إِزْڒِي ن ذَاوُوذْ
22
1 ذَاوُوذْ إِسِّيوڒْ أَوَاڒنْ ن إِزْڒِي أَيَا إِ سِيذِي ذڭْ وَاسّْ ؤُمِي ث إِفكّْ سِيذِي زڭْ ؤُفُوسْ ن مَارَّا ڒْعذْيَانْ نّسْ ؤُ زڭْ ؤُفُوسْ ن شَاوُولْ. 2 نتَّا إِنَّا: ”سِيذِي ذ ثَاصْضَارْثْ إِنُو ذ لْپُورْجْ إِنُو ذ أَمْسنْجمْ إِنُو.
3 سِيذِي ن ثصْضَارْثْ إِنُو، نشّْ غَارسْ إِ غَا أَروْڒغْ.
شكْ ذ أَسڒْقِي إِنُو ذ يِيشّْ ن ؤُسنْجمْ إِنُو،
لْپُورْجْ إِنُو يُوعْڒَانْ، أَمْشَانْ إِنُو ن ثَاروْڒَا ذ أَمْسنْجَامْ إِنُو.
شكْ ثْفكّذْ أَيِي زِي لْعُونْفْ. ▪
4 نشّْ ڒَاغِيغْ-د: ’أَسمْغَارْ إِ سِيذِي‘،
ؤُ أَقَا تّْوَاسْنجْمغْ زِي ڒْعذْيَانْ إِنُو.
5 مَاغَارْ نّْضنْ أَيِي-د ڒمْوَاجْ ن ڒْموْثْ،
سِّيڭّْوذنْثْ أَيِي ڒْحمْڒَاثْ ن وَامَانْ إِهَاجنْ.
6 إِسغْوَانْ ن ڒَاخَارْثْ شَارْفنْ أَيِي،
ثِيخشْفِينْ ن ڒْموْثْ حْصَارنْثْ أَيِي.
7 ذِي ڒحْصَارثْ إِنُو ڒَاغِيغْ-د خْ سِيذِي ؤُ خْ أَربِّي إِنُو إِ خْ د-ڒَاغِيغْ.
زِي زَّاوشْثْ ثَامقّْرَانْثْ نّسْ إِسْڒَا نتَّا إِ ثْمِيجَّا إِنُو
ؤُشَا إِغُويَّانْ إِنُو ؤُذْفنْ غَارْ إِمزُّوغنْ نّسْ.
8 خنِّي ثنْهزّْ ؤُ ثَارْجِيجْ ثمُّورْثْ،
ذْسُوسَا ن ؤُجنَّا تّْرَاحنْ-د تَّاسنْ-د ؤُ نْهزّنْ،
مَاغَارْ أَغْضَابْ نّسْ ثُوغَا إِتّْوَاسَارْغْ.
9 دّخَّانْ إِڭعّذْ-د زڭْ ونْزَارنْ نّسْ
ؤُ ثِيمسِّي زڭْ ؤُقمُّومْ نّسْ ثْصَارْضْ،
ڒفْحمْ إِتّحْذُوذُوقنْ إِتّْوَاسَارْغْ زَّايسْ.
10 نتَّا إِڭَّا أَجنَّا أَذْ يَاضَارْ ؤُشَا إِهْوَا-د نتَّا،
أَقَا ذِينْ إِجّْ ن ؤُسيْنُو إِبُّومْبسْ سَاذُو إِضَارنْ نّسْ.
11 نتَّا إِنْذهْ خْ إِجّْ ن ؤُكِيرُوبْ ؤُشَا إِضْوَا،
ؤُ نتَّا إِتّْوَاژَارْ خْ وَافْرِيونْ ن ؤُصمِّيضْ. ▫
12 نتَّا إِڭَّا ثَادْجسْثْ أَذْ أَسْ ثنّضْ،
أَمْ إِعُوشُّوثنْ، إِجّْ ن وڭْرَاوْ ن وَامَانْ،
إِسيْنُوثنْ إِقلّْجنْ إِبَّارشْننْ.
13 زِي ثِيسِّيقْثْ قِيبَاتْشْ نّسْ تّْوَاسَارْغنْ ڒفْحمْ إِتّحْذُوذُوقنْ.
14 ؤُشَا إِجَّا سِيذِي أَجَّاجْ أَذْ إِدُّوقّزْ زڭْ ؤُجنَّا،
ؤُشَا أَمْعُودْجِي خْ كُوڒْشِي إِڭَّا ثْمِيجَّا نّسْ تّْنفْرَارَا.
15 نتَّا إِسّكّْ فْڒِيثْشَاثْ ن ڒْقوْسْ نّسْ ؤُشَا إِبزّعْ إِ-ثنْ،
إِزَّارْيضْ أَسَّامنْ ؤُشَا إِسِّيڭّْوذْ إِ-ثنْ.
16 ثِيسِيوِينْ ن ڒبْحَارْ ذوْڒنْثْ تّْبَاننْثْ،
ذْسُوسَا ن دُّونشْثْ ذوْڒنْ عَارَّانْ زڭْ ؤُودّبْ ن سِيذِي،
زڭْ ؤُصُوضِي ن ڒعْوِينْ زڭْ ونْزَارنْ نّسْ.
17 زِي سنّجْ إِسّْوِيژّضْ-د أَفُوسْ نّسْ،
يِيوِي أَيِي، إِجْبذْ أَيِي-د زڭْ وَامَانْ مْغَارنْ.
18 نتَّا إِفكّْ أَيِي-د زِي ڒعْذُو إِنُو إِجهْذنْ،
زڭْ إِنِّي ذ أَيِي إِشَارّْهنْ،
مِينْزِي نِيثْنِي ثُوغَا جهْذنْ خَافِي.
19 نِيثْنِي حْصَارنْ أَيِي ذڭْ وَاسّْ ن أَرْژِييّثْ إِنُو،
مَاشَا سِيذِي ثُوغَا ذ أَمْعمّذْ إِنُو.
20 نتَّا إِنْذهْ أَيِي غَارْ تَّاسِيعْ ؤُشَا إِسّنْجمْ أَيِي،
مَاغَارْ نتَّا ثُوغَا إِسّْعِيزَّا أَيِي.
21 سِيذِي إِخْڒفْ أَيِي عْلَاحْسَابْ ثَاسڭْذَا إِنُو،
عْلَاحْسَابْ ثَازْذُوڭِي ن إِفَاسّنْ إِنُو إِخدْجصْ أَيِي.
22 مَاغَارْ نشّْ حْضِيغْ إِبْرِيذنْ ن سِيذِي،
وَارْ هيّْضغْ شَا خْ أَربِّي إِنُو س ؤُخيّبْ.
23 مَاغَارْ مَارَّا ڒْحقّْ نّسْ ثُوغَا زَّاثْ إِ ثِيطَّاوِينْ إِنُو،
وَارْ حيِّيذغْ شَا خْ ثْوصَّا نّسْ.
24 ذوْڒغْ تّْوَاكمّْڒغْ أَكِيذسْ،
حْضِيغْ إِخفْ إِنُو زِي ڒْمُوعْصِييّثْ إِنُو.
25 سِيذِي إِخْڒفْ أَيِي أَنشْثْ ن ثَاسڭْذَا إِنُو،
أَنشْثْ ن ثَازْذُوڭِي إِنُو زَّاثْ إِ ثِيطَّاوِينْ نّسْ.
26 إِ ؤُمدُّوكّڒْ أَمْثِيقِّي إِ ثدْجِيذْ شكْ ذ أَمدُّوكّڒْ ذ أَمْثِيقِّي،
إِ بُو-ثغْرُوضْثْ إِكمّْڒنْ إِ ثدْجِيذْ شكْ ثْكمّْڒذْ.
27 إِ ونِّي إِتّْوَاسِيزذْڭنْ أَقَا شكْ ذ أَمزْذَاڭْ،
أَكْ-ذ ونِّي إِفَارْغنْ، أَقَا ثْفَارْغذْ.
28 شكْ ثسّْنجْمذْ ڒْڭنْسْ إِتّْوَاحْصَارْ،
مَاشَا ثِيطَّاوِينْ نّكْ ضِيدّْ إِ إِمْعفَّارنْ، شكْ أَذْ ثنْ ثسّهْوِيذْ. ▫
29 مِينْزِي شكْ ذ ڒفْنَارْ إِنُو، أَ سِيذِي!
سِيذِي إِڭَّا ثَافَاوْثْ ذِي ثَادْجسْثْ إِنُو.
30 مِينْزِي أَكِيذكْ أَذْ أَزّْڒغْ خْ إِشْثْ ن بَانْذِييَّا،
أَكْ-ذ أَربِّي إِنُو أَذْ نڭّْزغْ خْ إِجّْ ن ڒْحِيضْ.
31 أَبْرِيذْ ن أَربِّي إِكْمڒْ، مِينْ إِقَّارْ سِيذِي أَقَا إِتّْوَاصفَّا ذِي ثْمسِّي.
نتَّا ذ أَسڒْقِي إِ مَارَّا إِنِّي غَارسْ يَاروْڒنْ. ▪
32 مَاغَارْ مَانْ ونْ إِ إِدْجَانْ ذ أَربِّي، مْغِيرْ سِيذِي،
ؤُ مَانْ ونْ إِ إِدْجَانْ ذ ثَاصْضَارْثْ، مْغِيرْ أَربِّي نّغْ؟ ▪
33 أَربِّي ذ لْپُورْجْ إِنُو إِجْهذْ،
نتَّا إِسَّارْخُو أَبْرِيذْ نّسْ نِيشَانْ.
34 نتَّا إِڭَّا إِضَارنْ إِنُو أَمْ ينِّي ن ثُوذَاذِينْ،
ؤُ يَارَّا أَيِي أَذْ بدّغْ خْ ڒڭْعُوذِي إِنُو.
35 نتَّا إِسّڒْمذْ إِفَاسّنْ إِنُو إِ ؤُمنْغِي،
إِغَادْجنْ إِنُو أَذْ محْضنْ إِجّْ ن ڒْقوْسْ ن نّْحَاسْ.
36 شكْ ثوْشِيذْ أَيِي أَسڒْقِي ن ؤُسنْجمْ نّكْ،
ؤُ س ؤُوَاضعْ نّكْ ثسّمْغَارذْ أَيِي.
37 أَقَا ثڭّذْ تَّاسِيعْ إِ ؤُصُورِيفْ سَاذُو إِنُو،
ؤُشَا ثِيشعْبِينْ إِنُو وَارْ ميّْڒنْثْ.
38 نشّْ ضْفَارغْ ڒْعذْيَانْ إِنُو ؤُشَا ثحِّيغْ ثنْ،
ؤُ وَارْ د تّْعِيقِّيبغْ أَڒْ ثنْ قْضِيغْ.
39 نشّْ قْضِيغْ ثنْ ؤُ سّْنُوقّْبغْ ثنْ أَڒَامِي وَارْ كَّارنْ عَاوذْ.
نِيثْنِي وْضَانْ سَاذُو إِضَارنْ إِنُو.
40 شكْ ثْبيْسذْ أَيِي س جّهْذْ إِ ؤُمنْغِي،
ثَارِّيذْ-د إِنِّي غَارِي د-إِكَّارنْ أَذْ أَضَارنْ سَاذُو إِنُو.
41 شكْ ثوْشِيذْ أَيِي ثِيمجَّارْثْ ن ڒْعذْيَانْ إِنُو، ن يِينِّي ذ أَيِي إِعِيفّنْ،
ؤُ نشّْ أَردّْدْجغْ ثنْ.
42 نِيثْنِي خزَّارنْ، مَاشَا وَارْ ذِينْ ثُوغِي أَمْسنْجمْ،
خژَّارنْ غَارْ سِيذِي، مَاشَا نتَّا وَارْ خَاسنْ د-يَارِّي.
43 نشّْ ودَّارغْ ثنْ أَمْ ثْعجَّاجْثْ ن ثمُّورْثْ،
أَمْ ؤُشَاڒْ خْ إِبْرِيذنْ عجْنغْ خَاسنْ ؤُ ڒبْزغْ ثنْ.
44 شكْ ثْفكِّيذْ أَيِي زڭْ إِمْشُوبّشنْ ن ڒْڭنْسْ إِنُو،
ثحْضِيذْ أَيِي ذ أَزدْجِيفْ ن ڒڭْنُوسْ،
إِجّْ ن ڒْڭنْسْ وَارْ ث سِّينغْ، أَذْ أَيِي إِسخَّارْ.
45 ثَارْوَا ن إِجّْ ن ؤُبَارَّانِي سّْنِيعْمِيڒنْ سّْوَاضْعنْ أَيِي.
مْغِيرْ ڒَامِي إِسْڒَا ؤُمزُّوغْ وَاهَا، سْڒِينْ-د غَارِي.
46 ثَارْوَا ن إِجّْ ن ؤُبَارَّانِي فشْڒنْ،
وَاخَّا نِيثْنِي ثُوغَا تّْوَانّْضنْ س لْبَارَاجَاثْ نْسنْ.
47 ثُوذَارْثْ إِ سِيذِي. أَذْ ثتّْوَابَاركْ ثصْضَارْثْ إِنُو.
أجّْ أَذْ يِيڒِي أَربِّي ن ثصْضَارْثْ ن ؤُسنْجمْ إِنُو أَذْ إِتّْوَاسْڭعّذْ غَارْ ؤُجنَّا!.
48 أَربِّي ونِّي إِ خَافِي إِتّنْثَاقَامنْ
ذ ونِّي إِ ذ أَيِي إِتّڭّنْ ڒڭْنُوسْ سَاذُو ؤُفُوسْ إِنُو،
49 ونِّي ذ أَيِي إِسُّوفُّوغنْ زڭْ ؤُفُوسْ ن ڒْعذْيَانْ إِنُو،
وَاهْ، شكْ ثسّْڭعَّاذذْ أَيِي ثِيوَا ن يِينِّي ذ أَيِي إِتّْضَادَّانْ،
شكْ ثسّنْجَامذْ أَيِي زڭْ ورْيَازْ ن ڒخْشُونشْثْ.
50 خْ ؤُينِّي، سِيذِي، نشّْ خْسغْ أَذْ شكْ قَاذِيغْ
ؤُ أَذْ زهّْذغْ إِسمْ نّكْ. ▪
51 إِڭَّا إِسنْجِيمنْ ن ؤُجدْجِيذْ نّسْ مْغَارنْ
ؤُشَا إِسّْشنْ ثَامخْسِيوْثْ نّسْ إِشوَّارنْ إِ ؤُمذْهُونْ نّسْ،
إِ ذَاوُوذْ ؤُ إِ زَّارِيعثْ نّسْ إِ ڒبْذَا.“