‏1 ذَاوُوذْ يَارْوڒْ زِي نَايُوثْ ثنِّي غَارْ رَامَا ؤُشَا يُوسَا-د غَارْ يُونَاثَانْ، إِنَّا: ”مِينْ ڭِّيغْ نشّْ؟ مَانْ لْجَارِيمَا إِنُو ذ دّنْبْ إِ ذ أَسْ ڭِّيغْ إِ بَابَاشْ، أَقَا نتَّا إِخْسْ أَذْ زَّايِي إِكّسْ ثُوذَارْثْ؟“ ‏2 إِنَّا أَسْ يُونَاثَانْ: ”وَارْ خَاسْ نسِّيوڒْ! شكْ وَارْ ثتّْمتِّيذْ شَا. خْزَارْ بَابَا وَارْ إِتّڭّْ وَالُو، ؤُڒَا ذ إِشْثْ ن ڒْحَاجّثْ ذ ثَامقّْرَانْثْ نِيغْ ثَامژْيَانْثْ، بْڒَا مَا إِ ذ أَيِي ت غَا إِسَّارْڭبْ. مَايمِّي بَابَا زَّايِي إِ غَا إِسّْنُوفَّارْ ثَامسْڒَاشْثْ-أَ؟ أَيَا وَارْ إِزمَّارْ.“ ‏3 خنِّي إِجِّيدْجْ أَسْ ذَاوُوذْ ثْوَاڒَا نّغْنِيثْ، إِنَّا: ”بَابَاشْ إِسّنْ نِيشَانْ، أَقَا ؤُفِيغْ ڒْخَاضَارْ ذِي ثِيطَّاوِينْ نّكْ. خْ ؤُيَا إِنَّا: ’وَارْ إِتّجِّي أَذْ إِسّنْ يُونَاثَانْ مَانْ أَيَا، حِيمَا وَارْ إِكسِّي س ومْنُوسْ!‘ خْ ؤُيَا، س ثِيذتّْ أَمْ إِدَّارْ سِيذِي ؤُ أَمْ دَّارغْ نشّْ، أَقَا ذِينْ جَارْ أَيِي ذ ڒْموْثْ مْغِيرْ إِجّْ ن ؤُصُورِيفْ وَاهَا!“

‏4 يُونَاثَانْ إِنَّا إِ ذَاوُوذْ: ”مِينْ إِدْجَانْ ذڭْ وُوڒْ نّكْ، نشّْ أَذْ أَشْ ث ڭّغْ.“ ‏5 ذَاوُوذْ يَارَّا-د خْ يُونَاثَانْ: ”خْزَارْ، ثِيوشَّا أَذْ إِبدّْ ؤُيُورْ ؤُشَا إِتّْخصَّا أَيِي أَذْ قِّيمغْ غَارْ طَّابْڒَا أَكْ-ذ ؤُجدْجِيذْ أَذْ شّغْ. أجّْ أَيِي أَذْ ؤُيُورغْ، مَاحنْذْ أَذْ نُوفَّارغْ ذڭْ إِيَّارْ غَارسْ أَڒْ ثَامذِّيثْ وِيسّْ ثْڒَاثَا. ‏6 مَاڒَا يَارْزُو خَافِي بَابَاشْ، إِفْقذْ أَيِي، خنِّي إِنِي: ’ذَاوُوذْ إِحشّمْ أَيِي س وَاطَّاسْ حِيمَا إِزمَّارْ أَذْ إِرَاحْ غَارْ ثنْذِينْثْ نّسْ، غَارْ بَايْثْ-لَاحْمْ، مِينْزِي ذِينِّي إِ غَا ثِيڒِي ثْغَارْصْثْ ن ؤُسڭّْوَاسْ إِ مَارَّا ڒَادْجْ.‘ ‏7 مَاڒَا نتَّا خنِّي إِنَّا: ’مْلِيحْ!‘، أَذْ يِيڒِي ڒهْنَا إِ ؤُمْسخَّارْ نّكْ، مَاشَا مَاڒَا يَارْغَا ؤُفُوڭمْ نّسْ، خنِّي أَذْ ثسّْنذْ، أَقَا نتَّا إِڭَّا ذِي ڒْبَاڒْ نّسْ أَذْ ذ أَيِي إِڭّْ ڒْغَارْ. ‏8 أڭّْ س ثْمخْسِيوْثْ إِشوَّارنْ أَكْ-ذ ؤُمْسخَّارْ نّكْ، مِينْزِي ثسِّيذْفذْ أَمْسخَّارْ نّكْ أَكِيذكْ ذڭْ إِجّْ ن ڒْعَاهْذْ ن سِيذِي. مَاشَا مَاڒَا ڭِّيغْ إِشْثْ ن لْجَارِيمَا، نغْ أَيِي شكْ خنِّي. مَايمِّي ثخْسذْ أَذْ أَيِي ثَاوْيذْ غَارْ بَابَاشْ؟“ ^▪   ‏9 خنِّي إِنَّا يُونَاثَانْ: ”أَذْ يِيڒِي ؤُيَا إِڭّْوجْ خَاكْ! مِينْزِي وَاخَّا أَرڭْبغْ خَاسْ، أَقَا بَابَا إِڭَّا ذِي ڒْبَاڒْ نّسْ أَذْ ذَايكْ إِڭّْ ڒْغَارْ، مَا خنِّي نشّْ وَارْ ذ أَشْ ث قَّارغْ؟“

‏10 إِنَّا ذَاوُوذْ إِ يُونَاثَانْ: ”مَانْ ونْ إِ ذ أَيِي-د إِ غَا يَاوْينْ أَرقَّاسْ، مَاڒَا إِوْشَا أَشْ بَابَاشْ إِشْثْ ن ثمْوَارِّيثْ ثقْسحْ؟“

‏11 خنِّي إِنَّا يُونَاثَانْ إِ ذَاوُوذْ: ”أَسْ-د، أجّْ أَنغْ أَذْ نفّغْ بَارَّا غَارْ ييَّارْ.“ ؤُشَا فّْغنْ نِيثْنِي س ثْنَاينْ إِذْسنْ، غَارْ ييَّارْ بَارَّا.

‏12 إِنَّا يُونَاثَانْ إِ ذَاوُوذْ: ”جُّودْجغْ غَارْ سِيذِي، أَربِّي ن إِسْرَائِيل، مَاڒَا نشّْ ثِيوشَّا نِيغْ فَارْوِيشَّا غَارْ ڒْوقْثْ-أَ، أَقَا وْثِيغْ ڒحْسَابْ أَمُّو ذ وَامُّو زِي جِّيهثْ ن بَابَا، ؤُفِيغْ أَقَا مْلِيحْ إِ ذَاوُوذْ ؤُشَا خنِّي نشّْ وَارْ سّكِّيغْ حذْ أَذْ أَشْ ث يِينِي،

‏13 خنِّي أَذْ إِڭّْ سِيذِي أَمنِّي س يُونَاثَانْ ؤُ عَاذْ مَاهُو. مَاشَا مَاڒَا إِتّْغِيڒْ أَسْ مْلِيحْ إِ بَابَا أَذْ ذَايكْ إِڭّْ ڒْغَارْ، خنِّي نشّْ أَذْ أَشْ ث إِنِيغْ، أَذْ شكْ جّغْ أَذْ ثفّْغذْ حِيمَا ثْزمَّارذْ أَذْ ثُويُورذْ ذِي ڒهْنَا. سِيذِي أَذْ يِيڒِي أَكِيذكْ، أَمْ مَامّشْ ث ثُوغَا أَكْ-ذ بَابَا.

‏14 وَارْ إِتِّيڒِي وَاهَا أَمْ دَّارغْ، وَارْ إِتِّيڒِي خنِّي وَاهَا أَذْ أَيِي ثسّشْنذْ ثَامخْسِيوْثْ إِشوَّارنْ ن سِيذِي حِيمَا وَارْ تّْمتِّيغْ شَا،

‏15 مَاشَا ؤُڒَا وَارْ ثْقطّْعذْ ثَامخْسِيوْثْ نّكْ إِشوَّارنْ إِ ڒبْذَا خْ ثَادَّارْثْ إِنُو، ؤُڒَا خْمِي إِ غَا إِقْضعْ سِيذِي مَارَّا ڒْعذْيَانْ ن ذَاوُوذْ زڭْ وُوذمْ ن ثمُّورْثْ!“

‏16 ؤُشَا إِڭَّا يُونَاثَانْ إِجّْ ن ڒْعَاهْذْ أَكْ-ذ ثَادَّارْثْ ن ذَاوُوذْ ؤُشَا سِيذِي إِتَّارْ إِ-ث زڭْ ؤُفُوسْ ن ڒْعذْيَانْ ن ذَاوُوذْ.

‏17 يُونَاثَانْ إِجَّا ذَاوُوذْ أَذْ إِجَّادْجْ ثْوَاڒَا نّغْنِيثْ، مِينْزِي نتَّا ثُوغَا إِتّخْسْ إِ-ث، أَقَا إِتّخْسْ إِ-ث أَمْ مَامّشْ ثُوغَا إِتّخْسْ إِخفْ نّسْ.

‏18 خَاسْ ؤُشَا إِنَّا أَسْ يُونَاثَانْ: ”ثِيوشَّا ذ أَيُورْ أَمَايْنُو ؤُ شكْ أَذْ ذَايْسنْ ثقِّيمذْ مَاغَارْ ڒْكُورْسِي نّكْ أَذْ إِقِّيمْ إِخْوَا.

‏19 مَاڒَا عْذُونْ ثْڒَاثَا ن وُوسَّانْ، هْوَا قَاعْ ؤُشَا رُوحْ غَارْ ومْشَانْ مَانِي ثُوغَا ثنُّوفَّارذْ ذڭْ وَاسّْ ن ثْمڭِّيثْ ؤُ قِّيمْ غَارْ ؤُغزْذِيسْ ن وژْرُو ن هَا‘إِزِيلْ. ‏20 نشّْ أَذْ وْثغْ ثْڒَاثَا ن فْڒِيثْشَاثْ زَّاثسْ أَخْمِي خْسغْ أَذْ ڒقْفغْ ثَانْذَايْثْ. ‏21 ؤُ خْزَارْ، نشّْ أَذْ سّكّغْ أَحُوذْرِي أَوَارْنِي أَسنْثْ، أَذْ أَسْ إِنِيغْ: ’ؤُيُورْ، أَرْزُو خْ فْڒِيثْشَاثْ!‘ مَاڒَا نشّْ أَذْ إِنِيغْ نِيشَانْ إِ ؤُحُوذْرِي: ’حْضَا، فْڒِيثْشَاثْ أَقَا ؤُذْسنْثْ غَارْ ؤُغزْذِيسْ-أَ زِي غَاركْ!‘، خنِّي أَوْيِي ثنْثْ-إِ-د، أَسْ-د، مَاغَارْ أَقَا ذِينْ ڒهْنَا إِ شكْ ؤُ وَارْ ذِينْ وَالُو أَقَا أَمُّو س ثِيذتّْ إِ إِدَّارْ سِيذِي! ‏22 مَاشَا مَاڒَا نشّْ نِّيغْ إِ ؤُحُوذْرِي: ’خْژَارْ، فْڒِيثْشَاثْ أَقَا إِڭّْوجنْثْ خَاكْ عَاذْ كْثَارْ!‘، خنِّي أَڭّْوجْ، مَاغَارْ سِيذِي إِسّكَّا شكْ غَارْ ڒَاڭّْوَاجْ. ‏23 ؤُشَا خْ وَاوَاڒْ نِّي ننَّا نشّْ ذ شكْ، أَقَا سِيذِي أَذْ يِيڒِي ذ أَشهَّاذْ جَارْ أَيِي ذ شكْ إِ ڒبْذَا!“

‏24 إِسّْنُوفَّارْ ذَاوُوذْ إِخفْ نّسْ بَارَّا ذڭْ إِيَّارْ. ؤُ ڒَامِي د-يُوسَا ؤُيُورْ أَمَايْنُو إِقِّيمْ ؤُجدْجِيذْ غَارْ طَّابْڒَا حِيمَا أَذْ إِشّْ. ‏25 ثُوغَا أَجدْجِيذْ إِقِّيمْ غَارْ ؤُمنْسِي أَيَا ذڭْ ومْشَانْ نّسْ أَمْ مَامّشْ ثُوغَا إِقِّيمْ غَارْ إِمنْسِييّنْ إِنّغْنِي، ذِي ڒْكُورْسِي إِ إِدْجَانْ غَارْ ڒْحِيضْ. يُونَاثَانْ إِكَّارْ ؤُ أَبْنِيرْ إِقِّيمْ غَارْ ؤُغزْذِيسْ ن شَاوُولْ ؤُ ڒْكُورْسِي ن ذَاوُوذْ إِبَانْ-د إِخْوَا. ‏26 ذڭْ وَاسّْ نِّي شَاوُولْ وَارْ إِنِي وَالُو، مَاغَارْ نتَّا إِنَّا ذڭْ إِخفْ نّسْ: ”إِمْسَارْ أَسْ شَا أَڒَامِي نتَّا وَارْ إِدْجِي ذ أَمزْذَاڭْ. أَقَا نِيشَانْ نتَّا وَارْ إِدْجِي ذ أَمزْذَاڭْ.“

‏27 ثِيوشَّا نّسْ، ذڭْ وَاسّْ وِيسّْ ثْنَاينْ أَوَارْنِي إِ ؤُيُورْ أَمَايْنُو، ؤُمِي إِقِّيمْ ڒْكُورْسِي ن ذَاوُوذْ إِخْوَا عَاوذْ، إِمْسَارْ، أَقَا إِنَّا شَاوُولْ إِ مِّيسْ يُونَاثَانْ: ”مَايمِّي مِّيسْ ن يَاسَّا وَارْ د-يُوسِي إِضنَّاضْ ذ وَاسّْ-أَ غَارْ ؤُمنْسِي؟“ ‏28 يُونَاثَانْ يَارَّا-د خْ شَاوُولْ: ”ذَاوُوذْ إِحشّمْ أَيِي أَطَّاسْ مَاحنْذْ إِزمَّارْ أَذْ إِرَاحْ غَارْ بَايْثْ-لَاحْمْ. ‏29 نتَّا إِنَّا: ’أجّْ أَيِي أَذْ ؤُيُورغْ، مَاغَارْ نشِّينْ أَذْ نڭّْ إِشْثْ ن ثْغَارْصْثْ ن ڒَادْجْ نّغْ ذِي ثنْذِينْثْ ؤُشَا ؤُمَا إِڭَّا خَافِي أَذْ حْضَارغْ. مَاڒَا خنِّي ؤُفِيغْ ڒخُّو أَرْضَا ذِي ثِيطَّاوِينْ نّكْ، تّْزَاوْڭغْ، أجّْ أَيِي أَذْ ؤُيُورغْ حِيمَا أَذْ ژَترغْ أَيْثْمَا.‘ س ؤُينِّي ذَاوُوذْ وَارْ د-يُوسِي غَارْ طَّابْڒَا ن ؤُجدْجِيذْ.“

‏30 خنِّي يَارغْ ؤُخيّقْ ن شَاوُولْ خْ يُونَاثَانْ، إِنَّا أَسْ: ”شكْ، مِّيسْ ن ثمْغَارْثْ إِ ذِي ثدْجْ ثْغنَّانْثْ إِفَارْغنْ! نشّْ سّْنغْ مْلِيحْ، أَقَا شكْ ثِيخْضَارذْ أَغزْذِيسْ ن مِّيسْ ن يَاسَّا، ذ مَانْ أَيَا ذ ڒفْضِيحثْ إِ شكْ ذ ڒفْضِيحثْ إِ ثُوعَّارْينْثْ ن يمَّاشْ! ‏31 مِينْزِي مَارَّا ؤُسَّانْ مِينْ غَا يكّْ مِّيسْ ن يَاسَّا إِدَّارْ خْ ثمُّورْثْ، وَارْ ثْبذِّيذْ شكْ ؤُڒَا ذ ثَاڭلْذِيثْ نّكْ. خنِّي ڒخُّو، سكّْ إِجّنْ، أَوْيِي ث-إِ-د غَارِي، مَاغَارْ نتَّا ذ أَحنْجِيرْ ن ڒْموْثْ.“

‏32 يَارَّا-د يُونَاثَانْ خْ بَابَاسْ شَاوُولْ، إِنَّا أَسْ: ”مَايمِّي إِتّْخصَّا نتَّا أَذْ إِتّْوَانغْ؟ مِينْ إِڭَّا؟“ ‏33 خنِّي إِحجَّارْ إِ-ث شَاوُولْ س لَانْسَا حِيمَا أَذْ ث إِڒْقفْ. أَمُّو إِ إِسّنْ يُونَاثَانْ، أَقَا بَابَاسْ ثُوغَا إِڭَّا ذِي ڒْبَاڒْ نّسْ أَذْ إِنغْ ذَاوُوذْ. ‏34 إِكَّارْ يُونَاثَانْ خْ طَّابْڒَا ؤُمِي يَارْغَا ؤُخيّقْ نّسْ ؤُ وَارْ إِشِّي أَغْرُومْ ذڭْ وَاسّْ وِيسّْ ثْنَاينْ ن ؤُيُورْ أَمَايْنُو، مَاغَارْ نتَّا ثُوغَا إِكسِّي س ومْنُوسْ إِ ذَاوُوذْ، مِينْزِي بَابَاسْ ثُوغَا إِسّْبهْذڒْ إِ-ث أَمُّو.

‏35 ثِيوشَّا نّسْ غَارْ ثُوفُّوثْ، إِمْسَارْ أَقَا يُونَاثَانْ يُويُورْ بَارَّا ذڭْ إِيَّارْ، ذِي ڒْوقْثْ إِ إِڭَّا أَمْسَاڭَارْ أَكْ-ذ ذَاوُوذْ ؤُ ثُوغَا أَكِيذسْ إِجّْ ن ؤُحُوذْرِي ذ أَمژْيَانْ. ‏36 نتَّا إِنَّا إِ ؤُحُوذْرِي: ”ؤُيُورْ، أَرْزُو خْ فْڒِيثْشَاثْ نِّي إِ غَا وْثغْ.“ أَحنْجِيرْ يُويُورْ ؤُ نتَّا إِوْثَا إِشْثْ ن فْڒِيثْشَا ثكَّا سنّجْ نّسْ. ‏37 ؤُمِي د-يِيوضْ ؤُحُوذْرِي غَارْ ومْشَانْ مَانِي ثدْجْ فْڒِيثْشَا، إِڒَاغَا-د يُونَاثَانْ أَوَارْنِي إِ ؤُحنْجِيرْ، إِنَّا: ”مَا وَارْ ثوْضِي فْڒِيثْشَا زَّايكْ أَغِيرِينْ عَاذْ خَاكْ؟“ ‏38 إِڒَاغَا يُونَاثَانْ عَاوذْ إِ ؤُحُوذْرِي ”ذغْيَا، أَزّڒْ، وَارْ تّْبذِّي!“ أَحُوذْرِي إِ إِدْجَانْ أَكْ-ذ يُونَاثَانْ إِسّْمُونْ فْڒِيثْشَا ؤُشَا إِعْقبْ غَارْ بَابْ نّسْ. ‏39 أَحُوذْرِي وَارْ إِسِّينْ وَالُو. مْغِيرْ يُونَاثَانْ ذ ذَاوُوذْ سّْننْ خْ ثْمسْڒَاشْثْ جَارْ أَسنْ. ‏40 خنِّي إِوْشَا يُونَاثَانْ ڒقْشُوعْ ن ڒسْنَاحْ نّسْ إِ ؤُحُوذْرِي إِ ثُوغَا غَارسْ إِدْجَانْ، إِنَّا أَسْ: ”ؤُيُورْ، أَرّْ إِ-ثنْ غَارْ ثنْذِينْثْ!“ ‏41 ؤُمِي يُويُورْ ؤُحنْجِيرْ، إِكَّارْ ذَاوُوذْ زڭْ ؤُغزْذِيسْ ن لْجَانُوبْ ؤُشَا إِوْضَا س ؤُغمْپُوبْ نّسْ غَارْ ثمُّورْثْ ؤُشَا يُوضَارْ ثْڒَاثَا ن ثْوَاڒَاوِينْ. نِيثْنِي سُّوذْمنْ أَيَاوْيَا، رُونْ س ثْنَاينْ إِذْسنْ أَڒَامِي ذَاوُوذْ يَارْنِي ذَايسْ. ‏42 ؤُ يُونَاثَانْ إِنَّا إِ ذَاوُوذْ: ”ؤُيُورْ ذِي ڒهْنَا. أَقَا نجِّيدْجْ س ثْنَاينْ إِذْنغْ س يِيسمْ ن سِيذِي، ننَّا: ’أَذْ يِيڒِي سِيذِي ذ أَشهَّاذْ جَارْ أَيِي ذ شكْ، جَارْ زَّارِيعثْ إِنُو ذ زَّارِيعثْ نّكْ، إِ ڒبْذَا!‘ “