‏1 ڒْحُوكْمْ إِسَّاڭّْوَاذنْ خْ ڒخْڒَا ن ڒبْحَارْ.

”أَمْ مَامّشْ تَّازّْڒنْثْ ثْحَارْيَاضِينْ ذِي ثمُّورْثْ ن لْجَانُوبْ، أَمُّو إِ غَا إِفّغْ نتَّا زِي ڒخْڒَا، زِي ثمُّورْثْ إِسَّاڭّْوَاذنْ. ^▫   ‏2 ثُوسَا-د غَارِي إِشْثْ ن ثْمژْرِيوْثْ ثقْسحْ: ’أَغدَّارْ إِتّڭّْ س ڒغْذَارثْ ؤُ أَمْثحَّايْ أَذْ إِثحَّا. ڭَاعّذْ-د، أَ عِيلَامْ، حْصَارْ، أَ مَاذَايْ!‘ نشّْ أَذْ سّْبدّغْ مَارَّا أَنخْسسْ نّسْ. ‏3 س ؤُينِّي تّكْسنْثْ ذَايِي ثجْعِينَّاثِينْ إِنُو، ؤُ تّطّْفنْ أَيِي ڒوْجعْ ن ثَارُوثْ أَمْ ڒوْجعْ ن إِشْثْ ن ثمْغَارْثْ إِتَّارْونْ. نشّْ تّْنزْبَارغْ خْمِي ذ أَسْ تّسْڒِيغْ، نّْخڒْعغْ ؤُمِي ث تّْوَاڒِيغْ. ‏4 ؤُڒْ إِنُو إِنّجْڒفْ، أَقَارْقبْ نّسْ إِسّنْهزَّا ذَايِي ثِيڭّْوُوذِي. ثْبَامْبَاسْثْ ن ثْمذِّيثْ نِّي وهّْشغْ أَطَّاسْ، إِڭَّا أَيِي ت ذ ڒْعُورّثْ.“ ^▪  

‏5 ”سْرُوسَا-د طَّابْڒَا، سْبدّْ أَعسَّاسْ، أشّْ، سُو!“

”كَّارمْ، أَ إِجدْجِيذنْ، ذهْنمْ ثَاسدَّارْثْ ن ؤُسڒْقِي!“ ‏6 مَاغَارْ أَمُّو إِ ذ أَيِي إِنَّا سِيذِي: ”ؤُيُورْ، أڭّْ إِجّْ ن ؤُعسَّاسْ، أجّْ إِ-ث أَذْ إِخبَّارْ مِينْ إِتّْوَاڒَا!“ ‏7 أَقَا إِژْرَا إِكَارُّوثنْ ن ؤُمنْغِي ذ ثْيُويَاثْ ن يِينِّي إِندّْهنْ إِيْسَانْ، إِجّْ ن ؤُكَارَابَانْ ن يغْيَاڒْ ذ إِجّْ ن ؤُكَارَابَانْ ن إِڒغْمَانْ. ثُوغَا إِحطَّا مْلِيحْ، مْلِيحْ أَطَّاسْ. ‏8 خنِّي إِڒَاغَا ونِّي إِژْرِينْ: ”أَ سِيذِي إِنُو، ذڭْ وَاسّْ تّْبذِّيغْ بْڒَا قطُّو خْ وشْبَارْ ن ثْعسَّاسْثْ ؤُ كُوڒْ دْجِيڒثْ تّْعسّغْ. ^▪   ‏9 خْزَارْ، ذِيهَا ؤُسِينْ-د إِرْيَازنْ نِّي إِنّْيِينْ خْ ييْسَانْ، ثْيُويَا ن إِمْنَاينْ أَكْ-ذ ثْيُويَا نّغْنِي!“ عَاوذْ إِطّفْ نتَّا ذڭْ وَاوَاڒْ، إِنَّا: ”ثوْضَا ثنْذِينْثْ ن بَابِيلْ، ثوْضَا، ذ مَارَّا ڒخْيَاڒَاثْ إِنقْشنْ ن إِربِّيثنْ نّسْ إِڒْبزْ إِ-ثنْ خْ ثمُّورْثْ!“ ^▪  

‏10 أَ أَسَارْوَاثْ إِنُو، أَ مِّيسْ ن ؤُنذْرَارْ إِنُو! مِينْ سْڒِيغْ زِي سِيذِي ن ڒْعسْكَارَاثْ، أَربِّي ن إِسْرَائِيل، خبَّارغْ كنِّيوْ خَاسْ.

‏11 ڒْحُوكْمْ إِسَّاڭّْوَاذنْ خْ ذُومَا.

”زِي سَاعِيرْ ڒَاغَانْ أَيِي-د: ’أَعسَّاسْ، مشْحَاڒْ عَاذْ غَا ثكّْ دْجِيڒثْ؟ أَعسَّاسْ، مشْحَاڒْ عَاذْ غَا ثكّْ دْجِيڒثْ؟‘

‏12 إِنَّا ؤُعسَّاسْ: ’يُوسَا-د ؤُثفُّو ن ڒْحَاڒْ، ؤُڒَا ذ دْجِيڒثْ ثُوسَا-د. مَاڒَا كنِّيوْ ثخْسمْ أَذْ ثسّقْسَامْ، سقْسَامْ! ذوْڒمْ-د، أَسمْ-د!‘ “

‏13 ڒْحُوكْمْ إِسَّاڭّْوَاذنْ ذِي ثْمذِّيثْ.

”ذڭْ وزْغَارْ ذِي ثمُّورْثْ ن وعْرَابنْ أَذْ ثسّنْسمْ، أَ كنِّيوْ، إِكَارَابَاننْ ن أَيْثْ ن ذَاذَانْ! ^▫  

‏14 ؤُيُورمْ غَارْ وُومْسَاڭَارْ أَكْ-ذ ونِّي إِفُّوذنْ حِيمَا أَذْ أَسْ ثَاوْيمْ أَمَانْ! إِمزْذَاغْ ن ثمُّورْثْ ن ثَايْمَا فّْغنْ-د غَارْ ؤُمْسَاڭَارْ أَكْ-ذ ؤُمَارْوَاڒْ س وغْرُومْ.

‏15 مَاغَارْ نِيثْنِي أَروْڒنْ زِي ڒسْيُوفْ، زِي سِّيفْ إِ د-إِتّْوَاجبْذنْ ؤُ زِي ڒْقوْسْ إِتّْوَامحْذنْ ؤُ زِي ڒغْبنْ ن ؤُمنْغِي.

‏16 مَاغَارْ أَمُّو إِ ذ أَيِي إِنَّا سِيذِي: ’عَاذْ ذڭْ إِجّْ ن ؤُسڭّْوَاسْ، عْلَاحْسَابْ إِسڭّْوُوسَا ن ؤُشوَّاڒْ، خنِّي أَذْ إِقْضَا مَارَّا خْ ؤُعُودْجِي ن قِيذَارْ!

‏17 ڒْقدّْ ن أَيْثْ ن بُو-ڒْقوْسْ إِقِّيمنْ، أَيْثْ ن بُو-ثغْڒُوذْطْ ن إِقِيذَارِييّنْ، أَذْ يِيڒِي ذْرُوسْ وَاهَا، مَاغَارْ سِيذِي، أَربِّي ن إِسْرَائِيل ذ ونِّي إِنَّانْ أَيَا.‘ “