسْبدّْ. إِذُورَارْ ن إِسْرَائِيل أَذْ تّْوَاردّْدْجنْ أَڒَامِي وَارْ ذِينْ وِي خَاسنْ إِ غَا إِژْوَانْ. ‏29 خنِّي أَذْ سّْننْ بلِّي نشّْ ذ سِيذِي، خْمِي إِ غَا أَرّغْ ثَامُّورْثْ ذ أَردّدْجْ ذ إِجّْ ن ؤُمذْيَا ن وَارْجفْ زِي سِّيبّثْ ن جّْعَايفْ نْسنْ نِّي ڭِّينْ.‘ “

‏30 ”شكْ، أَ مِّيسْ ن بْنَاذمْ، أَيْثْ ن ڒْڭنْسْ نّكْ سَّاوَاڒنْ خَاكْ غَارْ ڒحْيُوضْ ؤُ غَارْ وَاذَافْ ن ثُوذْرِينْ. إِجّْ إِسَّاوَاڒْ أَكْ-ذ ونّغْنِي، كُوڒْ إِجّْ أَكْ-ذ ؤُمَاسْ، ؤُشَا إِقَّارْ: ’أَسمْ-د خنِّي ؤُشَا سْڒمْ مَانْ أَوَاڒْ إِ د إِفّغْ زڭْ ؤُقمُّومْ ن سِيذِي!‘ ‏31 نِيثْنِي أَذْ غَاركْ د-أَسنْ أَمْ مَامّشْ إِ د-يُوسَا إِجّْ ن ؤُبَارُّو ن ڒْڭنْسْ، ؤُشَا نِيثْنِي أَذْ قِّيمنْ زَّاثكْ أَمْ ڒْڭنْسْ إِنُو ؤُشَا أَذْ سْڒنْ إِ وَاوَاڒنْ نّكْ، مَاشَا وَارْ زَّايْسنْ تّڭّنْ، مَاغَارْ س ؤُقمُّومْ نْسنْ سّْنِيعْمِيڒنْ ثَايْرِي، مَاشَا ؤُڒْ نْسنْ إِڭُّورْ أَوَارْنِي إِ ڒفْضڒْ ن يِيخفْ نْسنْ. ^▪   ‏32 ؤُشَا خْزَارْ، أَقَا شكْ غَارْسنْ أَمشْنَاوْ ونِّي إِتّْغنَّاجنْ إِزْڒَانْ س ثْمِيجَّا ثصْبحْ، أَمشْنَاوْ ونِّي إِزمَّارنْ أَذْ إِڭَّا لْمُوسِيقَا مْلِيحْ. نِيثْنِي أَذْ سْڒنْ غَارْ وَاوَاڒنْ نّكْ، مَاشَا وَارْ زَّايْسنْ تّڭّنْ. ‏33 مَاشَا ڒَامِي أَيَا أَذْ د-يَاسْ - خْزَارْ، أَذْ د-يَاسْ! - خنِّي أَذْ سّْننْ بلِّي ثُوغَا إِجّْ ن ؤُنَابِي ذِي ڒْوسْثْ نْسنْ.“