‏1 أَوَارْنِي ڒَامِي إِكمّڒْ سُولِيمَانْ ڒبْنِي ن ثَادَّارْثْ ن سِيذِي ؤُ ڒبْنِي ن ثَادَّارْثْ ن ؤُجدْجِيذْ، وَاهْ مَارَّا مِينْ ثُوغَا إِمّژْرِي ؤُ ثُوغَا إِخْسْ أَذْ ث إِڭّْ، ^▪   ‏2 إِبَانْ-د سِيذِي إِ سُولِيمَانْ إِ ثْوَاڒَا وِيسّْ ثْنَاينْ أَمْ إِ ذ أَسْ د-إِبَانْ ذِي جِيبْعُونْ. ^▪   ‏3 إِنَّا أَسْ سِيذِي: ”نشّْ سْڒِيغْ إِ ثْژَادْجِيثْ نّكْ ؤُ إِ ؤُحشّمْ نّكْ إِ زِي ثْحشّْمذْ زَّاثْ إِ وُوذمْ إِنُو. ثَادَّارْثْ إِ ثبْنِيذْ، سّْقدّْسغْ ت حِيمَا أَذْ سّْمثْنغْ ذِينْ إِسمْ إِنُو إِ ڒبْذَا ؤُشَا ثِيطَّاوِينْ إِنُو ذ وُوڒْ إِنُو أَذْ ذِينْ إِڒِينْ مَارَّا ؤُسَّانْ! ^▪   ‏4 مَاڒَا شكْ ثُويُورذْ زَّاثْ إِ وُوذمْ إِنُو أَمْ مَامّشْ ثُوغَا إِڭُّورْ بَابَاشْ ذَاوُوذْ س وُوڒْ إِمُونْ ؤُ س ڒصْفَايثْ ؤُ أَذْ ثڭّذْ أَمْ مَامّشْ مَارَّا إِ ذ أَشْ ؤُمُورغْ ؤُ أَذْ ثحْضِيذْ ثِيوصَّا إِنُو ذ لْفَارَايِيضْ  إِنُو، ‏5 خنِّي أَذْ سّْمثْنغْ ڒْعَارْشْ ن ثْڭلْذَا نّكْ خْ إِسْرَائِيل إِ ڒبْذَا، أَمْ مَامّشْ سِّيوْڒغْ غَارْ بَابَاشْ ذَاوُوذْ، نِّيغْ: ’وَارْ ڭُّورْ أَذْ إِتّْوَاقسّْ شَا ن ورْيَازْ زَّايكْ زِي ڒْعَارْشْ ن إِسْرَائِيل!‘ ^▪  

‏6 مَاشَا مَاڒَا كنِّيوْ، شكْ ذ إِحنْجِيرنْ نْومْ، أَذْ ثْحيّْذمْ زِي ضفَّارْ إِنُو ؤُ كنِّيوْ وَارْ ثْحطَّامْ عَاذْ ڒُومُورَاثْ إِنُو ذ ثْوصَّا إِنُو، نِّي وْشِيغْ زَّاثْ إِ وُوذمْ نْومْ، ؤُ كنِّيوْ أَذْ ثُويُورمْ أَذْ ثْسخَّارمْ إِ إِربِّيثنْ نّغْنِي، أَذْ أَسنْ ثَاضَارمْ، ^▪   ‏7 خنِّي أَذْ قْضِيغْ إِسْرَائِيل زِي ثمُّورْثْ نِّي ذ أَسنْ وْشِيغْ ؤُشَا ثَادَّارْثْ-أَ إِ سّْقدّْسغْ إِ يِيسمْ إِنُو أَذْ ت مّنْضَارغْ زڭْ وُوذمْ إِنُو ؤُ إِسْرَائِيل أَذْ إِذْوڒْ ذ إِجّْ ن ؤُمذْيَا ذ إِشْثْ ن ڒْقشْعثْ ن ؤُسْثهْزِي جَارْ مَارَّا ڒڭْنُوسْ. ^▪   ‏8 ؤُ خْ ثَادَّارْثْ-أَ ثنِّي يُوعْڒَانْ قَاعْ، مَارَّا وِي خَاسْ إِ غَا إِكّنْ، أَذْ إِثبْهثْ أَذْ إِصفَّارْ. نِيثْنِي أَذْ إِنِينْ: ’مَايمِّي إِڭَّا سِيذِي أَمُّو ذِي ثمُّورْثْ-أَ ؤُ ذِي ثَادَّارْثْ-أَ؟‘ ^▪   ‏9 أَذْ إِنِينْ: ’مِينْزِي نِيثْنِي سمْحنْ ذِي سِيذِي، أَربِّي نْسنْ، ونِّي د-إِسُّوفّْغنْ إِبَابَاثنْ نْسنْ زِي ثمُّورْثْ ن مِيصْرَا ؤُ مِينْزِي نِيثْنِي شبَّارنْ ذِي إِربِّيثنْ نّغْنِي ؤُ ؤُيُورنْ أَذْ أَسنْ أَضَارنْ ؤُ أَذْ أَسنْ سخَّارنْ، خْ ؤُينِّي إِسِّيوضْ سِيذِي مَارَّا ڒْغَارْ-أَ خَاسنْ.‘ “

‏10 أَوَارْنِي إِ عِيشْرِينْ ن إِسڭّْوُوسَا إِ ذِي إِبْنَا سُولِيمَانْ ثْنَاينْ ن ثُوذْرِينْ، ثَادَّارْثْ ن سِيذِي ؤُ ثَادَّارْثْ ن ؤُجدْجِيذْ، إِمْسَارْ ^▪  

‏11 - أَمْ إِوْشَا حِيرَامْ، أَجدْجِيذْ ن صُورْ، إِ سُولِيمَانْ عْلَاحْسَابْ مژْرِي نّسْ أَكشُّوضْ ن ثْشجَّارْثْ ن ثنْڭلْثْ ذ ؤُكشُّوضْ ن ثْشجَّارْثْ ن ؤُمرْزِي ذ وُورغْ - أَقَا سُولِيمَانْ إِوْشَا إِ حِيرَامْ عِيشْرِينْ ن ثْندَّامْ ذِي ثمُّورْثْ ن لْجَالِيلْ. ^▫  

‏12 حِيرَامْ إِفّغْ-د زِي صُورْ حِيمَا أَذْ إِخْزَارْ ثِيندَّامْ نِّي ذ أَسْ إِوْشَا سُولِيمَانْ، مَاشَا ثُوغَا أَثنْثْ وَارْ شْنَانْثْ ذِي ثِيطَّاوِينْ نّسْ.

‏13 نتَّا إِنَّا: ”مَانَا ثِيندَّامْ-أَ إِ ذ أَيِي ثوْشِيذْ، أَوْمَا؟“ ؤُ نتَّا إِڒَاغَا أَسنْثْ: ’ثَامُّورْثْ ن كَاپُولْ‘. نِيثنْثِي تّْوَاڒَاغَانْثْ أَمُّو أَڒْ أَسّْ-أَ .

‏14 حِيرَامْ ثُوغَا إِسّكّْ إِ ؤُجدْجِيذْ مْيَا ؤُ-عِيشْرِينْ ن ثَالِينْثَاثْ ن وُورغْ.

‏15 ذ وَا ذ أَوَاڒْ خْ لْجِيزْيَا إِ ثُوغَا إِسّْڭعّذْ ؤُجدْجِيذْ سُولِيمَانْ مَاحنْذْ أَذْ إِبْنَا ثَادَّارْثْ ن سِيذِي ذ ثَادَّارْثْ نّسْ ذ لْقلْعَا ذ مَاجِيدُّو ذ ڒْحِيضْ ن ؤُرْشَالِيمْ ذ حَاصُورْ ذ مَاجِيدُّو ذ جَازَارْ.

‏16 فِيرْعُونْ، أَجدْجِيذْ ن مِيصْرَا، ثُوغَا إِڭعّذْ، إِطّفْ جَازَارْ، إِقدّْ أَسْ ثِيمسِّي. إِنْغَا إِكنْعَانِييّنْ إِ ثُوغَا إِزدّْغنْ ذِي ثنْذِينْثْ ؤُشَا إِوْشَا إِ-ت ذ ثَارْزفْثْ ن ثسْڒِيثْ إِ يدْجِيسْ، ثَامْغَارْثْ ن سُولِيمَانْ.

‏17 سُولِيمَانْ إِعَاوذْ إِبْنَا خنِّي جَازَارْ ذ بَايْثْ-حُورُونْ ن وَادَّايْ

‏18 ذ بَاعْلَا ذ ثَاذْمَارْ ذِي ڒخْڒَا، ذِي ثمُّورْثْ نِّي، ^▪  

‏19 مَارَّا ثِيندَّامْ ن ڒخْزنْ نِّي غَارسْ غَارْ سُولِيمَانْ ؤُڒَا ذ ثِيندَّامْ ن إِكَارُّوثنْ ذ ثِيندَّامْ ن إِمْنَاينْ، ؤُ مَارَّا مِينْ ثُوغَا إِمّژْرِي سُولِيمَانْ أَذْ ث إِبْنَا ذِي ؤُرْشَالِيمْ ؤُ خْ إِذُورَارْ ن لُوبْنَانْ ؤُ ذِي مَارَّا ثَامُّورْثْ إِ خْ إِحْكمْ.

‏20 مَارَّا ڒْڭنْسْ إِ إِقِّيمنْ ن إِمُورِييّنْ، إِحِيتِّييّنْ، إِفِيرِيزِييّنْ، إِحِيوِييّنْ ذ إِيَاپُوسِييّنْ، إِنِّي وَارْ إِدْجِينْ شَا زڭْ أَيْثْ ن إِسْرَائِيل، ‏21 إِحنْجِيرنْ نْسنْ نِّي إِقِّيمنْ أَوَارْنِي أَسنْ ذِي ثمُّورْثْ، إِنِّي وَارْ إِزمَّارنْ أَذْ ثنْ حَارّْمنْ إِ ؤُثحِّي أَيْثْ ن إِسْرَائِيل، إِڭَّا خَاسنْ سُولِيمَانْ لْجِيزْيَا ن ثسْمُوغِي أَڒْ أَسّْ-أَ. ‏22 زڭْ أَيْثْ ن إِسْرَائِيل مَاشَا وَارْ إِڭِّي سُولِيمَانْ ؤُڒَا ذ إِجّْ ذ إِسْمغْ، مِينْزِي نِيثْنِي ثُوغَا أَثنْ ذ إِعسْكَارِييّنْ ذ إِمْسخَّارنْ نّسْ ذ ڒْحُوكَّامْ نّسْ ذ إِنغْرَافنْ نّسْ ن ڒْعسْكَارْ ذ إِمقّْرَاننْ ن إِكَارُّوثنْ نّسْ ذ إِمْنَاينْ نّسْ. ^▪   ‏23 إِنَا ذ إِمحْضَاينْ نِّي ثُوغَا إِتّْوَاڒقّْمنْ خْ ڒْخذْمثْ ذِي طّْوعْ ن سُولِيمَانْ، خمْسَا-مْيَا ؤُ-خمْسِينْ ن يرْيَازنْ نِّي ثُوغَا إِذبَّارنْ خْ ڒْڭنْسْ نِّي ثُوغَا إِتّطّْفنْ ذِي ڒْخذْمثْ.

‏24 مَاشَا يدْجِيسْ ن فِيرْعُونْ ثْڭعّذْ زِي ثنْذِينْثْ ن ذَاوُوذْ غَارْ ثَادَّارْثْ إِ ثُوغَا إِ ذ أَسْ إِبْنَا. ڒخْذنِّي إِبْنَا لْقلْعَا. ^▪  

‏25 ثْڒَاثَا ن ثْوَاڒَاوِينْ ذڭْ ؤُسڭّْوَاسْ إِسّْڭعّذْ سُولِيمَانْ ثِيغَارْصَا ن وشْمَاضْ ذ ثوْهِيبِينْ ن ڒهْنَا خْ ؤُعَالْطَارْ ن سِيذِي إِ ثُوغَا إِبْنَا ؤُ ؤُمِي ثُوغَا إِكمّڒْ ثَادَّارْثْ، إِسّْبخَّارْ خَاسْ زَّاثْ إِ وُوذمْ ن سِيذِي.

‏26 أَجدْجِيذْ سُولِيمَانْ إِبْنَا ؤُڒَا ذ إِجّْ ن وَاڭْرَاوْ ن إِغَارُّوبَا ذِي عِيصْيُونْ-جَابَارْ نِّي إِدْجَانْ غَارْ ثْمَا ن ڒبْحَارْ ن ثلْڭَا، ذِي ثمُّورْثْ إِذُومْ. ‏27 حِيرَامْ إِسّكّْ إِمْسخَّارنْ نّسْ س وَاڭْرَاوْ ن إِغَارُّوبَا نِّي، إِبحْرِييّنْ إِنِّي إِسّْننْ ڒبْحَارْ، جْمِيعْ أَكْ-ذ إِمْسخَّارنْ ن سُولِيمَانْ. ‏28 نِيثْنِي إِوْضنْ غَارْ ؤُفِيرْ ؤُ كْسِينْ سّنِّي أَربْعَا-مْيَا ؤُ-عِيشْرِينْ ن ثَالِينْثَاثْ ن وُورغْ ؤُ إِوْينْ ث غَارْ ؤُجدْجِيذْ سُولِيمَانْ.