‏1 إِنَا ذ أَوَاڒنْ إِنڭُّورَا ن ذَاوُوذْ.

ذَاوُوذْ، مِّيسْ ن يَاسَّا إِسَّاوَاڒْ، بُو-ثغْرُوضْثْ ونِّي إِتّْوَاسّْعُودْجَانْ إِسَّاوَاڒْ، أَمذْهُونْ ن أَربِّي ن يَاعْقُوبْ، ذ أَمذْيَازْ إِعِيزّنْ ن إِسْرَائِيل.

‏2 أَرُّوحْ ن سِيذِي إِسِّيوڒْ زَّايِي ؤُ أَوَاڒْ نّسْ خْ إِڒسْ إِنُو.

‏3 أَربِّي ن إِسْرَائِيل إِنَّا، أَقَا ثَاصْضَارْثْ ن إِسْرَائِيل ثسِّيوڒْ أَكِيذِي:

’إِجّْ ن ڒْحَاكمْ جَارْ إِوْذَانْ، إِجّْ ن ؤُمْسڭّذْ،

إِجّْ ن ڒْحَاكمْ ونِّي إِتّڭّْوذنْ زِي أَربِّي،

‏4 ونِّي إِڭِّينْ أَمْ ثْفَاوْثْ غَارْ ثُوفُّوثْ خْمِي د-ثْنقَّارْ ثْفُوشْثْ،

غَارْ إِشْثْ ن ثُوفُّوثْ بْڒَا إِسيْنُوثنْ إِعْپُوبّْزنْ،

خْمِي س ثِيسِّيقْثْ ن ثْفَاوْثْ، س ونْژَارْ

أَقَا إِسّْفُوفُّويْ أَغمُّويْ أَزِيزَا زِي ثمُّورْثْ.‘

‏5 وَاخَّا ثَادَّارْثْ إِنُو غَارْ أَربِّي وَارْ ثدْجِي أَمنِّي،

أَقَا إِڭَّا أَيِي إِجّْ ن ڒْعَاهْذْ إِ ڒبْذَا،

مْستّفْ ذِي مَارَّا ؤُ إِتّْوَاحْضَا.

مَاغَارْ قَاعْ أَسنْجمْ إِنُو ذ مَارَّا مِينْ إِسّْنكَّارَانْ ڒفْرَاحثْ،

مَا وَارْ إِسّْغمَّا أَيَا؟

‏6 مَاشَا إِنِّي وَارْ إِسكّْوِينْ أَذْ تّْوَامنْضَارنْ

أَمْ إِشْثْ ن ثْسطَّا أَكْ-ذ إِسنَّاننْ، مَارَّا نِيثنْثِي،

مَاغَارْ وَارْ إِزمَّارْ أَذْ تّْوَاطّْفنْثْ س ؤُفُوسْ.

‏7 أَرْيَازْ ونِّي إِخْسنْ أَذْ ثنْثْ إِحَاذَا،

أَذْ إِحزّمْ إِخفْ نّسْ س وُوزَّاڒْ ذ ؤُكشُّوضْ نْ لَانْسَا

ؤُ نِيثْنِي أَذْ تّْوَاسْشمْضنْ س ثْمسِّي ذڭْ ومْشَانْ نْسنْ.“

‏8 إِنَا ذ إِسْمَاونْ ن أَيْثْ ن بُو-ثغْرُوضْثْ إِ إِدْجَانْ غَارْ ذَاوُوذْ: يُوشَايْبْ بَاشَابَّاثْ، مِّيسْ ن أَثَاهْكَامُونِي، أَزدْجِيفْ ن إِنغْرَافنْ. لَانْسَا نّسْ ثُوغَا ذ ڒهْزُوطْ نّسْ، إِسّْنُوقّبْ ثمْنْ-مْيَا ن يرْيَازنْ ذڭْ إِجّْ ن ؤُمنْغِي. ^▫   ‏9 أَوَارْنِي أَسْ يُوسَا-د أَلِيعَازَارْ، مِّيسْ ن ذُوذُو، مِّيسْ ن أَخُوخِي، نتَّا ثُوغَا ذ إِجّنْ زِي ثْڒَاثَا ن أَيْثْ ن بُو-ثغْرُوضْثْ نِّي إِدْجَانْ أَكْ-ذ ذَاوُوذْ، ڒَامِي نِيثْنِي سّْثهْزَانْ زڭْ إِفِيلِيسْطِينِييّنْ نِّي ثُوغَا ذِينْ سّْمُوننْ إِ ؤُمنْغِي ؤُ إِرْيَازنْ ن إِسْرَائِيل ڭعّْذنْ غَارْسنْ إِ ؤُمنْغِي.

‏10 نتَّا إِكَّارْ، إِوْثَا ذڭْ إِفِيلِيسْطِينِييّنْ غَارسْ أَڒَامِي أَفُوسْ نّسْ يُوحرْ. إِڒْصقْ ؤُفُوسْ نّسْ ذِي سِّيفْ. سِيذِي يِيوِيضْ إِجّْ ن ؤُسنْجمْ ذ أَمقّْرَانْ ذڭْ وَاسّْ نِّي ؤُشَا إِرْيَازنْ ن ڒْڭنْسْ عقْبنْ أَوَارْنِي أَسْ، مْغِيرْ حِيمَا أَذْ كشّْضنْ.

‏11 أَوَارْنِي أَسْ يُوسَا-د شَامَّا، مِّيسْ ن أَجِي، أَهَارَارِي. ڒَامِي نْجَارْونْ إِفِيلِيسْطِينِييّنْ غَارْ لَاخِي، ثُوغَا ذِينِّي إِجّْ ن إِيَّارْ إِشُّورنْ س ڒعْذسْ. ڒْڭنْسْ ثُوغَا يَارْوڒْ زَّاثْ إِ وُوذمْ ن إِفِيلِيسْطِينِييّنْ.

‏12 نتَّا إِبدّْ ذِي ڒْوسْثْ ن ؤُرقِّيعْ ن إِيَّارْ نِّي ؤُشَا إِفكّْ إِ-ث-إِ-د ؤُشَا إِغْڒبْ خْ إِفِيلِيسْطِينِييّنْ. أَمُّو يَارَّا أَسْ سِيذِي إِجّْ ن وغْڒَابْ ذ أَمقّْرَانْ.

‏13 ثْڒَاثَا زِي ثْڒَاثِينْ ن إِزدْجِيفنْ هْوَانْ، ؤُسِينْ-د غَارْ ذَاوُوذْ ذِي ڒْوقْثْ ن ثْميْرَا، ذڭْ إِفْرِي ن أَبْذُولَّامْ. ثُوغَا ذِينْ إِشْثْ ن ثَارْبِيعْثْ ن إِفِيلِيسْطِينِييّنْ ثوْثَا إِقِيضَانْ نْسنْ ذِي ثغْزُورْثْ ن إِرَافَاوِييّنْ.

‏14 ذَاوُوذْ ثُوغَا-ث ذِي لْقلْعَا ؤُ ثُوغَا ذِينْ إِشْثْ ن ثشْبَارْثْ ن إِعسَّاسنْ ن إِفِيلِيسْطِينِييّنْ ذِي بَايْثْ-لَاحْمْ.

‏15 خنِّي ذَاوُوذْ إِڒْقفْ إِ-ث ؤُفَاذِي، إِنَّا: ”وِي ذ أَيِي إِ د غَا يَاوْينْ أَمَانْ زِي ثَاڒَا ن بَايْثْ-لَاحْمْ إِ إِدْجَانْ غَارْ ثوَّارْثْ ن ثنْذِينْثْ؟“

‏16 خنِّي شُوقّنْ ثْڒَاثَا ن أَيْثْ ن بُو-ثغْرُوضْثْ نِّي ڒْمَارْڭحْ ن ڒْعسْكَارْ ن إِفِيلِيسْطِينِييّنْ، ؤُيْمنْ-د أَمَانْ زِي ثَاڒَا ن بَايْثْ-لَاحْمْ، إِ إِدْجَانْ غَارْ ثوَّارْثْ ن ثنْذِينْثْ. كْسِينْ ثنْ أَكِيذْسنْ ؤُ إِوْضنْ غَارْ ذَاوُوذْ، مَاشَا نتَّا يُوڭِي أَذْ ثنْ إِسُو ؤُشَا إِزدْجعْ إِ-ثنْ زَّاثْ إِ سِيذِي.

‏17 نتَّا إِنَّا: ”أَيَا إِڭّْوجْ خْ أَفِي، أَ سِيذِي، أَقَا نشّْ أَذْ ڭّغْ مَانْ أَيَا. مَا أَذْ سْوغْ إِذَامّنْ ن يرْيَازنْ، إِنِّي ذِينْ إِرُوحنْ أَمْ سبّْڒنْ ثُوذَارْثْ نْسنْ؟“ ؤُ نتَّا وَارْ إِخْسْ أَذْ ثنْ إِسُو. ذ مَانْ أَيَا إِ ث إِڭِّينْ ثْڒَاثَا ن أَيْثْ ن بُو-ثغْرُوضْثْ نِّي.

‏18 أَبِيشَايْ، مِّيسْ ن يُووَابْ، مِّيسْ ن صَارُويَا، ثُوغَا ذ أَزدْجِيفْ ن ثْڒَاثَا نِّي. نتَّا إِحنّضْ لَانْسَا نّسْ خْ ثڒْثْ-مْيَا، إِسّْنُوقّبْ إِ-ثنْ. نتَّا غَارسْ إِجّْ ن إِسمْ إِتّْوَاشنّعْ جَارْ ثْڒَاثَا نِّي.

‏19 مَا وَارْ إِدْجِي نتَّا ذ ونِّي إِتّْوَاشنّْعنْ أَطَّاسْ زِي ثْڒَاثَا-يَا؟ س ؤُيَا ثُوغَا نتَّا ذ ڒْقبْطَانْ نْسنْ. مَاشَا نتَّا وَارْ يِيوِيضْ ؤُڒَا غَارْ ثْڒَاثَا ن إِمزْوُورَا.

‏20 خنِّي بَانَايَا، مِّيسْ ن يَاهُويَاذَاعْ، مِّيسْ ن إِجّْ ورْيَازْ إِمحْضنْ، ثِيمڭَّا نّسْ مْغَارنْثْ، نتَّا زِي قَابْضِييِيلْ. نتَّا إِغْڒبْ خْ ثْنَاينْ ن إِيْرَاذنْ إِجهْذنْ. عَاوذْ ثُوغَا نتَّا إِهْوَا إِشْثْ ن ثْوَاڒَا، إِغْڒبْ خْ إِجّْ ن ويْرَاذْ ذِي ڒْوسْثْ ن إِجّْ ن وَانُو ذڭْ إِجّْ ن وَاسّْ ؤُمِي إِوْثَا وذْفڒْ. ‏21 نتَّا إِغْڒبْ ؤُڒَا خْ يِيجّْ ن ورْيَازْ ذ أَمِيصْرِي، إِجّْ ن ورْيَازْ إِسّڭّْوَاذنْ. أَمِيصْرِي ثُوغَا غَارسْ إِشْثْ ن لَانْسَا ذڭْ ؤُفُوسْ نّسْ. إِهْوَا غَارسْ س يِيجّْ ن وعْمُوذْ، إِكّسْ أَسْ لَانْسَا زڭْ ؤُفُوسْ ن ؤُمِيصْرِي ؤُ إِنْغَا إِ-ث س لَانْسَا نّسْ. ‏22 ذ مَانْ أَيَا إِ إِڭَّا بَانَايَا، مِّيسْ ن يَاهُويَاذَاعْ. س ؤُيَا غَارسْ إِسمْ إِشْنعْ جَارْ ثْڒَاثَا ن أَيْثْ ن بُو-ثغْرُوضْثْ. ‏23 نتَّا ثُوغَا ذ ونِّي إِتّْوَاشنّْعنْ أَطَّاسْ زِي ثْڒَاثِينْ، مَاشَا وَارْ يِيوضْ أَڒْ ثْڒَاثَا إِمزْوُورَا. ذَاوُوذْ إِڭَّا إِ-ث جَارْ إِمْثِيقَّانْ نّسْ.

‏24 ثُوغَا عَاسَايِيلْ، ؤُمَاسْ ن يُووَابْ، جَارْ ثْڒَاثِينْ؛

إِلْحَانَانْ، مِّيسْ ن ذُوذُو، زِي بَايْثْ-لَاحْمْ؛

‏25 شَامْعَا، أَحَارُوذِي؛

إِلِيقَا، أَحَارُوذِي؛

‏26 هَالَاصْ، أَفَالْطِي؛

عِيرَا، مِّيسْ ن عِيقِّيشْ، أَثِيقُوعِي؛

‏27 أَبِيعَازَارْ، أَعَانَاثُوثِي؛

مَاپُونَّايْ، أَحُوشَايِي؛

‏28 صَالْمُونْ، أَخُوخِي؛

مَاهْرَايْ، أَنَاطُوفَاثِي؛

‏29 خَالَابْ، مِّيسْ ن بَاعْنَا، أَنَاطُوثَافِي؛

إِتَّايْ، مِّيسْ ن رِيبَايْ، زِي جِيبْعَا زڭْ أَيْثْ ن بِينْيَامِينْ؛

‏30 بَانَايَا، زِي فِيرْعَاثُونْ؛

هِيدَّايْ، زِي ثغْزُورِينْ ن جَاعَاشْ؛

‏31 أَپُو-عَالْپُونْ، أَعَارَابَاثِي؛

عَازَامُوثْ، أَبَارْحُومِي؛

‏32 إِلْيَاحْبَا، أَشَاعْلُوپُونِي؛

زڭْ إِحنْجِيرنْ ن يَاشَانْ، مْغِيرْ يُونَاثَانْ؛

‏33 شَامَّا، أَهَارَارِي؛

أَخِييَامْ، مِّيسْ شَارَارْ، أَرَارِي؛

‏34 إِلِيفَالَاطْ، مِّيسْ ن أَحَاسْبَايْ، مِّيسْ ن ؤُمَاعْكِي؛

إِعَامْ، مِّيسْ ن أَخِيطُوفِيلْ، أَجِيلُونِي؛

‏35 حَاصْرَايْ، أَكَارْمَالِي؛

فَاعْرَايْ، أَلَارْبِي؛

‏36 يِيجْعَالْ، مِّيسْ ن نَاثَانْ، زِي صُوبَا؛

بَانِي، أَجَاذِي؛

‏37 صَالَاقْ، أَعَامُّونِي؛

نَاحْرَايْ، أَلْبِي‘رُوثِي، أَحمَّاڒْ ن ڒسْنَاحْ ن يُووَابْ، مِّيسْ ن صَارُويَا؛

‏38 عِيرَا، أَيِيثْرِي؛

جَارَابْ، أَيِيثْرِي؛

‏39 ؤُرِييَا، أَحِيتِّي، مَارَّا جْمِيعْ سبْعَا ؤُ-ثْڒَاثِينْ ن يرْيَازنْ.