‏1 ذَاوُوذْ إِمْشَاوَارْ أَكْ-ذ ڒْقبْطَانَاثْ خْ وَاڒفْ ذ خْ مْيَا ؤُ أَكْ-ذ مَارَّا إِمْڭوَّاذنْ. ‏2 ذَاوُوذْ إِنَّا إِ مَارَّا أَڭْرَاوْ ن ڒْڭنْسْ ن إِسْرَائِيل: ”مَاڒَا يَارْضَا إِ كنِّيوْ ؤُڒَا إِ سِيذِي، أَربِّي نّغْ، أجّْ أَنغْ أَذْ نسّكّْ ذغْيَا إِرقَّاسنْ غَارْ يَايْثْمَاثْنغْ نِّي إِقِّيمنْ ذِي مَارَّا ثِيمُّورَا ن إِسْرَائِيل ؤُ غَارْ إِكهَّاننْ ذ إِلَاوِييّنْ نِّي إِزدّْغنْ أَكِيذْسنْ ذِي ثْندَّامْ أَكْ-ذ دّْمَانِي نْسنْثْ ن ثَاروْسَا، حِيمَا نِيثْنِي أَذْ غَارْنغْ نّْيَارْونْ ‏3 ؤُ أجّْ أَنغْ أَذْ غَارْنغْ د-نَارّْ تَّاپُوثْ ن أَربِّي، مَاغَارْ ذڭْ وُوسَّانْ ن شَاوُولْ وَارْ أَكِيذسْ نڒْهِي. ‏4 مَارَّا أَڭْرَاوْ ن ڒْڭنْسْ إِنَّا بلِّي أَذْ ڭّنْ أَمُّو، مَاغَارْ ذ مَانْ أَيَا ذ إِشْثْ ن ثْمسْڒَاشْثْ ذ ثَاصبْحَانْثْ ذِي ثِيطَّاوِينْ ن مَارَّا ڒْڭنْسْ.

‏5 ذَاوُوذْ إِسّْمُونْ مَارَّا إِسْرَائِيل، زڭْ يغْزَارْ ن شِيحُورْ غَارْ مِيصْرَا أَڒْ مَانِي إِ غَا ثِيوْضذْ غَارْ حَامَاثْ، حِيمَا أَذْ سّْڭعّْذنْ تَّاپُوثْ ن أَربِّي زِي قَارْيَاثْ-يَاعَارِيمْ. ‏6 خنِّي إِفّغْ ذَاوُوذْ أَكْ-ذ مَارَّا إِسْرَائِيل غَارْ بَاعْلَا، غَارْ قَارْيَاثْ-يَاعَارِيمْ ونِّي إِدْجَانْ ذِي يَاهُوذَا حِيمَا أَذْ سّْڭعّْذنْ تَّاپُوثْ ن أَربِّي سّنِّي. تَّاپُوثْ ن سِيذِي ونِّي إِتّْغِيمَانْ سنّجْ إِ إِكِيرُوبنْ مَانِي إِتّْوَاڒَاغَا خْ يِيسمْ نّسْ. ^▫   ‏7 نِيثْنِي إِوْينْ-د تَّاپُوثْ ن أَربِّي خْ إِجّْ ن ؤُكَارُّو ن جْذِيذْ زِي ثَادَّارْثْ ن أَبِينَاذَابْ. عُوزَّا ذ أَخِييُو نذْهنْ أَكَارُّو. ‏8 ذَاوُوذْ ذ مَارَّا إِسْرَائِيل تِّيرَارنْ لْمُوسِيقَا س مَارَّا جّهْذْ نْسنْ زَّاثْ إِ وُوذمْ ن أَربِّي س يزْڒَانْ ذ ڒْڭَامْبْرِييَاثْ ذ لْهَارْبَاثْ ذ إِبنْذِيرنْ ذ ثدْجُونِينْ ن وُوزَّاڒْ ذ ڒْغَايْطَاثْ.

‏9 ؤُمِي د-إِوْضنْ نِيثْنِي غَارْ ؤُنذْرَارْ ن كِيذُونْ، إِسّْوِيژّضْ عُوزَّا أَفُوسْ نّسْ، حِيمَا أَذْ إِطّفْ تَّاپُوثْ مِينْزِي نْذرْفنْ إِفُونَاسنْ.

‏10 خَاسْ ؤُشَا يَارْغَا وغْضَابْ ن سِيذِي خْ عُوزَّا ؤُشَا إِوْثَا إِ-ث مَاغَارْ وَانِيثَا إِسّْوِيژّضْ أَفُوسْ نّسْ غَارْ تَّاپُوثْ ؤُشَا إِمُّوثْ ذِينْ زَّاثْ إِ وُوذمْ ن أَربِّي.

‏11 يِيوضْ سّمْ غَارْ وُوڒْ ن ذَاوُوذْ، أَقَا سِيذِي إِسْعَارْ أَمُّو خْ عُوزَّا ؤُ إِڭَّا أَسْ إِ ومْشَانْ نِّي فَارِيصْ-عُوزَّا أَڒْ أَسّْ-أَ.

‏12 ذڭْ وَاسّْ نِّي ثڒْقفْ ذَاوُوذْ ثِيڭّْوُوذِي زِي أَربِّي، إِنَّا: ”مَامّشْ إِ غَا ڭّغْ أَذْ غَارِي-د أَوْيغْ تَّاپُوثْ ن أَربِّي؟“

‏13 خْ ؤُيَا ذَاوُوذْ وَارْ إِجِّي أَذْ غَارسْ-د أَوْينْ تَّاپُوثْ ذِي ثنْذِينْثْ ن ذَاوُوذْ، مَاشَا إِجَّا إِ-ت أَذْ ثَاڭّْوجْ غَارْ ثَادَّارْثْ ن عُوبِيذْ-إِذُومْ، أَجِيتِّي.

‏14 ثكَّا تَّاپُوثْ ن أَربِّي ثْڒَاثَا ن إِيُورنْ ذِي ثَادَّارْثْ نّسْ غَارْ أَيْثْبَابْ ن ثَادَّارْثْ ن عُوبِيذْ-إِذُومْ، ؤُ إِبَاركْ سِيذِي ثَادَّارْثْ ن عُوبِيذْ-إِذُومْ ذ مَارَّا مِينْ غَارسْ إِدْجَانْ.