‏1 ”خْمِي سِيذِي، أَربِّي نّكْ، إِ غَا إِثحَّا ڒڭْنُوسْ إِ زَّايْسنْ إِ ذ أَشْ غَا إِوْشْ، سِيذِي، أَربِّي نّكْ، ثَامُّورْثْ ؤُشَا خنِّي أَذْ ثكْسِيذْ ڒْوَارْثْ نْسنْ ؤُشَا أَذْ ثْزذْغذْ ذِي ثْندَّامْ نْسنْ ؤُ ذِي ثُوذْرِينْ نْسنْ، ‏2 خنِّي إِتّْخصَّا شكْ أَذْ ثْحُوزذْ إِ يِيخفْ نّكْ ثْڒَاثَا ن ثْندَّامْ ذِي ڒْوسْثْ ن ثمُّورْثْ إِ ذ أَشْ غَا إِوْشْ سِيذِي، أَربِّي نّكْ، مَاحنْذْ أَذْ ت ثكْسِيذْ ذ ڒْوَارْثْ. ^▪   ‏3 أَذْ ثْعذْڒذْ إِجّْ ن وبْرِيذْ ؤُشَا ثَامُّورْثْ، ثنِّي إِ ذ أَشْ غَا إِوْشْ سِيذِي، أَربِّي نّكْ، ذ ڒْوَارْثْ، أَذْ ت ثبْضِيذْ خْ ثْڒَاثَا ن ثْسقَّارْ. مَانْ أَيَا حِيمَا كُوڒْ أَقتَّاڒْ إِزمَّارْ أَذْ ذِينْ يَارْوڒْ.

‏4 ذ وَا ذ أَمْثَاوِي إِ زِي إِعدّڒْ إِ ؤُقتَّاڒْ مَاحنْذْ أَذْ ذِينْ يَارْوڒْ، حِيمَا أَذْ إِقِّيمْ إِدَّارْ: مَاڒَا إِنْغَا أَمْقَارّبْ نّسْ بْڒَا مَا أَذْ أَسْ إِڭّْ ڒحْسَابْ ؤُ ثُوغَا وَارْ ث إِشَارّهْ شَا إِضنَّاضْ ذ فَارِيضنَّاضْ. ^▫  ▪  

‏5 ونِّي إِرُوحنْ أَكْ-ذ ؤُمْقَارّبْ نّسْ غَارْ وزْغَارْ حِيمَا أَذْ إِقسّْ أَكشُّوضْ ؤُشَا إِسْوِيژّضْ أَفُوسْ نّسْ س شَّاقُورْ حِيمَا أَذْ إِحَارْوشْ أَكشُّوضْ ؤُشَا خنِّي إِفّغْ أَسْ وُوزَّاڒْ ن شَّاقُورْ ؤُشَا إِڒْقفْ أَمْقَارّبْ نّسْ ؤُشَا وَانِيثَا إِمُّوثْ، أَقَا وَانِيثَا إِزمَّارْ أَذْ يَارْوڒْ غَارْ إِشْثنْ زِي ن ثْندَّامْ-أَ مَاحنْذْ أَذْ إِقِّيمْ إِدَّارْ، ^▫   ‏6 حِيمَا وَارْ إِتِّيڒِي ؤُنقَّامْ ن إِذَامّنْ أَذْ إِضْفَارْ أَقتَّاڒْ، خْمِي إِ غَا إِغڒْغڒْ وُوڒْ نّسْ ؤُشَا أَذْ خَاسْ إِحَارْثْ مَاڒَا أَبْرِيذْ ذ أَزِيرَارْ ؤُشَا أَذْ ث إِنغْ أَمْ وَارْ خَاسْ إِدْجِي ڒحْكَامْ س ڒْموْثْ، مِينْزِي ثُوغَا وَارْ ث إِشَارْهْ، وَارْ إِدْجِي زڭْ إِضنَّاضْ ؤُڒَا زِي فَارِيضنَّاضْ. ‏7 س ؤُيَا نشّْ ؤُمُورغْ شكْ، قَّارغْ: ’حُوزْ ثْڒَاثَا ن ثْندَّامْ إِ يِيخفْ نّكْ.‘

‏8 ؤُشَا مَاڒَا سِيذِي، أَربِّي نّكْ أَذْ إِوسّعْ ثَامُّورْثْ نّكْ، أَمْ مَامّشْ إِجِّيدْجْ إِ إِبَابَاثنْ نّكْ، ؤُ أَذْ أَشْ إِوْشْ مَارَّا ثَامُّورْثْ نِّي إِوَاعذْ أَذْ ت إِوْشْ إِ إِبَابَاثنْ نّكْ، ^▪   ‏9 - مَاڒَا أَذْ ثحْضِيذْ مَارَّا ثَاوْصيّثْ-أَ مَاحنْذْ أَذْ ت ثڭّذْ أَمْ مَامّشْ ذ أَشْ ؤُمُورغْ أَسّْ-أَ حِيمَا أَذْ ثخْسذْ سِيذِي، أَربِّي نّكْ، ؤُشَا أَذْ ثُويُورذْ ذڭْ إِبْرِيذنْ نّسْ مَارَّا ؤُسَّانْ - ، خنِّي أَذْ ثَارْنِيذْ عَاذْ ثْڒَاثَا ن ثْندَّامْ غَارْ ثْڒَاثَا-يَا، ^▪  

‏10 حِيمَا وَارْ تّْوَاسِيزّْڒنْ إِذَامّنْ إِمزْذَاڭنْ ذِي ڒْوسْثْ ن ثمُّورْثْ نّكْ ثنِّي ذ أَشْ إِ غَا إِوْشْ سِيذِي، أَربِّي، ذ ڒْوَارْثْ ؤُشَا أَذْ خَاكْ إِڒِينْ إِذَامّنْ.

‏11 مَاشَا مَاڒَا شَا ن ورْيَازْ إِشَارْهْ أَمْقَارّبْ نّسْ ؤُشَا إِقَابڒْ إِ-ث ؤُشَا إِكَّارْ غَارسْ ؤُ خنِّي إِڭَّا أَسْ إِشْثْ ن ثشْثِي ؤُشَا إِمُّوثْ، خنِّي يَارْوڒْ غَارْ إِشْثنْ زِي ثْندَّامْ نِّي، ^▪  

‏12 خنِّي أَذْ سّكّنْ إِمْغَارنْ ن ثنْذِينْثْ نّسْ، أَذْ ث كْسِينْ ث زڭْ ومْشَانْ نِّي، أَذْ ث ڭّنْ ذڭْ إِفَاسّنْ ن ؤُنقَّامْ ن إِذَامّنْ ؤُشَا أَذْ إِمّثْ.

‏13 وَارْ ذ أَشْ إِزِّيدْجِيزْ، مَاشَا أَذْ ثمْحِيذْ زِي إِسْرَائِيل إِذَامّنْ ن ونِّي وَارْ إِڭِّينْ دّنْبْ حِيمَا أَذْ ثِيڒِيذْ مْلِيحْ.

‏14 وَارْ سْمُوطِّييْ أَيْمِيرْ ن ؤُمْقَارّبْ نّكْ نِّي نيّْشنْ ڒجْذُوذْ ذِي ثسْغَارْثْ نّكْ نِّي إِ غَا ثْوَارْثذْ ذِي ثمُّورْثْ إِ ذ أَشْ غَا إِوْشْ سِيذِي، أَربِّي نّكْ، حِيمَا أَذْ ت ثطّْفذْ. ^▪  

‏15 إِجّْ ن ؤُشهَّاذْ وَاهَا وَارْ إِزمَّارْ أَذْ إِكَّارْ ذ أَشهَّاذْ خْ شَا ن ورْيَازْ ذِي سِّيبّثْ ن شَا ن ڒْمُوعْصِييّثْ نِيغْ ذِي شَا ن نْ دّنْبْ نِّي إِزمَّارْ أَذْ إِتّْوَاڭّْ. خْ وَاوَاڒْ زڭْ ؤُقمُّومْ ن ثْنَاينْ نِيغْ خْ وَاوَاڒْ زڭْ ؤُقمُّومْ ن طْرَاثَا ن ڒشْهُوذْ أَذْ ثتّْوَاضْمنْ ثْمسْڒَاشْثْ. ^▪  

‏16 خْمِي إِ غَا إِكَّارْ إِجّْ ن ؤُشهَّاذْ أَقْطَاطْعِييْ خْ شَا ن ورْيَازْ حِيمَا أَذْ زَّايسْ إِشثْشَا خْ شَا ن دّنْبْ،

‏17 خنِّي أَذْ بدّنْ ثْنَاينْ ن يرْيَازنْ إِنِّي إِتّمّْشُوبُّوشنْ زَّاثْ إِ وُوذمْ ن سِيذِي، زَّاثْ إِ وُوذمْ ن إِكهَّاننْ ذ ڒْقُوضَاثْ نِّي إِ ذِينْ إِ غَا يِيڒِينْ ذڭْ وُوسَّانْ نِّي.

‏18 ؤُشَا ڒْقُوضَاثْ أَذْ أَرْزُونْ مْلِيهْ ذِي ثْمسْڒَاشْثْ، ؤُ أَقَا، مَاڒَا أَشهَّاذْ ذ إِجّْ ن ؤُشهَّاذْ بُو-إِخَارِّيقنْ، أَذْ إِشْهذْ س ڒْبَاطڒْ خْ ؤُمَاسْ،

‏19 خنِّي أَذْ زَّايسْ ثڭّمْ أَمْ مَامّشْ ثُوغَا إِتّْخَارّصْ أَذْ إِڭّْ نتَّا س ؤُمَاسْ. أَمُّو إِ غَا ثكّْسذْ ڒْغَارْ زِي ڒْوسْثْ نّكْ، ^▪   ‏20 حِيمَا إِنِّي إِقِّيمنْ أَذْ سْڒنْ، أَذْ ڭّْوذنْ، وَارْ ذِيكّْوِيرنْ أَذْ ڭّنْ ڒْحَاجّثْ ثَاعفَّانْثْ ذِي ڒْوسْثْ نّكْ. ‏21 وَارْ ذ أَشْ إِزِّيدْجِيزْ: ڒعْمَارْ س ڒعْمَارْ، ثِيطّْ س ثِيطّْ، ثِيغْمسْثْ س ثغْمسْثْ، أَفُوسْ س ؤُفُوسْ، أَضَارْ س ؤُضَارْ.“ ^▪