‏1 حِيزْقِييَا إِذْوڒْ ذ أَجدْجِيذْ ؤُمِي ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا. نتَّا إِحْكمْ ثسْعَا ؤُ-عِيشْرِينْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ أَبِييَا، يدْجِيسْ ن زَاكَارِييَّا. ‏2 نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث إِڭَّا بَابَاسْ ذَاوُوذْ. ‏3 ذڭْ ؤُسڭّْوَاسْ أَمزْوَارُو ن ڒحْكَامثْ نّسْ، ذڭْ ؤُيُورْ أَمزْوَارُو، يَارْزمْ ثِيوُّورَا ن ثَادَّارْثْ ن سِيذِي ؤُشَا إِعْذڒْ إِ-ثنْثْ. ‏4 إِسِّيذفْ إِكهَّاننْ ذ إِلَاوِييّنْ ؤُشَا إِسّْمُونْ إِ-ثنْ خْ وَازَّايْ غَارْ ؤُغزْذِيسْ ن شَّارْقْ. ‏5 إِنَّا أَسنْ: ”سْڒمْ-د غَارِي، أَ إِلَاوِييّنْ. سْقدّْسمْ إِخفْ نْومْ ؤُڒَا ذ ثَادَّارْثْ ن سِيذِي، أَربِّي ن إِبَابَاثنْ نْومْ ؤُ كّْسمْ مَارَّا مِينْ إِخمْجنْ زِي زَّاوشْثْ إِقدّْسنْ. ‏6 مَاغَارْ إِبَابَاثنْ نّغْ ثُوغَا أَثنْ ذ إِغدَّارنْ ؤُ ڭِّينْ مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي، أَربِّي نّغْ. نِيثْنِي حيّْذنْ خَاسْ ؤُشَا نّْقڒْبنْ ؤُذْمَاونْ نْسنْ زِي ثْزذِّيغْثْ ن سِيذِي ؤُشَا أَرِّينْ س وعْرُورْ غَارْ سِيذِي. ‏7 عَاذْ ؤُڒَا ذ ثِيوُّورَا ن وسْقِيفْ ن وَاذَافْ ن زَّاوشْثْ بلّْعنْ ثنْثْ، سّْخسْينْ ڒفْنَارَاثْ ؤُ وَارْ سَّارْغنْ ڒَا ذ ڒبْخُورْ ؤُ وَارْ سّْڭعّْذنْ عَاذْ ثَاغَارْصْثْ ن وشْمَاضْ إِ أَربِّي ن إِسْرَائِيل ذِي زَّاوشْثْ إِقدّْسنْ. ‏8 س ؤُيَا يُوسَا-د ؤُذُوقّزْ أَمقّْرَانْ ن وغْضَابْ ن سِيذِي خْ يَاهُوذَا ذ ؤُرْشَالِيمْ ؤُشَا إِسلّمْ إِ-ثنْ إِ ؤُنخْڒعْ ؤُ إِ وَاردّدْجْ ؤُ إِ ؤُسمْژِي، أَمْ مَامّشْ ثتّْوَاڒَامْ كنِّيوْ س ثِيطَّاوِينْ نْومْ. ‏9 خْزَارمْ، خْ ؤُيَا وْضَانْ إِبَابَاثنْ نّغْ س سِّيفْ ؤُ إِحنْجِيرنْ نّغْ ذ ثْحنْجِيرِينْ نّغْ ذ ثمْغَارِينْ نّغْ أَقَا أَثنْ ذِي ڒحْبسْ خْ ؤُيَا.

‏10 ڒخُّو أَقَا-ت غَارِي ذڭْ وُوڒْ  إِنُو مَاحنْذْ أَذْ ڭّغْ إِجّْ ن ڒْعَاهْذْ أَكْ-ذ سِيذِي، أَربِّي ن إِسْرَائِيل، حِيمَا ڒْحَاذُوقْ ن وغْضَابْ نّسْ أَذْ خَانغْ إِبعّذْ.

‏11 أَ إِحنْجِيرنْ إِنُو، وَارْ أَرخُّومْ، مِينْزِي سِيذِي إِفَارْزْ إِ كنِّيوْ، أَقَا أَذْ ثْبدّمْ زَّاثْ إِ وُوذمْ نّسْ حِيمَا أَذْ أَسْ ثْسخَّارمْ ؤُ حِيمَا كنِّيوْ أَذْ أَسْ ثِيڒِيمْ ذ إِمْسخَّارنْ نّسْ ؤُ أَذْ أَسْ ثْقدّْممْ ڒبْخُورْ.“

‏12 خنِّي كَّارنْ إِلَاوِييّنْ: مَاحَاثْ، مِّيسْ ن عَامَاسَايْ، ذ يُووِيلْ، مِّيسْ ن عَازَارْيَا، زڭْ إِحنْجِيرنْ ن قُوحَاثْ. زڭْ إِحنْجِيرنْ ن مَارَارِي، قِيسْ، مِّيسْ ن عَابْذِي، ذ عَازَارْيَا، مِّيسْ ن يَاهْلَايِيلْ. زڭْ إِحنْجِيرنْ ن جَارْشُونْ، يُووَاخْ، مِّيسْ ن زِيمَّا، ذ عِيذَانْ، مِّيسْ ن يُووَاخْ.

‏13 زڭْ إِحنْجِيرنْ ن إِلِيصَافَانْ، شِيمْرِي ذ يَاعِييِيلْ، ؤُ زڭْ إِحنْجِيرنْ ن أَسَافْ، زَاكَارِييَّا ذ مَاتَّانْيَا.

‏14 زڭْ إِحنْجِيرنْ ن هَايْمَانْ، يَاحِييِيلْ ذ شِيمْعِي، ؤُ زڭْ إِحنْجِيرنْ ن يَاذُوثُونْ، شْمَاعْيَا ذ عُوزِّييِيلْ.

‏15 نِيثْنِي سّْمُوننْ أَيْثْمَاثْسنْ ؤُشَا سّْقدّْسنْ إِخفْ نْسنْ، عْلَاحْسَابْ ڒُومُورْ ن ؤُجدْجِيذْ ونِّي إِعمّْذنْ خْ وَاوَاڒنْ ن سِيذِي، حِيمَا أَذْ سِّيزذْڭنْ ثَادَّارْثْ ن سِيذِي.

‏16 ؤُذْفنْ إِكهَّاننْ غَارْ ثَادَّارْثْ ن سِيذِي حِيمَا أَذْ ت سِّيزذْڭنْ ؤُشَا سُّوفّْغنْ مَارَّا ڒخْمجْ إِ ؤُفِينْ ذِي زَّاوشْثْ ثَامقّْرَانْثْ غَارْ ڒمْرَاحْ ن ثَادَّارْثْ ن سِيذِي ؤُشَا إِلَاوِييّنْ كْسِينْ ث حِيمَا أَذْ ث أَوْينْ غَارْ بَارَّا، غَارْ ثغْزَارْثْ ن قِيذْرُونْ.

‏17 ذڭْ وَاسّْ أَمزْوَارُو ن ؤُيُورْ أَمزْوَارُو بْذَانْ أَذْ قدّْسنْ ثَادَّارْثْ ؤُشَا ذڭْ وَاسْ وِيسّْ ثْمنْيَا ن ؤُيُورْ إِوْضنْ نِيثْنِي غَارْ وسْقِيفْ ن وَاذَافْ ن زَّاوشْثْ ن سِيذِي ؤُشَا أَمُّو إِ سّْقدّْسنْ ثَادَّارْثْ ن سِيذِي ذِي ثْمنْيَا ن وُوسَّانْ. ذڭْ وَاسّْ وِيسّْ سطَّاشْ ن ؤُيُورْ أَمزْوَارُو ثُوغَا كمّْڒنْ ڒْخذْمثْ.

‏18 نِيثْنِي ؤُذْفنْ غَارْ ؤُجدْجِيذْ حِيزْقِييَا، نَّانْ: ”نشِّينْ نسِّيزْذڭْ مَارَّا ثَادَّارْثْ ن سِيذِي، أَعَالْطَارْ ن وشْمَاضْ أَكْ-ذ مَارَّا دُّوزَانَاثْ نّسْ ذ طَّابْڒَا س وغْرُومْ ن وسْشَانْ أَكْ-ذ مَارَّا دُّوزَانَاثْ نّسْ.

‏19 مَارَّا ڒقْشُوعْ إِ إِنْضَارْ ؤُجدْجِيذْ أَحَازْيَا زِي ڒغْذَارْ نّسْ ذڭْ وُوسَّانْ ن ثْڭلْذَا نّسْ، نعْذڒْ إِ-ثنْ ؤُ نسّْقدّسْ إِ-ثنْ. أَقَا أَثنْ زَّاثْ إِ ؤُعَالْطَارْ ن سِيذِي.“

‏20 خنِّي إِكَّارْ ؤُجدْجِيذْ حِيزْقِييَا زِيشْ ؤُشَا إِسّْمُونْ إِمقّْرَاننْ ن ثنْذِينْثْ ؤُشَا إِڭعّذْ غَارْ ثَادَّارْثْ ن سِيذِي. ‏21 نِيثْنِي إِوْينْ-د سبْعَا ن إِينْذُوزنْ ذ سبْعَا ن إِشَارِّييّنْ ذ سبْعَا ن إِزْمَارنْ ذ سبْعَا ن إِمُويَانْ أَذْ إِڒِينْ ذ ثَاغَارْصْثْ ن دّنْبْ إِ ثْڭلْذِيثْ، ڒَا إِ زَّاوشْثْ إِقدّْسنْ ؤُڒَا إِ يَاهُوذَا ؤُشَا نتَّا إِنَّا إِ إِحنْجِيرنْ ن هَارُونْ، إِكهَّاننْ، حِيمَا أَذْ ثنْ قدّْمنْ خْ ؤُعَالْطَارْ ن سِيذِي. ‏22 غَارْصنْ إِ إِفُونَاسنْ ؤُشَا سّڒْقَانْ إِكهَّاننْ إِ إِذَامّنْ ؤُشَا رُوشّنْ ثنْ خْ ؤُعَالْطَارْ. نِيثْنِي غَارْصنْ ؤُڒَا ذ إِشَارِّييّنْ ؤُشَا زدْجْعنْ إِذَامّنْ خْ ؤُعَالْطَارْ. غَارْصنْ ؤُڒَا إِ إِزْمَارنْ ؤُشَا زدْجْعنْ إِذَامّنْ خْ ؤُعَالْطَارْ. ‏23 نِيثْنِي إِوْينْ-د إِمُويَانْ إِ ثْغَارْصْثْ ن دّنْبْ زَّاثْ إِ وُوذمْ ن ؤُجدْجِيذْ ذ وڭْرَاوْ ن ڒْڭنْسْ ؤُشَا سَّارْسنْ خَاسنْ إِفَاسّنْ نْسنْ. ‏24 إِكهَّاننْ غَارْصنْ أَسنْ ؤُ س إِذَامّنْ نْسنْ سِّيزذْڭنْ أَعَالْطَارْ زِي دّنْبْ حِيمَا أَذْ فْذَانْ إِ مَارَّا إِسْرَائِيل، مَاغَارْ أَجدْجِيذْ ثُوغَا إِڭَّا ثَاغَارْصْثْ ن وشْمَاضْ ذ ثْغَارْصْثْ ن دّنْبْ نِّي إِ مَارَّا إِسْرَائِيل. ‏25 نتَّا إِسّْبدّْ إِلَاوِييّنْ ذِي ثَادَّارْثْ ن سِيذِي س ثَادْجُونِينْ ن وُوزَّاڒْ ذ ڒْڭَامْبْرِييَاثْ ذ لْهَارْبَاثْ، عْلَاحْسَابْ ڒُومُورْ ن ذَاوُوذْ ذ جَاذْ، أَمْوَاڒَاوْ ن ؤُجدْجِيذْ، ذ ؤُنَابِي نَاثَانْ، مِينْزِي ڒُومُورْ-أَ ثُوغَا إِ د-يُوسَا زِي سِيذِي س ؤُقمُّومْ ن إِنَابِييّنْ. ‏26 أَيْثْ ن لَاوِي بدّنْ ذِينْ أَكْ-ذ دُّوزَانَاثْ ن لْمُوسِيقَا ن ذَاوُوذْ ؤُ إِكهَّاننْ أَكْ-ذ ڒْغَايْطَاثْ.

‏27 خنِّي يُومُورْ حِيزْقِييَا أَذْ أَوْينْ ثَاغَارْصْثْ ن وشْمَاضْ خْ ؤُعَالْطَارْ. ذِي ثْسَاعّثْ إِ ذِي ثبْذَا ثْغَارْصْثْ ن وشْمَاضْ، إِبْذَا ؤُڒَا ذ أَزهّذْ إِ سِيذِي س ڒْغَايْطَاثْ ؤُ س دُّوزَانَاثْ ن لْمُوسِيقَا ن ذَاوُوذْ، أَجدْجِيذْ ن إِسْرَائِيل. ‏28 مَارَّا أَڭْرَاوْ ن ڒْڭنْسْ يُوضَارْ غَارْ ثمُّورْثْ، أَمْ تّْغنَّاجنْ ؤُ تّْصُوضَانْ ذِي ڒْغَايْطَاثْ. مَانْ أَيَا مَارَّا إِكَّا غَارسْ أَڒَامِي ثتّْوَاكمّڒْ ثْغَارْصْثْ ن وشْمَاضْ. ‏29 ؤُمِي إِكمّڒْ ؤُسِيوضْ ن ثْغَارْصْثْ ن وشْمَاضْ، إِبّنْذقْ ؤُجدْجِيذْ ذ مَارَّا إِنِّي ثُوغَا غَارسْ إِدْجَانْ ؤُشَا ؤُضَارنْ. ‏30 أَوَارْنِي إِ ؤُيَا إِنَّا ؤُجدْجِيذْ حِيزْقِييَا ذ إِمقّْرَاننْ إِ إِلَاوِييّنْ، أَذْ سّْعُودْجَانْ سِيذِي س وَاوَاڒنْ ن ذَاوُوذْ ؤُ ن ؤُمْوَاڒَاوْ أَسَافْ. سّْعُودْجَانْ أَڒَامِي د-ثُوسَا ڒفْرَاحثْ ؤُشَا سّْقوْسنْ إِزدْجِيفنْ نْسنْ ؤُشَا ؤُضَارنْ.

‏31 حِيزْقِييَا يَارَّا-د، إِنَّا: ”ڒخُّو كنِّيوْ ثتّْوَاڒقّْممْ ذ إِكهَّاننْ إِ سِيذِي. أَستِّيوْ-د ؤُشَا أَوْيمْ-د ثِيغَارْصَا ذ ثوْهِيبِينْ ن ؤُقَاذِي إِ ثَادَّارْثْ ن سِيذِي.“ خَاسْ ؤُشَا يِيوِي-د وڭْرَاوْ ن ڒْڭنْسْ ثِيغَارْصَا ذ ثوْهِيبِينْ ن ؤُقَاذِي ؤُ مَارَّا إِنِّي إِ غَارْ ت ثُوغَا ذِي ڒْخَاذَارْ نْسنْ إِوْينْ-د ثِيغَارْصَا ن وشْمَاضْ. ‏32 ڒْقدّْ ن ثْغَارْصَا ن وشْمَاضْ إِ د-يِيوِي وڭْرَاوْ ن ڒْڭنْسْ، أَقَا-ث ذِي سبْعِينْ ن إِفُونَاسنْ ذ مْيَا ن إِشَارِّييّنْ ذ مِيثَاينْ ن إِزْمَارنْ. نِيثْنِي مَارَّا تّْوَاوْينْ-د ذ ثَاغَارْصْثْ ن وشْمَاضْ إِ سِيذِي. ‏33 ثِيوْهِيبِينْ إِقدّْسنْ أَقَا أَثنْثْ ذِي ستَّا-مْيَا ن إِفُونَاسنْ ذ ثڒْثْ-أَڒَافْ ن وُودْجِي. ‏34 مَاشَا أَقَا ذِينْ ذْرُوسْ ن إِكهَّاننْ ؤُ نِيثْنِي وَارْ زمَّارنْ أَذْ سَّارْخُونْ ثِيڒْمشْثْ ن مَارَّا ثِيغَارْصَا ن وشْمَاضْ. س ؤُيَا عَاوْننْ ثنْ أَيْثْمَاثْسنْ إِلَاوِييّنْ، أَڒَامِي كمّْڒنْ ڒْخذْمثْ ؤُ أَڒَامِي إِكهَّاننْ نّغْنِي ثُوغَا سّْقدّْسنْ إِخفْ نْسنْ، مِينْزِي إِلَاوِييّنْ ثُوغَا سڭّْذنْ ذڭْ وُوڒْ كْثَارْ حِيمَا أَذْ سّْقدّْسنْ إِخفْ نْسنْ زڭْ إِكهَّاننْ. ‏35 ثُوغَا ذِينْ عَاوذْ أَطَّاسْ ن ثْغَارْصَا ن وشْمَاضْ، أَكْ-ذ ثَاذُونْثْ ن ثوْهِيبِينْ ن ؤُقَاذِي ذ ثوْهِيبِينْ ن ؤُسيّبْ إِ ثْغَارْصَا ن وشْمَاضْ. أَمُّو إِ ثتّْوَاعْذڒْ ثْسخَّارْثْ ن ثَادَّارْثْ ن سِيذِي. ‏36 حِيزْقِييَا ذ مَارَّا ڒْڭنْسْ فَارْحنْ خْ مِينْ ثُوغَا إِسّوْجذْ أَربِّي إِ ڒْڭنْسْ، مَاغَارْ ثَامسْڒَاشْثْ ثتّْوَاڭّْ بْڒَا مَا أَذْ أَسْ ڭّنْ ڒحْسَابْ.