‏1 ذڭْ ؤُسڭّْوَاسْ وِيسّْ ثْنَاينْ ن يُووَاشْ، مِّيسْ ن يَاهُويَاحَازْ، أَجدْجِيذْ ن إِسْرَائِيل، إِذْوڒْ أَمَاصْيَا، مِّيسْ ن يُووَاشْ، ذ أَجدْجِيذْ. نتَّا إِذْوڒْ ذ أَجدْجِيذْ خْ يَاهُوذَا. ‏2 نتَّا ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا، ؤُمِي إِذْوڒْ ذ أَجدْجِيذْ. نتَّا إِحْكمْ ذِي ؤُرْشَالِيمْ. يمَّاسْ قَّارنْ أَسْ يَاهُوعَاذَانْ، زِي ؤُرْشَالِيمْ. ^▪   ‏3 نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، مَاشَا وَارْ إِدْجِي أَمْ بَابَاسْ ذَاوُوذْ. إِڭَّا نِيشَانْ أَمْ مَامّشْ إِڭَّا بَابَاسْ يُووَاشْ. ‏4 مْغِيرْ وَارْ تّْوَاكّْسنْ ڒڭْعُوذِي. ڒْڭنْسْ يِيوِي عَاذْ ثِيغَارْصَا ذ ثوْهِيبِينْ ن ڒبْخُورْ ذِي ڒڭْعُوذِي. ‏5 ؤُمِي ثُوغَا ثَاڭلْذَا ثمْثنْ ذڭْ إِفَاسّنْ نّسْ، إِمْسَارْ بلِّي نتَّا إِنْغَا إِمْسخَّارنْ نِّي إِنْغِينْ أَجدْجِيذْ، بَابَاسْ. ‏6 مَاشَا إِحنْجِيرنْ ن إِقتَّاڒنْ وَارْ ثنْ إِنْغِي شَا، أَمْ مَامّشْ ث يُورَا ذڭْ وذْلِيسْ إِتّْوَانّْضنْ ن شَّارِيعَا ن مُوسَا، إِ ذِي إِوصَّا سِيذِي، إِنَّا: ”إِبَابَاثنْ وَارْ تّْوَانقّنْ ذِي سِّيبّثْ ن إِحنْجِيرنْ نْسنْ ؤُڒَا إِحنْجِيرنْ وَارْ تّْوَانقّنْ ذِي سِّيبّثْ ن إِبَابَاثنْ نْسنْ، مَاغَارْ كُوڒْ إِجّْ أَذْ إِتّْوَانغْ خْ دّْنُوبْ ن يِيخفْ نّسْ.“ ^▪  

‏7 نتَّا إِغْڒبْ خْ أَيْثْ ن إِذُومْ ذِي ثغْزُورْثْ ن ثْمدْجَاحْثْ، عشْرَا أَڒفْ ن يرْيَازنْ، ؤُ إِطّفْ سَالَاعْ ذڭْ ؤُمنْغِي ؤُ إِڭَّا أَسْ يَاقْثَايِيلْ، أَڒْ أَسّْ-أَ. ^▫  

‏8 خنِّي إِسّكّْ أَمَاصْيَا إِرقَّاسنْ غَارْ يُووَاسْ، مِّيسْ ن يَاهُويَاحَازْ، مِّيسْ ن يَاهُو، أَجدْجِيذْ ن إِسْرَائِيل، إِنَّا: ”أَسْ-د، أجّْ أَنغْ أَذْ نمّڒْقَا إِ ؤُمنْغِي.“ ‏9 مَاشَا يُووَاشْ، أَجدْجِيذْ ن إِسْرَائِيل، إِسّكّْ إِجّْ ن ؤُرقَّاسْ غَارْ أَمَاصْيَا، أَجدْجِيذْ ن يَاهُوذَا، إِنَّا: ”شْبَارْقْ أَكْ-ذ إِسنَّاننْ إِ إِغمّْينْ خْ إِذُورَارْ ن لُوبْنَانْ، إِسّكّْ إِشْثْ ن ثبْرَاثْ غَارْ ثْشجَّارْثْ ن ثنْڭلْثْ خْ إِذُورَارْ ن لُوبْنَانْ، إِنَّا: ’أوْشْ يدْجِيسْ ذ ثَامْغَارْثْ إِ مِّي!‘ مَاشَا إِجّْ ن ڒوْحُوشْ إِ ذِينْ يُويُورنْ خْ إِذُورَارْ ن لُوبْنَانْ، إِكَّا ؤُ إِعْفسْ خْ شْبَارْقْ أَكْ-ذ إِسنَّاننْ.

‏10 إِوَا شكْ ثْغڒْبذْ خْ إِذُومْ ؤُ ڒخُّو ثْذوْڒذْ ذَايكْ نّْفَاخثْ ذڭْ وُوڒْ نّكْ. إِڒِي ثتّْوقَّارذْ ؤُ قِّيمْ ذِي ثَادَّارْثْ نّكْ، مِينْزِي مَايمِّي إِ غَا ثمّنْضَارذْ إِخفْ نّكْ ذِي ڒْغَارْ ؤُ أَذْ ثوْضِيذْ، شكْ ذ يَاهُوذَا أَكِيذكْ؟“

‏11 مَاشَا أَمَاصْيَا وَارْ إِخْسْ أَذْ إِسڒْ ؤُشَا يُووَاشْ، أَجدْجِيذْ ن إِسْرَائِيل، إِڭعّذْ أَڒَامِي نتَّا ذ أَمَاصْيَا، أَجدْجِيذْ ن يَاهُوذَا، مْقَابَاڒنْ غَارْ بَايْثْ-شَامْسْ إِ إِدْجَانْ ذِي يَاهُوذَا.

‏12 يَاهُوذَا إِتّْوَاغْڒبْ س ؤُفُوسْ ن إِسْرَائِيل ؤُشَا نِيثْنِي أَروْڒنْ، كُوڒْ إِجّْ غَارْ ؤُقِيضُونْ نّسْ.

‏13 يُووَاشْ، أَجدْجِيذْ ن إِسْرَائِيل، إِطّفْ أَمَاصْيَا، أَجدْجِيذْ ن يَاهُوذَا، مِّيسْ ن يُووَاشْ، مِّيسْ ن أَخَازْيَا، ذِي بَايْثْ-شَامْسْ ؤُشَا يِيوضْ ث-إِ-د غَارْ ؤُرْشَالِيمْ. ذِينِّي إِڭَّا إِشْثْ ن ثَازِّيثْ ذِي ڒْحِيضْ ن ؤُرْشَالِيمْ، زِي ثوَّارْثْ ن إِفْرَايِيمْ غَارسْ أَڒْ ثوَّارْثْ ن ثغْمَارْثْ، خْ إِجّْ ن وبْرِيذْ ن أَربْعَا مْيَا ن إِغَادْجنْ.

‏14 يِيوِي مَارَّا ؤُرغْ ذ نُّوقَارْثْ ذ مَارَّا ڒقْشُوعْ إِ إِتّْوَافنْ ذِي ثَادَّارْثْ ن سِيذِي ؤُ ذڭْ إِخَّامنْ ن ثْخُوبَايْ ن ثَادَّارْثْ ن ؤُجدْجِيذْ، ؤُڒَا ذ إِرهَّاننْ ؤُشَا إِعْقبْ غَارْ سَامَارْيَا.

‏15 إِمزْرُوينْ إِقِّيمنْ ن يُووَاشْ ذ مِينْ إِڭَّا ذ ثْمڭَّا نّسْ إِمحْضنْ ذ مَامّشْ إِمْنغْ أَكْ-ذ أَمَاصْيَا، أَجدْجِيذْ ن يَاهُوذَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟

‏16 يُووَاشْ إِتّْوَاسَّارْسْ ذڭْ ونْضڒْ جَارْ ڒجْذُوذْ نّسْ. نتَّا إِتّْوَانْضڒْ ذِي سَامَارْيَا جَارْ إِجدْجِيذنْ ن إِسْرَائِيل. مِّيسْ يَارُوبْعَامْ إِذْوڒْ ذ أَجدْجِيذْ ذڭْ ومْشَانْ نّسْ.

‏17 أَمَاصْيَا، مِّيسْ ن يُووَاشْ، أَجدْجِيذْ ن يَاهُوذَا، إِدَّارْ عَاذْ خمّسْطَاشْ ن إِسڭّْوُوسَا أَوَارْنِي إِ ڒْموْثْ ن يُووَاشْ، مِّيسْ ن يَاهُويَاحَازْ، أَجدْجِيذْ ن إِسْرَائِيل.

‏18 إِمزْرُوينْ إِقِّيمنْ ن أَمَاصْيَا، مَا نِيثْنِي وَارْ تّْوَازمّمنْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟

‏19 نِيثْنِي ڭِّينْ إِشْثْ ن ثْمعْمُوتْشْ خَاسْ ذِي ؤُرْشَالِيمْ، أَڒَامِي نتَّا يَارْوڒْ غَارْ لَاخِيشْ، مَاشَا نِيثْنِي سّكّنْ أَوَارْنِي أَسْ إِنِّي ث إِضْفَارنْ غَارْ لَاخِيشْ ؤُشَا نْغِينْ ث ذِينِّي. ^▪   ‏20 نِيثْنِي إِوْينْ ث-إِ-د خْ ييْسَانْ ؤُ نتَّا إِتّْوَانْضڒْ ذِي ؤُرْشَالِيمْ، جَارْ ڒجْذُوذْ نّسْ، ذِي ثنْذِينْثْ ن ذَاوُوذْ. ‏21 مَارَّا ڒْڭنْسْ ن يَاهُوذَا يِيوِي عَازَارْيَا، ونِّي ؤُمِي غَارْ إِدْجْ سطَّاشْ ن إِسڭّْوُوسَا، ؤُ ڭِّينْ ث ذ أَجدْجِيذْ ذڭْ ومْشَانْ ن بَابَاسْ أَمَاصْيَا. ^▪   ‏22 نتَّا إِبْنَا إِلَاثْ ؤُ يَارَّا ث ذڭْ ؤُفُوسْ ن يَاهُوذَا، أَوَارْنِي ؤُمِي إِتّْوَاسَّارْسْ ؤُجدْجِيذْ ذڭْ ونْضڒْ أَكْ-ذ ڒجْذُوذْ نّسْ.

‏23 ذڭْ ؤُسڭّْوَاسْ وِيسّْ خمّسْطَاشْ ن أَمَاصْيَا، مِّيسْ ن يُووَاشْ، أَجدْجِيذْ ن يَاهُوذَا، إِذْوڒْ يَارُوبْعَامْ، مِّيسْ ن يُووَاشْ، أَجدْجِيذْ ن إِسْرَائِيل ذِي سَامَارْيَا. نتَّا إِحْكمْ وَاحِيثْ ؤُ-عِيشْرِينْ ن إِسڭّْوُوسَا ذِي سَامَارْيَا. ‏24 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. نتَّا وَارْ إِحيّذْ خْ مَارَّا دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا. ‏25 نتَّا يَارَّا-د مَارَّا ثَامُّورْثْ ن إِسْرَائِيل سَاذُو ؤُفُوسْ نّسْ زِي مَانِي إِ غَا ثِيوْضذْ غَارْ حَامَاثْ أَڒْ ربْحَارْ ن ڒوْضَا عْلَاحْسَابْ أَوَاڒْ ن سِيذِي، أَربِّي ن إِسْرَائِيل، إِ ثُوغَا إِسِّيوڒْ س ؤُقمُّومْ ن ؤُمْسخَّارْ نّسْ يُونُوسْ، مِّيسْ ن أَمِيتَّايْ زِي جَاثْ-حَافِيرْ. ^▪   ‏26 مَاغَارْ سِيذِي إِژْرَا أَقَا ڒغْبنْ ن إِسْرَائِيل ذ أَمرْزَاڭْ أَطَّاسْ ؤُ وَارْ ذِينْ إِقِّيمْ عَاذْ ونِّي إِتّْوَاطّْفنْ ذ ونِّي ؤُمِي إِجِّينْ ؤُ وَارْ ثُوغِي ونِّي إِعَاوْننْ إِ إِسْرَائِيل. ‏27 سِيذِي ثُوغَا وَارْ يِينِي أَذْ إِمْحَا إِسمْ ن إِسْرَائِيل زِي سَاذُو إِجنْوَانْ ؤُ إِسّنْجمْ إِ-ثنْ س ؤُفُوسْ ن يَارُوبْعَامْ، مِّيسْ ن يُووَاشْ.

‏28 إِمزْرُوينْ إِقِّيمنْ ن يَارُوبْعَامْ ذ مَارَّا مِينْ إِڭَّا ذ مَارَّا ثِيمڭَّا نّسْ إِمحْضنْ ذ مَامّشْ إِمْنغْ ؤُ مَامّشْ إِكسّبْ ثْوَاڒَا نّغْنِيثْ ذِيمَاشْقْ ذ حَامَاثْ إِنِّي ثُوغَا إِدْجَانْ غَارْ يَاهُوذَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟ ‏29 يَارُوبْعَامْ إِتّْوَاسَّارْسْ ذڭْ ونْضڒْ جَارْ ڒجْذُوذْ نّسْ، جَارْ إِجدْجِيذنْ ن إِسْرَائِيل. مِّيسْ زَاكَارِييَّا إِذْوڒْ ذ أَجدْجِيذْ ذڭْ ومْشَانْ نّسْ.