‏1 ”سْڒمْ أَوَاڒْ إِ زِي غَارْومْ د-إِسَّاوَاڒْ سِيذِي، أَ ثَادَّارْثْ ن إِسْرَائِيل! ‏2 أَمُّو إِ إِقَّارْ سِيذِي: ’وَارْ ڒمّْذمْ أَبْرِيذْ ن ڒڭْنُوسْ إِ يِيخفْ نّكْ ؤُ وَارْ تّْنخْڒِيعمْ زِي ڒعْڒَامَاثْ ن ؤُجنَّا، وَاخَّا ڒڭْنُوسْ تّْنخْڒَاعنْ زَّايْسنْثْ. ‏3 مَاغَارْ مِينْ زِي تّْوصَّانْ ڒڭْنُوسْ أَذْ إِفْنَا، مِينْزِي أَقَا أَيَا ذ أَكشُّوضْ نِّي د-قسّنْ زڭْ وزْغَارْ، ذْ ڒْخذْمثْ ن إِفَاسّنْ ن بُو-صّنْعثْ نِّي إِڭَّا س إِميْذِي ن ومْزِيڒْ. ^▫  ▪   ‏4 زوّْقنْ ت س نُّوقَارْثْ ذ وُورغْ، س إِمسْمِيرنْ ذ إِفْضِيسنْ سّْمثْننْ ت أَڒَامِي وَارْ ثقِّيمْ ثتّنْخُوخُوڒْ. ^▪   ‏5 ڒخْيَاڒَاثْ-أَ أَقَا أَثنْثْ أَمشْنَاوْ أَميْضَا إِ د-إِفّْغنْ زِي طَّابْڒَا ن ؤُسُويْذَايْ، وَارْ زمَّارنْ أَذْ سِّيوْڒنْ، إِتّْخصَّا أَذْ ثنْثْ أَرْپُونْ، مِينْزِي وَارْ زمَّارنْثْ أَذْ ؤُيُورنْثْ. وَارْ زَّايْسنْثْ ثڭّْوذمْ شَا، مَاغَارْ نِيثنْثِي وَارْ زمَّارنْثْ أَذْ ڭّنْثْ مِينْ إِعفّْننْ، ؤُ وَارْ زمَّارنْثْ أَذْ ڭّنْثْ مِينْ إِصبْحنْ.‘ “ ^▪  

‏6 ”ؤُڒَا ذ إِجّْ مَا أَمْ شكْ، أَ سِيذِي! شكْ ذ أَمقّْرَانْ ؤُ إِسمْ نّكْ ذ أَمقّْرَانْ س جّهْذْ. ^▪   ‏7 مَانْ ونْ وَارْ شكْ إِتّڭّْوِيذنْ، شكْ، أَ أَجدْجِيذْ ن ڒڭْنُوسْ؟ مِينْزِي أَيَا يُوسَا-د خَاكْ، مَاغَارْ جَارْ مَارَّا إِمِيغِيسنْ ن ڒڭْنُوسْ ؤُ ذِي مَارَّا ثَاڭلْذِيثْ نْسنْ ؤُڒَا ذ إِجّْ مَا أَمْ شكْ.“ ^▪  

‏8 ”أَقَا-ثنْ جْمِيعْ ذ إِفْغَارْ ذ إِپُوهَاڒِييّنْ، مِينْزِي تَّارْبِييّثْ ن ڒخْيَاڒَاثْ إِبطِّيڒنْ ثفّغْ-د زڭْ ؤُكشُّوضْ وَاهَا. ^▪   ‏9 إِوْينْ-د نُّوقَارْثْ إِتّْوَابزّْعنْ زِي ثَارْشِيشْ ذ وُورغْ زِي ؤُفَازْ، ڒْخذْمثْ ن ؤُحْرَايْفِي ؤُڒَا ن إِفَاسّنْ ن ومْزِيڒْ ن وُورغْ. أَرُّوضْ نْسنْ ن إِفِيڒَانْ إِذهْمَانِييّنْ ذ أَرْجُووَانِييّنْ، مَارَّا ڒخْيَاڒَاثْ ڭِّينْ ثنْثْ يرْيَازنْ إِمِيغِيسنْ.“

‏10 ”سِيذِي أَربِّي ذ ثِيذتّْ، نتَّا ذ أَربِّي إِدَّارنْ، ذ أَجدْجِيذْ نْ ڒبْذَا. ثَامُّورْثْ ثتّنْهزَّا س ؤُذُوقّزْ ن وغْضَابْ نّسْ ؤُشَا ڒڭْنُوسْ وَارْ زمَّارنْ أَذْ كْسنْ أَسْخضْ نّسْ.“

‏11 ”ذ مَانْ أَيَا ذ أَسنْ إِ غَا ثِينِيمْ: ’إِربِّيثنْ نِّي وَارْ إِڭِّينْ أَجنَّا ؤُڒَا ذ ثَامُّورْثْ، نِيثْنِي أَذْ تّْوَاقْضَانْ زِي ثمُّورْثْ ذ سَاذُو أَجنَّا.‘ “

‏12 ”نتَّا مَاشَا إِڭَّا ثَامُّورْثْ س جّْهذْ نّسْ، إِڭَّا دُّونشْثْ زِي ثِيغِيثْ ؤُ س ڒفْهَامثْ نّسْ إِبزّعْ أَجنَّا. ^▪  

‏13 ڒَامِي إِتّجَّا ثْمِيجَّا نّسْ أَذْ ت سْڒنْ، خنِّي ثڭَّا أَمْ ؤُشَارْشُورْ ن وَامَانْ ذڭْ ؤُجنَّا. إِسيْنُوثنْ إِسّْڭعَّاذْ إِ-ثنْ زڭْ إِنڭُّورَا ن دُّونشْثْ، إِتّڭّْ أَسَّامْ أَكْ-ذ ونْژَارْ ؤُ إِسّكَّا-د أَسمِّيضْ زڭْ إِخَّامنْ ن ثْخُوبَايْ نّسْ.“ ^▪  

‏14 ”كُوڒْ بْنَاذمْ ذ أَڭَارُّوضْ، بْڒَا ثُوسّْنَا، كُوڒْ أَمْزِيڒْ ن وُورغْ إِتّْسضْحَا زِي سِّيبّثْ ن ڒخْيَاڒْ إِنقْشنْ إِ إِڭَّا، مَاغَارْ ڒخْيَاڒْ نّسْ إِفسْينْ ذ إِخَارِّيقنْ، وَارْ ذَايسْ إِدْجِي بُوحْبڒْ.^▪  

‏15 ڒخْيَاڒَاثْ ن صَّانَامْ أَقَا فنَّانْثْ، أَقَا أَثنْثْ ذ ثِيمسْڒَايِينْ ن ثْسضْحَاشْثْ. ذِي ڒْوقْثْ مَانِي ثنْثْ إِ غَا عَاقْبنْ، أَذْ فْنَانْثْ.“

‏16 ”ثَاسْغَارْثْ ن يَاعْقُوبْ وَارْ ثدْجِي أَمشْنَاوْ ثَاسْغَارْثْ نْسنْثْ، مِينْزِي نتَّا ذ ونِّي إِڭِّينْ مَارَّا، ؤُشَا إِسْرَائِيل ذ ثَاقْبِيتْشْ ن ثسْغَارْثْ نّسْ، أَقَا سِيذِي ن ڒْعسْكَارَاثْ ذ إِسمْ نّسْ.“ ^▪  

‏17 ”سَارْوڒْ سّڒْعثْ زِي ثمُّورْثْ نّمْ، أَ شمْ ثَامْغَارْثْ نِّي إِزدّْغنْ ذِي لْقلْعَا!

‏18 مَاغَارْ أَمُّو إِ إِقَّارْ سِيذِي: ’خْزَارْ، ثْوَاڒَا أَيَا أَذْ نْضَارغْ إِمزْذَاغْ ن ثمُّورْثْ غَارْ ڒَاڭّْوَاجْ ؤُشَا أَذْ أَسنْ د-أَوْيغْ ذِي ڒحْصَارثْ، حِيمَا أَذْ تّْوَاطّْفنْ!‘ “ ^▪  

‏19 ”ؤُشْثْ إِنُو زِي سِّيبّثْ ن ثْرژِّيثْ إِنُو، أَيزِّيمْ إِنُو إِتّقّسْ أَيِي أَطَّاسْ. وَاخَّا نشّْ نِّيغْ: ’أَيَا ذ إِجّْ ن ڒهْڒَاشْ ؤُ نشّْ أَذْ ث كْسِيغْ!‘ ‏20 إِتّْوَاخَارّبْ ؤُقِيضُونْ إِنُو ؤُ مَارَّا إِمُورَارْ ن ؤُقِيضُونْ قطّْسنْ، إِحنْجِيرنْ إِنُو ؤُيُورنْ خَافِي ؤُ وَارْ ذَا دْجِينْ عَاذْ. وَارْ ذِينْ وِي إِ غَا إِسّْبدّنْ أَقِيذُونْ إِنُو ؤُشَا أَذْ خَاسْ يَايڒْ ثِيجَارْثِيڒِينْ نّسْ.“

‏21 ”مَاغَارْ إِمكْسَاونْ ثُوغَا قجْحنْ، سِيذِي وَارْ خَاسْ أَرْزُونْ. س ؤُينِّي ثُوغَا وَارْ ڭعّْذنْ ؤُ مَارَّا ثَاحِيمَارْثْ ن دّْمَانِي نْسنْ ثتّْوَازُوزَّارْ. ^▫   ‏22 ڒحْوڒْ ذ أَمقّْرَانْ، أَقَا ذَا، دّْرِيزْ زِي ثمُّورْثْ ذِي شَّامَالْ، حِيمَا أَذْ أَردّْدْجنْ ثِيندَّامْ ن يَاهُوذَا، مَاحنْذْ أَذْ ت أَرّنْ ذ ثَامُّورْثْ ن ثْزذِّيغْثْ إِ وُوشَّاننْ ن ڒخْڒَا.“ ^▪  

‏23 ”نشّْ سّْنغْ، أَ سِيذِي، أَقَا وَارْ د-ثقِّيمْ غَارْ بْنَاذمْ أَذْ إِخْضَارْ أَبْرِيذْ نّسْ، ؤُڒَا إِ ورْيَازْ إِڭُّورْ مَاحنْذْ أَذْ إِنْذهْ إِصُورَافْ نّسْ. ^▪   ‏24 سڭّمْ أَيِي، سِيذِي، مَاشَا س ڒْحقّْ، وَارْ إِدْجِي ذڭْ وغْضَابْ نّكْ، حِيمَا وَارْ ذ أَيِي ثَارِّيذْ ذ وَالُو. ^▪   ‏25 زدْجعْ أَسْعَارْ نّكْ خْ ڒڭْنُوسْ نِّي وَارْ شكْ إِسِّيننْ، ؤُ خْ ثْقبَّاڒْ نِّي وَارْ إِتّْڒِيغِينْ إِسمْ نّكْ، مِينْزِي نِيثْنِي صَارْضنْ يَاعْقُوبْ، صَارْضنْ ث ؤُشَا قْضَانْ خَاسْ ؤُشَا هذْمنْ أَمْشَانْ ن ثْزذِّيغْثْ نّسْ.“ ^▪