‏1 سْڒمْ-د غَارِي، أَ ثِيڭْزِيرِينْ، سْحسّمْ، أَ شُّوعُوبْ ن ڒَاڭّْوَاجْ! سِيذِي إِڒَاغَا أَيِي-د زڭْ وَامِي ذ أَيِي ثُوغَا ذڭْ ؤُعذِّيسْ ن يمَّا، زڭْ وَامِي ذ أَيِي ثُوغَا عَاذْ ذِي ڒمْڒَاوثْ إِڒَاغَا أَيِي-د س يِيسمْ إِنُو. ‏2 نتَّا إِڭَّا أَقمُّومْ إِنُو ذ سِّيفْ إِقضْعنْ، نتَّا إِسّْذُوڒِي أَيِي ذِي ثِيڒِي ن ؤُفُوسْ نّسْ. نتَّا إِڭَّا أَيِي ذ فْڒِيثْشَا س ثِيخفْثْ إِقضْعنْ، إِڭَّا أَيِي ذڭْ وقْرَابْ نّسْ ن فْڒِيثْشَاثْ. ‏3 إِنَّا أَيِي: ’شكْ ذ أَمْسخَّارْ إِنُو إِسْرَائِيل نِّي ذِي غَا تّْوَاسْعُودْجغْ!‘ “

‏4 ”مَاشَا نشّْ نِّيغْ: ’نشّْ أَرْبْرغْ خْ وَالُو، ضيّْعغْ جّهْذْ إِنُو ذِي ڒْبَاطڒْ ذِي ڒْخَاوِي. س ثِيذتّْ، ثَاسْغَارْثْ إِنُو غَارْ سِيذِي ؤُ ڒْمُونثْ إِنُو غَارْ أَربِّي إِنُو.‘ “

‏5 ”ؤُشَا ڒخُّو إِقَّارْ سِيذِي، ونِّي ذ أَيِي إِڭِّينْ ذ أَمْسخَّارْ زڭْ وَامِي ذ أَيِي ثُوغَا ذڭْ ؤُعذِّيسْ ن يمَّا مَاحنْذْ أَذْ غَارسْ د-سّْعقْبغْ يَاعْقُوبْ ؤُ مَاحنْذْ أَذْ غَارسْ سّْمُونغْ إِسْرَائِيل - وَاهْ نشّْ تّْوَاسْعُودْجغْ ذِي ثِيطَّاوِينْ ن سِيذِي ؤُشَا أَربِّي إِنُو ذ جّهْذْ إِنُو! — ‏6 وَاهْ نتَّا إِقَّارْ: ’ذْرُوسْ، أَقَا شكْ أَذْ ثِيڒِيذْ ذ أَمْسخَّارْ إِنُو مَاحنْذْ أَذْ ثسّْنكَّارذْ ثِيقبَّاڒْ ن يَاعْقُوبْ ؤُ مَاحنْذْ أَذْ د-ثَارّذْ إِنِّي إِتّْوَاحْذَانْ زِي إِسْرَائِيل. نشّْ ڭِّيغْ شكْ ذ ثَافَاوْثْ إِ ڒڭْنُوسْ، مَاحنْذْ أَذْ ثِيڒِيذْ ذ أَسنْجمْ إِنُو أَڒْ ؤُنڭَّارْ ن ثمُّورْثْ!‘ ‏7 أَمُّو إِ إِقَّارْ سِيذِي، أَمفْذِي ن إِسْرَائِيل، أَمْقدّسْ نّسْ، إِ ورْيَازْ إِتّْوَاسّحْقَارنْ، إِ ونِّي ذ نّْعِي ن ڒْڭنْسْ، إِ ؤُمْسخَّارْ ن أَيْثْ نْ صُّولْطَا: ’إِجدْجِيذنْ أَذْ شكْ ژَترنْ ؤُ أَذْ كَّارنْ، ڒْحُوكَّامْ أَذْ أَضَارنْ زَّاثكْ ذِي طّْوعْ ن سِيذِي، ونِّي ذ أَمْثِيقِّي، أَمْقدَّاسْ ن إِسْرَائِيل، ونِّي شكْ إِفَارْزنْ!‘ “

‏8 ”أَمُّو إِ إِقَّارْ سِيذِي: ’ذِي ڒْحَاڒْ ن أَرْضَا، سْڒِيغْ أَشْ، ؤُ ذڭْ وَاسّْ ن ؤُسنْجمْ، وْشِيغْ أَشْ أَفُوسْ. نشّْ أَذْ شكْ حْضِيغْ ؤُ أَذْ شكْ أَرشّْحغْ ذ ڒْعَاهْذْ ن ڒْڭنْسْ، مَاحنْذْ أَذْ ثسّْبدّذْ ثَامُّورْثْ، مَاحنْذْ أَذْ ثطّْفذْ ثِيسقَّارْ يَاردّْدْجنْ عَاوذْ ذ ثَاسْغَارْثْ، ^▪   ‏9 مَاحنْذْ أَذْ ثِينِيذْ إِ إِمحْبَاسْ: فّْغمْ-د!، إِ ينِّي إِدْجَانْ ذِي ثَادْجسْثْ: ضْهَارمْ-د! أَذْ أَروْسنْ غَارْ إِبْرِيذنْ، خْ مَارَّا ثِيوْرِيرِينْ إِقُوشَّارنْ أَذْ إِڒِينْ دّْمَانِي نْسنْ ن ثَاروْسَا.

‏10 وَارْ خَاسنْ إِتّكّْ ڒَاژْ ؤُڒَا ذ أَفَاذِي، ڒحْمُو ذ ثْفُوشْثْ وَارْ ثنْ ثشِّيثْ شَا، مَاغَارْ ونِّي خَاسنْ إِتّْحِينَّانْ أَذْ ثنْ إِڭوّذْ، أَذْ ثنْ إِنْذهْ غَارْ ثَاڒَاوِينْ ن وَامَانْ. ^▪  

‏11 مَارَّا إِذُورَارْ إِنُو أَذْ ثنْ ڭّغْ ذ إِبْرِيذنْ ؤُ إِبْرِيذنْ إِنُو إِوَاطَانْ أَذْ تّْوَاسُّوعْڒَانْ.

‏12 خْزَارْ، أَذْ د-أَسنْ زِي ڒَاڭّْوَاجْ. خْزَارْ، إِنَا أَذْ د-أَسنْ زِي شَّامَالْ ؤُ زِي ڒبْحَارْ ؤُ إِنّغْنِي زِي ثمُّورْثْ ن أَسْوَانْ.‘ “ ^▫  

‏13 ”سْڒِيوْڒِيومْ، أَ كنِّيوْ إِجنْوَانْ، فَارْحثْ، أَ شمْ ثَامُّورْثْ! أَرّمْ إِذُورَارْ أَذْ دُّوقّْزنْ س ؤُسْڒِيوْڒوْ، مَاغَارْ سِيذِي إِسّْفوّجْ خْ ڒْڭنْسْ نّسْ، نتَّا أَذْ إِحِينّْ خْ ڒْمُوسَاكِينْ نّسْ!“

‏14 ”مَاشَا صِيهْيُونْ ثنَّا: ’سِيذِي إِسْمحْ ذَايِي، سِيذِي إِتُّو أَيِي.‘

‏15 مَا ثْزمَّارْ ثمْغَارْثْ أَذْ ثتُّو أَسيْمِي نّسْ ؤُمِي وَارْ ثتّْحِينِّي خْ مِّيسْ ن ؤُعذِّيسْ نّسْ؟ وَاخَّا ثتُّو ث، نشّْ وَارْ شمْ تّتُّوغْ.

‏16 خْزَارْ، نشّْ نقْشغْ شمْ ذِي ثْنَاينْ ن ثْڒقَّا ن إِفَاسّنْ إِنُو، ڒحْيُوضْ نّمْ ڒبْذَا غَارِي زَّاثْ إِ ثِيطَّاوِينْ.

‏17 إِحنْجِيرنْ نّمْ أَذْ عرْفنْ، مَاشَا إِمْثحَّاينْ نّمْ ؤُ إِنِّي شمْ إِخَارّْبنْ أَذْ خَامْ ؤُيُورنْ.“

‏18 ”سْڭعّذْ ثَامُوغْڒِي نّمْ ؤُشَا خْزَارْ ذَا ذ ذِيهَا. خْزَارْ، مَارَّا مُوننْ، ؤُسِينْ-د غَارمْ. س ثِيذتّْ أَمْ دَّارغْ نشّْ، إِقَّارْ سِيذِي، أَذْ ثَارْضذْ إِخفْ نّمْ س مَارَّا إِنَا أَمْ س ڒهْزُوطْ، ؤُشَا أَذْ زَّايْسنْ ثْزوّْقذْ إِخفْ نّمْ أَمْ ث ثڭَّا ثسْڒِيثْ.‘ ^▪  

‏19 مَاغَارْ س ثِيذتّْ أَمْ ذِينْ خْڒَانْثْ ڒْخِيرْبَاثْ نّمْ ذ إِمُوشَانْ نّمْ إِتّْوَاردّْدْجنْ ذ ثمُّورْثْ نّمْ إِتّْوَاثحَّانْ، أَمُّو س ثِيذتّْ أَذْ ثِيڒِيذْ ثحْصَارذْ إِ إِمزْذَاغْ، ؤُشَا إِنِّي إِخْسنْ أَذْ شمْ صَارْضنْ، أَذْ إِڒِينْ غَارْ ڒَاڭّْوَاجْ.

‏20 ؤُڒَا ذ إِحنْجِيرنْ نِّي زَّايمْ إِتّْوَاشَارنْ، أَذْ إِنِينْ ذڭْ إِمزُّوغنْ نّمْ: ’أَمْشَانْ ذَايسْ ڒْحصْرَانْ خَافِي، أڭّْ أَيِي أَمْشَانْ إِ نشّْ، مَاحنْذْ زمَّارغْ أَذْ ذَايسْ زذْغغْ!‘ ‏21 أَذْ ثِينِيذْ ذڭْ وُوڒْ نّمْ: ’مَانْ ونْ إِ ذ أَيِي د-يُورْونْ مَارَّا إِحنْجِيرنْ-أَ؟ ؤُشَارنْ أَيِي إِحنْجِيرنْ ؤُ وَارْ د-تِّيرْوغْ، سُّوفّْغنْ أَيِي-د ذ أَمحْپُوسْ ؤُشَا نْضَارنْ أَيِي-د. مَانْ ونْ إِ ثنْ إِسّيْمنْ؟ خْزَارْ، نشّْ وَاهَا ذ ثنِّي ثُوغَا إِشطّنْ، مَانِيسْ د-ؤُسِينْ نِيثْنِي؟‘ “

‏22 ”أَمُّو إِ إِقَّارْ سِيذِي إِنُو، سِيذِي: ’خْزَارْ، أَذْ سّْڭعّْذغْ أَفُوسْ إِنُو غَارْ ڒڭْنُوسْ ؤُ أَذْ سّْبدّغْ ثَاعدْجَانْثْ إِنُو إِ ڒڭْنُوسْ. خنِّي أَذْ أَوْينْ إِحنْجِيرنْ نّمْ ذڭْ وحْسِينْ نْسنْ غَارْ ذَانِيثَا ؤُشَا أَذْ أَرْپُونْ يسِّيمْ خْ ثْغَارْضِينْ نْسنْ. ‏23 إِجدْجِيذنْ أَذْ شمْ صُوننْ، ثِيجدْجِيذِينْ أَذْ شمْ سُّوطّْذنْثْ. أَذْ أَضَارنْ زَّاثكْ س ؤُغمْپُوبْ نْسنْ غَارْ ثمُّورْثْ، أَذْ أَمْ ڒسْحنْ ثَاعجَّاشْثْ زڭْ إِضَارنْ نّمْ. خنِّي أَذْ ثسّْنذْ أَقَا نشّْ ذ سِيذِي: إِنِّي خَاسْ إِ غَا إِسِيثِيمنْ، وَارْ تّْسضْحِينْ شَا.‘ “

‏24 ”مَا إِزمَّارْ إِجّْ أَذْ إِكّسْ خْ ونِّي إِجهْذنْ زَّارْذثْ؟ مَا إِزمَّارْ أَذْ يَارْوڒْ ونِّي إِدْجَانْ ذ أَمحْپُوسْ ن ؤُمْسڭّذْ؟ ^▪   ‏25 مَاشَا أَمُّو إِ إِقَّارْ سِيذِي: ’أَذْ د-تّْوَاكّْسنْ إِمحْبَاسْ زڭْ ؤُفُوسْ ن ؤُمْزمَّارْ ؤُڒَا ذ ثَاكشَّاضْطْ ن ؤُقهَّارْ أَذْ ثخْثُوتّڒْ زِي جَارْ إِفَاسّنْ نّسْ. مَاغَارْ ونِّي إِخْسنْ أَذْ شمْ إِشَارّعْ، نشّْ أَذْ ث شَارّْعغْ، ؤُشَا إِحنْجِيرنْ نّمْ أَذْ ثنْ سّْنجْمغْ. ‏26 إِ ينِّي شمْ إِحصَّارنْ أَذْ أَسنْ وْشغْ أَذْ شّنْ أَيْسُومْ ن يِيخفْ نْسنْ ؤُ نِيثْنِي أَذْ سّْشَارنْ س إِذَامّنْ نْسنْ أَمْ س بِينُو ژمّنْ ث جْذِيذْ، ؤُ مَارَّا إِوْذَانْ أَذْ سّْننْ أَقَا نشّْ، سِيذِي، ذ أَمْسنْجَامْ نّمْ ذ أَمفْذِي نّمْ، أَمْزمَّارْ ن يَاعْقُوبْ.‘ “ ^▪