17
1 ثَاقدُّوحْثْ إِ ثقْبِيتْشْ ن مَانَاسَّا، مِينْزِي نتَّا ثُوغَا ذ أَمنْزُو ن يُوسُوفْ، ثكَّارْ أَسْ-د إِ مَاكِيرْ، أَمنْزُو ن مَانَاسَّا، بَابَاسْ ن ثمُّورْثْ ن جِيلْعَاذْ، جِيلْعَاذْ ذ بَاشَانْ، مَاغَارْ نتَّا ثُوغَا ذ إِجّْ ن ؤُعسْكَارِي إِمحْضنْ. ▪ 2 خْ ؤُيَا ثكَّارْ أَسنْ-د ثْقدُّوحْثْ إِ أَيْثْ نّغْنِي ن مَانَاسَّا، عْلَاحْسَابْ ڒَادْجَاثْ نْسنْ، إِ أَيْثْ ن أَبِيعَازَارْ ذ أَيْثْ ن حَالَاقْ ذ أَيْثْ ن أَسْرِييِيلْ ذ أَيْثْ ن شَاكَامْ ذ أَيْثْ ن حَافَارْ ذ أَيْثْ ن شَامِيذَاعْ. إِنَا ذ أَيْثْ ن مَانَاسَّا، مِّيسْ ن يُوسُوفْ، عْلَاحْسَابْ ڒَادْجَاثْ نْسنْ.
3 ؤُ زلُوحْفَاذْ، مِّيسْ ن حَافَارْ، مِّيسْ ن جِيلْعَاذْ، مِّيسْ ن مَاكِيرْ، مِّيسْ ن مَانَاسَّا، وَارْ غَارسْ ثُوغِي شَا إِحنْجِيرنْ، مَاشَا ثُوغَا غَارسْ يسِّيسْ. إِنَا ذ إِسْمَاونْ ن يسِّيسْ: مَاحْلَا ذ نُوعَا، حُوجْلَا، مِيلْكَا ذ ثِيرْصَا. ▪ 4 نِيثنْثِي قَارّْبنْثْ-إِ-د زَّاثْ إِ وُوذمْ ن ؤُكهَّانْ أَلِيعَازَارْ ؤُ زَّاثْ إِ وُوذمْ ن يَاشُووَا، مِّيسْ ن نُونْ، ؤُ زَّاثْ إِ وُوذمْ ن إِزدْجِيفنْ، نَّانْثْ: ”سِيذِي يُومُورْ مُوسَا، أَذْ أَنغْ إِوْشْ ثَاسْغَارْثْ جَارْ أَيْثْمَاثْنغْ.“ ؤُشَا إِوْشَا أَسنْثْ، عْلَاحْسَابْ ڒُومُورْ ن سِيذِي، إِشْثْ ن ثَاسْغَارْثْ جَارْ وَاوْمَاثنْ ن بَابَاثْسنْثْ. ▪
5 أَمُّو إِ إِوْضَانْ إِفِيڒَانْ ن ڒعْبَارْ عشْرَا ن ثْوَاڒَاوِينْ إِ مَانَاسَّا، بْڒَا ثَامُّورْثْ ن جِيلْعَاذْ ذ بَاشَانْ إِ إِدْجَانْ أَغِيرِينْ ن لْ'ؤُرْذُونْ، 6 مَاغَارْ يسِّيسْ ن مَانَاسَّا طّْفنْثْ ثَاسْغَارْثْ ذِي ڒْوسْثْ ن وَارَّاونْ نّسْ ؤُ ثَامُّورْثْ ن جِيلْعَاذْ ثُوغَا إِ وَارَّاونْ ن مَانَاسَّا إِ إِقِّيمنْ.
7 أَيْمِيرْ ن مَانَاسَّا إِتّفّغْ زِي أَشِيرْ إِعدُّو غَارْ مِيكْمَاثَاثْ إِ إِدْجَانْ أَجمَّاضْ إِ شَاكِيمْ ؤُ أَيْمِيرْ إِتّفّغْ غَارْ ؤُفُوسِي غَارْ إِمزْذَاغْ ن عَايْنْ-ثَافُّوحْ. 8 مَانَاسَّا وَاخَّا غَارسْ ثَامُّورْثْ ن ثَافُّوحْ، مَاشَا ثَافُّوحْ سِيمَانْثْ نّسْ نِّي إِدْجَانْ خْ ويْمِيرْ أَكْ-ذ مَانَاسَّا، ثُوغَا إِ أَيْثْ ن إِفْرَايِيمْ. 9 خنِّي إِهكّْوَا ويْمِيرْ غَارْ ثغْزَارْثْ ن قَانَا غَارْ لْجَانُوبْ ن ثغْزَارْثْ. ثِيندَّامْ ن إِفْرَايِيمْ أَقَا ذِينْ جَارْ ثْندَّامْ ن مَانَاسَّا. ثَامُّورْثْ ن مَانَاسَّا ثدْجْ غَارْ ثْمَا ن شَّامَالْ ن إِغْزَارْ ؤُشَا طّْرُوفَا نّسْ تَّاكّْوَاضنْ أَڒْ ڒبْحَارْ.
10 لْجَانُوبْ أَقَا ن إِفْرَايِيمْ، شَّامَالْ أَقَا ن مَانَاسَّا ؤُ ڒبْحَارْ ذ أَيْمِيرْ نّسْ. ذِي شَّامَالْ تّنْحَاذَانْ خْ أَشِيرْ ؤُ ذِي شَّارْقْ خْ إِسَّاكَارْ.
11 ذِي إِسَّاكَارْ ؤُ ذِي أَشِيرْ ذوْڒنْ إِنَا غَارْ مَانَاسَّا: بَايْثْ-شَانْ أَكْ-ذ ثْندَّامْ إِ غَارسْ د-إِقّْننْ ؤُ يَابْلَاعَامْ أَكْ-ذ ثْندَّامْ نّسْ ذ إِمزْذَاغْ ن ذُورْ أَكْ-ذ ثْندَّامْ نّسْ ذ إِمزْذَاغْ ن عَايْنْ-ذُورْ أَكْ-ذ ثْندَّامْ نّسْ ذ إِمزْذَاغْ ن ثَاعْنَاكْ أَكْ-ذ ثْندَّامْ نّسْ ذ إِمزْذَاغْ ن مَاجِيدُّو أَكْ-ذ ثْندَّامْ نّسْ، ثْڒَاثَا ن ثْرقِّيعِينْ ؤُيْڒنْثْ.
12 أَيْثْ ن مَانَاسَّا وَارْ زمَّارنْ أَذْ طّْفنْ ثِيندَّامْ-أَ أَمْ ثسْغَارْثْ ن ڒْوَارْثْ، مِينْزِي إِكنْعَانِييّنْ ڭِّينْ أَذْ قِّيمنْ زدّْغنْ ذِي ثمُّورْثْ. ▪
13 ؤُمِي أَيْثْ ن إِسْرَائِيل ثُوغَا ذوْڒنْ جهْذنْ، ڭِّينْ نِيثْنِي لْجِيزْيَا خْ إِكنْعَانِييّنْ، مَاشَا وَارْ خَاسنْ ؤُژّْڒنْ قَاعْ.
14 سِّيوْڒنْ أَيْثْ ن يُوسُوفْ أَكْ-ذ يَاشُووَا، نَّانْ: ”مَايمِّي إِ ذ أَيِي ثوْشِيذْ ذ ثَاسْغَارْثْ مْغِيرْ إِشْثْ ن ثْقدُّوحْثْ ذ يِيجّْ ن ؤُفِيڒُو ن ڒعْبَارْ ، وَاخَّا نشّْ ذ إِجّْ ن ڒْڭنْسْ ذ أَمقّْرَانْ، أَوَارْنِي إِ ؤُمِي ذ أَيِي إِڭَّا سِيذِي لْبَارَاكَا أَمُّو؟“
15 يَاشُووَا إِنَّا أَسنْ: ”مَاڒَا شكْ خنِّي ذ إِجّْ ن ڒْڭنْسْ أَمقّْسَانْ، ڭعّذْ خنِّي غَارْ وزْغَارْ ؤُشَا زْذمْ ذِينِّي تَّاسِيعْ إِ يِيخفْ نّكْ ذِي ثمُّورْثْ ن إِفِيرِيزِييّنْ ذ إِرَافَاوِييّنْ، مَاڒَا حْصَارنْ خَاكْ إِذُورَارْ ن إِفْرَايِيمْ.“ ▫
16 خنِّي نَّانْ أَيْثْ ن يُوسُوفْ: ”إِذُورَارْ نِّي وَارْ ذ أَنغْ تّْقِيذِّينْ. مَارَّا إِكنْعَانِييّنْ نِّي إِزدّْغنْ ذِي ثمُّورْثْ ن ڒوْضَا ن ثغْزُورْثْ غَارْسنْ إِكَارُّوثنْ ن ؤُمنْغِي ن وُوزَّاڒْ، أَمْ إِنِّي إِزدّْغنْ ذِي بَايْثْ-شَانْ أَكْ-ذ ثْندَّامْ إِ غَارسْ د-إِقّْننْ ؤُ أَمْ إِنِّي ذِي ڒوْضَا ن ثغْزُورْثْ ن يَازْرَاعِيلْ.“
17 إِسِّيوڒْ يَاشُووَا أَكْ-ذ ثَادَّارْثْ ن يُوسُوفْ، أَكْ-ذ إِفْرَايِيمْ ذ مَانَاسَّا، إِنَّا: ”كنِّيوْ ذ إِجّْ ن ڒْڭنْسْ ذ أَمقّْرَانْ ؤُ غَارْومْ جّهْذْ أَمقّْرَانْ. كنِّيوْ وَارْ إِدْجِي ثطّْفمْ مْغِيرْ إِشْثْ ن ثْقدُّوحْثْ،
18 مَاغَارْ ؤُڒَا ذ إِذُورَارْ أَذْ إِڒِينْ نْومْ ؤُشَا ؤُمِي ثدْجْ ذ أَزْغَارْ، إِتّْخصَّا أَذْ ثْزذْممْ ؤُشَا طّْرُوفَا نّسْ أَذْ إِڒِينْ إِ كنِّيوْ، مَاغَارْ أَذْ ثَاژّْڒمْ خْ إِكنْعَانِييّنْ زِي ثسْغَارْثْ نْسنْ، وَاخَّا غَارْسنْ إِكَارُّوثنْ ن ؤُمنْغِي ن وُوزَّاڒْ ؤُ وَاخَّا نِيثْنِي جهْذنْ.“