شَاوُولْ إِتّْوَامّنْضَارْ زِي أَربِّي أَمْ ؤُجدْجِيذْ خْ إِسْرَائِيل
15
1 شَامْوِيلْ إِنَّا إِ شَاوُولْ: ”سِيذِي ثُوغَا إِسّكّْ أَيِي-د حِيمَا أَذْ شكْ ذهْنغْ ذ أَجدْجِيذْ خْ ڒْڭنْسْ نّسْ، خْ إِسْرَائِيل. سڒْ خنِّي غَارْ وَاوَاڒنْ ن سِيذِي. 2 أَمُّو إِ إِقَّارْ سِيذِي ن ڒْعسْكَارَاثْ: ’نشّْ أَذْ خدْجْصغْ مِينْ إِڭَّا عَامَالِيقْ إِ إِسْرَائِيل، أَقَا إِبدّْ أَسْ ذڭْ وبْرِيذْ ؤُمِي د-إِڭعّذْ إِسْرَائِيل زِي مِيصْرَا. ▪ 3 كَّارْ ڒخُّو ؤُ وّثْ عَامَالِيقْ. حَارّمْ مَارَّا مِينْ غَارسْ إِ ؤُثحِّي ؤُ وَارْ خَاسْ تّْحِيوِيڒْ شَا، مَاشَا نغْ مَارَّا، زڭْ ورْيَازْ أَڒْ ثمْغَارْثْ، زڭْ ؤُحنْجِيرْ أَڒْ أَسيْمِي، زڭْ ؤُفُونَاسْ أَڒْ ؤُدْجِي، زڭْ وڒْغمْ أَڒْ أَغْيُوڒْ!‘ “ 4 إِڒَاغَا-د شَاوُولْ خْ ڒْڭنْسْ. إِسدّْ إِ-ثنْ ذِي طَالَايِيمْ. ثُوغَا-ثنْ ذِي مِيثَاينْ-أَڒفْ ن يرْيَازنْ خْ إِضَارنْ ذ ثنْعَاشْ أَڒفْ ن يرْيَازنْ ن يَاهُوذَا. 5 ؤُمِي يِيوضْ شَاوُولْ غَارْ ثنْذِينْثْ ن عَامَالِيقْ، إِڭَّا إِشْثْ ن ثخْشفْثْ ذِي ثغْزُورْثْ 6 ؤُشَا نتَّا إِجَّا أَذْ إِنِينْ إِ أَيْثْ ن إِقِينِييّنْ: ”فّْغمْ، بعّْذمْ، سمْحمْ ذِي ڒْوسْثْ ن عَامَالِيقْ، حِيمَا نشّْ وَارْ كنِّيوْ تّحِّيغْ أَكِيذْسنْ، مَاغَارْ كنِّيوْ ثڭِّيمْ س ثْمخْسِيوْثْ إِشوَّارنْ أَكْ-ذ أَيْثْ ن إِسْرَائِيل ؤُمِي د-فّْغنْ زِي مِيصْرَا.“ خَاسْ ؤُشَا فّْغنْ إِقِينِييّنْ زِي ڒْوسْثْ ن إِعَامَالِيقِييّنْ. ▪ 7 خنِّي إِغْڒبْ شَاوُولْ خْ إِعَامَالِيقِييّنْ زِي حَاوِيلَا أَڒْ شُورْ إِ إِدْجَانْ أَرنْذَاذْ ن مِيصْرَا. 8 أَجَاجْ، أَجدْجِيذْ ن عَامَالِيقْ، إِطّفْ إِ-ث إِدَّارْ، مَاشَا مَارَّا ڒْڭنْسْ إِحَارّمْ إِ-ثنْ إِ ؤُثحِّي س ڒقْضعْ ن سِّيفْ. ▪ 9 مَاشَا شَاوُولْ ذ ڒْڭنْسْ حَاوْڒنْ خْ أَجَاجْ ؤُڒَا خْ ڒمْخيّرْ ن وُودْجِي ذ إِفُونَاسنْ ذ ثْفُونَاسِينْ ؤُ خْ مِينْ إِدْجَانْ إِصبْحنْ أَوَارْنِي أَسْ ؤُ مَارَّا إِزْمَارنْ ذَايْسنْ ثَاذُونْثْ ذ مَارَّا مِينْ ثُوغَا ذ أَصبْحَانْ قَاعْ. وَارْ خْسنْ أَذْ ثنْ حَارّْمنْ إِ ؤُثحِّي، مَاشَا مَارَّا مِينْ إِدْجَانْ ذْرُوسْ ذ مِينْ إِضعْفنْ، حَارّْمنْ ث إِ ؤُثحِّي.
10 خنِّي يُوسَا-د وَاوَاڒْ ن سِيذِي غَارْ شَامْوِيلْ، إِنَّا:
11 ”نشّْ نذْمغْ، أَقَا ڭِّيغْ شَاوُولْ ذ أَجدْجِيذْ، مَاغَارْ نتَّا إِحيّذْ زِي ضفَّارْ إِنُو ؤُ وَارْ إِسّقْفڒْ أَوَاڒنْ إِنُو.“ إِفُّوڭمْ شَامْوِيلْ ؤُشَا إِسْغُويّْ ثَامذِّيثْ ثْمُونْ غَارْ سِيذِي.
12 ثِيوشَّا نّسْ زِيشْ إِكَّارْ شَامْوِيلْ، يُويُورْ أَذْ إِڒْقَا شَاوُولْ. إِتّْوَانَّا أَسْ إِ شَامْوِيلْ، نَّانْ: ”شَاوُولْ يُوسَا-د غَارْ كَارْمِيلْ ؤُ إِسّْبدّْ ذِينِّي إِجّْ ن ؤُقلِّيجْ ن ڒِيذَارثْ إِ يِيخفْ نّسْ، خنِّي إِعْذُو، إِهْوَا غَارْ جِيلْجَالْ.“
13 يُوسَا-د شَامْوِيلْ غَارْ شَاوُولْ ؤُ شَاوُولْ إِنَّا أَسْ: ”أَقَا شكْ ثتّْوَابَارْكذْ زِي سِيذِي! نشّْ سّْقفْڒغْ أَوَاڒْ ن سِيذِي.“
14 خنِّي يَارَّا-د خَاسْ شَامْوِيلْ: ”ذ مِينْ إِخْسْ أَذْ يِينِي ڒْحسّْ-أَ ن وُودْجِي إِ ذ أَيِي إِتَّاذْفنْ ذڭْ إِمزُّوغنْ إِنُو ذ ڒْحسّْ ن إِفُونَاسنْ ذ ثْفُونَاسِينْ إِ تّسْڒِيغْ؟“
15 شَاوُولْ إِنَّا: ”أَوْينْ ثنْ-د أَكِيذْسنْ زِي عَامَالِيقْ مِينْزِي ڒْڭنْسْ إِحَاوڒْ خْ مُومُّو ن وُودْجِي ؤُ ن إِفُونَاسنْ ذ ثْفُونَاسِينْ حِيمَا أَذْ ثنْ قدّْمنْ ذ ثَاغَارْصْثْ إِ سِيذِي، أَربِّي نّكْ. مِينْ إِقِّيمنْ نْحَارّمْ إِ-ث إِ ؤُثحِّي.“
16 خنِّي إِنَّا شَامْوِيلْ إِ شَاوُولْ: ”شْفَا! نشّْ أَذْ شكْ إِنِيغْ مِينْ إِ ذ أَيِي إِنَّا سِيذِي ذِي دْجِيڒثْ-أَ.“ إِنَّا أَسْ شَاوُولْ: ”سِيوڒْ!“
17 ؤُشَا إِنَّا شَامْوِيلْ: ”ؤُمِي ثدْجِيذْ عَاذْ ذ أَمژْيَانْ ذِي ثِيطَّاوِينْ نّكْ، مَا وَارْ ثْذوْڒذْ شَا ذ أَزدْجِيفْ ن ثْقبَّاڒْ ن إِسْرَائِيل، ؤُ مَا وَارْ شكْ إِذْهنْ سِيذِي أَذْ ثْذوْڒذْ ذ أَجدْجِيذْ خْ إِسْرَائِيل؟
18 سِيذِي إِسّكّْ إِ شكْ غَارْ وبْرِيذْ، إِنَّا: ”ؤُيُورْ، حَارّمْ إِمذْنَابْ نِّي، إِعَامَالِيقِييّنْ، إِ ؤُثحِّي ؤُ مْنغْ أَكِيذْسنْ غَارسْ أَڒْ ثنْ غَا ثقْضِيذْ قَاعْ.
19 مَايمِّي وَارْ ثسْڒِيذْ شَا غَارْ ثْمِيجَّا ن سِيذِي ؤُشَا ثوْضِيضْ شكْ خْ ثْكشَّاضْثْ ؤُ ثڭِّيذْ مِينْ إِدْجَانْ ذ ڒْغَارْ ذِي ثِيطَّاوِينْ ن سِيذِي؟“
20 خنِّي إِنَّا شَاوُولْ إِ شَامْوِيلْ: ”نشّْ سْڒِيغْ مَاشَا غَارْ ثْمِيجَّا ن سِيذِي ؤُ نشّْ كّغْ أَبْرِيذْ إِ خْ إِ ذ أَيِي د-إِسّكّْ سِيذِي. نشّْ إِوْيغْ-د ذَانِيثَا أَجَاجْ، أَجدْجِيذْ ن عَامَالِيقْ ؤُشَا إِعَامَالِيقِييّنْ حَارّْمغْ ثنْ إِ ؤُثحِّي. 21 ڒْڭنْسْ إِكْسِي ؤُدْجِي ذ إِفُونَاسنْ ذ ثْفُونَاسِينْ زِي ثْكشَّاضْثْ، مُومُّو ن مِينْ إِتّْوَاحَارّْمنْ إِ ؤُثحِّي، حِيمَا أَذْ قدّْمنْ أَيَا إِ سِيذِي، أَربِّي نّكْ، ذِي جِيلْجَالْ.“ 22 مَاشَا شَامْوِيلْ إِنَّا: ”مَا ثعْجبْ أَسْ إِ سِيذِي ثِيغَارْصَا ن وشْمَاضْ ذ ثِيغَارْصَا كْثَارْ زڭْ ؤُسدْجِي إِ ثْمِيجَّا ن سِيذِي؟ خْزَارْ أَسدْجِي حْسنْ زِي ثْغَارْصْثْ ؤُ أَسْحسِّي س ثَايْنِيثْ حْسنْ زِي ثَاذُونْثْ ن إِشَارِّييّنْ. ▪ 23 مِينْزِي أَغوّغْ أَقَا-ث ذ دّنْبْ ن ؤُعزّمْ ؤُ ثَاغنَّانْثْ أَقَا-ت ذ أَعْبَاذْ نْ صَّانَامْ ؤُ أَمْ ؤُوقَّارْ ن ڒخْيَاڒَاثْ إِمژْيَاننْ ن صَّانَامْ. مِينْزِي شكْ ثنْضَارذْ أَوَاڒْ ن سِيذِي، إِنْضَارْ نتَّا إِ شكْ أَمْ ؤُجدْجِيذْ.“
24 خنِّي إِنَّا شَاوُولْ إِ شَامْوِيلْ: ”نشّْ خْضِيغْ، مَاغَارْ نشّْ تّْعذِّيغْ خْ ڒُومُورْ إِ د-إِفّْغنْ زڭْ ؤُقمُّومْ ن سِيذِي ؤُ خْ وَاوَاڒنْ نّكْ، مِينْزِي نشّْ ڭّْوذغْ زِي ڒْڭنْسْ ؤُ سْڒِيغْ غَارْسنْ. ▫ 25 س ؤُينِّي، غْفَارْ أَيِي دّنْبْ إِنُو ؤُ ذْوڒْ أَكِيذِي، خنِّي أَذْ سجْذغْ إِ سِيذِي.“ 26 مَاشَا شَامْوِيلْ يَارَّا-د خْ شَاوُولْ: ”نشّْ وَارْ كِيذكْ ذِيكّْوِيڒغْ شَا، مَاغَارْ شكْ ثنْضَارذْ أَوَاڒْ ن سِيذِي ؤُ سِيذِي إِنْضَارْ إِ شكْ أَمْ ؤُجدْجِيذْ خْ إِسْرَائِيل.“
27 ؤُمِي شَامْوِيلْ إِنّقْڒبْ حِيمَا أَذْ يُويُورْ، إِشبَّارْ أَسْ نتَّا ذِي ثْمَا ن ؤُسڒْهَامْ نّسْ، مَاشَا وَانِيثَا إِشَارّڭْ. 28 خنِّي إِنَّا أَسْ شَامْوِيلْ: ”ذڭْ وَاسّْ-أَ إِشَارّڭْ أَشْ سِيذِي ثَاڭلْذَا ن إِسْرَائِيل ؤُ إِوْشَا إِ-ت إِ ؤُمْقَارّبْ نّكْ ونِّي إِدْجَانْ حْسنْ زَّايكْ.▫ 29 ؤُڒَا لْعَاضِيمْ ن إِسْرَائِيل ن ڒبْذَا وَارْ إِسّْخَارِّيقْ شَا ؤُ وَارْ إِنْذِيمْ، مَاغَارْ نتَّا وَارْ إِدْجِي ذ بْنَاذمْ أَڒَامِي إِ غَا إِنْذمْ.“ ▪ 30 خَاسْ ؤُشَا إِنَّا أَسْ: ”نشّْ خْضِيغْ. أوْشْ أَيِي مَاشَا أَوقَّارْ زَّاثْ إِ إِمْغَارنْ ن ڒْڭنْسْ ؤُ زَّاثْ إِ إِسْرَائِيل ؤُ ذْوڒْ أَكِيذِي، خنِّي أَذْ سجْذغْ إِ سِيذِي، أَربِّي نّكْ.“ 31 ؤُشَا إِذْوڒْ شَامْوِيلْ، يَاردّفْ شَاوُولْ ؤُ شَاوُولْ إِسْجذْ إِ سِيذِي.
32 خَاسْ ؤُشَا إِنَّا شَامْوِيلْ: ”أَوِي-د غَارِي أَجَاجْ، أَجدْجِيذْ ن عَامَالِيقْ. أَجَاجْ يُويُورْ غَارسْ س أَرَّاثُوحْ ؤُ إِنَّا أَجَاجْ أَكْ-ذ إِخفْ نّسْ: ”س ثِيذتّْ، ثَارْزُوڭِي ن ڒْموْثْ ثتّْوَاحيّذْ خَافِي.“ 33 مَاشَا شَامْوِيلْ إِنَّا: ”أَمْ مَامّشْ إِسّْحَارّمْ سِّيفْ نّكْ ثِيمْغَارِينْ خْ إِحنْجِيرنْ نْسنْثْ، أَمُّو إِ غَا ثتّْوَاحَارّمْ يمَّاشْ جَارْ ثِيمْغَارِينْ خْ ثَارْوَا نّسْ.“ ؤُ شَامْوِيلْ إِقطّسْ أَجَاجْ ذ إِشدْجِيقنْ زَّاثْ إِ وُوذمْ ن سِيذِي ذِي جِيلْجَالْ. 34 خنِّي يُويُورْ شَامْوِيلْ غَارْ رَامَا ذ شَاوُولْ إِڭعّذْ غَارْ ثَادَّارْثْ نّسْ ذِي جِيبْعَا ن شَاوُولْ. 35 شَامْوِيلْ وَارْ إِژْرِي عَاذْ شَاوُولْ غَارسْ أَڒْ أَسّْ ن ڒْموْثْ نّسْ، مَاشَا شَامْوِيلْ إِشْضنْ خْ شَاوُولْ. ؤُشَا إِنْذمْ سِيذِي ڒَامِي إِڭَّا شَاوُولْ ذ أَجدْجِيذْ خْ إِسْرَائِيل.