‏1 يُوسَا-د غَارِي وَاوَاڒْ ن سِيذِي، إِنَّا:

‏2 ”وَارْ تَّاوِي ثَامْغَارْثْ إِ يِيخفْ نّكْ ؤُ وَارْ غَاركْ تِّيڒِينْ إِحنْجِيرنْ ذ ثْحنْجِيرِينْ ذڭْ ومْشَانْ-أَ، ‏3 مَاغَارْ أَمُّو إِ إِقَّارْ سِيذِي خْ إِحنْجِيرنْ ذ ثْحنْجِيرِينْ إِ د غَا إِتّْوُورْونْ ذڭْ ومْشَانْ-أَ ؤُ خْ يمَّاثْسنْ إِ ثنْ د-يُورْونْ ؤُ خْ بَابَاثْسنْ إِ ثنْ د-إِجِّينْ ذِي ثمُّورْثْ-أَ: ‏4 ’نِيثْنِي أَذْ مّْثنْ سْ  إِبْرِيذنْ إِوْعَارنْ أَطَّاسْ، وَارْ خَاسنْ شطّنْ ؤُ وَارْ ثنْ نطّْڒنْ، نِيثْنِي أَذْ ذوْڒنْ ذ ڒغْبَارْ إِ وُوذمْ ن ثمُّورْثْ ؤُشَا أَذْ تّْوَاغزّنْ س سِّيفْ ذ ڒَاژْ ؤُ ڒْخشْبَاثْ نْسنْ أَذْ ذوْڒنْثْ ذ مَاشَّا إِ إِجْضَاضْ ن ؤُجنَّا ذ ڒوْحُوشْ ن ڒخْڒَا.‘ “ ^▪  

‏5 ”مَاغَارْ أَمُّو إِ إِقَّارْ سِيذِي: ’وَارْ تَّاذفْ غَارْ إِشْثْ ن ثَادَّارْثْ ن وشْضَانْ ؤُ وَارْ ڭُّورْ أَذْ ثوْثذْ أَڭجْذُورْ ؤُ وَارْ أَرحّمْ، مَاغَارْ نشّْ كّْسغْ ڒهْنَا إِنُو خْ ڒْڭنْسْ-أَ، ثَامخْسِيوْثْ إِنُو إِشوَّارنْ ذ أَرّحْمثْ، أَمُّو إِ إِقَّارْ سِيذِي.‘ ‏6 إِمقّْرَاننْ ذ إِمژْيَاننْ أَذْ مّْثنْ ذِي ثمُّورْثْ-أَ. وَارْ ثنْ نطّْڒنْ ؤُ وَارْ خَاسنْ شَّاثنْ أَڭجْذُورْ ؤُ وَارْ خبّْشنْ إِخفْ نْسنْ نِيغْ أَذْ سّْقُوشَّارنْ إِخفْ نْسنْ ذِي طّْوعْ نْسنْ. ^▪   ‏7 وَارْ ذ أَسنْ إِتّْوَارْژْ وغْرُومْ زِي سِّيبّثْ ن وشْضَانْ حِيمَا أَذْ عزَّانْ شَا ن يِيجّنْ خْ إِجّْ ن ؤُمتِّي، ؤُ وَارْ ذ أَسنْ تِّيشنْ أَذْ سْونْ زڭْ ؤُغَارَّافْ ن ؤُعزِّي خْ بَابَاسْ نِيغْ يمَّاسْ.

‏8 وَارْ تَّاذفْ غَارْ ثَادَّارْثْ مَانِي تّڭّنْ زَّارْذثْ مَاحنْذْ أَذْ ثقِّيمذْ غَارْسنْ إِ مَاشَّا ذ ثْسسِّيثْ. ‏9 مَاغَارْ أَمُّو إِ إِقَّارْ سِيذِي ن ڒْعسْكَارَاثْ، أَربِّي ن إِسْرَائِيل: ’خْزَارْ، نشّْ أَذْ سّْبدّغْ زَّاثْ إِ ثِيطَّاوِينْ نْومْ ذڭْ ومْشَانْ-أَ ثْمِيجَّا ن وَارْشَاقْ ذ ثْمِيجَّا ن ڒفْرَاحثْ، ثْمِيجَّا ن مُوڒَايْ ذ ثْمِيجَّا ن ثسْڒِيثْ.‘ “ ^▪  

‏10 ”خْمِي إِ غَا ثْبَارّْحذْ مَارَّا أَوَاڒنْ-أَ إِ ڒْڭنْسْ-أَ ؤُشَا نِيثْنِي أَذْ سّقْسَانْ: ’مَايمِّي إِقَّارْ سِيذِي مَارَّا ڒْغَارْ-أَ أَمقّْرَانْ خَانغْ ؤُ مِينْ إِدْجَانْ ذ لْجَارِيمَا نّغْ ؤُ مِينْ إِدْجَانْ ذ دّنْبْ نّغْ إِ نڭَّا نشِّينْ أَكْ-ذ سِيذِي، أَربِّي نّغْ؟‘ ^▪  

‏11 خنِّي أَذْ أَسنْ ثِينِيذْ: ’مَاغَارْ إِبَابَاثنْ نْومْ سمْحنْ ذَايِي، أَمُّو إِ إِقَّارْ سِيذِي، ؤُشَا ؤُيُورنْ أَوَارْنِي إِ إِربِّيثنْ نّغْنِي ؤُشَا سخَّارنْ ؤُ ؤُضَارنْ أَسنْ، مَاشَا سمْحنْ ذَايِي ؤُ وَارْ حْضِينْ شَّارِيعَا إِنُو.

‏12 ؤُ كنِّيوْ سِيمَانْثْ نْومْ مَاشَا ثڭِّيمْ مَاهُو إِ إِبَابَاثنْ نْومْ، مِينْزِي خْزَارْ، كُوڒْ  إِجّْ زَّايْومْ إِضَافَّارْ ڒقْسَاحثْ ن وُوڒْ أَعفَّانْ نّسْ أَڒَامِي كنِّيوْ وَارْ د غَارِي ثسْڒِيمْ قَاعْ. ^▫  ▪  

‏13 س ؤُينِّي أَذْ كنِّيوْ حجَّارغْ غَارْ بَارَّا زِي ثمُّورْثْ-أَ غَارْ إِشْثْ ن ثمُّورْثْ إِ وَارْ ثسِّينمْ كنِّيوْ ؤُڒَا ذ إِبَابَاثنْ نْومْ، ؤُشَا ذِينِّي إِ غَا ثْعبْذمْ إِربِّيثنْ نّغْنِي، أَسّْ ذ دْجِيڒثْ، مِينْزِي نشّْ وَارْ غَارْومْ-د تَّارْزِيفغْ عَاذْ س شَا ن ڒْخَاضَارْ.‘ “ ^▪  

‏14 ”س ؤُينِّي، خْزَارْ، أَذْ د-أَسنْ وُوسَّانْ، أَمُّو إِ إِقَّارْ سِيذِي وَارْ ذ أَسْ قَّارنْ عَاذْ: ’س ثِيذتّْ أَمْ إِدَّارْ سِيذِي نِّي إِ د إِسُّوفّْغنْ أَيْثْ ن إِسْرَائِيل زِي مِيصْرَا!‘ ^▪  

‏15 مَاشَا: ’س ثِيذتّْ أَمْ إِدَّارْ سِيذِي ونِّي د-إِسُّوفّْغنْ أَيْثْ ن إِسْرَائِيل زِي ثمُّورْثْ ن شَّامَالْ ؤُ زِي مَارَّا ثِيمُّورَا مَانِي خَاسنْ يُوژّڒْ!‘ مِينْزِي نشّْ أَذْ ثنْ أَرّغْ غَارْ ثمُّورْثْ نِّي وْشِيغْ إِ إِبَابَاثنْ نْسنْ.

‏16 خْزَارْ، نشّْ أَذْ سّكّغْ أَطَّاسْ ن إِنيْمَارنْ ن إِسڒْمَانْ، أَمُّو إِ إِقَّارْ سِيذِي، إِنِّي ثنْ إِ غَا يْمَارنْ، ؤُ خنِّي أَذْ سّكّغْ أَطَّاسْ ن إِنيْمَارنْ نِّي خَاسنْ إِ غَا يَاژّْڒنْ زِي مْكُوڒْ أَذْرَارْ ؤُ زِي مْكُوڒْ ثَاوْرِيرْثْ ؤُ زڭْ إِفدْجِيقنْ جَارْ ڒجْرُوفْ.

‏17 مَاغَارْ ثِيطَّاوِينْ إِنُو تّْوَاڒَانْثْ مَارَّا إِبْرِيذنْ نْسنْ، نِيثْنِي وَارْ زمَّارنْ أَذْ زَّايِي نُّوفَّارنْ ؤُشَا ڒْمُوعْصِييّثْ نْسنْ وَارْ ثْزمَّارْ أَذْ ثنُّوفَّارْ زَّاثْ إِ ثِيطَّاوِينْ إِنُو. ^▪  

‏18 أَمزْوَارْ أَذْ خڒْفغْ س ؤُضفُّوسْ مَارَّا ڒْمُوعْصِييّثْ نْسنْ ذ مَارَّا دّْنُوبْ نْسنْ، مِينْزِي نِيثْنِي سّْعِيدْجْثنْ ثَامُّورْثْ إِنُو. نِيثْنِي شُّورنْ ثَاسْغَارْثْ إِنُو س ڒْخشْبَاثْ ن نّْعَاوَاثْ ن صَّانَامْ نْسنْ ؤُ س جّْعَايفْ نْسنْ.“ ^▪  

‏19 ”أَ سِيذِي، شكْ ذ جّهْذْ إِنُو ذ أَذُورِّي إِنُو ذ أَرْوَاڒْ إِنُو ذڭْ وَاسّْ ن ڒحْصَارثْ. أَذْ غَاركْ د-أَسنْ ڒڭْنُوسْ زڭْ إِنڭُّورَا ن دُّونشْثْ، أَذْ إِنِينْ: ’ثَاسْغَارْثْ نِّي طّْفنْ إِبَابَاثنْ نّغْ، ذَايسْ مْغِيرْ أَشْمَاثْ ذ أَعْبذْ ن ڒخْيَاڒَاثْ إِبطِّيڒنْ، ثِيمسْڒَايِينْ إِ وَارْ إِنفّْعنْ.

‏20 مَا إِزمَّارْ بْنَاذمْ أَذْ إِڭّْ إِربِّيثنْ إِ يِيخفْ نّسْ؟ نِيثْنِي مَاشَا وَارْ دْجِينْ ذ إِربِّيثنْ. ‏21 س ؤُينِّي، خْزَارْ، نشّْ أَذْ ثنْ أَرّغْ أَذْ شهْذنْ، ؤُڒَا ذ ثْوَاڒَا أَيَا أَذْ ثنْ أَرّغْ أَذْ شهْذنْ أَقَا ذ أَفُوسْ إِنُو ذ جّهْذْ إِنُو. نِيثْنِي أَذْ سّْننْ بلِّي إِسمْ إِنُو ’سِيذِي‘.“ ^▪