‏1 أَحَازْ ثُوغَا غَارسْ عِيشْرِينْ ن إِسڭّْوُوسَا، ؤُمِي إِذْوڒْ ذ أَجدْجِيذْ. نتَّا إِحْكمْ سطَّاشْ ن إِسڭّْوُوسَا ذِي ؤُرْشَالِيمْ. نتَّا وَارْ إِڭِّي مِينْ إِدْجَانْ نِيشَانْ ذِي ثِيطَّاوِينْ ن سِيذِي، أَربِّي نّسْ، أَمْ مَامّشْ إِڭَّا بَابَاسْ ذَاوُوذْ. ‏2 نتَّا يُويُورْ ذڭْ إِبْرِيذنْ ن إِجدْجِيذنْ ن إِسْرَائِيل. عَاوذْ إِڭَّا ڒخْيَاڒَاثْ إِفسْينْ إِ إِبَاعْلنْ. ^▫   ‏3 نتَّا ثُوغَا إِتَّاوِي-د ڒبْخُورْ ذِي ثغْزُورْثْ ن بِينْ-هِينُّومْ ؤُ إِسّشْمضْ إِحنْجِيرنْ نّسْ ذِي ثْمسِّي ؤُ إِڭَّا عْلَاحْسَابْ جّْعَايفْ نِّي ڭِّينْ مَارَّا ڒڭْنُوسْ إِ خفْ يُوژّڒْ سِيذِي زَّاثْ إِ وُوذمْ ن أَيْثْ ن إِسْرَائِيل. ‏4 نتَّا يِيوْيِي-د ثِيغَارْصَا ذ ثوْهِيبِينْ ن ڒبْخُورْ خْ ڒڭْعُوذِي ؤُ خْ ثوْرِيرِينْ ؤُ سَاذُو مَارَّا أَزْغَارْ أَزِيزَا. ‏5 سِيذِي، أَربِّي نّسْ، إِوْشَا إِ-ث ذڭْ إِفَاسّنْ ن ؤُجدْجِيذْ ن أَرَامْ. نِيثْنِي وْثِينْ ث ؤُ حبّْسنْ زَّايْسنْ إِجّْ ن ؤُبَارُّو إِمْغَارْ ؤُ إِوْينْ ثنْ غَارْ ذِيمَاشْقْ. إِمّوْشْ أَحَازْ ذڭْ إِفَاسّنْ ن ؤُجدْجِيذْ ن إِسْرَائِيل، ونِّي ذ أَسْ إِوْثِينْ إِشْثْ ن ثشْثِي ذ ثَامقّْرَانْثْ. ^▫   ‏6 فَاقَاحْ، مِّيسْ ن رَامَالْيَا، إِنْغَا مْيَا ؤُ-عِيشْرِينْ-أَڒفْ ن يرْيَازنْ ذڭْ إِجّْ ن وَاسّْ ذِي يَاهُوذَا، مَارَّا نِيثْنِي ذ أَيْثْ ن ؤُمنْغِي، ؤُمِي حيّْذنْ خْ سِيذِي، أَربِّي ن إِبَابَاثنْ نْسنْ. ‏7 زِيكْرِي، إِجّْ ن بُو-ثغْرُوضْثْ زِي إِفْرَايِيمْ، إِنْغَا مَاعَاسِييَا، مِّيسْ ن ؤُجدْجِيذْ، ذ عَازْرِيقَامْ، أَوقَّافْ ن ثَادَّارْثْ، ذ إِلْقَانَا، ونِّي ذ وِيسّْ ثْنَاينْ أَوَارْنِي إِ ؤُجدْجِيذْ. ‏8 نذْهنْ أَيْثْ ن إِسْرَائِيل زڭْ أَيْثْمَاثْسنْ مِيثَاينْ-أَڒفْ ن ثمْغَارِينْ ذ إِحنْجِيرنْ ذ ثْحنْجِيرِينْ ذِي ثْمحْبَاسْثْ ؤُ طّْفنْ زَّايْسنْ إِشْثْ ن ثْكشَّاضْثْ ذ ثَامقّْرَانْثْ. إِوْينْ ثَاكشَّاضْثْ نِّي غَارْ سَامَارْيَا.

‏9 ذِينِّي إِدْجْ إِجّْ ن ؤُنَابِي ن سِيذِي، قَّارنْ أَسْ عُوذِيذْ. وَانِيثَا إِفّغْ غَارْ ڒْعسْكَارْ إِ د-إِعقْبنْ غَارْ سَامَارْيَا، إِنَّا أَسنْ: ”خْزَارمْ، مِينْزِي سِيذِي، أَربِّي ن إِبَابَاثنْ نْومْ، ثُوغَا إِسْعَارْ خْ يَاهُوذَا، إِڭَّا إِ-ثنْ ذڭْ ؤُفُوسْ نْومْ ؤُ كنِّيوْ ثنْغِيمْ ثنْ س إِجّْ ن وسْخضْ يِيوضْ أَڒْ أَجنَّا.

‏10 ؤُ ڒخُّو تّْغِيڒْ أَومْ كنِّيوْ أَذْ ثڭّمْ أَيْثْ ن يَاهُوذَا ذ ؤُرْشَالِيمْ ذ إِسمْغَانْ ذ ثْسمْغِينْ نْومْ. مَا وَارْ كنِّيوْ إِضْفَارْ خنِّي ؤُمَارْوَاسْ غَارْ سِيذِي، أَربِّي نْومْ؟

‏11 سْڒمْ-د ڒخُّو غَارِي ؤُ أَرّمْ إِمحْبَاسْ نِّي ثْحبّْسمْ زڭْ أَيْثْمَاثْومْ، مَاغَارْ ڒْحَاذُوقْ ن وغْضَابْ ن سِيذِي خَاومْ إِ د-يُوسَا.“

‏12 خنِّي سّْبدّنْ يرْيَازنْ-أَ زڭْ إِزدْجِيفنْ ن إِحنْجِيرنْ ن إِفْرَايِيمْ إِخفْ نْسنْ زَّاثْ إِ ينِّي د-يَارڭّْوحنْ زِي ڒْعسْكَارْ: عَازَارْيَا، مِّيسْ ن يُوحَانَانْ، بَارَاخْيَا، مِّيسْ ن مَاشِيلِّيمُوثْ، حِيزْقِييَا، مِّيسْ ن شَالُّومْ، ذ عَامَاسَا، مِّيسْ ن هِيذْلَايْ.

‏13 نِيثْنِي نَّانْ أَسنْ: ”وَارْ ثْزمَّارمْ أَذْ ثسِّيذْفمْ إِمحْبَاسْ ذَانِيثَا، مَاغَارْ نِيثْنِي أَذْ خَانغْ د-أَرنْينْ أَمَارْوَاسْ زَّاثْ إِ سِيذِي. مَا إِتّْغِيڒْ أَومْ نْزمَّارْ أَذْ نَارْنِي عَاذْ ذِي دّْنُوبْ نّغْ ذ ؤُمَارْوَاسْ نّغْ، وَاخَّا عَاذْ غَارْنغْ أَطَّاسْ ن إِمرْوُوسَا ؤُ ڒْحَاذُوقْ ن وغْضَابْ ن أَربِّي أَقَا-ث خْ إِسْرَائِيل؟“

‏14 خنِّي سمْحنْ يرْيَازنْ إِحزّْمنْ س ڒسْنَاحْ ذڭْ إِمحْبَاسْ ذ ثْكشَّاضْثْ زَّاثْ إِ إِمقّْرَاننْ ذ مَارَّا أَڭْرَاوْ ن ڒْڭنْسْ.

‏15 إِرْيَازنْ، إِنِّي إِتّْوَاسمَّانْ قْبڒْ س إِسْمَاونْ نْسنْ، كَّارنْ ؤُشَا ثْهلَّانْ ذڭْ إِمحْبَاسْ، سّْيَارْضنْ مَارَّا إِنِّي إِ ثُوغَا إِدْجَانْ ذ إِعَارْيَاننْ س وَارُّوضْ زِي ثْكشَّاضْثْ. سّْيَارْضنْ ثنْ س وَارُّوضْ ذ ثْسِيڒَا ؤُ وْشِينْ أَسنْ أَذْ شّنْ، أَذْ سْونْ. عَاوذْ ذهْننْ ثنْ ؤُشَا سّْغِيمنْ إِنِّي إِ ثُوغَا ڭُّورنْ تّنْقَارْضنْ خْ يغْيَاڒْ ؤُ أَمُّو إِوْينْ ثنْ غَارْ أَيْثْمَاثْسنْ غَارْ أَرِيحَا، ثَانْذِينْثْ ن ثِينِي. أَوَارْنِي مَانْ أَيَا عقْبنْ نِيثْنِي سِيمَانْثْ نْسنْ غَارْ سَامَارْيَا.

‏16 ذِي ڒْوقْثْ نِّي إِسّكّْ أَحَازْ إِرقَّاسنْ غَارْ إِجدْجِيذنْ ن أَشُّورْ، حِيمَا أَذْ أَسْ وْشنْ أَفُوسْ.

‏17 ؤُڒَا ذ أَيْثْ ن إِذُومْ ؤُسِينْ-د ؤُشَا وْثِينْ يَاهُوذَا ؤُ نذْهنْ ثنْ ذِي ثْمحْبَاسْثْ.

‏18 إِفِيلِيسْطِينِييّنْ هجْمنْ خْ ثْندَّامْ ن ثمُّورْثْ إِوَاطَانْ ذ لْجَانُوبْ ن يَاهُوذَا ؤُشَا طّْفنْ بَايْثْ-شَامْسْ، أَيَّالُونْ، جَاذِيرُوثْ، سُوكُو ذ ثْندَّامْ إِ غَارسْ د-إِقّْننْ، ثِيمْنَا ذ ثْندَّامْ إِ غَارسْ د-إِقّْننْ ذ جِيمْزُو ذ ثْندَّامْ إِ غَارسْ د-إِقّْننْ ؤُشَا زذْغنْ ذِينِّي.

‏19 مَاغَارْ سِيذِي إِسّهْقَارْ يَاهُوذَا ذِي سِّيبّثْ ن أَحَازْ، أَجدْجِيذْ ن يَاهُوذَا، مِينْزِي نتَّا إِفُّوشّحْ ذِي يَاهُوذَا ؤُ إِغْذَارْ سِيذِي. ‏20 ثِيغْلَاثْ-فِيلْنَاسِيرْ، أَجدْجِيذْ ن أَشُّورْ، يُوسَا-د غَارسْ. نتَّا إِڭَّا خَاسْ بزّزْ ؤُ وَارْ ث إِسّجْهذْ. ‏21 مَاغَارْ وَاخَّا أَحَازْ إِكْسِي أَڭْڒَا زِي ثَادَّارْثْ ن سِيذِي ؤُ زِي ثَادَّارْثْ ن ؤُجدْجِيذْ ؤُ ن ڒْحُوكَّامْ، إِوْشَا أَيَا إِ ؤُجدْجِيذْ ن أَشُّورْ، وَاخَّا أَمنِّي وَارْ إِنْفِيعْ ذِي شَا.

‏22 ذِي ڒْوقْثْ إِ ذِي إِتّْوَاحْصَارْ، يَارْنِي ؤُجدْجِيذْ أَحَازْ عَاذْ ذِي ڒْغذْرَانْ نّسْ زَّاثْ إِ سِيذِي. ‏23 نتَّا إِقدّمْ ثِيغَارْصَا إِ إِربِّيثنْ ن ذِيمَاشْقْ، إِنِّي خَاسْ إِغڒْبنْ، إِنَّا: ”مَاغَارْ إِربِّيثنْ ن إِجدْجِيذنْ ن أَرَامْ وْشِينْ أَسنْ أَفُوسْ، ؤُڒَا ذ نشّْ أَذْ أَسنْ وهّْبغْ حِيمَا أَذْ أَيِي وْشنْ أَفُوسْ عَاوذْ.“ مَاشَا نِيثْنِي ذوْڒنْ إِ ؤُوطُّو نّسْ ؤُ إِ مَارَّا إِسْرَائِيل. ‏24 أَحَازْ إِسّْمُونْ ڒقْشُوعْ زِي ثَادَّارْثْ ن أَربِّي ؤُشَا يَارْژَا ڒقْشُوعْ ن ثَادَّارْثْ ن أَربِّي ذِي إِوثْوِيثنْ ؤُشَا إِبلّعْ ثِيوُّورَا ن ثَادَّارْثْ ن سِيذِي ؤُشَا إِڭَّا إِ يِيخفْ نّسْ إِعَالْطَارنْ ذِي كُوڒْ ثَاغْمَارْثْ ن ؤُرْشَالِيمْ. ‏25 إِڭَّا ؤُڒَا ذ ڒڭْعُوذِي ذِي كُوڒْ ثَانْذِينْثْ ن يَاهُوذَا حِيمَا أَذْ أَوْينْ ڒبْخُورْ إِ إِربِّيثنْ نّغْنِي. أَمُّو إِ إِسْعَارْ سِيذِي، أَربِّي ن إِبَابَاثنْ نّسْ.

‏26 إِمزْرُوينْ إِقِّيمنْ ذ مَارَّا إِبْرِيذنْ نّسْ، إِمزْوُورَا ذ إِنڭُّورَا، خْزَارْ، أَقَا تّْوَازمّمنْ ذڭْ وذْلِيسْ ن إِجدْجِيذنْ ن يَاهُوذَا ذ إِسْرَائِيل. ‏27 أَحَازْ إِتّْوَاسَّارْسْ ذڭْ ونْضڒْ جَارْ ڒجْذُوذْ نّسْ. نضْڒنْ ث ذِي ثنْذِينْثْ، ذِي ؤُرْشَالِيمْ، مَاشَا وَارْ ث سَّارْسنْ شَا ذڭْ إِمضْڒَانْ ن إِجدْجِيذنْ ن إِسْرَائِيل. مِّيسْ حِيزْقِييَا إِذْوڒْ ذ أَجدْجِيذْ ذڭْ ومْشَانْ نّسْ.