‏1 ذڭْ ؤُسڭّْوَاسْ وِيسّْ ثْڒَاثَا ؤُ-عِيشْرِينْ ن يُووَاشْ، مِّيسْ ن أَخَازْيَا، أَجدْجِيذْ ن يَاهُوذَا، إِذْوڒْ يَاهُويَاحَازْ، مِّيسْ ن يَاهُو، ذ أَجدْجِيذْ خْ إِسْرَائِيل، ذِي سَامَارْيَا. نتَّا إِحْكمْ سْبعْطَاشْ ن إِسڭّْوُوسَا. ‏2 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُ نتَّا إِضْفَارْ دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارَّا إِسْرَائِيل أَذْ إِخْضَا. نتَّا وَارْ إِحيّذْ خْ مَانْ أَيَا. ‏3 خْ ؤُينِّي يَارْغَا وغْضَابْ ن سِيذِي خْ إِسْرَائِيل. مَارَّا ؤُسَّانْ نِّي إِوْشَا إِ-ثنْ ذڭْ إِفَاسّنْ ن حَازَايِيلْ، أَجدْجِيذْ ن أَرَامْ، ؤُ ذڭْ إِفَاسّنْ ن بِينْهَاذَاذْ، مِّيسْ ن حَازَايِيلْ.

‏4 مَاشَا يَاهُويَاحَازْ إِحشّمْ زَّاثْ إِ وُوذمْ ن سِيذِي ؤُ سِيذِي إِسْڒَا أَسْ، مَاغَارْ نتَّا إِژْرَا ڒحْصَارثْ ن إِسْرَائِيل، مَامّشْ إِ ثنْ إِحْصَاڒْ ؤُجدْجِيذْ ن أَرَامْ. ‏5 سِيذِي إِوْشَا إِجّْ ن ؤُمْسنْجمْ إِ إِسْرَائِيل، أَڒَامِي زمَّارنْ أَذْ نْفكّنْ زڭْ ؤُفُوسْ ن إِرَامِييّنْ ؤُشَا خنِّي ثُوغَا أَيْثْ ن إِسْرَائِيل زدّْغنْ عَاوذْ أَمْ قْبڒْ ذڭْ إِقِيضَانْ نْسنْ. ‏6 مَاشَا نِيثْنِي وَارْ حيّْذنْ شَا خْ دّْنُوبْ ن ثَادَّارْثْ ن يَارُوبْعَامْ ونِّي يَارِّينْ إِسْرَائِيل أَذْ إِخْضَا. ؤُڒَا ذ نتَّا إِقِّيمْ إِڭُّورْ أَمُّو، ؤُ ثقِّيمْ ثَاربِّيثْ ن شْوَارْثِي ثْبدّْ ذِي سَامَارْيَا.

‏7 مَاغَارْ نتَّا وَارْ إِجِّي زِي ڒْعسْكَارْ ن يَاهُويَاحَازْ مْغِيرْ خمْسِينْ ن إِمْنَاينْ ذ عشْرَا ن إِكَارُّوثنْ ذ عشْرَا أَڒفْ ن يرْيَازنْ خْ إِضَارنْ، مَاغَارْ أَجدْجِيذْ ن أَرَامْ ثُوغَا إِقْضَا إِ-ثنْ، إِڭَّا إِ-ثنْ أَمْ ثْعجَّاجْثْ غَارْ ؤُسَارْوثْ.

‏8 إِمزْرُوينْ إِقِّيمنْ ن يَاهُويَاحَازْ، ذ مَارَّا مِينْ إِڭَّا ذ مَارَّا ثِيمڭَّا نّسْ إِمحْضنْ، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟ ‏9 يَاهُويَاحَازْ إِتّْوَاسَّارْسْ ذڭْ ونْضڒْ جَارْ ڒجْذُوذْ نّسْ. نضْڒنْ ث ذِي سَامَارْيَا. مِّيسْ يُووَاشْ إِذْوڒْ ذ أَجدْجِيذْ ذڭْ ومْشَانْ نّسْ.

‏10 ذڭْ ؤُسڭّْوَاسْ وِيسّْ سبْعَا ؤُ-ثْڒَاثِينْ ن يُووَاشْ، أَجدْجِيذْ ن يَاهُوذَا، إِذْوڒْ يُووَاشْ، مِّيسْ ن يَاهُويَاحَازْ، ذ أَجدْجِيذْ خْ إِسْرَائِيل. نتَّا إِحْكمْ سطَّاشْ ن إِسڭّْوُوسَا ذِي سَامَارْيَا.

‏11 نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي. نتَّا وَارْ إِحيّذْ خْ دّْنُوبْ ن يَارُوبْعَامْ، مِّيسْ ن نَابَاطْ، ونِّي يَارِّينْ إِسْرَائِيل أَذْ إِخْضَا، مَاشَا نتَّا يُويُورْ أَمنِّي.

‏12 إِمزْرُوينْ إِقِّيمنْ ن يُووَاشْ ذ مَارَّا مِينْ إِڭَّا ذ مَارَّا ثِيمڭَّا نّسْ إِمحْضنْ إِ زِي إِمْنغْ أَكْ-ذ أَمَاصْيَا، أَجدْجِيذْ ن يَاهُوذَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟

‏13 يُووَاشْ إِتّْوَاسَّارْسْ ذڭْ ونْضڒْ جَارْ ڒجْذُوذْ نّسْ. يَارُوبْعَامْ إِنْيَا خْ ڒْعَارْشْ نّسْ. يُووَاشْ إِتّْوَانْضڒْ ذِي سَامَارْيَا جَارْ إِجدْجِيذنْ ن إِسْرَائِيل.

‏14 إِلِيشَاعْ إِتّْوَاڒْقفْ س ڒهْڒَاشْ إِ زِي غَا إِمّثْ ؤُ يُووَاشْ، أَجدْجِيذْ ن إِسْرَائِيل، إِهْوَا-د غَارسْ ؤُشَا إِرُو زَّاثسْ، إِنَّا: ”بَابَا إِنُو، بَابَا إِنُو! أَكَارُّو ن إِسْرَائِيل ذ إِمْنَاينْ نّسْ!“ ^▫  ▪  

‏15 إِلِيشَاعْ إِنَّا: ”كْسِي ڒْقوْسْ ذ فْڒِيثْشَاثْ!“ نتَّا إِطّفْ إِ يِيخفْ نّسْ إِجّْ ن ڒْقوْسْ ذ فْڒِيثْشَاثْ.

‏16 خنِّي إِنَّا نتَّا إِ ؤُجدْجِيذْ ن إِسْرَائِيل: ”سَارْسْ أَفُوسْ نّكْ خْ ڒْقوْسْ!“ ؤُشَا إِسَّارْسْ نتَّا أَفُوسْ نّسْ خْ ڒْقوْسْ ؤُشَا إِسَّارْسْ إِلِيشَاعْ إِفَاسّنْ نّسْ خْ إِفَاسّنْ ن ؤُجدْجِيذْ،

‏17 إِنَّا: ”أَرْزمْ ڒْكَازِي إِ إِدْجَانْ غَارْ مَانِيسْ د-ثْنقَّارْ ثْفُوشْثْ!“، ؤُشَا نتَّا يَارْزمْ إِ-ث. خنِّي إِنَّا إِلِيشَاعْ: ”وّثْ!“. ؤُ نتَّا إِوْثَا س ڒْقوْسْ نّسْ. ؤُشَا إِنَّا إِلِيشَاعْ: ”أَقَا-ت ذ إِشْثْ ن فْڒِيثْشَا ن ؤُسنْجمْ س ؤُفُوسْ ن سِيذِي ؤُڒَا ذ إِشْثْ ن فْڒِيثْشَا ن ؤُسنْجمْ زڭْ إِفَاسّنْ ن أَرَامْ، مِينْزِي أَذْ ثْغڒْبذْ أَرَامْ ذِي عَافِيكْ أَڒْ غَا إِتّْوَاردّدْجْ.“ ^▪  

‏18 خَاسْ ؤُشَا إِنَّا نتَّا: ”كْسِي فْڒِيثْشَاثْ!“ ؤُشَا نتَّا إِطّفْ إِ-ثنْثْ. خنِّي إِنَّا إِ ؤُجدْجِيذْ ن إِسْرَائِيل: ”وّثْ خْ ثمُّورْثْ!“ ؤُشَا وَانِيثَا إِوْثَا ثْڒَاثَا ن ثْوَاڒَاوِينْ خْ ثمُّورْثْ ؤُشَا ڒخْذنِّي إِبدّْ.

‏19 أَرْيَازْ ن أَربِّي إِفُّوڭمْ خَاسْ أَطَّاسْ، إِنَّا: ”ثُوغَا إِتّْخصَّا أَذْ ثوْثذْ خمْسَا نِيغْ ستَّا ن ثْوَاڒَاوِينْ، إِڒِي أَذْ ثغْڒبْ خْ أَرَامْ أَڒَامِي ث إِ غَا ثقْضِيذْ قَاعْ. ڒخُّو مَاشَا أَذْ ثْغڒْبذْ خْ أَرَامْ مْغِيرْ ثْڒَاثَا ن ثْوَاڒَاوِينْ.

‏20 إِلِيشَاعْ إِمُّوثْ ؤُشَا نضْڒنْ ث. بَانْذِييَّاثْ ن إِمُوآبِييّنْ ثُوغَا نُّومنْثْ أَذْ أَذْفنْثْ غَارْ ثمُّورْثْ غَارْ ؤُمزْوَارُو ن ؤُسڭّْوَاسْ. ‏21 خْزَارْ، ؤُمِي ثُوغَا نطّْڒنْ إِشْثْ ن ثْوَاڒَا إِجّْ ن ورْيَازْ، إِمْسَارْ أَقَا ژْرِينْ إِشْثْ ن بَانْذِييَّا. نِيثْنِي نْضَارنْ أَرْيَازْ ذڭْ ونْضڒْ ن إِلِيشَاعْ. ؤُمِي ذَايسْ إِوْضَا ورْيَازْ، إِحَاذَا إِيْسَانْ ن إِلِيشَاعْ، إِذْوڒْ إِدَّارْ عَاوذْ ؤُشَا إِكَّارْ إِبدّْ خْ إِضَارنْ نّسْ.

‏22 حَازَايِيلْ، أَجدْجِيذْ ن أَرَامْ، إِحْصَارْ خْ إِسْرَائِيل، مَارَّا ؤُسَّانْ ن يَاهُويَاحَازْ. ‏23 مَاشَا سِيذِي إِحِينّْ خْ ڒْڭنْسْ نّسْ ؤُشَا يَارْحمْ خَاسنْ ؤُشَا إِنّقْڒبْ غَارْسنْ ذِي طّْوعْ ن ڒْعَاهْذْ نّسْ أَكْ-ذ إِبْرَاهِيمْ، إِسْحَاقْ ذ يَاعْقُوبْ. نتَّا ثُوغَا وَارْ إِخْسْ أَذْ ثنْ يَارذدْجْ ؤُ وَارْ إِخْسْ أَذْ ثنْ إِسّكّْ زِي زَّاثْ ن وُوذمْ نّسْ، أَڒْ ڒخُّو. ‏24 حَازَايِيلْ، أَجدْجِيذْ ن أَرَامْ، إِمُّوثْ ؤُ مِّيسْ بِينْهَاذَاذْ إِذْوڒْ ذ أَجدْجِيذْ ذڭْ ومْشَانْ نّسْ. ‏25 يُووَاشْ، مِّيسْ ن يَاهُويَاحَازْ، إِكّسْ-د زڭْ إِفَاسّنْ ن بِينْهَاذَاذْ، مِّيسْ ن حَازَايِيلْ، ثِيندَّامْ نِّي ثُوغَا وَانِيثَا إِطّفْ زڭْ إِفَاسّنْ ن بَابَاسْ يَاهُويَاحَازْ. يُووَاشْ إِغْڒبْ خَاسْ ثْڒَاثَا ن ثْوَاڒَاوِينْ ؤُشَا يَارَّا-د ثِيندَّامْ عَاوذْ غَارْ إِسْرَائِيل.