‏1 ”أَمُّو إِ إِقَّارْ سِيذِي: ’ؤُشْثْ خْ إِحنْجِيرنْ نِّي إِغوّْغنْ مَاحنْذْ أَذْ سُّوفّْغنْ شّْوَارْ، مَاشَا وَارْ إِدْجِي زَّايِي، مَاحنْذْ أَذْ ڭّنْ إِجّْ نْ ڒْعَاهْذْ، مَاشَا وَارْ إِدْجِي زِي أَرُّوحْ إِنُو، حِيمَا أَذْ سّْعُورّْشنْ دّنْبْ خْ دّنْبْ، ‏2 إِنِّي إِڭُّورنْ مَاحنْذْ أَذْ هْوَانْ غَارْ مِيصْرَا نْهْڒَا مَا أَذْ أَيِي سّقْسَانْ، حِيمَا أَذْ أَفنْ أَسڒْقِي غَارْ جّهْذْ ن فِيرْعُونْ ؤُ مَاحنْذْ أَذْ أَفنْ دُّورِي غَارْ ثِيڒِي ن مِيصْرَا. ‏3 مَاشَا جّهْذْ ن فِيرْعُونْ أَذْ كنِّيوْ يَارّْ ثتّْسضْحَامْ ؤُشَا أَذُورِّي ذِي يِيڒِي ن مِيصْرَا أَذْ كنِّيوْ إِفْضحْ. ‏4 مَاغَارْ ڒْحُوكَّامْ نّسْ دْجَانْ ذِي صُوعَانْ ؤُشَا إِمْسكَّانْ نّسْ إِوْضنْ غَارْ حَانِيسْ. ‏5 نِيثْنِي مَارَّا أَذْ تّْوَاسْبَارّْقنْ زِي ڒْڭنْسْ نِّي وَارْ ذ أَسنْ إِنفّْعنْ شَا، وَارْ إِتِّيشنْ أَفُوسْ ؤُڒَا ذ وَالُو ن ڒفْضڒْ، مَاشَا أَذْ ثنْ يَاوِي غَارْ ڒفْضِيحثْ ذ ڒْهڭْرَا.“ ^▪  

‏6 ڒْحُوكْمْ إِسَّاڭّْوَاذنْ خْ ڒْمَاڒْ ن ثمُّورْثْ ن لْجَانُوبْ.

”ذڭْ إِشْثْ ن ثمُّورْثْ ن ڒحْصَارثْ ذ دّدْجْ، مَانِي زَّايسْ د-ؤُسِينْ ثَايْرَاذْثْ ذ ويْرَاذْ ذ ؤُفِيغَارْ ذ ڒْحَايْشثْ إِشمْضنْ إِطَّاونْ، أَربُّونْ-د نِيثْنِي أَڭْڒَا نْسنْ خْ وعْرُورْ ن إِسْنُوسنْ ذ ڒكْنُوزْ نْسنْ خْ ثعْرُورِينْ ن إِڒغْمَانْ غَارْ إِجّْ ن ڒْڭنْسْ وَارْ ثنْ إِنفّعْ ذِي شَا. ‏7 مَاغَارْ مِيصْرَا أَذْ إِوْشْ أَفُوسْ بَاطڒْ ؤُ إِ وَالُو. س ؤُيَا ڒَاغِيغْ مِيصْرَا وَانِيثَا: ’رَاهَابْ أَكْ-ذ ؤُقمُّومْ أَمقّْرَانْ نّسْ ثقِّيمْ وَاهَا!‘ “

‏8 ”خنِّي ڒخُّو، أَرِي ث زَّاثْ إِ ثِيطَّاوِينْ نْسنْ خْ ثڒْوِيحْثْ ؤُشَا خبْشْ إِ-ث ذڭْ إِشْثْ ن ثبْرَاثْ إِتّْوَانّْضنْ، مَاحنْذْ أَذْ ثِيڒِي ثتّْوَاحْضَا أَڒْ أَسّْ إِ د غَا يَاسنْ، إِ ڒبْذَا، إِ ڒبْذَا نْ ڒبْذَا. ‏9 مَاغَارْ نِيثْنِي ذ ڒْڭنْسْ إِغوّْغنْ، أَيْثْ ن بُو-إِخَارِّيقنْ، إِحنْجِيرنْ نِّي وَارْ إِخْسنْ أَذْ سْڒنْ إِ شَّارِيعَا ن سِيذِي،

‏10 إِنِّي إِقَّارنْ إِ إِمْوَاڒَاونْ: ’وَارْ تّْوِيڒِيمْ شَا وَاهَا!‘، ؤُ إِ ينِّي إِخزَّارنْ ثِيمژْرَا: ’وَارْ تّْوِيڒِيمْ ثِيمژْرَا نِّي إِدْجَانْ ذ ثِيذتّْ. سِيوْڒمْ أَكِيذْنغْ مِينْ د إِسّْحِينِّيبنْ، مْڒِي ذ أَنغْ ثتّْوَاڒَامْ ثِيمژْرَا إِغشّنْ!

‏11 حيّْذمْ زڭْ وبْرِيذْ، فّْغمْ زڭْ وبْرِيذْ، جّمْ أَمْقدَّاسْ ن إِسْرَائِيل أَذْ خَانغْ يِيڭّْوجْ!‘ “

‏12 ”س ؤُينِّي، أَمُّو إِ إِقَّارْ ؤُمْقدَّاسْ ن إِسْرَائِيل: ’مِينْزِي كنِّيوْ ثنْضَارمْ أَوَاڒْ-أَ، ثتّشْڒمْ خْ دّدْجْ ؤُ خْ مِينْ إِفّْغنْ زڭْ وبْرِيذْ، وَاهْ ثتّڭّمْ ڒَامَانْ نْونْ ذِي مَانْ أَيَا،

‏13 س ؤُينِّي أَذْ ثِيڒِي ڒْمُوعْصِييّثْ-أَ إِ كنِّيوْ أَمْ ثَازِّيثْ ذِي ڒْحِيضْ إِ غَا إِوْضَانْ، نِّي إِضهَّارنْ ذِي ڒْحِيضْ يُوعْڒَانْ، أَقَا ثَارژِّيثْ نّسْ أَذْ د-ثَاسْ ذغْيَا، ذڭْ إِشْثْ ن ثشْثِي. ^▪  

‏14 أَذْ ث يَارْژْ أَمْ إِتّْوَارْژْ إِجّْ ن ؤُغَارَّافْ ن بُو-ثْڒَاخْثْ نْهْڒَا أَحِينِّي. جَارْ مَارَّا إِفثْوِيثنْ نّسْ وَارْ إِتّْوَافْ ́́́عَاذْ ؤُڒَا ذ إِجّْ ن ؤُشقُّوفْ عَاذْ إِ زِي د غَا يَاوْينْ ثِيمسِّي زِي ڒْمجْمَارْ نِيغْ أَذْ أَيْمنْ أَمَانْ زِي جُّوبْ.‘ “ ^▪  

‏15 ”مَاغَارْ أَمُّو إِ إِقَّارْ سِيذِي إِنُو، سِيذِي، أَمْقدَّاسْ ن إِسْرَائِيل: ’س تُّوبثْ ذ ڒْهُوذْنثْ إِڒِي أَذْ غَارْومْ يِيڒِي ؤُسنْجمْ، ذِي ثْرُوسِي ذ ڒَامَانْ أَذْ غَارْومْ يِيڒِي جّهْذْ، مَاشَا كنِّيوْ وَارْ ثخْسمْ.‘

‏16 كنِّيوْ ثقَّارمْ: ’لَّ، خْ ييْسَانْ نخْسْ أَذْ نَارْوڒْ!‘ س ؤُيَا س ؤُغِيڒْ أَذْ ثَاروْڒمْ. ؤُشَا ثقَّارمْ عَاوذْ: ’خْ إِيْسَانْ ن حَامَاثْ نخْسْ أَذْ نِّييْ إِ ثَاروْڒَاثْ!‘ س ؤُيَا أَذْ قدْجْقنْ ؤُڒَا ذ إِمْسضْفَارنْ نْومْ!

‏17 إِجّْ نْ ڒُوڒُوفْ أَذْ يَارْوڒْ إِ ؤُهذِّي ن يِيجّْ. إِ ؤُهذِّي ن خمْسَا أَذْ ثَاروْڒمْ مَارَّا أَڒْ غَا ثقِّيممْ أَمشْنَاوْ ثَاسنْيَانْثْ ن ؤُشنْيَالْ خْ ثْقِيشّثْ ن وذْرَارْ، أَمشْنَاوْ ثْعدْجَانْثْ خْ ثوْرِيرْثْ.“ ^▪  

‏18 ”س ؤُينِّي أَذْ رَاجَا سِيذِي مَاحنْذْ أَذْ أَومْ إِسّْشنْ أَحِينِّي نّسْ، س ؤُينِّي أَذْ إِتّْوَاسْڭعّذْ مَاحنْذْ أَذْ كنِّيوْ يَارْحمْ، مَاغَارْ سِيذِي ذ أَربِّي ن ڒْحقّْ. سّعْذْ ن مَارَّا إِنِّي ث إِتّْرَاجَانْ. ^▪  

‏19 مَاغَارْ ڒْڭنْسْ أَذْ إِزْذغْ ذِي صِيهْيُونْ، ذِي ؤُرْشَالِيمْ. شكْ وَارْ ثتّْرُوذْ عمَّارْصْ عَاذْ، نتَّا أَذْ خَاكْ إِحِينّْ، مَاڒَا إِسْڒَا إِ ثْمِيجَّا نّكْ ثتّْڒَاغَا، أَذْ خَاكْ د-يَارّْ. ‏20 سِيذِي إِنُو أَذْ أَومْ إِوْشْ أَغْرُومْ ذِي ڒحْصَارثْ ؤُڒَا ذ أَمَانْ ذِي ڒغْبنْ، إِمسْغَارنْ نّكْ وَارْ إِتّْنُوفَّارنْ عَاذْ، مَاشَا ثِيطَّاوِينْ نّكْ أَذْ ژَترنْثْ إِمسْغَارنْ نّكْ. ‏21 إِمزُّوغنْ نّكْ أَذْ سْڒنْ إِ وَاوَاڒْ زِي غَارْ ضفَّارْ نّكْ إِ إِقَّارنْ: ’أَقَا أَبْرِيذْ، ؤُيُورمْ ذَايسْ. وَارْ تّفّْغمْ يفُّوسْ ؤُڒَا ذ أَزڒْمَاضْ.‘

‏22 أَذْ ثْحسْبمْ إِشلّلنْ ن ڒخْيَاڒَاثْ إِنقْشنْ إِ إِتّْوَاڭّنْ س نُّوقَارْثْ نّكْ ؤُڒَا ذ أَڒحّفْ ن ڒخْيَاڒَاثْ نّكْ د-إِفسْينْ ن وُورغْ نّكْ ذ ڒخْمُوجِي. أَذْ ثنْ ثنْضَارذْ أَمْ وَارُّوضْ ثسّخْمجْ إِ-ث ثمْغَارْثْ إِ خْ دْجَانْ إِذَامّنْ، أَذْ ثِينِيذْ: ’غَارْ بَارَّا!‘ “

‏23 ”خنِّي أَذْ إِوْشْ نتَّا أَنْژَارْ إِ زَّارِيعثْ نّكْ إِ ثْزَارْعذْ ذڭْ إِيَّارْ ؤُڒَا ذ أَغْرُومْ نِّي ذ صَّابثْ ن ثمُّورْثْ نّكْ. خْ دّْمَانِي إِسَارّْحنْ أَذْ ثهْذَا ثْحِيمَارْثْ نّكْ ذڭْ وَاسّْ نِّي. ‏24 إِينْذُوزنْ ذ يغْيَاڒْ إِمژْيَاننْ، إِنِّي إِشَارّْزنْ ثَامُّورْثْ، أَذْ شّنْ ڒعْڒفْ إِردّْ إِ زُوزَّارنْ س دْجُوحْ ذ ثزَّارْثْ. ‏25 خْ كُوڒْ أَذْرَارْ ؤُ خْ كُوڒْ ثَاوْرِيرْثْ إِڭعّْذنْ أَذْ إِڒِينْثْ ثِيغزْرَاثِينْ ذ ثْمِيزَابِينْ شُّورنْ س وَامَانْ، ذڭْ وَاسّْ ن ثْغَارْصْثْ ثَامقّْرَانْثْ، خْمِي إِ غَا وْضَانْ صُّومْعَاثْ. ‏26 ثَافَاوْثْ ن ثْزِيرِي أَذْ ثِيڒِي أَمْ ثْفَاوْثْ ن ثْفُوشْثْ ؤُشَا ثَافَاوْثْ ن ثْفُوشْثْ أَذْ ثِيڒِي ثجْهذْ سبْعَا ن ثْسقَّارْ خْ ثْفَاوْثْ ن سبْعَا ن وُوسَّانْ، ذڭْ وَاسّْ إِ ذِي إِ غَا إِجْبَارْ سِيذِي ثَارژِّيثْ ن ڒْڭنْسْ نّسْ ؤُشَا أَذْ إِسّْڭنْفَا أَيزِّيمْ ن ثشْثِي إِ إِوْثَا نتَّا.“

‏27 ”خْزَارْ، إِتَّاسْ-د إِسمْ ن سِيذِي زِي ڒَاڭّْوَاجْ، يَارقّْ وغْضَابْ نّسْ ؤُ أَسِيڭّْوذْ إِمْغَارْ، شُّورنْ إِينْشِيشنْ نّسْ س وسْخضْ ؤُ إِڒسْ نّسْ إِڭَّا أَمْ ثْمسِّي إِتّتّنْ. ‏28 أَصُوضِي ن نّفْسْ نّسْ أَمْ يغْزَارْ إِسّفْينْ، إِتَّاكّْوَاضنْ أَڒْ إِرِي، مَاحنْذْ أَذْ إِزُوزَّارْ ڒڭْنُوسْ س ثَازَّارْثْ ن ؤُردّدْجْ، ؤُ مَاحنْذْ أَذْ يڭّْ إِ ڒڭْنُوسْ سْڒِيمثْ ن ؤُغَارِّي خْ إِغسْمَارنْ نْسنْ.“ ^▪  

‏29 ”أَذْ غَارْونْ يِيڒِي إِجّْ ن إِزْڒِي، أَمشْنَاوْ ذِي دْجِيڒثْ نِّي ذِي إِسّوْجذْ بْنَاذمْ إِخفْ نّسْ إِ ڒْعِيذْ، ؤُڒَا ذ ڒفْرَاحثْ ذڭْ وُوڒْ أَمشْنَاوْ غَارْ إِجّنْ إِڭُّورنْ ؤُمِي إِژمَّارْ ذِي ثمْجَا مَاحنْذْ أَذْ د-يَاسْ غَارْ وذْرَارْ ن سِيذِي، غَارْ ثصْضَارْثْ ن إِسْرَائِيل. ‏30 سِيذِي أَذْ يجّْ أَذْ سْڒنْ إِ ثْمِيجَّا نّسْ يُوعْڒَانْ ؤُشَا أَذْ إِسّْشنْ مَامّشْ إِ غَا إِهْوَا ؤُغِيڒْ نّسْ أَكْ-ذ وسْخضْ ن وغْضَابْ ذ ثْمسِّي إِتّحْذُوذُوقنْ إِتّتّنْ، أَذُوقّزْ ن ونْژَارْ ذ ڒْحَاڒْ ن ونْژَارْ ذ إِبْقُوقنْ ن ثبْرُورِي. ‏31 مَاغَارْ أَشُّورْ أَذْ يَارْجِيجْ س ثْمِيجَّا ن سِيذِي خْمِي ث غَا إِوّثْ نتَّا س وعْمُوذْ نّسْ. ‏32 قَاعْ ثْوَاڒَا إِعدُّو خَاسْ وعْمُوذْ ن ؤُسڭّذْ، أَعْمُوذْ نِّي خَاسْ إِسَّارْسْ سِيذِي، أَقَا ذ مَانْ أَيَا سَاذُو ثِينخْثْ ن إِبنْذِيرنْ ذ سْنِيثْرَاثْ ن ڒْڭَامْبْرِييَّاثْ، مَاغَارْ نتَّا أَكِيذْسنْ إِمْنغْ س إِغَادْجنْ إِتّنْهزَّانْ. ‏33 مَاغَارْ زڭْ وشْحَاڒْ ؤُيَا إِوْجذْ ومْشَانْ إِ نّْعِي نِّي، إِ إِوْجذْ ؤُڒَا إِ ؤُجدْجِيذْ. إِڭَّا إِ-ث يُودْجغْ ذ ؤُمِيرِيوْ. أَقلِّيجْ نّسْ ن ثْمسِّي ذ ؤُكشُّوضْ ذ أَمقّْرَانْ. ثْوَارِّيثْ ن نّفْسْ ن سِيذِي أَذْ ث إِقدّْ أَمْ يغْزَارْ ن ڒشْبَارِييّثْ.“