‏1 إِمْسَارْ ذڭْ ؤُيُورْ وِيسّْ سبْعَا أَقَا يُوسَا-د إِسْمَاعِيلْ، مِّيسْ ن نَاثَانْيَا، مِّيسْ ن إِلِيشَامَاعْ نِّي ذ إِجّْ زِي ڒْوَاشُونْ ن ؤُجدْجِيذْ، جْمِيعْ أَكْ-ذ إِمقّْرَاننْ ن ؤُجدْجِيذْ ؤُ أَكِيذسْ عَاذْ عشْرَا ن يرْيَازنْ، غَارْ جَاذَالْيَا، مِّيسْ ن أَخِيقَامْ، غَارْ مِيصْفَاثْ. نِيثْنِي مُوننْ تّتّنْ ذِينْ ذِي مِيصْفَاثْ. ^▪   ‏2 خنِّي إِكَّارْ إِسْمَاعِيلْ، مِّيسْ ن نَاثَانْيَا، جْمِيعْ أَكْ-ذ عشْرَا ن يرْيَازنْ نِّي ثُوغَا غَارسْ إِدْجَانْ ؤُشَا وْثِينْ جَاذَالْيَا، مِّيسْ ن أَخِيقَامْ، مِّيسْ ن شَافَانْ، س سِّيفْ. أَمُّو إِ إِنْغَا إِسْمَاعِيلْ ونِّي ثُوغَا إِڭَّا ؤُجدْجِيذْ ن بَابِيلْ خْ ثمُّورْثْ. ‏3 إِنْغَا إِسْمَاعِيلْ ؤُڒَا ذ مَارَّا ؤُذَاينْ إِ غَارسْ، إِخْسْ أَذْ يِينِي إِنِّي ثُوغَا غَارْ جَاذَالْيَا ذِي مِيصْفَاثْ، ؤُڒَا ذ إِكَالْذَانِييّنْ نِّي إِتّْوَافنْ ذِينْ، إِعسْكَارِييّنْ.

‏4 ذڭْ وَاسّْ وِيسّْ ثْنَاينْ أَوَارْنِي ڒَامِي إِنْغَا جَاذَالْيَا ؤُ ؤُڒَا ذ إِجّْ وَارْ يَارْڭِيبْ عَاذْ، ‏5 ؤُسِينْ-د إِرْيَازنْ زِي شَاكِيمْ، شِيلُو ذ سَامَارْيَا، ثْمنْيِينْ ن يرْيَازنْ، س ثِيمِيرَا حفّنْثْ ذ ورُّوضْ إِشَارّڭْ ذ إِخبِّيشنْ. نِيثْنِي إِوْينْ-د ذڭْ إِفَاسّنْ نْسنْ إِشْثْ ن ثوْهِيبْثْ ن ڒْغِيدْجثْ ذ ڒبْخُورْ مَاحنْذْ أَذْ ت أَوْينْ غَارْ ثَادَّارْثْ ن سِيذِي. ‏6 ؤُشَا إِفّغْ غَارْسنْ إِسْمَاعِيلْ، مِّيسْ ن نَاثَانْيَا، زِي مِيصْفَاثْ ؤُ ؤُمْسَاڭَارْ أَكِيذْسنْ، إِرُو أَمْ إِڭُّورْ. ؤُمِي ثنْ إِمّڒْقَا، إِنَّا: ”أَسمْ-د غَارْ جَاذَالْيَا، مِّيسْ ن أَخِيقَامْ!“ ‏7 ؤُمِي د-إِوْضنْ نِيثْنِي غَارْ ڒْوسْثْ ن ثنْذِينْثْ، إِغَارْصْ أَسنْ إِسْمَاعِيلْ، مِّيسْ ن نَاثَانْيَا. نتَّا ذ يرْيَازنْ إِ كِيذسْ إِدْجَانْ، نْضَارنْ ثنْ ذِي ڒْوسْثْ ن وَانُو. ‏8 مَاشَا تّْوَافنْ عشْرَا ن يرْيَازنْ جَارْ أَسنْ إِنِّي إِنَّانْ إِ إِسْمَاعِيلْ: ”وَارْ ذ أَنغْ نقّْ شَا، مَاغَارْ ذڭْ إِيَّارْ نشِّينْ غَارْنغْ ڒعْوتْشْ إِخمّْڒنْ ن إِرْذنْ، إِمنْذِي، زّشْثْ ذ ثَامّنْثْ.“ خنِّي إِحْثَا خَاسنْ، وَارْ ثنْ إِنْغِي ذِي ڒْوسْثْ ن أَيْثْمَاسْ. ‏9 أَنُو نِّي ذِي إِنْضَارْ إِسْمَاعِيلْ مَارَّا أَرِّيمَاثْ ن يرْيَازنْ نِّي إِنْغَا غَارْ ؤُغزْذِيسْ ن جَاذَالْيَا، ثُوغَا ذ ونِّي إِڭَّا ؤُجدْجِيذْ أَسَا زِي سِّيبّثْ ن بَاعْشَا، أَجدْجِيذْ ن إِسْرَائِيل. إِسْمَاعِيلْ، مِّيسْ ن نَاثَانْيَا، إِشُّورْ إِ-ث س ينِّي إِتّْوَانْغنْ.

‏10 إِنْذهْ إِسْمَاعِيلْ مَارَّا مِينْ إِقِّيمنْ عَاذْ زِي ڒْڭنْسْ إِ إِدْجَانْ ذِي مِيصْفَاثْ، ذ إِمحْبَاسْ، أَقَا يسِّيسْ ن ؤُجدْجِيذْ ذ مَارَّا ڒْڭنْسْ نِّي ثُوغَا إِقِّيمنْ عَاذْ ذِي مِيصْفَاثْ، إِنِّي خْ ثُوغَا إِڭَّا نپُوزَارَاذَانْ، ڒْقبْطَانْ ن إِعسَّاسنْ ن أَرِّيمثْ، جَاذَالْيَا، مِّيسْ ن أَخِيقَامْ. إِسْمَاعِيلْ، مِّيسْ ن نَاثَانْيَا إِنْذهْ إِ-ثنْ ذ إِمحْبَاسْ ؤُشَا يُويُورْ حِيمَا أَذْ إِعْذُو خْ لْ'ؤُرْذُونْ غَارْ ثمُّورْثْ ن أَيْثْ ن عَامُّونْ.

‏11 ؤُمِي يُوحَانَانْ، مِّيسْ ن قَارِيهَا، ذ مَارَّا إِكُومَانْذَارنْ ن ڒْعسْكَارْ نِّي ثُوغَا غَارسْ إِدْجَانْ، سْڒِينْ س مَارَّا ڒْغَارْ إِ ثُوغَا إِڭَّا إِسْمَاعِيلْ، مِّيسْ ن نَاثَانْيَا،

‏12 إِوْينْ نِيثْنِي مَارَّا إِرْيَازنْ ؤُشَا ؤُيُورنْ ذڭْ وبْرِيذْ حِيمَا أَذْ مّنْغنْ أَكْ-ذ إِسْمَاعِيلْ، مِّيسْ ن نَاثَانْيَا. نِيثْنِي ؤُفِينْ ث غَارْ وَامَانْ إِمقّْرَاننْ غَارْ جِيبْعُونْ.

‏13 ڒَامِي مَارَّا ڒْڭنْسْ إِ ثُوغَا أَكْ-ذ إِسْمَاعِيلْ، إِنْطحْ يُوحَانَانْ، مِّيسْ ن قَارِيحَا، ذ مَارَّا إِمقّْرَاننْ ن ڒْعسْكَارْ نِّي غَارسْ، فَارْحنْ أَطَّاسْ.

‏14 مَارَّا ڒْڭنْسْ نِّي ثُوغَا إِنْذهْ إِسْمَاعِيلْ ذ أَمحْپُوسْ زِي مِيصْفَاثْ، قڒْبنْ، ذوْڒنْ-د ؤُشَا عْذُونْ غَارْ يُوحَانَانْ، مِّيسْ ن قَارِيحَا.

‏15 إِسْمَاعِيلْ مَاشَا، مِّيسْ ن نَاثَانْيَا، يَارْوڒْ-د زِي زَّاثْ ن وُوذمْ ن يُوحَانَانْ أَكْ-ذ ثْمنْيَا ن يرْيَازنْ ؤُشَا يُويُورْ غَارْ أَيْثْ ن عَامُّونْ.

‏16 خنِّي إِكْسِي يُوحَانَانْ، مِّيسْ ن قَارِييَاحْ، نتَّا جْمِيعْ أَكْ-ذ مَارَّا إِمقّْرَاننْ ن ڒْعسْكَارْ نِّي غَارسْ إِدْجَانْ، مَارَّا مِينْ إِقِّيمنْ ن ڒْڭنْسْ نِّي ثُوغَا د-إِسّعْقبْ زِي إِسْمَاعِيلْ، مِّيسْ ن نَاثَانْيَا، زِي مِيصْفَاثْ، أَوَارْنِي ڒَامِي إِنْغَا وَانِيثَا جَاذَالْيَا، مِّيسْ ن أَخِيقَامْ: أَقَا إِرْيَازنْ إِجهْذنْ، إِعسْكَارِييّنْ، ثِيمْغَارِينْ، إِحنْجِيرنْ إِمژْيَاننْ ذ إِمْسخَّارنْ إِشنْعنْ نِّي د-إِسّعْقبْ نتَّا زِي جِيبْعُونْ.

‏17 نِيثْنِي ؤُيُورنْ ذڭْ وبْرِيذْ ؤُشَا قِّيمنْ ذڭْ ومْشَانْ ن أَرَّاحثْ ن كِيمْهَانْ نِّي غَارْ بَايْثْ-لَاحْمْ مَاحنْذْ أَذْ سّنِّي د-عْذُونْ أَڒَامِي د-ؤُذْفنْ غَارْ مِيصْرَا.

‏18 نِيثْنِي أَروْڒنْ زِي زَّاثْ ن وُوذمْ ن إِكَالْذَانِييّنْ، مَاغَارْ ڭّْوذنْ زَّايْسنْ، مَاغَارْ إِسْمَاعِيلْ، مِّيسْ ن نَاثَانْيَا، إِنْغَا جَاذَالْيَا، مِّيسْ ن أَخِيقَامْ، ونِّي إِڭَّا ؤُجدْجِيذْ ن بَابِيلْ ذ ڒْبَاشَا خْ ثمُّورْثْ.