‏1 إِنَّا ذَاوُوذْ ذڭْ وُوڒْ نّسْ: ”ڒخُّو عَاذْ إِجّْ ن وَاسّْ ؤُشَا أَذْ تّْوَانْغغْ خْ ؤُفُوسْ ن شَاوُولْ. وَارْ إِقِّيمْ حَاشَا أَذْ أَروْڒغْ ذغْيَا غَارْ ثمُّورْثْ ن إِفِيلِيسْطِينِييّنْ، مَاحنْذْ أَذْ إِقْضعْ إِ شَاوُولْ ڒَايَاسْ زِي جِّيهثْ إِنُو مَاحنْذْ أَذْ خَافِي يَارْزُو عَاذْ كْثَارْ ذِي مَارَّا ثَامُّورْثْ ن إِسْرَائِيل. أَمُّو إِ غَا نجْمغْ إِ ؤُفُوسْ نّسْ.“ ‏2 ذَاوُوذْ إِكَّارْ، نتَّا ذ ستَّا-مْيَا ن يرْيَازنْ نِّي ثُوغَا غَارسْ إِدْجَانْ، عْذُونْ غَارْ مِّيسْ ن مَاعُوكْ، أَجدْجِيذْ ن جَاثْ. ‏3 إِقِّيمْ ذَاوُوذْ غَارْ أَخِيسْ، نتَّا ذ يرْيَازنْ نّسْ، كُوڒْ أَرْيَازْ أَكْ-ذ ثَادَّارْثْ نّسْ. ذَاوُوذْ إِزْذغْ ذِينْ أَكْ-ذ ثْنَاينْ ن ثمْغَارِينْ نّسْ، أَخِينُوعَامْ زِي يَازْرَاعِيلْ ؤُ أَبِيجَايِيلْ، ثَامْغَارْثْ ن نَابَالْ، زِي كَارْمِيلْ. ‏4 ؤُمِي إِتّْوَانَّا إِ شَاوُولْ، أَقَا ذَاوُوذْ يَارْوڒْ غَارْ جَاثْ، وَارْ يَارْنِي إِقِّيمْ أَذْ خَاسْ يَارْزُو عَاذْ كْثَارْ.

‏5 ؤُشَا إِنَّا ذَاوُوذْ إِ أَخِيشْ: ”مَاڒَا ؤُفِيغْ نشّْ ڒْخَاضَارْ ذِي ثِيطَّاوِينْ نّكْ، خنِّي أوْشْ أَيِي إِجّْ ن ومْشَانْ ذڭْ إِشْثْ زِي ثْندَّامْ نّكْ ن ثمُّورْثْ، حِيمَا زمَّارْغْ أَذْ زذْغغْ ذِينْ. مَايمِّي إِ غَاركْ إِ غَا إِزْذغْ ؤُمْسخَّارْ نّكْ أَكِيذكْ ذِي ثنْذِينْثْ ن ؤُجدْجِيذْ؟“ ‏6 ذڭْ وَاسّْ نِّي إِوْشَا أَسْ أَخِيشْ ثَانْذِينْثْ ن صِيقْلَاغْ. س ؤُينِّي ثُوغَا ثدْجْ صِيقْلَاغْ ن إِجدْجِيذنْ ن يَاهُوذَا غَارسْ أَڒْ أَسّْ-أَ. ‏7 ؤُسَّانْ إِ إِكَّا ذَاوُوذْ ذِي ثمُّورْثْ ن إِفِيلِيسْطِينِييّنْ، ثُوغَا إِجّْ ن ؤُسڭّْوَاسْ ذ أَربْعَا ن إِيُورنْ.

‏8 ذَاوُوذْ إِفّغْ أَكْ-ذ إِرْيَازنْ نّسْ ؤُ نِيثْنِي كشّْضنْ إِجَاشُورِييّنْ ذ إِجَارْزِييّنْ ذ إِعَامَالِيقِييّنْ، مِينْزِي إِنَا ثُوغَا زدّْغنْ زڭْ وشْحَاڒْ ؤُيَا ذِي ثمُّورْثْ إِ إِدْجَانْ غَارْ شُورْ غَارسْ أَڒْ ثَامُّورْثْ ن مِيصْرَا. ‏9 ذَاوُوذْ إِوْثَا ثَامُّورْثْ ؤُ وَارْ إِجِّي أَذْ إِدَّارْ ؤُڒَا ذ إِجّْ ن ورْيَازْ نِيغْ ذ ثَامْغَارْثْ. إِطّفْ عَاوذْ ؤُدْجِي ذ إِفُونَاسنْ ذ ثْفُونَاسِينْ ذ يغْيَاڒْ ذ إِڒغْمَانْ ذ وَارُّوضْ ؤُشَا إِعْقبْ، يُوسَا-د غَارْ أَخِيشْ.

‏10 ؤُ أَخِيشْ إِنَّا: ”مَانِي ثْرُوحمْ أَسّْ-أَ أَذْ ثْكشّْضمْ؟“ إِنَّا ذَاوُوذْ: ”غَارْ لْجَانُوبْ ن يَاهُوذَا ؤُ غَارْ لْجَانُوبْ ن ثمُّورْثْ ن إِيَارْحَامِيثِيلِييّنْ ؤُ غَارْ لْجَانُوبْ ن ثمُّورْثْ ن إِقِينِييّنْ.“

‏11 وَارْ إِجِّي ذَاوُوذْ أَذْ إِدَّارْ ؤُڒَا ذ إِجّْ ن ورْيَازْ نِيغْ ؤُڒَا ذ إِشْثْ ن ثمْغَارْثْ حِيمَا أَذْ د-يَاسْ غَارْ جَاثْ. إِنَّا: ”حِيمَا نِيثْنِي وَارْ خَانغْ تّْعِيوِيذنْ وَالُو، أَذْ إِنِينْ: ’ثَا إِ إِڭَّا ذَاوُوذْ!‘ “ أَمُّو إِ إِقِّيمْ إِتّڭّْ ذِي مَارَّا ؤُسَّانْ إِ إِكَّا ذِي جّْوَايهْ ن إِفِيلِيسْطِينِييّنْ.

‏12 أَخِيشْ إِتِّيقّْ ذِي ذَاوُوذْ، إِنَّا: ”س ثِيذتّْ نتَّا إِسَّارْزڭْ إِخفْ نّسْ غَارْ ڒْڭنْسْ نّسْ، غَارْ إِسْرَائِيل، ؤُشَا خْ ؤُينِّي أَقَا نتَّا إِ ڒبْذَا أَذْ يِيڒِي ذ أَمْسخَّارْ إِنُو.“