‏1 إِنَا إِ د-يُوسِينْ غَارْ ذَاوُوذْ غَارْ صِيقْلَاغْ، ؤُمِي ثُوغَا إِتّْخصَّا عَاذْ أَذْ إِقِّيمْ ذَاوُوذْ إِتّڭّْوجْ خْ وُوذمْ ن شَاوُولْ، مِّيسْ ن قِيشْ. نِيثْنِي ثُوغَا تّقّنْ إِ أَيْثْ ن بُو-ثغْرُوضْثْ إِنِّي إِوْشِينْ أَفُوسْ إِ ذَاوُوذْ ذڭْ ؤُمنْغِي. ‏2 نِيثْنِي ثُوغَا حزْمنْ س ڒقْوَاسْ ؤُ زمَّارنْ أَذْ حجَّارنْ س يژْرَا ؤُ أَذْ وْثنْ فْڒِيثْشَاثْ س ڒْقوْسْ س ؤُفُوسْ أَفُوسِي ؤُ س ؤُفُوسْ أَزڒْمَاضْ. نِيثْنِي ثُوغَا أَثنْ زڭْ أَيْثْمَاسْ ن شَاوُولْ زِي بِينْيَامِينْ.

‏3 أَخِيعَازَارْ ثُوغَا ذ أَزدْجِيفْ نْسنْ، خنِّي يُووَاشْ، نِيثْنِي س ثْنَاينْ إِذْسنْ ذ إِحنْجِيرنْ ن شَامَاعَا، أَجِيبَاعِي،

خنِّي يَازُو‘إِلْ ذ فَالَاطْ، نِيثْنِي س ثْنَاينْ إِذْسنْ ذ إِحنْجِيرنْ ن عَازْمُوثْ،

ؤُ بَارَاخْيَا ذ يَاهُو، زِي عَانَاثُوثْ،

‏4 ؤُ يَاشْمَاعْيَا، أَجِيبْعُونِي، ونِّي ثُوغَا ذ إِجّْ ن بُو-ثغْرُوضْثْ جَارْ ثْڒَاثِينْ ؤُ ثُوغَا خْ ثْڒَاثِينْ، ‏5 ؤُڒَا ذ إِرْمِييَا ذ يَاحْزِييِيلْ ذ يُوحَانَانْ ذ يُوزَابَاذْ، أَجَاذِيرِي،

‏6 ذ إِلْعُوزَايْ ذ يَارِيمُوثْ ذ بَاعْلِييَا ذ شَامَارْيَا ذ شَافَاطْيَا، أَحَارُوفِي،

‏7 ذ إِلْقَانَا ذ يَاشِييَاهُو ذ عَازْرِييِيلْ ذ يُوعَازَارْ ذ يَاشُوبْعَامْ، نِيثْنِي ذ إِقُورَاحِييّنْ،

‏8 ؤُ غَارْ ؤُنڭَّارْ يُوعِيلَا ذ زَابَاذْيَا، نِيثْنِي س ثْنَاينْ إِذْسنْ ذ إِحنْجِيرنْ ن يَارُوحَامْ زِي جَاذُورْ.

‏9 ؤُڒَا زڭْ أَيْثْ ن جَاذْ أَقَا ذِينْ إِنِّي إِسّبْضَانْ إِخفْ نْسنْ حِيمَا أَذْ ژْوَانْ غَارْ ذَاوُوذْ، ذِي لْقلْعَا ذِي ڒخْڒَا. أَيْثْ ن بُو-ثغْرُوضْثْ إِمحْضنْ، إِعسْكَارِييّنْ وجْذنْ إِ ؤُمنْغِي، تّْوَاحزْمنْ س ثْسدَّارِييِينْ ن ؤُعسْكَارِي ثِيمقّْرَانِينْ ؤُ س إِحْرِيشنْ. ؤُذْمَاونْ نْسنْ أَمْ وُوذْمَاونْ ن ويْرَاذنْ ؤُ نِيثْنِي ؤُيُورنْ س ثَازْڒَا أَمْ إِغَايْضنْ ن وزْغَارْ خْ إِذُورَارْ.

‏10 عَازَارْ ثُوغَا-ث ذ أَزدْجِيفْ،

عُوبَاذْيَا ذ وِيسّْ ثْنَاينْ، إِلِييَابْ ذ وِيسّْ ثْڒَاثَا،

‏11 مِيشْمَانَّا ذ وِيسّْ أَربْعَا، إِرْمِييَا ذ وِيسّْ خمْسَا،

‏12 عَاتَّايْ ذ وِيسّْ ستَّا، إِلِييِيلْ ذ وِيسّْ سبْعَا،

‏13 يُوحَانَانْ ذ وِيسّْ ثْمنْيَا، إِلْزَابَاذْ ذ وِيسّْ ثسْعَا،

‏14 إِرْمِييَا ذ وِيسّْ عشْرَا، مَاخْبَانَايْ ذ وِيسّْ حِيطَاشْ.

‏15 إِنَا ثُوغَا أَثنْ زڭْ إِحنْجِيرنْ ن جَاذْ، ڒْقبْطَانَاثْ خْ ڒْعسْكَارْ. أَمژْيَانْ حسْبنْ ث أَمْ مْيَا ن يرْيَازنْ ؤُ أَمقّْرَانْ أَمْ أَڒفْ.

‏16 إِنَا ذ إِنِّي إِژْوَانْ لْ'ؤُرْذُونْ ذڭْ ؤُيُورْ أَمزْوَارُو، ؤُمِي إِسْفِي لْ'ؤُرْذُونْ بَارَّا مَارَّا ثِيمُووَّا نّسْ ؤُ نِيثْنِي ؤُژّْڒنْ خْ مَارَّا إِمزْذَاغْ ن ڒوْضَاثْ ن ثغْزُورْثْ، إِ إِدْجَانْ غَارْ شَّارْقْ ذ ڒْغَارْبْ.

‏17 ؤُڒَا زڭْ إِحنْجِيرنْ ن بِينْيَامِينْ ؤُ زڭْ إِحنْجِيرنْ ن يَاهُوذَا ؤُسِينْ-د يرْيَازنْ غَارْ ذَاوُوذْ غَارْ لْقلْعَا ن وذْرَارْ.

‏18 ذَاوُوذْ إِفّغْ-د غَارْسنْ حِيمَا أَذْ ثنْ إِڒْقَا ؤُ إِطّفْ ذڭْ وَاوَاڒْ، إِنَّا أَسنْ: ”مَاڒَا كنِّيوْ ثُوسِيمْ-د غَارِي حِيمَا أَذْ أَيِي ثوْشمْ أَفُوسْ، خنِّي نشّْ أَذْ إِڒِيغْ س وُوڒْ ذ إِجّْ أَكِيذْومْ، مَاشَا مَاڒَا كنِّيوْ ثُوسِيمْ-د حِيمَا أَذْ أَيِي ثْسلّْمنْ إِ ڒْعذْيَانْ إِنُو، وَاخَّا وَارْ ذِينْ إِدْجِي ڒخْشُونشْثْ غَارْ إِفَاسّنْ إِنُو، خنِّي إِڒِي أَذْ ث إِژَارْ أَربِّي ن ڒجْذُوذْ نّغْ ؤُ أَذْ كنِّيوْ إِخدْجسْ!“

‏19 إِوْضَا-د أَرُّوحْ أَمْ وَارُّوضْ خْ عَامَاسَايْ، أَزدْجِيفْ ن ثْڒَاثِينْ، ؤُشَا نتَّا إِنَّا: ”نشِّينْ أَكِيذكْ، ذَاوُوذْ، ؤُ نشِّينْ أَكِيذكْ، مِّيسْ ن يَاسَّا. ڒهْنَا، ڒهْنَا أَذْ كِيذكْ يِيڒِي ؤُ ڒهْنَا أَذْ يِيڒِي أَكْ-ذ ينِّي ذ أَشْ إِوْشِينْ أَفُوسْ، مَاغَارْ أَربِّي نّكْ إِوْشَا أَشْ أَفُوسْ.“ خنِّي إِسِّيذفْ إِ-ثنْ ذَاوُوذْ ؤُ إِڭَّا إِ-ثنْ ذ إِزدْجِيفنْ خْ ثرْبِيعِينْ ن ڒْعسْكَارْ.

‏20 ؤُڒَا زِي مَانَاسَّا ثُوغَا ذِينْ إِنِّي إِعْذُونْ غَارْ ذَاوُوذْ، ؤُمِي د-إِفّغْ أَكْ-ذ إِفِيلِيسْطِينِييّنْ غَارْ ؤُمنْغِي أَكْ-ذ شَاوُولْ. إِفِيلِيسْطِينِييّنْ مَاشَا وَارْ ذ أَسنْ جِّينْ أَذْ وْشنْ أَفُوسْ، مِينْزِي ڒْبَاشَاثْ ن إِفِيلِيسْطِينِييّنْ سّكّنْ ث، نَّانْ: ”زعْمَا نتَّا إِزمَّارْ أَذْ إِعْذُو س إِزدْجِيفنْ نّغْ ذڭْ ؤُفُوسْ نّسْ غَارْ شَاوُولْ، سِيذسْ.“ ‏21 ؤُمِي د-إِعْقبْ غَارْ صِيقْلَاغْ، عْذُونْ إِنَا غَارسْ زڭْ أَيْثْ ن مَانَاسَّا: عَاذْنَاحْ، يُوزَابَاذْ، يَاذِيعِيلْ، مِيخَايِيلْ، يُوزَابَاذْ، إِلِيهُو ذ صِيلّْثَايْ، ڒْقبْطَانَاثْ خْ ڒُورُوفْ ن مَانَاسَّا. ‏22 نِيثْنِي وْشِينْ أَفُوسْ إِ ذَاوُوذْ حِيمَا أَذْ إِڭوّذْ بَانْذِييَّا ن ڒْعسْكَارْ، مَاغَارْ نِيثْنِي مَارَّا ثُوغَا أَثنْ ذ أَيْثْ ن بُو-ثغْرُوضْثْ إِمحْضنْ ؤُ نِيثْنِي ثُوغَا أَثنْ ذ ڒْقبْطَانَاثْ ذِي ڒْعسْكَارْ. ‏23 مَاغَارْ ذِي ڒْوقْثْ نِّي ؤُسِينْ-د يرْيَازنْ غَارْ ذَاوُوذْ زڭْ وَاسّْ أَڒْ أَسّْ حِيمَا أَذْ أَسْ وْشنْ أَفُوسْ أَڒَامِي ذوْڒنْ ذ ڒْعسْكَارْ ذ أَمقّْرَانْ، أَمشْنَاوْ ڒْعسْكَارْ ن أَربِّي.

‏24 وَا ذ ڒْقدّْ ن إِعسْكَارِييّنْ ن ڒْقبْطَانَاثْ إِ ثُوغَا إِسّْوجْذنْ إِ ؤُمنْغِي، إِنِّي د-يُوسِينْ غَارْ ذَاوُوذْ ذِي حَابْرُونْ مَاحنْذْ أَذْ سّعْذُونْ ثَاڭلْذَا ن شَاوُولْ غَارسْ، أَمْ مَامّشْ ث يُومُورْ سِيذِي:

‏25 زڭْ أَيْثْ ن يَاهُوذَا ثُوغَا ڒْقدّْ ن يِينِّي يَارْپُونْ ثِيسدَّارِييِينْ ن ؤُعسْكَارِي ثِيمقّْرَانِينْ ذ إِحْرِيشنْ ستَّا-أَڒَافْ ؤُ-ثمْنْ-مْيَا ن يرْيَازنْ. نِيثْنِي ثُوغَا سّْوجْذنْ إِ ؤُمنْغِي.

‏26 زِي أَيْثْ ن شِيمْعُونْ ثُوغَا ڒْقدّْ ن أَيْثْ ن بُو-ثغْرُوضْثْ إِمحْضنْ إِ ڒْعسْكَارْ سبْعَا-أَڒَافْ ؤُ-مْيَا ن يرْيَازنْ.

‏27 زڭْ إِحنْجِيرنْ ن لَاوِي أَربْعَا-أَڒَافْ ؤُ-ستَّا-مْيَا ن يرْيَازنْ.

‏28 يَاهُويَاذَاعْ ثُوغَا ذ أَمْڭوّذْ ن إِحنْجِيرنْ ن هَارُونْ. نتَّا يِيوِي أَكِيذسْ ثڒْثْ-أَڒَافْ ؤُ-سبْعَا-مْيَا ن يرْيَازنْ.

‏29 صَاذُوقْ ثُوغَا ذ أَحُوذْرِي، بُو-ثغْرُوضْثْ إِمحْضنْ. زِي ثَادَّارْثْ نّسْ ثُوغَا ذِينْ ثْنَاينْ ؤُ-عِيشْرِينْ ن ڒْقبْطَانَاثْ.

‏30 زڭْ إِحنْجِيرنْ ن بِينْيَامِينْ، أَيْثْمَاسْ ن شَاوُولْ، ثُوغَا ذِينْ ثڒْثْ-أَڒَافْ ن يرْيَازنْ، مِينْزِي أَزْينْ أَمقّْرَانْ زَّايْسنْ ثُوغَا حطَّانْ ثَادَّارْثْ ن شَاوُولْ.

‏31 زڭْ إِحنْجِيرنْ ن إِفْرَايِيمْ ثُوغَا ذِينْ عِيشْرِينْ-أَڒفْ ؤُ-ثْمنْيَا-مْيَا ن يرْيَازنْ، أَيْثْ ن بُو-ثغْرُوضْثْ إِمحْضنْ، إِرْيَازنْ س يِيسمْ ذِي ثَادَّارْثْ ن بَابَاثْسنْ.

‏32 زڭْ وزْينْ ن ثقْبِيتْشْ ن مَانَاسَّا ثُوغَا ذِينْ ثْمنْطَاشْ-أَڒفْ ن يرْيَازنْ، إِنِّي ثُوغَا تّْوَاڒَاغَانْ س يِيسْمَاونْ نْسنْ مَاحنْذْ أَذْ د-أَسنْ أَذْ ڭّنْ ذَاوُوذْ ذ أَجدْجِيذْ.

‏33 زڭْ إِحنْجِيرنْ ن إِسَّاكَارْ إِنِّي إِسّْننْ ؤُ فهّْمنْ إِكُوذنْ حِيمَا أَذْ سّْننْ مِينْ ثُوغَا خْ إِسْرَائِيل أَذْ إِڭّْ، ثُوغَا ڒْقبْطَانَاثْ نْسنْ، مِيثَاينْ ن يرْيَازنْ، ؤُ مَارَّا أَيْثْمَاثْسنْ ثُوغَا أَثنْ سَاذُو أَفُوسْ نْسنْ. ^▫  

‏34 زڭْ أَيْثْ ن زَاپُولُونْ، زڭْ ينِّي د-إِفّْغنْ أَكْ-ذ ڒْعسْكَارْ س مَارَّا ڒسْنَاحْ نْسنْ، ثُوغَا ذِينْ خمْسِينْ-أَڒفْ ن يرْيَازنْ. نِيثْنِي ثُوغَا سّْوجْذنْ حِيمَا أَذْ ستّْفنْ إِخفْ نْسنْ ذڭْ ؤُسذِّي س وُوڒْ إِمُونْ نِيشَانْ.

‏35 زڭْ أَيْثْ ن نَافْثَالِي ثُوغَا ذِينْ أَڒفْ ن ڒْقبْطَانَاثْ. ثُوغَا-ثنْ ذِي سبْعَا ؤُ-ثْڒَاثِينْ-أَڒفْ ن يرْيَازنْ إِنِّي يَارْپُونْ ثَاسدَّارْثْ ن ؤُعسْكَارِي ثَامقّْرَانْثْ ذ لَانْسَا،

‏36 زڭْ أَيْثْ ن ذَانْ ثُوغَا ذِينْ ثْمنْيَا ؤُ-عِيشْرِينْ أَڒفْ ؤُ-ستَّا-مْيَا ن يرْيَازنْ، وجْذنْ إِ ؤُمنْغِي.

‏37 زڭْ أَيْثْ ن أَشِيرْ فّْغنْ-د أَربْعَا-أَڒَافْ ن يرْيَازنْ أَكْ-ذ ڒْعسْكَارْ حِيمَا أَذْ سّْبدّنْ إِخفْ نْسنْ ذڭْ ؤُسذِّي.

‏38 زڭْ ؤُجمَّاضْ ن لْ'ؤُرْذُونْ، زڭْ أَيْثْ ن إِرُوبِينِييّنْ ذ إِجَاذِييّنْ ؤُ زڭْ أَيْثْ ن وزْينْ ن ثقْبِيتْشْ ن مَانَاسَّا ثُوغَا ذِينْ مْيَا ؤُ-عِيشْرِينْ-أَڒفْ ن يرْيَازنْ أَكْ-ذ مَارَّا ڒسْنَاحْ إِ ؤُمنْغِي.

‏39 مَارَّا إِعسْكَارِييّنْ-أَ ؤُسِينْ-د، تّْوَاستّْفنْ ذڭْ إِسذِّييّنْ ؤُ س وُوڒْ إِمُونْ، غَارْ حَابْرُونْ حِيمَا أَذْ ڭّنْ ذَاوُوذْ ذ أَجدْجِيذْ خْ مَارَّا إِسْرَائِيل. ؤُڒَا مِينْ إِقِّيمنْ ن أَيْثْ ن إِسْرَائِيل ثُوغَا أَثنْ س وُوڒْ ذ إِجّْ حِيمَا أَذْ ڭّنْ ذَاوُوذْ ذ أَجدْجِيذْ. ‏40 نِيثْنِي قِّيمنْ ثْڒَاثَا ن وُوسَّانْ ذِينِّي غَارْ ذَاوُوذْ، شِّينْ سْوِينْ، مَاغَارْ أَيْثْمَاثْسنْ ثُوغَا بدّنْ أَكِيذْسنْ. ‏41 ؤُڒَا ذ ينِّي يُوذْسنْ غَارسْ أَڒْ إِسَّاكَارْ ذ زَاپُولُونْ ذ نَافْثَالِي ؤُسِينْ-د، إِوْينْ-د وغْرُومْ خْ إِغْيَاڒْ، خْ إِڒغْمَانْ، خْ إِسَارْضَانْ ؤُ خْ إِفُونَاسنْ، س ڒعْوتْشْ أَمْ فَارِينَا ذ إِغْرُومنْ ن ثَازَارْثْ ذ إِغْرُومنْ ن زّْبِيبْ ذ بِينُو ذ زّشْثْ ذ إِفُونَاسنْ ذ وُودْجِي س ؤُفيّضْ، مَاغَارْ ثُوغَا ذِينْ ڒفْرَاحثْ ذِي إِسْرَائِيل.