أَوَاڒْ ن أَربِّي خْ مُوآبَ
15
1 ڒْحُوكْمْ إِسَّاڭّْوَاذنْ خْ مُوآبَ. ”وَاهْ، ذِي دْجِيڒثْ إِتّْوَاهْذمْ أَرْ-مُوآبَ، إِذْوڒْ إِسُّوسمْ، وَاهْ، ذِي دْجِيڒثْ إِتّْوَاهْذمْ قِيرْ-مُوآبَ، إِذْوڒْ إِسُّوسمْ! ▪ 2 ڭَاعّْذنْ غَارْ بَايِيثْ ذ ذِيپُونْ، غَارْ ڒڭْعُوذِي حِيمَا أَذْ رُونْ. ذِينِّي أَذْ إِرُو مُوآبَ خْ نَاپُو ذ مَايْذَابَا. قَاعْ أَزدْجِيفْ نْسنْ إِڒْسَا ذ أَقشَّارْ، مَارَّا ثِيمِيرَا تّْوَاحفّنْثْ. ▪ 3 بيْسنْ س ثْخُونْشَايْ ن وشْضَانْ ذڭْ إِزْنِيقنْ نْسنْ، أَقَا ذِينْ مْغِيرْ ثْغُويِّيثْ خْ ثْزغْوِينْ نْسنْ ؤُ ذڭْ إِزُورَايْ نْسنْ، إِمطَّاونْ وطَّانْ-د خْ ؤُغمْپُوبْ. 4 حَاشْپُونْ إِسْغُويُّو، ؤُڒَا ذ أَلِيعَالَا. تّسْڒَانْ إِ ثْمِيجَّا نْسنْ أَڒْ يَاهَاصْ. س ؤُينِّي سْغُويّنْ ؤُڒَا ذ إِرْيَازنْ ن مُوآبَ نِّي غَارْ إِدْجْ ڒسْنَاحْ، بُوحْبڒْ ن مْكُوڒْ أَرْيَازْ إِفْشڒْ ذَايسْ.
5 ؤُڒْ إِنُو إِسْغُويُّو خْ مُوآبَ. ثَارْوَا نّسْ ن ثَاصِيڒثْ إِوْضنْ أَڒْ ثَانْذِينْثْ ن صُوغَارْ، ثنِّي إِدْجَانْ أَمْ ثْينْذُوزْثْ ن ثْڒَاثَا ن إِسڭّْوُوسَا. مَاغَارْ أَمْ تّْرُونْ تّْڭعَّاذنْ ثَاسَاونْثْ ن لُوحِيثْ، وَاهْ ذڭْ وبْرِيذْ غَارْ حُورُونَايِيمْ سّْڭَاعَّاذنْ نِيثْنِي ثَاغُويِّيثْ ن ثْخسَّارْثْ. 6 مَاغَارْ أَمَانْ ن نِيمْرِيمْ أَذْ ذوْڒنْ إِمُوشَانْ خْڒَانْ. مَاغَارْ أَرّْبِيعْ إِسْڒَاوْ، أَغمُّويْ ن أَرّْبِيعْ إِقْضَا، وَارْ إِتِّيڒِي عَاذْ ؤُغمُّويْ أَزِيزَا. 7 س ؤُينِّي أَذْ أَرْپُونْ مِينْ إِشطّنْ ذ مِينْ كسْبنْ غَارْ ؤُجمَّاضْ ن يغْزَارْ ن إِصفْصَافنْ. 8 مَاغَارْ ثْغُويِّيثْ ن ؤُشثْشِي أَذْ د-ثفّغْ ذِي ثمُّورْثْ ن مُوآبَ، أَوعّضْ نّسْ أَذْ د-إِفّغْ أَڒْ أَجْلَايِيمْ، أَغُويِّي س إِمطَّاونْ أَڒْ بِي‘رْ-إِلِيمْ. 9 مَاغَارْ أَمَانْ ن ذِيمُونْ شُّورنْ س إِذَامّنْ، مَاغَارْ نشّْ أَذْ أَوْيغْ خْ ذِيپُونْ عَاذْ كْثَارْ: أَيْرَاذْ أَذْ د-يَاسْ خْ ينِّي يَاروْڒنْ زِي مُوآبَ، خْ مِينْ إِقِّيمنْ ذِي ثمُّورْثْ.“