‏1 ذِي ثَادَّارْثْ نّسْ إِبْنَا سُولِيمَانْ ثْڒطَّاشْ ن إِسڭّْوُوسَا، ؤُشَا إِكمّڒْ مَارَّا ثَادَّارْثْ نّسْ. ^▪   ‏2 نتَّا إِبْنَا ثَادَّارْثْ ن وزْغَارْ ن لُوبْنَانْ. ثُوغَا-ت ذِي مْيَا ن إِغَادْجنْ ن ثُوزّڭَّارْثْ ؤُ خمْسِينْ ن إِغَادْجنْ ن ثِيرُو ؤُ ثْڒَاثِينْ ن إِغَادْجنْ ن ڒُوعْڒَا، ثتّْوَاڭّْ خْ أَربْعَا ن إِسذِّييّنْ ن إِبِيلَارنْ ن ؤُكشُّوضْ ن ثْشجَّارْثْ ن ثنْڭلْثْ ؤُ تّْوَاسَارْسنْثْ ثْحنْيَا ن ؤُكشُّوضْ ن ثْشجَّارْثْ ن ثنْڭلْثْ ثِيوَا إِ إِبِيلَارنْ. ^▫   ‏3 ثُوغَا س إِشْثْ ن ثْزقَّا زڭْ ؤُكشُّوضْ ن ثْشجَّارْثْ ن ثنْڭلْثْ ثِيوَا إِ ثْحنْيَا ن ؤُعَارّضْ نِّي إِدْجَانْ خْ خمْسَا ؤُ-ربْعِينْ ن إِبِيلَارنْ نِّي، أَقَا خمّسْطَاشْ ن ثْحنْيَا خْ إِجّْ ن ؤُسذِّي ن إِبِيلَارنْ. ‏4 ثُوغَا ثِيپُورْجَاثِينْ ذِي ثْڒَاثَا ن إِسذِّييّنْ، إِشْثْ ن ڒكْوَازَا أَجمَّاضْ إِ ڒكْوَازَا نّغْنِي، ثْڒَاثَا ن ثْوَاڒَاوِينْ ‏5 مَارَّا ثِيوُّورَا ذ ڒضْرُوفْ نْسنْثْ ثُوغَا أَثنْ ذ أَكْوَاذْرُونْ ن ثْپُورْجثْ ؤُشَا إِشْثْ ن ڒكْوَازَا ثُوغَا-ت أَجمَّاضْ ن إِشْثْ ن ڒكْوَازَا نّغْنِيثْ، ثْڒَاثَا ن ثْوَاڒَاوِينْ. ‏6 أَسْقِيفْ إِڭَّا إِ-ث س إِبِيلَارنْ غَارْ زَّاثْ ن ثَادَّارْثْ، خمْسِينْ ن إِغَادْجنْ ن ثُوزّڭَّارْثْ ؤُ ثْڒَاثِينْ ن إِغَادْجنْ ن ثِيرُو. غَارْ زَّاثْ ثُوغَا-ت إِشْثْ ن ثسْقِيفْثْ نّغْنِي ؤُ عَاوذْ زَّاثسْ نتَّاثْ إِبِيلَارنْ ذ إِجّْ ن ؤُسقّفْ سنّجْ خَاسْ. ‏7 نتَّا إِڭَّا عَاوذْ إِجّْ ن وسْقِيفْ إِ ڒْعَارْشْ مَانِي ثُوغَا إِحَاكمْ، أَسْقِيفْ ن وَاذَافْ ن ڒْمحْكَامثْ، ؤُشَا إِسّْذُوڒِي إِ-ت زِي ثِيسِي أَڒْ ثِيسِي نّغْنِي س ؤُكشُّوضْ ن ثْشجَّارْثْ ن ثنْڭلْثْ. ‏8 ثَادَّارْثْ نّسْ، مَانِي ثُوغَا إِزدّغْ، ذِي ڒمْرَاحْ نّغْنِي، غَارْ ذَاخڒْ زڭْ وسْقِيفْ ن وَاذَافْ ن لْمحْكَامَا، أَقَا ثتّْوَاڭّْ أَمشْنَاوْ ثَادَّارْثْ نّغْنِي. نتَّا إِڭَّا عَاوذْ إِشْثْ ن ثَادَّارْثْ إِ يدْجِيسْ ن فِيرْعُونْ، ثنِّي يِيوِي سُولِيمَانْ ذ ثَامْغَارْثْ، أَمشْنَاوْ أَسْقِيفْ-أَ وَانِيثَا. ^▪  

‏9 مَانْ أَيَا مَارَّا ثُوغَا-ث زِي ثْصُوضَارْ إِغْڒَانْ، تّْوَاسُويْذَانْثْ عْلَاحْسَابْ ڒقْيَاسْ، زِي ذَاخڒْ ؤُ زِي بَارَّا تّْوَانْشَارنْ س ڒْمنْشَارْ، ؤُ مَانْ أَيَا زِي ذْسَاسْ أَڒْ إِژْرَا ن سنّجْ قَاعْ ؤُ زِي بَارَّا أَڒْ ڒمْرَاحْ أَمقّْرَانْ.

‏10 ذْسَاسْ إِتّْوَاڭّْ س ثْصُوضَارْ إِغْڒَانْ، إِژْرَا إِمقّْرَاننْ، إِژْرَا ن عشْرَا ن إِغَادْجنْ ذ ثْمنْيَا ن إِغَادْجنْ

‏11 ؤُ ثِيوَا نْسنْ ثِيصُوضَارْ إِغْڒَانْ، تّْوَاسُويْذَانْثْ عْلَاحْسَابْ ڒقْيَاسْ، ؤُڒَا ذ أَكشُّوضْ ن ثْشجَّارْثْ ن ثنْڭلْثْ.

‏12 ڒمْرَاحْ أَمقّْرَانْ إِ ذ أَسْ د-إِنّْضنْ ثُوغَا-ث زِي ثْڒَاثَا ن إِسذِّييّنْ ن ثْصُوضَارْ إِتّْوَاسُّويْذَانْ ذ إِجّْ ن ؤُسذِّي ن ؤُكشُّوضْ ن ثْشجَّارْثْ ن ثنْڭلْثْ، أَمْ إِ ڒمْرَاحْ ن ذَاخڒْ إِ ثَادَّارْثْ ن سِيذِي أَمْ إِ وسْقِيفْ ن وَاذَافْ ن ثَادَّارْثْ.

‏13 أَجدْجِيذْ سُولِيمَانْ إِسّكّْ غَارْ حِيرَامْ زِي صُورْ حِيمَا أَذْ د-يَاسْ. ^▪  

‏14 وَانِيثَا ثُوغَا ذ مِّيسْ ن إِشْثْ ن ثَاجَّاتْشْ زِي ثقْبِيتْشْ ن نَافْثَالِي ؤُ بَابَاسْ ثُوغَا-ث ذ إِجّْ ن ورْيَازْ زِي صُورْ، إِجّْ ن ومْزِيڒْ ن نّْحَاسْ. نتَّا ثُوغَا إِشُّورْ س ڒفْهَامثْ ذ ڒعْقڒْ ذ ثُوسّْنَا حِيمَا أَذْ إِسُّوفّغْ قَاعْ ڒْخذْمثْ ن نّْحَاسْ. نتَّا يُوسَا-د غَارْ ؤُجدْجِيذْ سُولِيمَانْ ؤُ مَارَّا مِينْ إِڭَّا، إِڭَّا إِ-ث ن نّْحَاسْ. ^▪  

‏15 نتَّا إِڭَّا ثْنَاينْ ن إِبِيلَارنْ ن نّْحَاسْ. ڒُوعْڒَا ن إِجّْ ن ؤُبِيلَارْ ثُوغَا-ت ثْمنْطَاشْ ن إِغَادْجنْ ؤُشَا س يِيجّْ ن ؤُفِيڒُو ن ثنْعَاشْ ن إِغَادْجنْ إِزمَّارْ أَذْ إِنّضْ إِ ؤُبِيلَارْ نّغْنِي. ^▪  

‏16 نتَّا إِڭَّا ثْنَاينْ ن تَّاجَاثْ ن نّْحَاسْ إِفسْينْ حِيمَا أَذْ ثنْ سَّارْسنْ خْ إِزدْجِيفنْ ن إِبِيلَارنْ. ڒُوعْڒَا ن إِجّْ ن تَّاجْ ثُوغَا-ث خمْسَا ن إِغَادْجنْ ؤُ ڒُوعْڒَا ن تَّاجْ نّغْنِي ثُوغَا-ث ؤُڒَا ذ خمْسَا ن إِغَادْجنْ.

‏17 ؤُڒَا ذ ثِيرَاشِّيوِينْ تّْوَاڭّنْثْ س إِشْثْ ن ڒْخذْمثْ ن ؤُمُوذِي، أَمْ إِفِيڒَانْ إِتّْوَانّْضنْ تّْوَاڭّنْ س سّْنَاسڒْ إِزوّْقنْ إِ تَّاجَاثْ إِ إِدْجَانْ خْ إِزدْجِيفنْ ن إِبِيلَارنْ. سبْعَا إِ يِيجّْ ن تَّاجْ ؤُ سبْعَا إِ تَّاجْ نّغْنِي.

‏18 إِڭَّا إِبِيلَارنْ ؤُڒَا ذ ثْنَاينْ ن إِسذِّييّنْ س إِرمَّامنْ إِ ذ أَسْ د-إِنّْضنْ ثِيوَا إِ يِيشْثْ ن ثْرَاشَّا، حِيمَا أَذْ زَّايْسنْ إِسّْذُوڒِي تِّيجَانْ إِ إِدْجَانْ ثِيوَا إِ إِسذِّييّنْ ن إِرمَّامنْ. أَمُّو إِ إِڭَّا ؤُڒَا إِ تَّاجْ نّغْنِي.

‏19 تِّيجَانْ خْ ؤُزدْجِيفْ ن إِبِيلَارنْ نِّي إِدْجَانْ غَارْ ن وَاذَافْ تّْوَاڭّنْ س ثْلِيلِّيشِينْ، أَمْ مَامّشْ ذڭْ وسْقِيفْ، ڒُوعْڒَا نْسنْ ثُوغَا-ث أَربْعَا ن إِغَادْجنْ. ^▫   ‏20 تِّيجَانْ إِ إِدْجَانْ خْ ثْنَاينْ ن إِبِيلَارنْ ؤُسِينْ-د زِي سنّجْ أَكْ-ذ ؤُقُورَارْ نِّي ثُوغَا إِدْجَانْ أَرنْذَاذْ ن ثْرَاشَّا. ؤُشَا مِيثَاينْ ن إِرمَّامنْ قُووَّارنْ أَسنْ-د زِي ثْنَاينْ ن إِسذِّييّنْ. أَمُّو إِ إِڭَّا ؤُڒَا خْ تَّاجْ نّغْنِي. ‏21 خنِّي إِسّْبدّْ نتَّا إِبِيلَارنْ غَارْ وسْقِيفْ ن وَاذَافْ ن زَّاوشْثْ ثَامقّْرَانْثْ. إِسّْبدّْ أَبِيلَارْ أَفُوسِي، إِڭَّا أَسْ يَاخِينْ، ؤُشَا إِسّْبدّْ ؤُڒَا ذ أَبِيلَارْ نّغْنِي، إِڭَّا أَسْ بُوعَازْ. ‏22 خْ ؤُزدْجِيفْ ن إِبِيلَارنْ ثُوغَا ذِينْ إِشْثْ ن ڒْخذْمثْ إِزوّْقنْ س ڒْكِيسَانْ ن ثْلِيلِّيشِينْ. أَمُّو ثتّْوَاكمّڒْ ڒْخذْمثْ ن إِبِيلَارنْ.

‏23 نتَّا إِڭَّا إِشْثْ ن ثَارِيمَانْثْ إِفسْينْ إِ وَامَانْ. ثُوغَا-ث ڒعْبَارْ نّسْ زِي طَّارْفْ أَڒْ طَّارْفْ نّسْ نّغْنِي عشْرَا ن إِغَادْجنْ، ذ ؤُقُورَارْ قَاعْ، ؤُشَا ثِيذِّي نّسْ ثُوغَا-ث ذِي خمْسَا ن إِغَادْجنْ ؤُ ثْزمَّارذْ أَذْ أَسْ ثنّْضذْ س إِشْثْ ن ؤُفِيڒُو ن ڒعْبَارْ ن ثْڒَاثِينْ ن إِغَادْجنْ. ^▫  ▪   ‏24 سْوَادَّايْ إِ ثْمَا نّسْ ثُوغَا إِ ذ أَسْ د-إِنّْضنْ قَاعْ نُّووَّارَاثْ إِ وَارْ د-فِّيغنْثْ عَاذْ مَارَّا، عشْرَا ذِي كُوڒْ إِجّْ ن ؤُغِيڒْ نّْضنْثْ إِ ثْرِيمَانْثْ. ثْنَاينْ ن إِسذِّييّنْ ن نُّووَّارَاثْ إِ وَارْ د-فِّيغنْثْ عَاذْ مَارَّا، ثُوغَا تّْوَافسْينْ أَكِيذسْ. ^▪   ‏25 ثَارِيمَانْثْ ثْبدّْ خْ ثنْعَاشْ ن إِفُونَاسنْ. ثْڒَاثَا زَّايْسنْ أَرِّينْ ؤُذمْ نْسنْ غَارْ شَّامَالْ، ثْڒَاثَا زَّايْسنْ أَرِّينْ س وُوذمْ نْسنْ غَارْ ڒْغَارْبْ، ثْڒَاثَا زَّايْسنْ أَرِّينْ س وُوذمْ نْسنْ غَارْ لْجَانُوبْ ؤُ ثْڒَاثَا زَّايْسنْ أَرِّينْ س وُوذمْ نْسنْ غَارْ شَّارْقْ. ثَارِيمَانْثْ ثَارْسَا خَاسنْ ؤُ مَارَّا زّْعنْقُوقَاثْ نْسنْ ثُوغَا ذوْڒنْ خزَّارنْ غَارْ ذَاخڒْ. ‏26 ثڭْذَارْ ثْرِيمَانْثْ إِجّْ ن ؤُفُوسْ ؤُ ثْمَا نّسْ ثُوغَا أَمْ ڒْخذْمثْ إِزوّْقنْ ن ثْمَا ن إِجّْ ن ؤُفنْجَاڒْ نِيغْ أَمشْنَاوْ ثَانوَّاشْثْ ن إِشْثْ ن ثْلِيلّشْثْ. ثْوَاوِيثْ نّسْ أَڒْفَاينْ إِبَاثُوثنْ. ^▫  

‏27 نتَّا إِڭَّا عشْرَا ن ثْكَارُّوثِينْ س نّْحَاسْ. ثُوغَا ثُوزّڭَّارْثْ ن إِشْثْ ن ثْكَارُّوثْ أَربْعَا ن إِغَادْجنْ ؤُ ثِيرُو نّسْ أَربْعَا ن إِغَادْجنْ ؤُ ڒُوعْڒَا نّسْ ثْڒَاثَا ن إِغَادْجنْ. ‏28 أَمُّو إِ تّْوَاڭّنْثْ ثْكَارُّوثِينْ. نِيثنْثِي ثُوغَا غَارْسنْثْ ثِيڒْوِيحِينْ عَارّْضنْثْ ؤُ ثڒْوِيحِينْ عَارّْضنْثْ ثُوغَا أَثنْثْ جَارْ شَّافُوذْ. ‏29 خْ ثڒْوِيحِينْ عَارّْضنْثْ جَارْ شَّافُوذْ، ثُوغَا إِوْڒَافنْ ن ويْرَاذنْ، إِفُونَاسنْ ذ إِكِيرُوبنْ. غَارْ سنّجْ خْ شَّافُوذْ ثُوغَا ذِينْ إِجّْ ن ؤُسنَّاذْ. سَاذُو ويْرَاذنْ ذ إِفُونَاسنْ تّْوَاڭّنْثْ ثمْرِيسِينْ ن ثفْرَايْ نِّي يُويْڒنْ غَارْ وَادَّايْ. ‏30 إِشْثْ ن ثْكَارُّوثْ ثُوغَا غَارسْ أَربْعَا ن ثْجَارَّارِينْ ن نّْحَاسْ ذ إِزَايْڒُوثنْ ن نّْحَاسْ. أَربْعَا ن إِضَارنْ ثُوغَا غَارْسنْ ثِيغَارْضِينْ. ؤُ ثِيغَارْضِينْ إِفسْينْ نِّي ثُوغَا أَثنْثْ سَاذُو إِ ثْبَانْيُوثْ ن ؤُسِيرْذْ قِيبَاتْشْ إِ مْكُوڒْ إِشْثْ ن ثمْرِيسْثْ. ‏31 أَقمُّومْ نّسْ ثُوغَا-ث غَارْ ذَاخڒْ ن تَّاجْ ن ثْكَارُّوثْ، إِجّْ ن ؤُغِيڒْ غَارْ سنّجْ. أَقمُّومْ نّسْ ثُوغَا-ث ذ أَقُورَارْ، يُوسَا-د أَكْ-ذ إِسنَّاذنْ، ثِيرُو نّسْ ذ إِجّْ ن ؤُغِيڒْ ذ وزْينْ. ؤُ خْ ؤُقمُّومْ ثُوغَا ذِينْ ثِينْقَاشِينْ ؤُ ثِيڒْوِيحِينْ نْسنْثْ غَارْ طّْرُوفَا ن ؤُقمُّومْ ثُوغَا أَثنْثْ س أَربْعَا ن ثْغمُّورَا، وَارْ دْجِينْثْ ذ ثِيقُورَارِينْ. ‏32 أَربْعَا ن ثْجَارَّارِينْ ثُوغَا أَثنْثْ سَاذُو ثڒْوِيحِينْ عَارّْضنْثْ ؤُ إِزَايْڒُوثنْ ن ثْجَارَّارِينْ ثُوغَا أَثنْثْ شدّْننْثْ غَارْ ثْكَارُّوثْ. ڒُوعْڒَا ن إِشْثْ ن ثْجَارَّاثْ ثُوغَا-ث إِجّْ ن ؤُغِيڒْ ذ وزْينْ. ‏33 ثِيجَارَّارِينْ تّْوَاڭّنْثْ أَمْ تّْوَاڭّنْثْ ثْجَارَّارِينْ ن إِجّْ ن ؤُكَارُّو. إِزَايْڒُوثنْ نْسنْثْ، يَانْثَاثْ نْسنْثْ، بَارَّاثْ نْسنْثْ، أَرَّاذْيَاوَاثْ نْسنْثْ ذ إِنُوقَّابْ نْسنْثْ تّْوَافسْينْ مَارَّا. ‏34 ثُوغَا ذِينْ أَربْعَا ن ثْغَارْضِينْ غَارْ أَربْعَا ن ثْغمُّورَا ن إِشْثْ ن ثْكَارُّوثْ. ثِيغَارْضِينْ نّسْ فّْغنْثْ زِي نّْحَاسْ ن ثْكَارُّوثْ. ‏35 سنّجْ إِ ثْكَارُّوثْ ثُوغَا ذِينْ إِجّْ ن طَّارْفْ ن وزْينْ ن ؤُغِيڒْ إِبدّْ إِقُووَّارْ أَسْ-د زِي مَارَّا إِغزْذِيسنْ نّسْ. سنّجْ إِ ثْكَارُّوثْ ثُوغَا ذِينْ عَاوذْ إِفَاسّنْ إِ ثْكَارُّوثْ ذ ثڒْوِيحِينْ نّسْ. ‏36 خْ ثڒْوِيحِينْ غَارْ إِفَاسّنْ نّسْ ؤُ خْ ثڒْوِيحِينْ نّسْ إِنْقشْ إِكِيرُوبنْ، إِيْرَاذنْ ذ ثْشجِّيرَا ن ثِينِي، خْ كُوڒْ إِجّْ ن ومْشَانْ إِخْڒَا، ؤُڒَا ذ ثِيمْرِيسِينْ ن ثِيفْرَايْ غَارْ مَارَّا إِغزْذِيسنْ. ‏37 أَمُّو إِ إِڭَّا نتَّا عشْرَا ن ثْكَارُّوثِينْ، مَارَّا س يِيجّْ ن وبْرِيذْ ن ؤُفسْيِي، س يِيجّْ ن ڒقْيَاسْ، س يِيجّْ ن وَادُّوذْ.

‏38 إِڭَّا عَاوذْ عشْرَا ن ثْبَانْيُوثِينْ ن نّْحَاسْ. إِشْثْ ن ثْبَانْيُوثْ إِكْسِي أَربْعِينْ إِبَاثُوثنْ. إِشْثْ ن ثْبَانْيُوثْ ثُوغَا-ت ذَايسْ أَربْعَا ن إِغَادْجنْ ن ثِيرُو. خْ قَاعْ إِشْثْ زِي عشْرَا ن ثْكَارُّوثِينْ نِّي ثُوغَا ثكَّارْ أَسْ-د إِشْثْ ن ثْبَانْيُوثْ. ^▫  ▪   ‏39 إِڭَّا خمْسَا ن ثْكَارُّوثِينْ غَارْ ؤُغزْذِيسْ ن زَّاثْ أَفُوسِي ن ثَادَّارْثْ ؤُ خمْسَا غَارْ ؤُغزْذِيسْ ن زَّاثْ أَزڒْمَاضْ ن ثَادَّارْثْ، مَاشَا ثَارِيمَانْثْ إِ وَامَانْ إِڭَّا إِ-ث غَارْ ؤُغزْذِيسْ ن زَّاثْ أَفُوسِي ن ثَادَّارْثْ، غَارْ ؤُغزْذِيسْ ن شَّارْقْ غَارْ لْجَانُوبْ نّسْ. ‏40 إِڭَّا حِيرَامْ ثِيبَانْيُوثِينْ، إِغنْجَاينْ ذ طَّاوْيَاثْ إِ ؤُرُوشِّي ؤُشَا إِكمّڒْ حِيرَامْ مَارَّا ڒْخذْمثْ نِّي إِڭَّا إِ ؤُجدْجِيذْ سُولِيمَانْ إِ ثَادَّارْثْ ن سِيذِي:

‏41 ثْنَاينْ ن إِبِيلَارنْ ذ ثْنَاينْ ن إِقُورَارنْ ن تِّيجَانْ إِنِّي إِدْجَانْ خْ إِزدْجِيفنْ ن ثْنَاينْ ن إِبِيلَارنْ نِّي، ؤُڒَا ذ ثْنَاينْ ن ثْرَاشَّاوِينْ إِ ذ أَسنْثْ-إِ-د-إِنّْضنْ إِ ثْنَاينْ ن إِقُورَارنْ ن تِّيجَانْ إِنِّي إِدْجَانْ خْ إِزدْجِيفنْ ن ثْنَاينْ ن إِبِيلَارنْ، ‏42 أَربْعَا-مْيَا ن إِرمَّامنْ إِ ثْنَاينْ ن ثْرَاشَّاوِينْ، تّْوَامّْسبْضَانْ خْ ثْنَاينْ ن إِسذِّييّنْ ن إِرمَّامنْ إِ إِشْثْ ن ثْرَاشَّا، حِيمَا أَذْ ذْڒنْ ثْنَاينْ ن إِقُورَارنْ ن تِّيجَانْ إِنِّي خْ وُوذمْ سنّجْ ن إِبِيلَارنْ، ‏43 ذ عشْرَا ن ثْكَارُّوثِينْ ذ عشْرَا ن ثْبَانْيُوثِينْ نِّي إِدْجَانْ خْ ثْكَارُّوثِينْ نِّي، ‏44 ذ إِشْثْ ن ثْرِيمَانْثْ ذ ثنْعَاشْ ن إِفُونَاسنْ سَاذُو إِ ثْرِيمَانْثْ، ‏45 ذ ثيْذُورِينْ ذ إِغنْجَاجنْ ذ طَّاوْيَاثْ إِ ؤُرُوشِّي. مَارَّا ڒقْشُوعْ-أَ إِڭَّا حِيرَامْ إِ ؤُجدْجِيذْ سُولِيمَانْ إِ ثَادَّارْثْ ن سِيذِي، ثُوغَا أَثنْ زِي نّْحَاسْ إِشلّلنْ. ‏46 أَجدْجِيذْ إِكبّْ إِ-ثنْ ذڭْ ؤُذوَّارْ ن لْ'ؤُرْذُونْ ذِي ثْڒَاخْثْ إِڭْذَارنْ جَارْ سُوكُّوثْ ذ صَارْثَانْ. ‏47 سُولِيمَانْ إِسّْعِيزّْ خْ ووْزَانْ ن مَارَّا ڒقْشُوعْ-أَ ذِي سِّيبّثْ ن ڒْقدّْ نْسنْ ذ أَمقّْرَانْ أَطَّاسْ. وَارْ بقّْشنْ ذِي ڒوْزنْ ن نّْحَاسْ.

‏48 سُولِيمَانْ إِڭَّا مَارَّا ڒقْشُوعْ إِ ثَادَّارْثْ ن سِيذِي: أَعَالْطَارْ ن وُورغْ، ثَازوْضَا ن وُورغْ مِينْ خفْ إِتّْوَاسَّارْسْ وغْرُومْ ن وسْشَانْ، ^▪   ‏49 ذ ڒقْنَاذڒْ، خمْسَا غَارْ يفُّوسْ ذ خمْسَا غَارْ ؤُزڒْمَاضْ، زَّاثْ إِ وخَّامْ ن ذَاخڒْ ن زَّاوشْثْ، أَقَا أَثنْ ن وُورغْ إِزذْڭنْ أَكْ-ذ نُّووَارَاثْ ذ ڒفْنَارَاثْ ذ ثْجقَّاضِينْ ن ثفْثِيتْشْ نِّي إِتّْوَاڭّنْ مَارَّا س وُورغْ. ‏50 ؤُڒَا ذ طَّاوْيَاثْ ذ ثْجقَّاضِينْ ذ طَّاوْيَاثْ إِ ؤُرُوشِّي ذ ثْغنْجَايِينْ ذ ثْمجْمَارِينْ نِّي إِتّْوَاڭّنْ مَارَّا س وُورغْ إِزذْڭنْ. خنِّي إِڭَّا عَاوذْ ڒمْفَاسڒْ إِ ثوُّورَا ن ثَادَّارْثْ ن ذَاخڒْ، إِ وقْذَاسْ ن ؤُقدَّاسْ، ؤُڒَا إِ ثوُّورَا ن ثَادَّارْثْ، إِ وخَّامْ ن زَّاوشْثْ ثَامقّْرَانْثْ، إِڭَّا إِ-ثنْ س وُورغْ.

‏51 أَمُّو إِ ثتّْوَاكمّڒْ مَارَّا ڒْخذْمثْ إِ إِڭَّا ؤُجدْجِيذْ سُولِيمَانْ إِ ثَادَّارْثْ ن سِيذِي. ؤُشَا سُولِيمَانْ إِسِّيذفْ ثِيوْهِيبِينْ إِقدّْسنْ ن بَابَاسْ: نُّوقَارْثْ ذ وُورغْ ذ ڒقْشُوعْ، ؤُشَا إِسَّارْسْ مَانْ أَيَا مَارَّا ذڭْ إِخَّامنْ ن ثْخُوبَايْ ن ثَادَّارْثْ ن سِيذِي. ^▫  ▪