‏1 ثِيغِيثْ ثبْنَا ثَادَّارْثْ نّسْ،

ثڭَّا ثسُّويْذَا إِبِيلَارنْ نّسْ، أَقَا أَثنْ ذِي سبْعَا.

‏2 نتَّاثْ ثْغَارْصْ إِ ڒْمَاڒْ نّسْ، ثْخدْجضْ بِينُو نّسْ.

عَاوذْ ثسُّو طَّابْڒَا نّسْ.

‏3 نتَّاثْ ثسّكّْ ثِيمْسخَّارِينْ نّسْ.

خْ ثْسَاوِينْ يُوعْڒَانْ قَاعْ ن ڒڭْعُوذِي ن ثنْذِينْثْ ثتّْڒَاغَا: ^▪  

‏4 ”ونِّي إِدْجَانْ ذ أَحَافِي، أجّْ إِ-ث أَذْ د-يَاسْ ذَانِيثَا!“

نتَّاثْ ثقَّارْ إِ ينِّي وَارْ غَارْ إِدْجِي شَا وُوڒْ إِمْثنْ:

‏5 ”أَسمْ-د، شّمْ زڭْ وغْرُومْ إِنُو،

سْومْ زِي بِينُو نِّي ذ أَومْ د-خدْجْضغْ.

‏6 جّمْ ثَاقُوبَّانشْثْ، ؤُشَا دَّارمْ،

ؤُ ضْفَارمْ أَبْرِيذْ ن ڒفْهَامثْ.“

‏7 ”ونِّي إِتّْوبّْخنْ أَمسْثهْزِييْ، إِسَّاربُّو ڒفْضِيحثْ إِ يِيخفْ نّسْ،

ونِّي إِتّْعَاقَابنْ أَعفَّانْ، أَقَا نتَّا يَاربُّو أَبقِّيضْ ن ڒفْضِيحثْ نّسْ.

‏8 وَارْ تّْعيَّابْ أَمسْثهْزِييْ حِيمَا نتَّا وَارْ شكْ إِشَارّهْ،

عيّبْ أَمِيغِيسْ، خنِّي نتَّا أَذْ شكْ إِخْسْ. ^▪  

‏9 أوْشْ إِ ؤُمِيغِيسْ، خنِّي ڭُّورْ أَذْ إِذْوڒْ ذ مِيغِيسْ كْثَارْ،

سْغَارْ ثُوسّْنَا إِ ؤُمْسڭّذْ، خنِّي نتَّا أَذْ إِفْهمْ كْثَارْ.“

‏10 ثِيڭّْوُوذِي ن سِيذِي ذ بدُّو ن ثِيغِيثْ،

ثُوسّْنَا ن ؤُمْقدَّاسْ ذ أَمّقْرَانْ ذ بدُّو ن ڒفْهَامثْ. ^▪  

‏11 مَاغَارْ زَّايِي أَذْ كْثَارنْ وُوسَّانْ نّكْ،

إِسڭّْوُوسَا ن ثُوذَارْثْ أَذْ تّْوَارْنِينْ إِ شكْ. ^▪  

‏12 مَاڒَا شكْ ذ مِيغِيسْ، خنِّي أَذْ ثِيڒِيذْ ذ مِيغِيسْ إِ يِيخفْ نّكْ،

ؤُ مَاڒَا ثسْثهزِّيذْ، أَذْ ثَارْپُوذْ أَيَا سِيمَانْثْ نّكْ.

‏13 ثَامْغَارْثْ ثَاپُوهَاڒشْثْ ثتّْپُوهْڒُويْ،

نتَّاثْ ذ ثَاقُوبَّانِيثْ، وَارْ ثسّنْ وَالُو. ^▪  

‏14 نتَّاثْ ثتّْغِيمَا غَارْ ثوَّارْثْ ن ثَادَّارْثْ نّسْ،

خْ إِجّْ ن كُورْسِي، خْ ڒڭْعُوذِي ن ثنْذِينْثْ

‏15 حِيمَا أَذْ ثْڒَاغَا خْ إِنِّي إِعدُّونْ،

إِنِّي إِڭُّورنْ نِيشَانْ إِمسْرَاقْ نْسنْ، ثنَّا:

‏16 ”ونِّي إِدْجَانْ ذ أَحَافِي، أجّْ إِ-ث أَذْ د-يَاسْ ذَانِيثَا!“

نتَّاثْ ثقَّارْ إِ ينِّي وَارْ غَارْ إِدْجِي شَا وُوڒْ إِمْثنْ:

‏17 ”أَمَانْ إِتّْوَاشَارنْ ذ إِمِيژِيذنْ،

أَغْرُومْ إِنُّوفَّارنْ أَقَا إِشْنَا.“ ^▪  

‏18 نتَّا وَارْ إِسِّينْ أَقَا ذِينْ ڒخْيَاڒَاثْ،

أَقَا إِنوْجِيونْ نّسْ ذڭْ وَادْجَاغْ ن ڒَاخَارْثْ إِ إِدْجَانْ. ^▪