‏1 إِنَّا أَيِي سِيذِي: ”وَاخَّا مَاڒَا إِبدّْ مُوسَا ذ شَامْوِيلْ زَّاثْ إِ وُوذمْ إِنُو، عَاذْ وَارْ إِتِّيڒِي ڒعْمَارْ إِنُو أَكْ-ذ ڒْڭنْسْ-أَ. سِيڭّْوجْ إِ-ثنْ زِي زَّاثْ ن وُوذمْ إِنُو، أجّْ إِ-ثنْ أَذْ ؤُيُورنْ. ^▪   ‏2 خْمِي ذ أَشْ إِ غَا إِنِينْ: ’مَانِي إِ غَا نُويُورْ؟‘، خنِّي أَذْ أَسنْ ثِينِيذْ: ’أَمُّو إِ إِقَّارْ سِيذِي: وِي إِدْجَانْ إِ ڒْموْثْ، غَارْ ڒْموْثْ، ؤُ وِي إِدْجَانْ إِ سِّيفْ، غَارْ سِّيفْ، ؤُ وِي إِدْجَانْ إِ ڒَاژْ، غَارْ ڒَاژْ، ؤُ وِي إِدْجَانْ إِ ثْمحْبَاسْثْ، غَارْ ثْمحْبَاسْثْ!‘^▪   ‏3 أَذْ ثنْ خدْجْصغْ س أَربْعَا ن وبْرِيذنْ، أَمُّو إِ إِقَّارْ سِيذِي: س سِّيفْ أَڒَامِي إِ غَا تّْوَانْغنْ، س يِيطَانْ أَڒَامِي ثنْ جَارّنْ زڭْ وبْرِيذْ، س إِجْضَاضْ ن ؤُجنَّا ذ ڒوْحُوشْ ن ثمُّورْثْ أَڒْ غَا تّْوَاصَارْضنْ ؤُ أَذْ تّْوَاردّْدْجنْ. ^▪   ‏4 نشّْ أَذْ ثنْ جّغْ أَذْ خَاسنْ أَژّْڒنْ ذِي مَارَّا ثِيڭلْذِيوِينْ ن دُّونشْثْ، زِي سِّيبّثْ ن مَانَاسَّا، مِّيسْ ن حِيزْقِييَا، أَجدْجِيذْ ن يَاهُوذَا، ذ أَخْڒَافْ زِي مِينْ إِڭَّا ذِي ؤُرْشَالِيمْ. ^▪  

‏5 مَاغَارْ مَانْ ونْ ؤُمِي غَا ثزِّيدْجذْ، أَ ؤُرْشَالِيمْ؟ وِي ذ أَمْ إِ غَا إِسّْحِيسّْفنْ نِيغْ وِي د غَا إِفّْغنْ زڭْ وبْرِيذْ مَاحنْذْ أَذْ خَامْ إِسّقْسَا خْ ؤُمدُّورْ نّمْ؟ ^▪   ‏6 كنِّيوْ ثْسمْحمْ ذَايِي، أَمُّو إِ إِقَّارْ سِيذِي، كنِّيوْ ثْذوْڒمْ غَارْ ضفَّارْ. س ؤُينِّي إِ غَا سّْوِيژّْضغْ أَفُوسْ إِنُو ضِيدّْ نْومْ ؤُشَا أَذْ كنِّيوْ أَردّْدْجغْ. نشّْ ذوْڒغْ ندّْمغْ س ؤُحِينِّي خَاومْ. ^▪   ‏7 نشّْ أَذْ ثنْ زُوزَّارغْ س دْجُوحْ ذِي ثوُّورَا ن ثمُّورْثْ. نشّْ كشّْضغْ إِحنْجِيرنْ زِي ڒْڭنْسْ إِنُو ؤُشَا سّْهلّْكغْ ث. نِيثْنِي وَارْ د-ذْوِيڒنْ شَا زڭْ إِبْرِيذنْ نْسنْ إِعفَّاننْ.^▪   ‏8 ثِيجَّاڒْ نْسنْ أَذْ إِڒِينْثْ وسْعنْثْ خْ يجْذِي ن ڒبْحُورَاثْ. نشّْ ڭُّورْ أَذْ خَاسنْ د-غضْڒغْ، خْ يمَّاسْ ن ؤُحُوذْرِي، إِجّْ ن ؤُمْثحَّايْ ذِي طّْيَا ن وَاسّْ. ذغْيَا أَذْ خَاسنْ وْضِيغْ س ثِيڭّْوُوذِي ذ ؤُنخْڒِيعْ. ^▫   ‏9 ثنِّي إِ د-يُورْونْ سبْعَا ن إِحنْجِيرنْ، ثوْضَا غَارْ ثمُّورْثْ. نتَّاثْ ثذْڒقْ إِ بُوحْبڒْ نّسْ، ثغْڒِي ثْفُوشْثْ نّسْ أَمْ إِدْجْ عَاذْ ذ وَاسّْ. نتَّاثْ ثتّْسضْحَا ؤُشَا ثتّطّفْ إِ-ت إِ-د ڒفْضِيحثْ. مِينْ إِقِّيمنْ زَّايْسنْ أَذْ ث وْشغْ إِ سِّيفْ زَّاثْ إِ وُوذمْ ن ڒْعذْيَانْ نْسنْ.“ ^▪  

‏10 ”ؤُشْثْ خَافِي، يمَّا، أَقَا شمْ ثُورْوذْ أَيِي-د: إِجّْ ن ورْيَازْ ن ؤُمْشُوبّشْ، إِجّْ ن ورْيَازْ ن ؤُمنْغِي إِ مَارَّا ثَامُّورْثْ. نشّْ وَارْ ذ أَسنْثْ أَرْضْڒغْ ؤُشَا نِيثْنِي وَارْ ذ أَيِي تّتُّورْسنْ، وَاخَّا أَمنِّي مَارَّا نعّْڒنْ أَيِي.“ ^▫  ▪  

‏11 إِنَّا سِيذِي: ”أَهْ، مَاڒَا نشّْ وَارْ تّڭّغْ س ثْشُونِي أَكْ-ذ مِينْ إِقِّيمنْ ن ڒْڭنْسْ نّكْ، مَاڒَا نشّْ وَارْ د-ؤُسِيغْ غَاركْ إِ ڒعْذُو ذڭْ إِشْثْ ن ڒْوقْثْ ذ ثَاعفَّانْثْ ؤُ ذڭْ إِشْثْ ن ڒْوقْثْ نْ ڒحْصَارثْ.

‏12 مَا إِزمَّارْ بْنَاذمْ أَذْ يَارْژْ ؤُزَّاڒْ، ؤُزَّاڒْ د-يُوسِينْ زِي شَّامَالْ نِيغْ نّْحَاسْ؟ ^▪  

‏13 أَڭْڒَا نّكْ ذ ڒكْنُوزْ نّكْ أَذْ ثنْ وْشغْ ذ ثَاكشَّاضْثْ إِ ڒڭْنُوسْ، بْڒَا تَّامَانْ، زِي سِّيبّثْ ن مَارَّا دّْنُوبْ نّكْ ؤُشَا أَيَا ذِي مَارَّا ثَامُّورْثْ نّكْ. ^▪  

‏14 نشّْ أَذْ شكْ سّعْذُوغْ أَكْ-ذ ڒعْذُو نْومْ غَارْ إِشْثْ ن ثمُّورْثْ نِّي وَارْ ثسِّينذْ شَا، مَاغَارْ س وغْضَابْ إِنُو ثَارْغَا ثْمسِّي نِّي إِ غَا إِقِّيمنْ ثْشمّضْ ضِيدّْ نْومْ.“^▪  

‏15 ”أَ سِيذِي، شكْ ثسّْنذْ ت، إِذَارْ أَيِي ؤُشَا ڒْهَا-د أَكِيذِي! نْثَاقمْ أَيِي زڭْ ينِّي ذ أَيِي إِضفَّارنْ! وَارْ ذ أَيِي تّكّسْ أَمْ غَاركْ تَّاسِيعْ ن ڒْخَاضَارْ أَطَّاسْ. سّنْ أَقَا نشّْ أَذْ خَاكْ كْسِيغْ ڒْعَارْ ذِي طّْوعْ نّكْ. ^▪  

‏16 غَارْ أَذْ تّْوَافنْ وَاوَاڒنْ نّكْ، أَذْ ثنْ شّغْ ذغْيَا. أَوَاڒْ نّكْ ثُوغَا-ث إِ نشّْ ذ أَرْشُوقْ ذ ڒفْرَاحثْ إِ وُوڒْ إِنُو مَاغَارْ إِتّْوَابَارّحْ إِسمْ نّكْ ذِي ثِيوَا إِنُو، أَ سِيذِي، أَربِّي ن ڒْعسْكَارَاثْ.

‏17 نشّْ وَارْ تّْغِيمِيغْ شَا ذڭْ وڭْرَاوْ ن يِينِّي إِسْثهْزَانْ، وَارْ نڭّْزغْ س ڒفْرَاحثْ. زِي سِّيبّثْ ن ؤُفُوسْ نّكْ تّْغِيمِيغْ وحّْذِي، مَاغَارْ ثشُّورذْ أَيِي س وسْخضْ نّكْ. ^▪  

‏18 مَايمِّي ڒحْرِيقْ إِنُو إِدَّارْ ڒبْذَا ؤُ مَايمِّي وَارْ إِزمَّارْ ؤُيزِّيمْ إِنُو عمَّارْصْ أَذْ إِڭّنْفَا، مَا نتَّا يُوڭِي أَذْ إِڭّنْفَا؟ مَا س ثِيذتّْ أَقَا شكْ أَمْ وَامَانْ إِنْهوْڒنْ إِنِّي وَارْ ذِي إِدْجِي ڒَامَانْ؟“ ^▪  

‏19 ”س ؤُينِّي، أَمُّو إِ إِقَّارْ سِيذِي: ’مَاڒَا شكْ ثْذوْڒذْ-د، نشّْ أَذْ شكْ أَرّغْ أَذْ د-ثْذوْڒذْ ؤُ أَذْ ثْبدّذْ زَّاثْ إِ وُوذمْ إِنُو. مَاڒَا ثسُّوفّْغذْ مِينْ إِغْڒَانْ زِي جَارْ مِينْ وَارْ إِسكّْوَانْ وَالُو، أَذْ ثِيڒِيذْ أَمشْنَاوْ ؤُقمُّومْ إِنُو. أجّْ إِ-ثنْ أَذْ غَاركْ د-ذوْڒنْ، مَاشَا شكْ وَارْ ثْزمَّارذْ أَذْ غَارْسنْ د-ثْذوْڒذْ. ‏20 مَاغَارْ نشّْ أَذْ شكْ ڭّغْ إِ ڒْڭنْسْ-أَ ذ ڒْحِيضْ إِمثْننْ ن نّْحَاسْ. أَذْ خْسنْ أَكِيذكْ مّنْغنْ، مَاشَا نِيثْنِي وَارْ زمَّارنْ أَذْ شكْ أَرنْينْ، مَاغَارْ نشّْ أَكِيذكْ حِيمَا أَذْ شكْ سّْنجْمغْ ؤُ حِيمَا أَذْ شكْ فكّغْ، أَمُّو إِ إِقَّارْ سِيذِي.^▪   ‏21 نشّْ أَذْ شكْ فكّغْ زڭْ ؤُفُوسْ ن إِعفَّاننْ ؤُ نشّْ أَذْ شكْ فْذِيغْ زڭْ ومْنَاعْ ن أَيْثْ ن بُو-ڒخْشُونثْ.“