52
1 فَاقْ، فَاقْ، أَرْضْ س جّهْذْ أَ، إِمزْذَاغْ ن صِيهْيُونْ، أَرْضْ س ورُّوضْ نّمْ إِشُّووَّارنْ، أَ ؤُرْشَالِيمْ، ثَانْذِينْثْ ثَامْقدَّاسْثْ! زِي سَّا ثْسَاونْثْ وَارْ غَارمْ ث-إِ-د-إِتِّيذِيفْ عَاذْ ونِّي وَارْ إِتّْوَاخثْننْ ذ ؤُمخْمُوجْ. 2 زرْزْ خَامْ ثَاعجَّاشْثْ، كَّارْ، قِّيمْ شمْ، أَ ؤُرْشَالِيمْ! أَرْخُو سّْنَاسڒْ زڭْ يِيرِي نّمْ، أَ ثَامحْپُوسْثْ، أَ ثَايدْجِيثْ صِيهْيُونْ! 3 مَاغَارْ أَمُّو إِ إِقَّارْ سِيذِي: ’ثمّنْزمْ س بَاطڒْ، أَذْ ثتّْوَاسْفكّمْ عَاوذْ بْڒَا تّْمنْيَاثْ!‘ 4 مَاغَارْ أَمُّو إِ إِقَّارْ سِيذِي إِنُو، سِيذِي: ’زِيشْ إِهْوَا ڒْڭنْسْ إِنُو غَارْ مِيصْرَا مَاحنْذْ أَذْ ذِينِّي إِقِّيمْ أَمْ ڒْبَارَّانِي، ؤُشَا أَشُّورْ إِحْصَارْ إِ-ث خْ وَالُو!‘ “ ▪ 5 ”ؤُشَا ڒخُّو، مِينْ غَارِي عَاذْ خَافِي أَذْ ت ڭّغْ ذَانِيثَا، إِقَّارْ سِيذِي، مَاغَارْ أَوْينْ ڒْڭنْسْ إِنُو بْڒَا سِّيبّثْ ؤُشَا إِنِّي خَاسْ إِتّْصلّْطنْ سّْغُويّنْ، إِقَّارْ سِيذِي، أَسّْ مَارَّا تّْعيّْبنْ ذڭْ يِيسمْ إِنُو. ▪ 6 س ؤُيَا أَذْ إِسّنْ ڒْڭنْسْ إِنُو إِسمْ إِنُو، س ؤُيَا، أَقَا نشّْ ذ ونِّي إِقَّارنْ ذڭْ وَاسّْ نِّي: نشّْ أَقَا أَيِي ذَا!“
7 ”مشْحَاڒْ شْنَانْ خْ إِذُورَارْ إِصُورَافْ ن ؤُمْبشَّارْ نِّي إِتّْبَارّْحنْ س ڒهْنَا، ن ؤُمْبشَّارْ ن ڒخْبَارْ أَصبْحَانْ نِّي إِتّْبَارّْحنْ س ؤُسنْجمْ، ونِّي إِقَّارنْ إِ صِيهْيُونْ: ’أَربِّي نّمْ ذ أَجدْجِيذْ!‘ ▪ 8 سْڒمْ إِ ثْمِيجَّا ن إِعسَّاسنْ نّمْ! نِيثْنِي سّْڭعّْذنْ ثْمِيجَّا نْسنْ، سْڒِيوْڒِيونْ مُوننْ، مَاغَارْ ؤُذمْ ذڭْ ؤُذمْ أَكْ-ذ سِيذِي تّْوَاڒَانْ مَامّشْ إِ د-إِسّعْقبْ سِيذِي صِيهْيُونْ. 9 سْغُويّنْثْ س ڒفْرَاحثْ، سْڒِيوْڒونْثْ ثْمُوننْثْ، أَ ڒْخِيرْبَاثْ ن ؤُرْشَالِيمْ، مَاغَارْ سِيذِي إِسّْفوّجْ ڒْڭنْسْ نّسْ، إِسّنْجمْ ؤُرْشَالِيمْ.
10 إِعَارَّا سِيذِي أَغِيڒْ نّسْ أَمْقدّسْ زَّاثْ إِ ثِيطَّاوِينْ ن مَارَّا ڒڭْنُوسْ ؤُ مَارَّا ثِيمَاوِّينْ ن ثمُّورْثْ أَذْ ژَترنْثْ أَسنْجمْ ن أَربِّي نّغْ.“ ▪
11 ”رُوحمْ، رُوحمْ، فّْغمْ-د سّنِّي، وَارْ تّْحَاذَامْ وَالُو ن مِينْ إِخمْجنْ، فّْغمْ سّنِّي زِي ڒْوسْثْ نّسْ، سِيزذْڭمْ إِخفْ نْومْ، أَ كنِّيوْ إِنِّي يَاربُّونْ ڒقْشُوعْ ن سِيذِي! ▪
12 مَاغَارْ كنِّيوْ وَارْ ثتّفّْغمْ س ثزْڒَا، وَارْ ثَاركّْوَاڒمْ، مَاغَارْ سِيذِي أَذْ يُويُورْ زَّاثْ نْومْ ؤُ أَربِّي ن إِسْرَائِيل أَذْ يِيڒِي ذ أَغزْذِيسْ نْومْ أَنڭَّارْ.“
أَوَاڒْ وِيسّْ أَربْعَا خْ ؤُمْسخَّارْ ن سِيذِي
13 ”خْزَارْ، أَمْسخَّارْ إِنُو أَذْ يڭّْ س ڒعْقڒْ، أَذْ إِتّْوَاسّْعُودْجْ ؤُ أَذْ إِتّْوَاسُّوعْڒَا، وَاهْ أَذْ إِتّْوَاسْعُودْجْ أَڒْ طَّارْفْ.
14 أَمْ زَّايكْ نّْخڒْعنْ أَطَّاسْ — مَاغَارْ أَمُّو س وَاطَّاسْ إِخْصَارْ ؤُذمْ نّسْ، كْثَارْ زڭْ ؤُڒَا ذ إِجّنْ، ؤُ أَدُّوذْ نّسْ، كْثَارْ زڭْ ؤُڒَا ذ إِجّْ ن مِّيسْ ن بْنَاذمْ — ▪
15 أَمُّو إِ غَا إِسّنْڭزْ نتَّا أَطَّاسْ ن ڒڭْنُوسْ، وَاهْ، عَاذْ إِجدْجِيذنْ أَذْ سّغْذنْ، مَاغَارْ مِينْ وَارْ ذ أَسنْ بَارّْحنْ، أَذْ ث ژَترنْ، ؤُ مِينْ عمَّارْصْ وَارْ سْڒِينْ، أَذْ ث فهْمنْ.“ ▪