ڒعْذَاوَاثْ ن شَاوُولْ ضِيدّْ إِ ذَاوُوذْ
18
1 ؤُمِي إِكمّڒْ ذَاوُوذْ ڒْهَارْذْ أَكْ-ذ شَاوُولْ، إِمْسَارْ، أَقَا ڒعْمَارْ ن يُونَاثَانْ إِقّنْ غَارْ ذَاوُوذْ ؤُ يُونَاثَانْ إِتّخْسْ ذَاوُوذْ أَمْ ڒعْمَارْ نّسْ. 2 شَاوُولْ إِكْسِي غَارسْ ذَاوُوذْ ذڭْ وَاسّْ نِّي ؤُ وَارْ ث إِجِّي عَاذْ أَذْ إِعْقبْ غَارْ ثَادَّارْثْ ن بَابَاسْ. 3 يُونَاثَانْ ذ ذَاوُوذْ ڭِّينْ إِجّْ ن ڒْعَاهْذْ أَكْ-ذ وَايَاوْيَا، مِينْزِي نتَّا إِتّخْسْ إِ-ث أَمشْنَاوْ إِخفْ نّسْ. 4 يُونَاثَانْ إِكّسْ أَسڒْهَامْ نّسْ إِ ثُوغَا يَارْضْ، إِوْشَا إِ-ث إِ ذَاوُوذْ، ؤُڒَا ذ أَرُّوضْ نّسْ، ؤُشَا عَاوذْ سِّيفْ نّسْ ذ ڒْقوْسْ نّسْ ذ وبْيَاسْ نّسْ إِ ڒسْنَاحْ. 5 ذَاوُوذْ إِفّغْ غَارْ ؤُمنْغِي مَانِي مَا إِسّكّْ إِ-ث شَاوُولْ. ثُوغَا أَبْرِيذْ نّسْ مْلِيحْ أَڒَامِي ث يَارَّا شَاوُولْ خْ إِعسْكَارِييّنْ نّسْ. ثُوغَا ذَاوُوذْ ذ لمْلِيحْ ذِي ثِيطَّاوِينْ ن مَارَّا ڒْڭنْسْ ؤُڒَا ذِي ثِيطَّاوِينْ ن إِمْسخَّارنْ ن شَاوُولْ. 6 ؤُمِي د-أَرڭّْوْحنْ، ؤُشَا ؤُڒَا ذ ذَاوُوذْ إِعْقبْ أَوَارْنِي إِ ڒغْڒبْ خْ إِفِيلِيسْطِينِييّنْ، إِمْسَارْ، أَقَا فّْغنْثْ-إِ-د ثمْغَارِينْ زِي مَارَّا ثِيندَّامْ ن إِسْرَائِيل إِ ؤُمْسَاڭَارْ أَكْ-ذ شَاوُولْ ؤُشَا غنّْجنْثْ ؤُ شضْحنْثْ س إِبنْذِيرنْ، س ڒفْرَاحثْ ؤُ س ڒْڭَامْبْرِييَاثْ س ثْڒَاثَا ن إِفِيڒَانْ. 7 ثِيمْغَارِينْ أَرِّينْثْ مژْرِي نْسنْثْ، غنّْجنْثْ س نُّوبَاثْ، نَّانْثْ: ”شَاوُولْ إِغْڒبْ خْ ڒُوڒُوفْ نّسْ، مَاشَا ذَاوُوذْ خْ عشْرَا ن ڒُوڒُوفْ نّسْ!“ ▪ 8 شَاوُولْ إِفُّوڭمْ أَطَّاسْ ؤُ ثُوغَا ذ مَانْ أَيَا ذ ڒْعِيبْ ذِي ثِيطَّاوِينْ نّسْ، إِنَّا: ”وْشِينْثْ إِ ذَاوُوذْ عشْرَا ن ڒُوڒُوفْ، مَاشَا وْشِينْثْ أَيِي مْغِيرْ ڒُوڒُوفْ. مَاشَا ثقِّيمْ أَسْ مْغِيرْ ثْڭلْذَا وَاهَا؟“ 9 زڭْ وَاسّْ نِّي سنّجْ إِبْذَا شَاوُولْ إِحطَّا ذَاوُوذْ. 10 ثِيوشَّا نّسْ إِمْسَارْ، أَقَا إِوْضَا-د عَاوذْ ڒَارْيَاحْ ذ أَعفَّانْ ن أَربِّي خْ شَاوُولْ ؤُ إِطّفْ-إِ-ث إِذْوڒْ إِتّكّْ خْ ؤُزدْجِيفْ ذِي ثَادَّارْثْ نّسْ، أَمْ ثُوغَا إِتِّيرَارْ ذَاوُوذْ أَمْ وُوسَّانْ نّغْنِي س ؤُفُوسْ نّسْ خْ ڒْڭَامْبْرِي ؤُشَا شَاوُولْ ثُوغَا غَارسْ لَانْسَا ذڭْ ؤُفُوسْ.
11 شَاوُولْ إِنْضَارْ لَانْسَا، إِنَّا: ”نشّْ أَذْ ڒقْفغْ ذَاوُوذْ ؤُ أَذْ ث سمَّارغْ غَارْ ڒْحِيضْ.“ إِزمَّارْ ذَاوُوذْ أَذْ أَسْ إِخْنسْ ثْنَاينْ ن ثْوَاڒَاوِينْ.
12 ثُوغَا شَاوُولْ إِتّڭّْوذْ زِي ذَاوُوذْ، مِينْزِي سِيذِي ثُوغَا-ث أَكْ-ذ ذَاوُوذْ، مَاشَا ثُوغَا إِسْمحْ ذِي شَاوُولْ.
13 س ؤُينِّي إِسِّيڭّْوجْ شَاوُولْ ذَاوُوذْ خْ يِيخفْ نّسْ، إِڭَّا إِ-ث ذ أَمقّْرَانْ خْ وَاڒفْ. نتَّا إِتّفّغْ ؤُ إِتَّارڭّْوَاحْ زَّاثْ إِ وُوذمْ ن ڒْڭنْسْ.
14 ثُوغَا ذَاوُوذْ إِفْڒحْ ذِي مَارَّا إِبْرِيذنْ نّسْ ؤُ سِيذِي ثُوغَا-ث أَكِيذسْ.
15 ؤُمِي إِژْرَا شَاوُولْ، أَقَا ذَاوُوذْ إِفْڒحْ، ثُوغَا نتَّا إِتّڭّْوذْ زَّاثْ إِ وُوذمْ نّسْ.
16 مَاشَا مَارَّا إِسْرَائِيل ذ يَاهُوذَا تّخْسنْ ذَاوُوذْ، مِينْزِي نتَّا إِتّفّغْ ؤُ إِتَّارڭّْوَاحْ زَّاثْ إِ وُوذمْ نْسنْ.
17 شَاوُولْ إِنَّا إِ ذَاوُوذْ: ”خْزَارْ، نشّْ أَذْ أَشْ وْشغْ مِيرَابْ، يدْجِي ثَامقّْرَانْثْ قَاعْ، ذ ثَامْغَارْثْ. مْغِيرْ إِڒِي ذ إِجّْ ن ؤُضڭّْوَاڒْ إِمْحضْ ذڭْ ؤُمنْغِي إِ نشّْ ؤُ مْنغْ إِمنْغَانْ ن سِيذِي.“ إِنَّا شَاوُولْ أَكْ-ذ يِيخفْ نّسْ: ”حِيمَا وَارْ إِتِّيڒِي ؤُفُوسْ إِنُو ضِيدّْ نّسْ، مَاشَا أَفُوسْ ن إِفِيلِيسْطِينِييّنْ أَذْ يِيڒِي ضِيدّْ نّسْ.“
18 إِنَّا ذَاوُوذْ إِ شَاوُولْ: ”مِينْ عْنِيغْ نشّْ ذ مِينْ ثعْنَا ثُوذَارْثْ إِنُو ذ مِينْ ثعْنَا ڒَادْجْ ن بَابَا ذِي إِسْرَائِيل، أَقَا نشّْ أَذْ ذوْڒغْ ذ أَضڭّْوَاڒْ ن ؤُجدْجِيذْ؟“
19 ؤُمِي د-ثِيوضْ ڒْوقْثْ إِ ذِي إِ غَا ثمّوْشْ مِيرَابْ، يدْجِيسْ ن شَاوُولْ، ذ ثَامْغَارْثْ إِ ذَاوُوذْ، إِمْسَارْ، أَقَا ثمّوْشْ نتَّاثْ ذ ثَامْغَارْثْ إِ عَاذْرِييِيلْ زِي مَاحُولَا. 20 مِيخَالْ، يدْجِيسْ ن شَاوُولْ، ثُوغَا ثتّخْسْ ذَاوُوذْ. خبَّارنْ أَسْ ث إِ شَاوُولْ ؤُ ثُوغَا أَيَا ذ إِشْثْ ن ثْمسْڒَاشْثْ ثشْنَا ذِي ثِيطَّاوِينْ نّسْ. 21 إِنَّا شَاوُولْ: ”نشّْ أَذْ أَسْ ت وْشغْ حِيمَا أَذْ أَسْ ت ثذْوڒْ ذ ثَاخْشفْثْ ؤُ حِيمَا أَذْ يِيڒِي ؤُفُوسْ ن إِفِيلِيسْطِينِييّنْ ضِيدّْ نّسْ.“ إِنَّا شَاوُولْ إِ ذَاوُوذْ: ”أَسّْ-أَ أَذْ ثْذوْڒذْ ذ أَضڭّْوَاڒْ إِنُو س يِيجّْ ن وبْرِيذْ نّغْنِي.“ ▫ 22 يُومُورْ شَاوُولْ إِ إِمْسخَّارنْ نّسْ: ”سِيوڒْ أَكْ-ذ ذَاوُوذْ ذِي ثْنُوفّْرَا، إِنِي: ’أَقَا شكْ ثُوسِيذْ-د إِ ؤُجدْجِيذْ خْ ڒْخَاضَارْ ؤُ مَارَّا إِمْسخَّارنْ تّخْسنْ شكْ. خنِّي ذْوڒْ ڒخُّو ذ أَضڭّْوَاڒْ ن ؤُجدْجِيذْ.‘ “ 23 سِّيوْڒنْ إِمْسخَّارنْ ن شَاوُولْ أَوَاڒنْ-أَ ذڭْ إِمزُّوغنْ ن ذَاوُوذْ. خنِّي إِنَّا ذَاوُوذْ: ”مَا ذ ثَامسْڒَاشْثْ ثهْونْ ذِي ثِيطَّاوِينْ نْومْ أَذْ إِذْوڒْ إِجّْ ذ أَضڭّْوَاڒْ ن ؤُجدْجِيذْ؟ مَا وَارْ دْجِيغْ ذ إِجّْ ن ورْيَازْ ذ أَمزْڒُوضْ ذ أَمُوقْڒِيڒْ؟“ 24 إِمْسخَّارنْ ن شَاوُولْ حَاجَانْ أَسْ ث، نَّانْ: ”إِسِّيوڒْ ذَاوُوذْ أَوَاڒنْ-أَ.“ 25 خنِّي إِنَّا شَاوُولْ: ”أَمُّو إِ غَا ثِينِيمْ إِ ذَاوُوذْ: ’أَجدْجِيذْ وَارْ ذ أَسْ ثعْجِيبْ ڒغْرَامثْ، مَاشَا إِعْجبْ أَسْ مْيَا ن ڒعْذَاڒيَّاثْ ن إِفِيلِيسْطِينِييّنْ، حِيمَا أَذْ إِنْثَاقمْ زِي ڒْعذْيَانْ ن ؤُجدْجِيذْ.“ ثُوغَا شَاوُولْ إِتّْخَارَّاصْ أَذْ إِنغْ ذَاوُوذْ س ؤُفُوسْ ن إِفِيلِيسْطِينِييّنْ.
26 إِخدَّامنْ نّسْ عَاوْذنْ أَوَاڒنْ-أَ إِ ذَاوُوذْ. خنِّي ثُوغَا أَيَا ذ إِشْثْ ن ثْمسْڒَاشْثْ ثشْنَا ذِي ثِيطَّاوِينْ ن ذَاوُوذْ حِيمَا أَذْ إِذْوڒْ ذ أَضڭّْوَّارْ ن ؤُجدْجِيذْ. ڒْمِيجَاڒْ ن وُوسَّانْ إِتّْوَاڭّنْ ثُوغَا عَاذْ وَارْ عْذُونْ. 27 خنِّي إِكَّارْ ذَاوُوذْ. نتَّا ذ يرْيَازنْ نّسْ طّْفنْ أَبْرِيذْ ؤُشَا إِوْثَا نتَّا مِيثَاينْ ن يرْيَازنْ ن إِفِيلِيسْطِينِييّنْ. يِيوِي-د ذَاوُوذْ ڒعْذَاڒيَّاثْ نْسنْ ؤُ س ؤُيَا سدّنْ نِيثْنِي قَاعْ ڒْقدّْ-أَ إِ ؤُجدْجِيذْ، حِيمَا أَذْ إِذْوڒْ ذ أَضڭّْوَاڒْ ن ؤُجدْجِيذْ. خنِّي إِوْشَا أَسْ شَاوُولْ يدْجِيسْ مِيخَالْ ذ ثَامْغَارْثْ. ▪ 28 شَاوُولْ إِژْرَا ؤُ إِسّنْ، أَقَا سِيذِي ثُوغَا-ث أَكْ-ذ ذَاوُوذْ ؤُ مِيخَالْ، يدْجِيسْ ن شَاوُولْ، ثُوغَا ثتّخْسْ إِ-ث. 29 إِذْوڒْ شَاوُولْ إِڭّْوذْ عَاذْ كْثَارْ زِي ذَاوُوذْ ؤُشَا شَاوُولْ إِذْوڒْ ذ ڒعْذُو ن ذَاوُوذْ مَارَّا ؤُسَّانْ ن ثُوذَارْثْ نّسْ.
30 ؤُمِي د-فّْغنْ ڒْحُوكَّامْ ن إِفِيلِيسْطِينِييّنْ، إِمْسَارْ، مڒْمِي مَا فّْغنْ ثُوغَا ذَاوُوذْ يَارنِّي مَاهُو ذِي ڒفْڒَاحثْ نّسْ خْ مَارَّا إِمْسخَّارنْ ن شَاوُولْ، مَاحنْذْ أَذْ يِيڒِي إِسمْ نّسْ ذ شّنْعثْ أَڒْ طَّارْفْ.