‏1 إِمْسَارْ ذڭْ ؤُسڭّْوَاسْ وِيسّْ ثنْعَاشْ، ذڭْ ؤُيُورْ وِيسّْ ثنْعَاشْ، ذڭْ وَاسّْ أَمزْوَارُو ن ؤُيُورْ، أَقَا يُوسَا-د غَارِي وَاوَاڒْ ن سِيذِي، إِنَّا: ‏2 ”أَ مِّيسْ ن بْنَاذمْ، سْڭعّذْ إِجّْ ن يزْڒِي ن وشْضَانْ خْ فِيرْعُونْ، أَجدْجِيذْ ن مِيصْرَا، ؤُشَا إِنِي أَسْ:

ثُوغَا شكْ أَمشْنَاوْ أَيْرَاذْ ذ أَمژْيَانْ جَارْ ڒڭْنُوسْ،

ؤُ ثُوغَا شكْ أَمْ ڒْهَايْشثْ ذِي ڒبْحُورْ.

ثْغضْڒذْ إِخفْ نّكْ ذڭْ إِغزْرَانْ،

ثسّنْهزّذْ أَمَانْ س إِضَارنْ نّكْ،

ؤُشَا ثسّفْسَاذْ إِغزْرَانْ نْسنْ. ^▪  

‏3 أَمُّو إِ إِقَّارْ سِيذِي إِنُو، سِيذِي:

نشّْ أَذْ خَاكْ سّْوِيژّْضغْ ثْرَاشَّا إِنُو،

س يِيجّْ ن وڭْرَاوْ ن ڒڭْنُوسْ أَطَّاسْ.

نِيثْنِي أَذْ شكْ سِّيڒْينْ أَكْ-ذ ثْرَاشَّا إِنُو. ^▪  

‏4 نشّْ أَذْ شكْ جّغْ ذِي ثمُّورْثْ،

أَذْ شكْ نْضَارغْ خْ وُوذمْ ن ييَّارْ.

أَذْ خَاكْ سّْزذْغغْ مَارَّا إِجْضَاضْ ن ؤُجنَّا،

ؤُشَا أَذْ زَّايكْ سّْجِيوْنغْ إِمُودَّارنْ زِي مَارَّا ثَامُّورْثْ.

‏5 أَذْ ڭّغْ ويْسُومْ نّكْ خْ إِذُورَارْ،

ؤُشَا أَذْ شُّورغْ ثِيغْزُورِينْ س ڒڭْعُوذِي ن وَارَّايمْ نّكْ.

‏6 نشّْ أَذْ سّسْوغْ ثَامُّورْثْ،

أَذْ ثذْوڒْ ذ ڒبْحَارْ ن إِذَامّنْ نّكْ غَارسْ أَڒْ ثِيقِيشَّاثِينْ ن إِذُورَارْ،

ؤُشَا ثِيغزْرَاثِينْ أَذْ شُّورنْثْ زَّايكْ

‏7 نشّْ أَذْ سّْذُوڒْيغْ أَجنَّا خْمِي شكْ غَا سّْخسْيغْ،

ؤُشَا أَذْ سّْبَارّشْنغْ إِثْرَانْ.

نشّْ أَذْ سّْذُوڒْيغْ ثَافُوشْثْ س إِسيْنُوثنْ،

ؤُشَا ثَازِيرِي وَارْ تّجِّي عَاذْ ثَافَاوْثْ نّسْ أَذْ ثَارْغَا. ^▪  

‏8 مَارَّا ثِيفَاوِينْ يَارقّنْ ذڭْ ؤُجنَّا

أَذْ ثنْثْ سّْبَارّشْنغْ ذِي طّْوعْ نّكْ،

ؤُشَا أَذْ سّكّغْ ثَادْجسْثْ خْ ثمُّورْثْ نّكْ!،

أَمُّو إِ إِقَّارْ سِيذِي إِنُو، سِيذِي.

‏9 نشّْ أَذْ غزِّيغْ ؤُڒْ ن وَاطَّاسْ ن ڒڭْنُوسْ،

ؤُمِي إِ غَا يَاوْيغْ ڒخْبَارْ ن ثْرژِّيثْ نّكْ غَارْ ڒڭْنُوسْ،

غَارْ ثمُّورَا إِ وَارْ ثنْثْ ثسِّينذْ شَا.

‏10 نشّْ أَذْ سّْنخْڒْعغْ أَطَّاسْ نْ ڒڭْنُوسْ ذِي سِّيبّثْ نّكْ،

ؤُ أَشوَّافْ ن إِجدْجِيذنْ نْسنْ أَذْ ڭعّْذنْ زڭْ وَارْجفْ ذِي طّْوعْ نّكْ،

خْمِي إِ غَا سّنْهزّغْ سِّيفْ إِنُو سَّا ذ سَّا زَّاثْ إِ وُوذْمَاونْ نْسنْ.

نِيثْنِي أَذْ أَرْجِيجنْ ڒبْذَا،

كُوڒْ إِجّْ ذِي سِّيبّثْ ن ثُوذَارْثْ نّسْ،

ذڭْ وَاسّْ ن ؤُوطُّو نّكْ. ^▫  

‏11 مِينْزِي أَمُّو إِ إِقَّارْ سِيذِي إِنُو، سِيذِي:

سِّيفْ ن ؤُجدْجِيذْ ن بَابِيلْ أَذْ خَاكْ يمَّارْسْ.

‏12 س ڒسْيُوفْ ن أَيْثْ ن بُو-ثغْرُوضْثْ أَذْ غضْڒغْ ڒْغَاشِي نّكْ إِنْهوْڒنْ،

ڒڭْنُوسْ إِقسْحنْ أَطَّاسْ مَارَّا.

نِيثْنِي أَذْ قْضَانْ خْ نّْفَاخثْ ن مِيصْرَا،

ؤُشَا مَارَّا ڒْغَاشِي نّسْ إِنْهوْڒنْ أَذْ ث ثحَّانْ. ^▪  

‏13 نشّْ أَذْ قْضِيغْ خْ إِمُودَّارنْ نّسْ إِنِّي إِدْجَانْ غَارْ وَاطَّاسْ ن وَامَانْ،

ؤُڒَا ذ إِجّْ ن ؤُضَارْ ن بْنَاذمْ إِزمَّارْ أَذْ ثنْ إِسَّارْوِي عَاوذْ،

ؤُشَا ؤُڒَا ذ إِشْثْ ن ثشْضشْثْ ن ڒْمَاڒْ ثْزمَّارْ أَذْ ثنْ ثسَّارْوِي عَاذْ.

‏14 خنِّي أَذْ سّهْوِيغْ أَمَانْ نْسنْ أَڒَامِي إِ غَا صْفَانْ

ؤُ نشّْ أَذْ ڭّغْ إِغزْرَانْ نْسنْ أَذْ سِّيزّْڒنْ أَمْ زّشْثْ!‘،

أَمُّو إِ إِقَّارْ سِيذِي إِنُو، سِيذِي.

‏15 أَڒَامِي ڭِّيغْ ثَامُّورْثْ ن مِيصْرَا ذ أَردّدْجْ،

ؤُشَا أَذْ ثِيڒِي ثمُّورْثْ ثتّْوَاردّدْجْ، ثحْفَا زِي مَارَّا مِينْ ذَايسْ،

أَڒَامِي وْثغْ مَارَّا إِنِّي ذَايسْ إِزدّْغنْ،

خنِّي أَذْ سّْننْ بلِّي نشّْ ذ سِيذِي.

‏16 وَا ذ إِزْڒِي ن وشْضَانْ ؤُشَا أَذْ ث غنّْجنْ أَمْ يزْڒِي ن وشْضَانْ، يسِّيثْسنْثْ ن ثمُّورَا أَذْ ث غنّْجنْثْ أَمْ يزْڒِي ن وشْضَانْ، أَذْ ث غنّْجنْثْ أَمْ يزْڒِي ن وشْضَانْ خْ مِيصْرَا ؤُ خْ مَارَّا ڒْغَاشِي نّسْ إِنْهوْڒنْ!، أَمُّو إِ إِقَّارْ سِيذِي إِنُو، سِيذِي.“

‏17 ذڭْ ؤُسڭّْوَاسْ وِيسّْ ثنْعَاشْ، ذڭْ وَاسّْ وِيسّْ خمّسْطَاشْ ن ؤُيُورْ، إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا:

‏18 ”أَ مِّيسْ ن بْنَاذمْ، وّثْ أَڭجْذُورْ خْ ڒْغَاشِي إِنْهوْڒنْ ن مِيصْرَا. أجّْ إِ-ث أَذْ إِهْوَا، مِيصْرَا ذ يسِّيسْ ن ڒڭْنُوسْ إِجهْذنْ، ذِي ڒَادْجَاغْ ن ثمُّورْثْ، أَكْ-ذ ينِّي إِهْوَانْ ذڭْ وحْفُورْ ن ونْضڒْ.

‏19 مَا شكْ إِعِيزّنْ خْ مَانْ مَّا؟

هْوَا، أجّْ أَذْ شكْ سَّارْسنْ أَكْ-ذ ينِّي وَارْ إِتّْوَاخثْننْ.

‏20 أَذْ وْضَانْ ذِي ڒْوسْثْ ن يِينِّي إِتّْوَانْغنْ س سِّيفْ.

أَقَا إِمّوْشْ سِّيفْ.

جَارّْ مِيصْرَا زڭْ وبْرِيذْ أَكْ-ذ مَارَّا ڒْغَاشِي نّسْ إِنْهوْڒنْ.

‏21 إِنِّي غَارْ ثدْجْ صُّولْطَا أَطَّاسْ زڭْ أَيْثْ ن بُو-ثغْرُوضْثْ أَذْ كِيسْ سِّيوْڒنْ

زِي ڒْوسْثْ ن ڒَاخَارْثْ.

هْوَانْ نِيثْنِي، أَقَا زّْڒنْ ذِينِّي،

إِنِّي وَارْ إِتّْوَاخثْننْ،

إِنِّي إِتّْوَانْغنْ س سِّيفْ.

‏22 ذِيهَا إِدْجْ أَشُّورْ أَكْ-ذ مَارَّا أَڭْرَاوْ نّسْ،

نّْضنْ أَسْ-د إِمضْڒَانْ نّسْ.

مَارَّا نِيثْنِي تّْوَانْغنْ، وْضَانْ س سِّيفْ.

‏23 إِمضْڒَانْ نّسْ أَقَا أَثنْ ذِي ثْغمَّارْ ن وحْفُورْ ن ونْضڒْ

ؤُ أَڭْرَاوْ نّسْ أَقَا-ث ذڭْ ونّضْ ن ونْضڒْ نّسْ.

مَارَّا نِيثْنِي تّْوَاسْنُوقّْبنْ، وْضَانْ س سِّيفْ،

إِنِّي ثُوغَا إِسَّاڭّْوَاذنْ ذِي ثمُّورْثْ ن يِينِّي إِدَّارنْ.

‏24 ذِيهَا عِيلَامْ ذ مَارَّا ڒْغَاشِي نّسْ إِنْهوْڒنْ ذڭْ ونّضْ ن ونْضڒْ نّسْ.

مَارَّا نِيثْنِي تّْوَاسْنُوقّْبنْ، وْضَانْ س سِّيفْ،

هْوَانْ بْڒَا أَخْثَانْ ذِي ڒَادْجَاغْ ن ثمُّورْثْ،

إِنِّي ثُوغَا إِسَّاڭّْوَاذنْ ذِي ثمُّورْثْ ن يِينِّي إِدَّارنْ.

نِيثْنِي إِوْينْ ڒفْضِيحثْ نْسنْ أَكِيذْسنْ،

أَكْ-ذ ينِّي إِهكّْوَانْ ذڭْ وحْفُورْ ن ونْضڒْ.

‏25 ڭِّينْ أَسْ إِجّْ ن أَرُّوفْ ذِي ڒْوسْثْ ن يِينِّي إِتّْوَانْغنْ،

غَارْ مَارَّا ڒْغَاشِي نّسْ إِنْهوْڒنْ.

إِمضْڒَانْ نّسْ نّْضنْ أَسْ-د.

مَارَّا نِيثْنِي وَارْ إِتّْوَاخثْننْ، وْضَانْ س سِّيفْ،

مِينْزِي ثُوغَا سَّاڭّْوَاذنْ إِوْذَانْ زڭْ يِيخفْ نْسنْ

ذِي ثمُّورْثْ ن يِينِّي إِدَّارنْ.

نِيثْنِي إِوْينْ ڒفْضِيحثْ نْسنْ أَكِيذْسنْ،

جْمِيعْ أَكْ-ذ ينِّي إِهكّْوَانْ ذڭْ وحْفُورْ ن ونْضڒْ.

أَقَا نتَّا إِتّْوَاسَّارْسْ ذِي ڒْوسْثْ ن يِينِّي إِتّْوَانْغنْ.

‏26 ذِيهَا مَاشِيخْ-ثُوبَالْ ذ مَارَّا ڒْغَاشِي نّسْ إِنّْهوْڒنْ.

نّْضنْ أَسْ-د إِمضْڒَانْ نّسْ.

مَارَّا نِيثْنِي وَارْ تّْوَاخثْننْ،

تّْوَاسْنُوقّْبنْ س سِّيفْ،

مَاغَارْ نِيثْنِي ثُوغَا سَّاڭّْوَاذنْ إِوْذَانْ زڭْ يِيخفْ نْسنْ

ذِي ثمُّورْثْ ن يِينِّي إِدَّارنْ.

‏27 وَارْ زِّيڒنْ أَكْ-ذ أَيْثْ ن بُو-ثغْرُوضْثْ،

إِنِّي إِوْضَانْ زڭْ ينِّي وَارْ إِتّْوَاخثْننْ،

إِنِّي إِهْوَانْ غَارْ ڒَاخَارْثْ أَكْ-ذ ڒسْنَاحْ نْسنْ ن ؤُمنْغِي.

مَّارْسنْ ڒسْيُوفْ نْسنْ سَاذُو إِزدْجِيفنْ نْسنْ

ؤُشَا ڒْمُوعْصِييّثْ نْسنْ أَقَا-ت خْ ييْسَانْ نْسنْ،

وَاخَّا ثُوغَا نِيثْنِي ذ ثِيڭّْوُوذِي إِ أَيْثْ ن بُو-ثغْرُوضْثْ ذِي ثمُّورْثْ ن يِينِّي إِدَّارنْ.

‏28 ؤُڒَا ذ شكْ أَذْ ثِيڒِيذْ ثَارْژذْ ذِي ڒْوسْثْ ن يِينِّي وَارْ إِتّْوَاخثْننْ

ؤُشَا أَذْ ثزّْڒذْ أَكْ-ذ ينِّي إِتّْوَاسْنُوقْبنْ س سِّيفْ.

‏29 ذِيهَا إِذُومْ، إِجدْجِيذنْ نّسْ ذ مَارَّا ڒْحُوكَّامْ نّسْ،

إِنِّي إِ ذِينْ إِزّْڒنْ س مَارَّا صُّولْثَا نْسنْ

أَكْ-ذ ينِّي إِتّْوَاسْنُوقّْبنْ س سِّيفْ.

زّْڒنْ ذِينِّي أَكْ-ذ ينِّي وَارْ إِتّْوَاخثْننْ

ؤُ أَكْ-ذ ينِّي إِهْوَانْ ذڭْ وحْفُورْ ن ونْضڒْ.

‏30 ذِيهَا أَيْثْ ن بُو-صُّولْطَا زِي شّْمَالْ، مَارَّا نِيثْنِي،

ؤُ مَارَّا أَيْثْ ن صِيذُونْ، إِنِّي إِهْوَانْ أَكْ-ذ ينِّي إِتّْوَانْغنْ.

أَقَا تّْسضْحَانْ ذِينِّي، وَاخَّا ثُوغَا سَّاڭّْوَاذنْ إِوْذَانْ

س ثرْيَاسْثْ نْسنْ ن أَيْثْ ن بُو-ثغْرُوضْثْ.

أَقَا زّْڒنْ ذِينِّي أَكْ-ذ ينِّي إِتّْوَانْغنْ س سِّيفْ

ؤُشَا أَربُّونْ ڒفْضِيحثْ نْسنْ

أَكْ-ذ ينِّي إِهْوَانْ ذڭْ وحْفُورْ ن ونْضڒْ.

‏31 فِيرْعُونْ أَذْ ثنْ إِژَارْ ؤُشَا أَذْ إِتّْوَاسْفوّجْ

زِي مَارَّا ڒْغَاشِي نّسْ إِنْهوْڒنْ، إِنِّي إِتّْوَاسْنُوقّْبنْ س سِّيفْ،

فِيرْعُونْ ذ مَارَّا ڒْعسْكَارْ نّسْ!‘،

أَمُّو إِ إِقَّارْ سِيذِي إِنُو، سِيذِي.

‏32 مِينْزِي نشّْ جِّيغْ ث أَذْ إِسِّيڭّْوذْ إِنِّي ذِي ثمُّورْثْ ن يِينِّي إِدَّارنْ.

نتَّا أَذْ إِمَّارْسْ ذِي ڒْوسْثْ ن يِينِّي وَارْ إِتّْوَاخثْننْ،

غَارْ ينِّي إِتّْوَاسْنُوقّْبنْ س سِّيفْ،

فِيرْعُونْ ذ مَارَّا ڒْغَاشِي نّسْ إِنْهوْڒنْ!،

أَمُّو إِ إِقَّارْ سِيذِي إِنُو، سِيذِي.“