‏1 إِنَا ذ أَيْثْ ن إِسْرَائِيل أَكْ-ذ ڒْقدّْ نْسنْ، إِزدْجِيفنْ جَارْ إِبَابَاثنْ ن ڒَادْجَاثْ، ؤُ ڒْقبْطَانَاثْ خْ وَاڒفْ ذ إِمقّْرَاننْ خْ مْيَا أَكْ-ذ إِوقَّافنْ نْسنْ، إِنِّي ثُوغَا إِتّْسخَّارنْ إِ ؤُجدْجِيذْ ذِي مَارَّا ثِيمسْڒَايِينْ ن ثرْبِيعِينْ، أَمْ مَانْ ونْ إِ د-إِتَّاسنْ، أَمْ مَانْ ونْ إِتّْرَاحنْ، ؤُ مَانْ أَيَا زڭْ ؤُيُورْ أَڒْ ؤُيُورْ نّغْنِي ذِي مَارَّا إِيُورنْ ن ؤُسڭّْوَاسْ. إِشْثْ ن ثرْبِيعْثْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏2 يَاسُوبْعَامْ، مِّيسْ ن زَابْذِييِيلْ، ثُوغَا خْ ثرْبِيعْثْ ثَامزْوَارُوثْ إِ ؤُيُورْ وِيسّْ أَمزْوَارُو. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏3 نتَّا ثُوغَا زڭْ إِحنْجِيرنْ ن فَارِيصْ. نتَّا ذ أَزدْجِيفْ ن مَارَّا إِكُومَانْذَارنْ ن ڒْعسْكَارْ ذڭْ ؤُيُورْ أَمزْوَارُو.

‏4 ذُوذَايْ، أَخُوخِي، ثُوغَا خْ ثرْبِيعْثْ ن ؤُيُورْ وِيسّْ ثْنَاينْ. مِيقْلُوثْ ذ أَمحْذَايْ ن ثرْبِيعْثْ نّسْ. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏5 بَانَايَا، مِّيسْ ن يَاهُويَاذَاعْ، أَكهَّانْ أَمقّْرَانْ ثُوغَا ذ أَكُومَانْذَارْ وِيسّْ ثْڒَاثَا ن ڒْعسْكَارْ إِ ؤُيُورْ وِيسّْ ثْڒَاثَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏6 بَانَايَا وَا ثُوغَا ذ بُو-ثغْرُوضْثْ ن ثْڒَاثِينْ ؤُ نتَّا ثُوغَا خْ ثْڒَاثِينْ. مِّيسْ عَامِّيزَابَاذْ ثُوغَا خْ ثرْبِيعْثْ نّسْ.

‏7 عَاسَايِيلْ، مِّيسْ ن يُووَابْ، ذ وِيسّْ أَربْعَا إِ ؤُيُورْ وِيسّْ أَربْعَا ؤُ مِّيسْ زَابَاذْيَا ثُوغَا أَوَارْنِي أَسْ. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏8 شَامْحُوثْ، أَيَازَارَاحِي، أَكُومَانْذَارْ، ثُوغَا خْ ثرْبِيعْثْ وِيسّْ خمْسَا إِ ؤُيُورْ وِيسّْ خمْسَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏9 عِيرَا، مِّيسْ ن عِيقِّيسْ، أَثِيقُوعِي، ثُوغَا ذ وِيسّْ ستَّا إِ ؤُيُورْ وِيسّْ ستَّا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏10 حَالِيصْ، أَفَالِيثُونِي، زڭْ إِحنْجِيرنْ ن إِفْرَايِيمْ، ثُوغَا ذ وِيسّْ سبْعَا إِ ؤُيُورْ وِيسّْ سبْعَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏11 سِيبْكَايْ، أَحُوشَاثِي، ن إِزَارَاحِييّنْ، ذ وِيسّْ ثْمنْيَا إِ ؤُيُورْ وِيسّْ ثْمنْيَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏12 أَبِيعَازَارْ، أَعَانَاثُوثِي، ن إِبِينْيَامِينِييّنْ، ثُوغَا ذ وِيسّْ ثسْعَا إِ ؤُيُورْ وِيسّْ ثسْعَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏13 مَاهَارَايْ، أَنَاطُوفَاثِي، إِ إِزَارَاحِييّنْ، ثُوغَا ذ وِيسّْ عشْرَا إِ ؤُيُورْ وِيسّْ عشْرَا. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏14 بَانَايَا، أَفَارْعَاثُونِي، زڭْ إِحنْجِيرنْ ن إِفْرَايِيمْ، ثُوغَا ذ وِيسّْ حِيطَّاشْ إِ ؤُيُورْ وِيسّْ حِيطَّاشْ. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏15 خَالْذَايْ، أَنَاطُوفَاثِي، إِدّْ-إِقَّارْسنْ زِي عُوثْنِييِيلْ، ثُوغَا ذ وِيسّْ ثنْعَاشْ إِ ؤُيُورْ ثنْعَاشْ. ثَارْبِيعْثْ نّسْ ذَايسْ أَربْعَا ؤُ-عِيشْرِينْ-أَڒفْ ن يرْيَازنْ.

‏16 إِنَا بدّنْ خْ ثْقبَّاڒْ ن إِسْرَائِيل:

إِ إِرُوبِينِييّنْ ثُوغَا إِلِيعَازَارْ، مِّيسْ ن زِيكْرِي، ذ أَمْڭوّذْ.

إِ إِشَامْعُونِييّنْ: شَافَاطْيَا، مِّيسْ ن مَاعْكَا.

‏17 إِ لَاوِي: حَاشَابْيَا، مِّيسْ ن قَامُووِيلْ.

إِ هَارُونْ: صَاذُوقْ.

‏18 إِ يَاهُوذَا: إِلِيهُو، زڭْ أَيْثْمَاسْ ن ذَاوُوذْ.

إِ إِسَّاكَارْ: عُومْرِي، مِّيسْ ن مِيخَايِيلْ.

‏19 إِ زَاپُولُونْ: يِيشْمَاعْيَا، مِّيسْ ن عُوبَاذْيَا.

إِ نَافْثَالِي: يَارِيمُوثْ، مِّيسْ ن عَازَارْيِيلْ.

‏20 إِ إِحنْجِيرنْ ن إِفْرَايِيمْ: حُوشِيعَا، مِّيسْ ن عَازَارْيَا.

إِ وزْينْ ن ثقْبِيتْشْ ن مَانَاسَّا: يُووِيلْ، مِّيسْ ن فَاذَايَا.

‏21 إِ وزْينْ ن ثقْبِيتْشْ ن مَانَاسَّا ذِي جِيلْعَاذْ: جَادُّو، مِّيسْ ن زَاكَارِييَّا.

إِ بِينْيَامِينْ: يَاعِيسِييِيلْ، مِّيسْ ن أَبْنرْ.

‏22 إِ ذَانْ: عَازَارْيِيلْ، مِّيسْ ن يَارُوحَامْ.

إِنَا ثُوغَا ذ ڒْحُوكَّامْ ن ثْقبَّاڒْ ن إِسْرَائِيل.

‏23 ذَاوُوذْ وَارْ إِكْسِي شَا ڒْقدّْ ن يِينِّي غَارْ إِدْجْ عِيشْرِينْ ن إِسڭّْوُوسَا ذ سْوَادَّايْ، مَاغَارْ سِيذِي ثُوغَا إِنَّا أَقَا نتَّا أَذْ يَارّْ إِسْرَائِيل ذڭْ وَاطَّاسْ أَمْ إِثْرَانْ ن ؤُجنَّا. ‏24 يُووَابْ، مِّيسْ ن صَارُويَا، ثُوغَا إِبْذَا أَذْ إِحْسبْ ڒْڭنْسْ، مَاشَا وَارْ ث إِكمّڒْ ؤُمِي د-يُوسَا ؤُذُوقّزْ ذ أَمقّْرَانْ ن وغْضَابْ خْ إِسْرَائِيل. س ؤُينِّي وَارْ إِتّْوَاڭّْ ڒْقدّْ ذڭْ وذْلِيسْ ن إِمزْرُوينْ ن ؤُجدْجِيذْ ذَاوُوذْ.

‏25 عَازَامُوثْ، مِّيسْ ن عَاذِييِيلْ، ثُوغَا خْ إِخَّامنْ ن ثْخُوبَايْ ن ؤُجدْجِيذْ.

يُونَاثَانْ، مِّيسْ ن عُوزِّييَا، ثُوغَا خْ إِخَّامنْ ن ثْخُوبَايْ ن ثمُّورْثْ، ذِي ثْندَّامْ، ذِي ذْشُورَاثْ ؤُ ذِي لْپُورْجَاثْ.

‏26 عَازْرِي، مِّيسْ ن كَالُوبْ، ثُوغَا إِطّفْ أَشْبَارْ خْ مَامّشْ ڭِّينْ ڒْخذْمثْ ذڭْ إِيَّارْ حِيمَا أَذْ شَارْزنْ أَشَاڒْ.

‏27 شِيمْعِي، أَرَامَاثِي، ثُوغَا إِطّفْ أَشْبَارْ خْ إِمَارْجَاعنْ ن ؤُضِيڒْ.

زَابْذِي، أَشِيفْمِي، ثُوغَا خْ زَّاذْ ن بِينُو نِّي إِدْجَانْ ذڭْ إِمَارْجَاعنْ ن ؤُضِيڒْ.

‏28 بَاعْلْ-حَانَانْ، أَجَاذِيرِي، ثُوغَا إِطّفْ أَشْبَارْ خْ إِحْوِيشنْ ن زِّيثُونْ ؤُ خْ إِزمُّورنْ نِّي إِدْجَانْ ذِي ثمُّورْثْ إِوَاطَانْ.

يُووَاشْ ثُوغَا خْ زَّاذْ ن زّشْثْ.

‏29 شِيطْرَايْ، أَشَارُونِي، ثُوغَا إِطّفْ أَشْبَارْ خْ إِفُونَاسنْ ذ ثْفُونَاسِينْ، إِنِّي إِهدَّا ذِي ڒوْضَا ن شَارُونْ.

شَافَاثْ، مِّيسْ ن عَالَايْ، ثُوغَا خْ إِفُونَاسنْ ذ ثْفُونَاسِينْ ذِي ڒوْضَاثْ ن ثغْزُورْثْ.

‏30 ؤُبِيلْ، أَسْمَاعِيلِي، ثُوغَا إِطّفْ أَشْبَارْ خْ إِڒغْمَانْ.

يَاحَاذْيَا، أَمِيرُونُوثِي، ثُوغَا خْ ثِيغْيَاڒْ.

‏31 يَازِيزْ، أَهَاجْرِي، ثُوغَا إِطّفْ أَشْبَارْ خْ وُودْجِي.

نِيثْنِي مَارَّا ثُوغَا أَثنْ ذ إِمحْذَاينْ خْ وَاڭْڒَا نِّي إِدْجَانْ ن ؤُجدْجِيذْ ذَاوُوذْ.

‏32 يُونَاثَانْ، عمِّيسْ ن ذَاوُوذْ، ثُوغَا ذ أَمْشَاوَارْ، إِجّْ ن بْنَاذمْ ذ أَمِيغِيسْ. نتَّا ثُوغَا عَاوذْ ذ أَمَارِيرْ.

يَاحِييِيلْ، مِّيسْ ن حَاكْمُونِي، ثُوغَا غَارْ إِحنْجِيرنْ ن ؤُجدْجِيذْ، يَاربَّا إِ-ثنْ.

‏33 أَخِيثُوفِيلْ ثُوغَا ذ أَمْشَاوَارْ ن ؤُجدْجِيذْ،

ؤُ حُوشَايْ، أَيَارْكِي، ثُوغَا ذ أَمدُّوكّڒْ ن ؤُجدْجِيذْ.

‏34 يَاهُويَاذَاعْ، مِّيسْ ن بَانَايَا، ذ أَبْيَاثَارْ ثُوغَا أَثنْ أَوَارْنِي إِ أَخِيثُوفِيلْ.

يُو‘أَبْ ثُوغَا-ث ذ أَكُومَانْذَارْ ن ڒْعسْكَارْ ن ؤُجدْجِيذْ.