‏1 خنِّي قَارّْبنْ-د مَارَّا إِمقّْرَاننْ ن ڒْعسْكَارْ، يُوحَانَانْ، مِّيسْ ن قَارِييَاحْ، ذ يَازَانْيَا، مِّيسْ ن هُوشَاعْيَا، ذ مَارَّا ڒْڭنْسْ، زڭْ ؤُمژْيَانْ أَڒْ أَمقّْرَانْ. ‏2 نِيثْنِي نَّانْ إِ ؤُنَابِي إِرْمْيَا: ”إِڒِي أَذْ يَافْ ثُوثْرَا نّغْ أَرْضَا زَّاثْ إِ وُوذمْ نّكْ ؤُشَا تَّارْ أَنغْ غَارْ سِيذِي، أَربِّي نّكْ، ذِي طّْوعْ ن مَارَّا مِينْ إِقِّيمنْ، مِينْزِي نشِّينْ نقِّيمْ عَاذْ س ذْرُوسْ زڭْ وَاطَّاسْ أَمْ مَامّشْ ثْزمَّارذْ أَذْ أَنغْ ثسّشْنذْ س ثِيطَّاوِينْ نّكْ. ‏3 إِڒِي سِيذِي، أَربِّي نّكْ، أَذْ أَنغْ إِسّْشنْ مَانْ أَبْرِيذْ إِ غَا نضْفَارْ ذ مِينْ غَا نڭّْ.“ ‏4 إِنَّا أَسنْ ؤُنَابِي إِرْمِييَا: ”نشّْ سْڒِيغْ ث. خْزَارْ، نشّْ أَذْ تَّارغْ ذِي طّْوعْ نْومْ غَارْ سِيذِي، أَربِّي نْومْ، عْلَاحْسَابْ أَوَاڒنْ نْومْ. نشّْ أَذْ أَومْ إِنِيغْ مَارَّا أَوَاڒْ نِّي زِي د خَاومْ إِ غَا يَارّْ سِيذِي، وَارْ زَّايْومْ سّْنُوفَّارغْ ؤُڒَا ذ إِجّْ ن وَاوَاڒْ.“ ‏5 نِيثْنِي نَّانْ إِ إِرْمِييَا: ”سِيذِي أَذْ يِيڒِي ذ شَّاهذْ ذ أَمْثِيقِّي ذ أَصْذِيقْ جَارْ أَنغْ مَاڒَا وَارْ نتّڭّْ عْلَاحْسَابْ كُوڒْ أَوَاڒْ نِّي كِيذكْ غَارْنغْ د غَا إِسّكّْ سِيذِي، أَربِّي نّكْ! ‏6 ذ أَصبْحَانْ نِيغْ ذ أَعفَّانْ، أَذْ نْسڒْ غَارْ ثْمِيجَّا ن سِيذِي، أَربِّي نّغْ، إِ ؤُمِي شكْ إِ غَا نسّكّْ مَاحنْذْ أَذْ نِيڒِي مْلِيحْ خْمِي إِ غَا نْسڒْ غَارْ ثْمِيجَّا ن سِيذِي، أَربِّي نّغْ.“ ^▪  

‏7 أَوَارْنِي ڒَامِي عْذُونْ عشْرَا ن وُوسَّانْ، إِمْسَارْ أَقَا إِفّغْ وَاوَاڒْ ن سِيذِي غَارْ إِرْمِييَا. ‏8 خَاسْ ؤُشَا إِڒَاغَا-د نتَّا خْ يُوحَانَانْ، مِّيسْ ن قَارِييَاحْ، ؤُ خْ مَارَّا إِكُومَانْذَارنْ ن ڒْعسْكَارْ نِّي ثُوغَا غَارسْ إِدْجَانْ ؤُڒَا خْ مَارَّا ڒْڭنْسْ، زڭْ ؤُمژْيَانْ أَڒْ أَمقّْرَانْ. ‏9 إِنَّا أَسنْ: ”أَمُّو إِ إِقَّارْ سِيذِي، أَربِّي ن إِسْرَائِيل، غَارْ ونِّي ذ أَيِي ثسّكّمْ، حِيمَا أَذْ أَسْ سِّيوْضغْ ثُوثْرَا نْومْ زَّاثْ إِ وُوذمْ نّسْ:

‏10 ’مَاڒَا كنِّيوْ ثقِّيممْ ثْزدّْغمْ ذِي ثمُّورْثْ-أَ، أَمُّو كنِّيوْ إِ غَا سّْبدّغْ ؤُ وَارْ كنِّيوْ هدّْمغْ، أَذْ كنِّيوْ ژُّوغْ ؤُ وَارْ كنِّيوْ قڒْعغْ، مَاغَارْ نشّْ نْذمّغْ خْ ڒْغَارْ إِ ذَايْومْ ڭِّيغْ. ^▪  

‏11 وَارْ تّڭّْوْذمْ شَا زڭْ ؤُجدْجِيذْ ن بَابِيلْ، ونِّي زِي ثتّڭّْوذمْ. وَارْ زَّايسْ ثڭّْوْذمْ، أَمُّو إِ إِقَّارْ سِيذِي. مَاغَارْ نشّْ أَكِيذْومْ حِيمَا أَذْ كنِّيوْ سّْنجْمغْ ؤُ أَذْ كنِّيوْ فكّغْ زڭْ ؤُفُوسْ نّسْ.

‏12 نشّْ أَذْ كنِّيوْ أَرحْمغْ مَاحنْذْ نتَّا أَذْ كنِّيوْ يَارْحمْ ؤُ أَذْ كنِّيوْ يَارّْ أَذْ ثْذوْڒمْ غَارْ ثمُّورْثْ نْومْ.

‏13 مَاڒَا كنِّيوْ مَاشَا ثقَّارمْ: ’نشِّينْ وَارْ نتّْغِيمِي شَا ذِي ثمُّورْثْ-أَ!‘، ؤُ وَارْ ثتّسْڒِيمْ شَا غَارْ ثْمِيجَّا ن سِيذِي، أَربِّي نْومْ،

‏14 مَاشَا ثقَّارمْ: ’لَّ، نخْسْ أَذْ نُويُورْ غَارْ مِيصْرَا مَانِي نشِّينْ وَارْ نْژَارّْ أَمنْغِي ؤُ وَارْ نتّسْڒِي إِ ؤُصُوضِي ذڭْ ؤُيِيشّْ ن إِشَارِّي ؤُ وَارْ نتّْڒِيژِي أَغْرُومْ، أَقَا ذِينِّي إِ نخْسْ أَذْ نقِّيمْ!‘،

‏15 خنِّي سْڒمْ ڒخُّو غَارْ وَاوَاڒْ ن سِيذِي، كنِّيوْ مِينْ إِقِّيمنْ ن يَاهُوذَا! أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: مَاڒَا كنِّيوْ ثْعمّْذمْ أَذْ ثُويُورمْ غَارْ مِيصْرَا ؤُشَا أَذْ د-ثَاوْضمْ حِيمَا أَذْ ذِينْ ثْزذْغمْ أَمْ إِبَارَّانِييّنْ،

‏16 خنِّي سِّيفْ إِ زِي ثتّڭّْوذمْ أَذْ كنِّيوْ إِڒْقفْ ذِينِّي ذِي مِيصْرَا ؤُ ڒَاژْ إِ زِي ثڭّْوذمْ أَذْ كنِّيوْ د-إِضْفَارْ ذِينِّي ذِي مِيصْرَا ؤُ أَذْ ذِينِّي ثمّْثمْ.

‏17 خنِّي مَارَّا إِرْيَازنْ نِّي إِخْسنْ أَذْ ؤُيُورنْ غَارْ مِيصْرَا حِيمَا أَذْ ذِينْ زذْغنْ أَمْ إِبَارَّانِييّنْ أَذْ مّْثنْ س سِّيفْ ذ ڒَاژْ ذ طَّاعُونْ. وَارْ زَّايْسنْ إِنجّمْ ؤُڒَا ذ إِجّنْ ؤُشَا ؤُڒَا ذ إِجّْ زَّايْسنْ وَارْ يَاركّْوڒْ زِي ڒْغَارْ إِ خَاسنْ د غَا غضْڒغْ.‘ “

‏18 ”مَاغَارْ أَمُّو إِ إِقَّارْ سِيذِي، أَربِّي ن إِسْرَائِيل: ’أَمْ مَامّشْ أَغْضَابْ إِنُو ذ وسْعَارْ إِنُو تّْوَازدْجْعنْ خْ إِمزْذَاغْ ن ؤُرْشَالِيمْ، أَمُّو إِ غَا إِتّْوَازدْجعْ ؤُڒَا ذ أَسْعَارْ إِنُو خَاومْ مَاڒَا ثُوسِيمْ-د غَارْ مِيصْرَا. كنِّيوْ أَذْ ثْذوْڒمْ ذ ڒْقشْعثْ ن وخْزِي ذ وضْحَاشْ، إِ نّعْڒثْ ذ ڒْحڭْرَا. ثَامُّورْثْ-أَ عمَّارْصْ أَذْ ت ثْژَارمْ عَاذْ. ^▪  

‏19 سِيذِي إِسِّيوڒْ-د غَارْومْ، أَ مِينْ إِقِّيمنْ ن يَاهُوذَا! وَارْ د-ثِيذْفمْ غَارْ مِيصْرَا. سْنمْ مْلِيحْ أَقَا نشّْ عڒْمغْ أَومْ أَسّْ-أَ. ‏20 مَاغَارْ كنِّيوْ ثْغشّمْ خْ يِيخفْ نْومْ. كنِّيوْ سِيمَانْثْ نْومْ ثسّكّمْ أَيِي-د غَارْ سِيذِي، أَربِّي نْومْ، ثنَّامْ: ’ژَتدْجْ أَنغْ غَارْ سِيذِي، أَربِّي نّغْ. إِنِي أَنغْ مَارَّا مِينْ غَا يِيڒِي أَذْ يِينِي سِيذِي، أَربِّي نّغْ، ؤُشَا نشِّينْ أَذْ ث نڭّْ!‘ ‏21 أَسّْ-أَ نِّيغْ أَومْ، مَاشَا كنِّيوْ وَارْ ثسْڒِيمْ شَا غَارْ ثْمِيجَّا ن سِيذِي، أَربِّي نْومْ، غَارْ مَارَّا س مِينْ زِي إِ ذ أَيِي غَارْومْ د-إِسّكّْ. ‏22 خنِّي ڒخُّو، سّْنمْ مْلِيحْ أَقَا أَذْ ثمّْثمْ س سِّيفْ ذ ڒَاژْ ذ طَّاعُونْ ذڭْ ومْشَانْ مَانِي ثخْسمْ أَذْ ثُويُورمْ حِيمَا أَذْ ذِينِّي ثقِّيممْ أَمْ إِبَارَّانِييّنْ.‘ “